— Ĩsiwadi, we aimorĩ ãwa, ãme asãmra da.

Tahawa ma tô itẽme mo. Itẽme morĩ wamhã, ma tô i'rata nhamra.

2 Tawamhã Boaz ma tô aibâ norĩ zô tihârâ za'ra, 10 na 'ri nho'õmo 're, dama pire na 're ihâimana za'ra mono norĩ zô. Taha pari, te tãma nharĩ za'ra:

— Ãme asimroi wa'aba.

Tame ma tô asimro. 3 Si'ubumroi wamhã, Boaz ma tô tisisãnawã siwadi ma tinha, ãne:

— Noẽmi apâ ma tô wei wi, Moabi na ti'ai wa'õtõ nho'õmo nhisi hawi. Ta hã ti'a hã te te wede da, te sima wẽ, wasisãnawã siwadi nhipti'a hã, Elimelequihi te hã aré. 4 Tahawa, wa hã wa tô ĩsima rowairébé, te ãma aima robzanhamri da, ti'a na hã. Tahawa, ãhã na a hã asima wẽ wamhã, te za i'uipra ti'a hã, wasiré a'uwẽ norĩ ma ipire norĩ nho'a, duré ã hã aibâ norĩ isi'ubumro norĩ nho'a. Duré asima wẽ õ wamhã, te za ĩnha. Ti'a hã uipra da wamhã, imorĩ'rata na te za i'uipra, ĩwana. E marĩ wa. Itede'wa hã asisãnawã siwadi uptabi wa, aré. Duré asima wẽ õ wamhã, i'uipra da hã, wa hã asa'u wa za niha hã ĩsima waihu'u, ti'a na hã.

Tawamhã aibâ ma tô timreme na ãma wa'rã, ãne:

— Wa za uipra tô, ti'a hã.

5 Tahawa Boaz hã te duré tãma tinha, ãne:

— Noẽmihi te ti'a hã uipra wamhã, Rutihi ãma te za aimro za, moabita norĩ sipi'õi mrotõ ãma, ti'a hã idâ'â sisãnawã norĩ ma, 're hâimana u'âsi mono da, õne haré.

6 Tawamhã aibâ ma ãma sada'â, ãne:

— Tane wamhã, te ĩsima wẽ õ di za, ti'a te i'uipra da hã, wa hã idâ'â sisãnawã siwadi uptabi nherẽ. E marĩ wa. Ĩ'ra norĩ hã ĩ'uirĩ na te te siwi âri õ wa za, ti'a hã. Tahawa, aiwétési te za ĩ'upana niha hã asima iwaihu, ti'a na hã. Te ĩsima wẽ õ di, te i'manharĩ da hã. 7-8 Aiwétési te za ti'a hã i'uipra.

Tame aibâ ma tô tipara'uza waze, ihâiba amo hã. Te te wazere wamhã, ma tô oto tãma tisõ, Boazihi ma. (Duréihã Izaraéu nhihudu norĩ hã ti'a hã te te sima 're i'uipra za'ra mono zéb da, te te siwi 're sitob za'ra mono da wamhã, ma tô tipara'uza hã te te 're sani za'ra, roptede'wai hâiba amoi ma, te te tãma 're sõmri za'ra mono da, ti'ai wede nhitobzé 'rãsutuzéb da hã. Niha wamhã, ti'a hã taré te te siwi ãma 're isaprĩ za'ra mono zéb da, te te siwi 're sitob za'ra mono da wamhã, õne si ma tô te te sima 're 'manharĩ za'ra.)

