2 Tawamhã nimahã bâtâ na ma tô Ruti tãma tinha, Noẽmihi ma, ãne:

— E ĩma waprosi õ di za, ĩmorĩ da, daburu na amnho 'rã a'a ti'ai baba irere'e mono hã te 're awaibui mono da. Ãté ni'wa hã buru na romhuri'wa hã te za sima ĩwẽ, isarina te awaibui mono da amnho 'rã'a'a hã.

Tahawa, Noẽmi hã ma tô oto satõ, tisani'wa hã:

— Saihi, mo oto pé aimorĩ.

3 Tawamhã Ruti ma tô mo, daburu u amnho te te itehâri za'ra mono norĩ zarina, i'rã'a'a mono hã te te awaibui mono da. Tãma waihu'u õ nherẽ, ma tô ãzé Boazihi buru na da te 're irobzuri za'ra mono u hã, Elimelequihi sisãnawã buru u.

4 Tawamhã Boaz ma tô Rutihi ãma ronomro pesere õ ré, isãna're pesere wi, Belẽ hawimhã. Wisi wi, romhuri'wa norĩ ma, ma tô nharĩ za'ra, ãne:

— Uburé Danhib'apito hã asiré 're hâimana za'ra wa'aba mono da, wa hã wa tô ĩsima te 're wẽ.

— Uburé Danhib'apito hã rowẽ si te te aima 're pisutu mono da, wa wasima wẽ za'ra ni. — Ãne ma tô ãma tãma wa'rãmi za'ra, romhuri'wa norĩ hã.

5 Tahawa Boaz hã ma tô romhuri'wa norĩ 'madâ'â'wa hã sadanha, ãne:

— E 'wa hã õ hã, pi'õ ihâiba té hã.

6 Tame ma tô tãma wasu'u:

— Õ hã moabita norĩ nhipi'õ we imorĩ, Noẽmihi siré, Moabi hawi. 7 Ta hã ma tô ĩwi rowaptẽ, amnho tehâri'wa norĩ zarina, te te awaibui mono da, amnho 'rã'a'a hã. Ãne ma tô romhu, bâdâ 'rãiwatobro hawim haré ã bâtâ u hã. Awã zahâpâ wa'utu da wapsi, ma tô a'â sazâ, suru na.

8 Tawamhã Boaz ma tô Rutihi ma tinha, ãne:

— Pi'õ, ĩwapari, ãne. Buru na da te 're irobzuri za'ra mono hâiba amoi u hã 're awaibui mono õ di za, amnho 'rã'a'a hã. Ãmep si romhuri, ĩma romhuri'wa norĩ sipi'õ 'rata. 9 Asima a'madâ'â pese mono, ta norĩ siré aihâimana u'âsi za'ra da, te te tehâri za'ra mono ré, buru nho hã. Wa tô duré tãma roti za'ra, ĩma romhuri'wa norĩ ma, aibâ norĩ ma hã, te te siwi aiwamnarĩ tõ da. Duré 'rubu wamhã, te za nasi ihâsi, ĩma romhuri'wa norĩ te te nasi â sima i'amrami za'ra hã.

10 Tawamhã Ruti ma tô hi'rãtitõ nhamra. Ti'ubu na ma tô ropto, ti'ai u hã.^a Tahawa te Boazihi ma tinha, ãne:

— E tihai wa, ma tô ĩwẽsã, tiha hã ĩma i'manharĩ wẽ zéb da hã, wa hã dasiré a'uwẽ õ nherẽ.

11 Tawamhã te Boaz tãma tinha asa:

— Wa tô wapa, aimaprebaba ma, aimro hã idâ'âzém hawi uburé marĩ hã 're i'ab'manharĩ mono zém na hã. Ĩma waihu'u pese di duré, aimama norĩ hã ana me irẽme zahuré zém na hã duré asa'ru zama irẽmezém na hã. Tahawa, ãwa ma tô we aimo, aima idawaihu'u'õ norĩ wazari, 're aihâimana mono da. 12 Uburé Danhib'apito si te za uburé aima wa'â, marĩ hã 're i'ab'manharĩ mono zé hã. Ta hã Izaraéu nhihudu norĩ nhib'apito isimi'madâ'â wẽ zéb zarina we aimorĩ hã sa'ẽtẽ na te te aima wa'âbâ da, wa ĩsima wẽ.

