3 Mema va awirai vemona namairai moiy aro bombiam ve kebilip,

ku korao veka,

titja memi minia ruru awaka kobaun remi yah kekemi pasin taipo vemona kemao.

Memi kekemi mo pasin vo ava nemipana,

pianoreremi yah kekemi veka aro longlong yah pa kemekeiy aro tore tah kepiaruwiy ero.

Yah taim ve,

kekemi veka aro wokboi kanapo vo pasin vo riꞌi nokokore nami rore ao yah pasin vo aigris tah kemi mangal more revo ao vo meꞌri vemona.

Yah taim vemona minia,

kekemiroki revo are ro pasin vo nemitove kanakanapo yah pianemari moiy aro ovu.

Yah ao maramara vemona korao aro ovu kekepi veka birua memi yah memi minia kekemi veka birua yei.

4 Toh God,

bia ya nako memi varu,

pasin neman ya kaokoku yah karere romi revo aro bombiam vo meꞌri kariritami revo vatiron,

5 yah kako memi varu.

Pasin vemona beya karao rore ao neman kemaremare ero vai.

Baun poaka!

Ya veku kaokoku romi revo tah ao vemona karao vora nako memi varu.

Yah ao taipere koka kereporoporomi kaniriki remi.

Yah Holi Spirit ya veku laip tare koromi tah kemawe mevova tare ya.

6 Ro boꞌo ya Jisas Krais bio ya nako memi varu ero,

God-a Holi Spirit-a kaveretami vovake.

7 Yah pasin neman ya kamarimari romi,

korao kekemi veka aro bombiam niniu ri ine ya God.

Yah pasin vemona pon tah God-a kamompe memi veꞌen va nekemi veka me awaka ya,

tah nekemikeya pon va laip vemona nekemi revo toratora naromi.

8 Emo awirai awaka tah memi va nemibilip mo revo.

Kanereno va awirai ve namairai novatironki roiy revo aro bombiam kebilip pova God,

vora toratora kuiniari neropi kupuana yah rara niorepopo revo vora neredi yah nekepi pasin neman pon nepao.

Pasin vemona koneman revo yah inia koalpim yei aro bombiam koka tah ao emo koneman poaka.

9 Toh mema beya nakemi rovo miy awirai taipere yei aro inia keperepo revo va ova nereiroro kanakanapo roiy aro ovu,

o aro nape kesave awirai prumo chirirai pore awirai rivariva rore awoꞌo yei aro apo titja^a,

o aro yei awirai chirai warapo tah ketove kanakanapo rore awirai kerinia lo ya Cha Moses.

Awirai vemona,

ku rere kerebaun yah beya kuiniari revo va noalpim laip memi vai.

10 Boh bia raꞌa awirai ovu nairai tah norao nopavetari yah nonopi nokepi tintin,

kope emo taim mema va awirai kupuana namairai moa va ruru ya narovoru.

Toh boh awirai mema beya narivo yah baunke inia narao,

kope va awirai kupuana vemona namairai moa vova.

Yah boh awirai mema beya narivo tah baunke inia narao nanoi,

yake namemeyaki yah beya ao raꞌa namao moa vova vai.

11 Mema kamayara veꞌen veka beyo veka emo,

rara niniu kepepeu veꞌen yah kenopi kerepiroki veꞌen rara taipo.

Beyo veka emo,

kesave ao taipere aka keparepare ri ine ya God.

Yah ao taipere vemona inia kepao pi ine ya God emo,

kot-a kereirao veꞌen beyo vemona.

12 Nena va Cha Artemas o Tikikus,

nanasalim ya nanoi voro bopo mema nako.

Yah taim raꞌa yei namayaraka,

nama traim nakame bereren yah nama pirikena mataimon Nikopolis.

Ku vo koraka,

taim ve kokakuke veꞌen va bo nomariri yah puꞌu pako nokai,

tah nena kanereno veꞌen va nanoni nakeni vere Nikopolis.

13 Cha Apolos re saveman vo lo Cha Senas,

va neyute po rara.

Korao veka tah pasin neman-a va namao moiy yah ao voro kereperepore revo ero va namalpim yei.

14 Aro Kristen bombiam memi Krit emo beya nekepi kanapo vai,

yei minia va save neko veka mema,

ro pasin neman vo nialpim yei aro nape ava kerebaun reiy.

Mema beya namin Kristen-a nekepi kanapo tah beya pa nepekere pasin neman ya God,

va laip yei veku beya kuiniari aka nuawe vai.

15 Aro bombiam koka kekepi pina emo umonai neman yei kesalim poma.

Yah mema minia va umonai neman memi namoiy aro bombiam nape kesave kebilip pova Jisas yah kesave kepere pomi revo yah kekepi pima voro.

Marimari ya God kuiniari nuinia ripu.