9 Tame ma tô Boaz uburé norĩ ma tinha, dama ipire norĩ ma zama, ãne:

— Ãhã na hã a norĩ wa'wa ma tô atõmo na ĩ'madâ'â za'ra wa'wa, Noẽmihi wi, ti'a te i'uipra na hã, Elimelequihi te aré, duré aré i'ra norĩ te hã, Quiri'õ norĩ te hã Marõhõ me. 10 Rutihi ãma wa za duré ĩmro, moabita norĩ sipi'õi mrotõ ãma, Marõ hã sipara te te irẽme ãma. Ti'a hã idâ'â sisãnawã siwadi norĩ ma, 're hâimana u'âsi mono da, wa za ãma ĩmro, pi'õi ãma. Ãne wamhã, Marõhõ nhisi na te za ãhã 'remhã ãma 're dapo're pu'u u'âsi za'ra, duré ipotozéb 'reb zama 'ri nho'õmo 'remhã. Ãne na ma tô ã bâtâ na ĩ'madâ'â za'ra wa'wa.

11 Tahawa ma tô uburé ãma saze za'ra ni, ãne:

— Ĩhe, wa norĩ hã wa tô ai'madâ'â za'ra ni tô.

Tame dama ipire norĩ hã te duré tãma nharĩ za'ra, Boazihi ma hã:

— Wama wẽ za'ra di, Uburé Danhib'apito hã pi'õi ma, za ãma i'aimro ma hã te te ipisutu da hã 'ra ahâ da, Raqueu norĩ ne Léiaha me hã. Ta norĩ hã ma tô ti'ra ahâ zahuré, Zacoho ma. Taha zarina ma tô dana na 're hâimana zahuré, Izaraéu nhihudu norĩ ma hã. Wama wẽ za'ra di, asibro pese da hã, duré dama asa'rese za'ẽtẽ da, Belẽ-Efrata ãma hã. 12 Wa wasima wẽ za'ra ni, Uburé Danhib'apito ai'ra norĩ hã za te te aima isõmri 'wa hã 're hâimana wẽ za'ra mono da, Perizihi 'ra norĩ 're ihâimana za'ra mono ne. Periz hã Zuda norĩ 'ra, Tamaha me.

13 Tawamhã Boaz Ruti hã te oto saprõ 'ri tẽme, timro da. Taha pari sina sapa'a zahuré wamhã, ma tô Uburé Danhib'apito iwẽ na hã tãma tinhopru Rutihi ma, wasã da. Tame ma tô oto podo, i'ra hã. 14 Tawamhã ãne ma tô pi'õ norĩ hã Noẽmihi ma nharĩ za'ra:

— Uburé Danhib'apito ãma wawata za'ra wa'aba. E tihai wa. Ta hã asihudu da hã ã bâtâ na ma tô aima tisõ, te te 're i'ai'madâ'â mono da hã. Ã hã 'watébrémi hã niwamhã Izaraéu na darom nhisi ãma dama sa'rese za'ẽtẽ da, wama iwẽ za'ra hã. 15 Ta hã te te 're aipẽ'ẽ nomri u'âsi mono da, wama wẽ za'ra di, duré asi'ihi wa, te te 're i'ai'madâ'â mono da zama, wama iwẽ za'ra hã. Asani'wa hã 'watébrémi na te te 're asawi pese. Duré ta hã pire na te aima 're hâimana, 7 na 're ida'ra za'ra mono nhipai u.

16 Tawamhã Noẽmi hã ma tô oto sa'ra, tinhihudu si'watébrémi hã, tipa te te 'madâ'â da. 17 Tahawa pi'õ norĩ hã iwaptoma 're isi'ubumroi mono norĩ hã te te 'madâ'â za'ra wamhã, ma tô sima nharĩ za'ra:

— Noẽmihi ma, i'ra ma te 'maipodo.

Tawamhã Obedi na ma tô siwi sisi, ai'uté hã.

Ta hã Zéséhé mama da hã Obedi hã. Duré Zésé ta hã apito Davihi mama.

18-22 Davihi hi'rata norĩ hã Perizihi hawimhã ãne isisi za'ra hã: Periz hã Hesirõhõ mama, Hezirõ hã Rãhã mama, Rã hã Aminadabihi mama, Aminadabi hã Nasõhõ mama, Nasõ hã Samohõ mama, Samo hã Boazihi mama, Boaz hã Obedihi mama, Obedi hã Zéséhé mama, duré Zésé hã Davihi mama.