Namba tri pas
Cha Jon kareꞌe
1
Nena Cha Jon,
hetman vo sios ya God,
pas ve kaneꞌe konoi roma,
raꞌai Kristen neman nena Mah Gaius.
Aro memi awirai awaka ya God-a kemisave veꞌen yah ku vo ve pon tah kanasave kanere moma revo yah kakemi veka kura neman nena.
2-3 Ova korona taim kanarivo veka aro raꞌai Kristen ovu tah rere rou kekape tah chirai pona veka,
kamasave kamabilip mo awirai awaka ya God,
yah ao koka kamaremare ero,
pa korekeu pon awirai awaka ya God.
Korao veka tah kura neman nena,
kanasave beten-a kanao noa God rore ao koka kamao ero,
va nereneman pon tah mema veku minia kuiniari nakemi oꞌto notema veka spirit vo bilip mema kosave kokei revo.
4 Taim kanarivo veka aro me nena inia awirai awaka ya God-a chawo kupuana tah inia pa kepekeu revo,
oꞌto pako aka kotena tah kotawo oꞌto koka kosave kotena ero.
Cha Gaius pasin neman-a karao roiy aro Kristen ovu
5 Kura neman nena,
mema kamasave pa kamekeu awirai awaka ya God.
Yah kamasave kamalpim yei aro raꞌai Kristen ovu tah rere rou voro mema veku beya kamasave yei ero.
Korao veka tah pasin mema kamalpim yei aro ovu,
em ao pako aka tah koriritao mak vo bilip mema.
6 Ovu yei aro raꞌai Kristen tah rou memi,
kenopi keyarama yah kope kekape varu tah chirirai poiy aro bombiam vo sios vemo veka,
pasin neman-a kamasave kamao ke kameremoiy revo aro bombiam tah kamalpim yei minia.
Yah mare va nekape neyarama vova yah taim kepao nepepema yah nenopi boko raꞌa,
va noneman revo boh ao ovu namalpim yei vora kuiniari neko nenopi nao.
Va namalpim yei nuiniari mak veka God-a veku karereroma va namao ero.
7 Ero korao veka,
boꞌo ya Jisas-a kepao,
tah inia ketowa popore boko koka tah awoꞌo ya Jisas-a chiriraiꞌvo poiy beyo.
Yah taim ketowa boꞌo vemona kepao,
beya kesave ao-a raꞌa keko piy aro beya kesave kebilip pova Krais.
8 Korao veka tah memi va nemalpim yei aro veka vemona vora kuiniari nemao veka aro boꞌo kemao minia vora kupuana nemo boꞌo vo awirai awaka ya God.
9 Pas-a kaneꞌe konoi roiy veꞌen aro bombiam vo sios yah kanairai noiy no ao vemona.
Cha Diotrefes emo,
toratora kasave iki kayie va ya veku nanoi cha.
Beya kasave ava karivo tah pa karekeu awirai memi vai.
10 Korao veka tah taim nanakamap boko mopu,
pasin ya karao ero va nanairiraiꞌvo.
Awirai tore inia kairirai tah kabagarapim memi.
Yah beya kasave pasin ve pon karao vai,
aro raꞌai Kristen tah rere rou nape kesave kekape awirai-a chiriraiꞌvo ero,
kako yei kenopi oꞌro ya vai.
Yah taim aro vo sios ya veku emo kepao neko yei aro raꞌai Kristen tah rou nenopi poiy oꞌro va awirai-a niriraiꞌvo,
kasave karaorariy yah raꞌa vo minia kasave karirikeiy aro ya veku emo va beya nekepiroki vova sios vai.
Cha Demitrius pasin neman-a karao
11 Kura neman nena,
mema beya pa namekere pasin taipere vai.
Va pa namekeu pon pasin neman.
Aro yei pasin neman-a kepao ero,
yei aro ya God.
Yah aro yei kesave pasin taipere kepao,
em aro yei beya keyara revo God bia emo nape.
12 Cha Demitrius,
bia emo aro koka kesave awirai-a chirirai pova ro pasin neman ya.
Yah awirai awaka ya God minia kosave pasin neman-a kokamapim ri laip ya.
Korao veka tah awirai awaka ya God minia kosave kwiriraiꞌvo ro pasin neman ya.
Yah mare memi minia pasin neman ya inia kemiriraiꞌvo.
Yah namasave veka awirai memi emo awaka revo.
Hetman vo sios-a karao nayaraka Cha Gaius
13 Awirai prumo kerinia rina va nanairai noma.
Toh beya kanao naneꞌe nerinia pas vemona vai.
14 Inia ova kanakinakina va nakane nanapirikema yah nepikepi minia yah awirai-a nepirai pon ro.
15 Biapako kuiniari nablesim mema yah riꞌi mariri namako.
Aro raꞌai Kristen tah rou mema kekepi pina vemona,
umonai neman yei kesalim poma.
Umonai neman nena va namoiy olgeta moike moike yei aro raꞌai Kristen tah rou nena kekepi voronaro.