13 Tawamhã Ruti ma tô Boazihi ma tinha, ãne:

— Apito, wẽ na te ĩpawapto mo. Ĩma inharĩ wẽ mono zém na ma ãma ĩma irowẽ waze, wa hã aima romhuri'wa norĩ sipi'õ norĩ ma, ĩwapure nherẽ.

14 Abzuma dasaihurizéb da, iwa waptã'ã wamhã, ma tô Boaz hã Rutihi ma tinha, ãne:

— We ãwa aimorĩ, i'u'ẽtẽ wapu wa'õno hã 'mai'âri da, duré uva 'rãi wa'u isé na asima di'i da.

Tame ma tô oto nhamra, romhuri'wa norĩ zababa. Tahawa, Boaz ma tô duré tãma tisõ, amnho 'rã zebre hã. Ta hã te oto ti'rẽ, te te i'mahâiwĩrĩzéb u. Te te 'mahâiwĩrĩ wamhã, ma tiwi si'azazâ, amnho 'rã zebre hã. 15-16 Tawamhã Ruti hã amnho 'rã'a'a te te awaibui mono da, apâ oto wahutu wamhã, ma tô Boaz hã tite romhuri'wa norĩ ma roti za'ra, ãne:

— Iteihi iwasisi za'ra wa'aba mono 'remhã te te duré tô awaibu mono, amnho 'rã'a'a hã. Tahawa, tiwi sawi za'ra wa'aba õ di za, siséb tõ da. Te za duré iteihi wasisi hawimhã isani za'ra wa'aba mo, tãma sãmra za'ra wa'aba mono da, taha zama te te awaibui mono da.

17 Ãne ma tô Ruti, amnho 'rã'a'a hã hâiwahâzéb u nherẽ te te 're awaibu. Taha pari, ma tô duré pré'é, i'rãi uptabi si te te ubumro da. Ta hã i'rã pire pibuzé hã 25 kilu u ma aré watobro. 18 Tawamhã amnho hã te oto tidu 'ri tẽme, 'ri ahâ u hã. Te te ãwisi wamhã, timaprebaba ma, sa'u te te iduri hã ma tô tãma hâi'ré, sa'ẽtẽ na te te i'awaibui mono zé hã te te waihu'u da. Abzuma tisa si'atarẽme zama ma tô duré tãma tisõ. 19 Tahawa Noẽmi te oto sadanha, ãne:

— E ma niwĩmhã ma tô ã bâtâ na amnho 'rã'a'a hã i'awaibui mo. E ma niwĩ te iromhu, duré. 'Re ihâimana u'âsi mono wi, wa za waptẽ, aibâ hã ai'ãma ipẽ'ẽzézé wa'rãmi, iwẽ hã te te tãma pisutu da, rowẽ na 're hâimana mono da.

Tame te Ruti hã Noẽmihi ma rowasu'u, Boaz na aibâ nhisi buru ãma te te iromhuri na hã. 20 Tawamhã te Noẽmi hã duré tinha:

— Wa ĩsima wẽ, Uburé Danhib'apito iwẽ hã te te tãma 're pisutu u'âsi mono da, Boazihi ma hã. Ta hã te te dama 're rob'manharĩ wẽ u'âsi, hâiba ré 're ihâimana za'ra mono norĩ ma hã, duré 're idâ'â za'ra mono norĩ ma zama.

Noẽmi hã te timreme na zahadu ãma uzusi, ãne:

— Ta hã ĩmro sisãnawã siwadi, ãma wati prã na romhâ na hã. Ma tô ropire hawi wanho'reptui'wa za'ra 'wa^b na wama 're hâimana za'ra.

21 Tahawa te Ruti hã tãma rowasu'u, ãne:

— Ãhã nhipai u hã romhuri na te ãma uzusi da, te ĩma tinha, tãma romhuri'wa norĩ siré, amnho tehâri hã isi'utõrĩzéb u.

22 Tawamhã Noẽmi ma tô ãma sada'â:

— Wẽ di tô, aimorĩ da hã tãma iromhuri'wa norĩ sipi'õ norĩ siré. E tihai wa. Aibâ aimawi buru ãma, romhuri 'wa'âhã, te aré siwi aiwamna.

23 Tawamhã Ruti te oto romhu, Boazihi ma, romhuri'wa norĩ sipi'õ norĩ siré. Amnho trigu 'rã'a'a hã ma tô te te awaibu, itehâri hã isi'utõrĩzéb u, trigu tehâri hã duré trigu teihi ne tehâri zama. Te duré timaprebaba siré 're sãmra u'âsi.