Mema va skul-a namoiy revo aro bombiam vora pa nepekere pasin God-a karerero
2
Toh kope mema Mah Taitus,
va skul-a namoiy aro bombiam ro pasin vo pa korekeu revo awirai ya God.
2 Mema va awirai-a namairai namanao moiy revo aro biꞌiy vora
neorepapi revo pasin yei veku.
Yah pasin neman-a va nepao yah awoꞌo neman-a neko,
yah pava nepekeu pon ruru awaka.
Yah va nesave revo yah nebilip pova revo God,
yah pasin vo neperepoiy aro ovu pon nepao,
yah pasin vo neropi kupuana yah nai-a nepoi.
3 Korao veka tah va namairai more aro bom biꞌiy yah skul-a namore vora,
pa nererekeu revo pasin God-a karerero.
Beya pianererari rore aro ovu
tah beya nererin pi kupuana nobosim laip rere yah beya neriave wokmeri kanapo vo pasin vemona vai.
Va skul-a nererore aro bom ovu vora pasin neman neman pon nererao.
4 Boh pasin veka ve nererao,
kuiniari nereskulim rere aro bom yangpla am-a kererunai ero,
vora nererereroiy revo am tah me rere.
5 Raꞌa vo minia,
aro bom yangpla vemona am-a kerunaiy emo va
pa nererekeu pon ruru awaka,
yah nerekeri nereniniu revo ri ine ya God.
Yah neyorerari revo oꞌro rere,
yah pasin neman pon nererao roiy aro koka.
Yah nereikeri roko am rere yah ava nererivo roiy.
Taim pa nererekere ao koka vemona,
aro bombiam koka beya kuiniari netereu awirai ya God vai.
Cha Taitus pasin neman-a va narao roiy aro biam yangpla vora kuiniari pava nepekeu
6 Korao veka tah mema Mah Taitus,
awirai-a namairai naiy aro biam yangpla vora ova noraiko yah pava nepekeu pon ruru awaka.
7 Ao koka kamaremare,
mema veku va pasin neman pon namiritai vora neyara yah pava nepekeu.
Taim skul-a namoiy,
beya nama ropomeiy o nama bikhet o pianorerema vai.
Va boꞌo awaka namao yah awirai awaka namairai.
8 Pasin raꞌa vova va namao moiy vora pava nepekeu,
korao veka,
taim skul-a namoiy,
va awirai awaka pon namairai vora beya kuiniari rong-a rava neorenao kwinia rovo awirai memi.
Boh namao veka,
aro ine kepemitrotropu beya kuiniari pianepari po awirai memi vai,
yah reka va noyoi ro ruru taipo yei.
Wokboi-a va pa nepekeu awirai yei bosman yei.
9 Mema va skul-a namoiy wokboi kanapo vora nepeikepi roko bosman yei.
Boꞌo yei va nepao revo vora bos yei kuiniari oꞌto noteiy roiy revo.
Tah beya rova nepeikoka bosman vai.
10 Beya ao kakana nepao poiy bosman yei vai.
Awirai yei bosman va pa nepekeu,
yah bosman yei va ova noroiy ro pasin yei.
Korao veka tah taim pasin vemona wokboi kanapo kepao emo,
va kuiniari nepao awirai ya God emo,
va bilas aka nuinia riu yah noraipaiy aro prumo nekape pava nepekeu.
Awirai awaka emo ya God,
Bia ya nako memi varu.
11 Kanairai noma va skul-a namoiy aro bombiam ya God rore ao koka God-a kararerare,
vora aro bombiam ovu ova noroiy.
Ku vo korao veka,
marimari ya God,
yake kokai roiy veꞌen aro prumo vatiron.
Yah kuiniari noko memi varu.
12 Marimari ya God inia skul-a koromi vora pasin vo oreva nemoa God tah pasin vo nemeremore ao vo meꞌri vemona nememeuki.
Awaka,
memi kekemi romoiy aro bombiam vo meꞌri vemona,
tah marimari ya God inia skul-a koromi vora pa nemekeu ruru neman yah pasin neman pon nemao mi ine ya God.
13 Yah memi va nemao bilip memi nokupuana yah nekemi kekeu ao neman va nokai yah nemipirike yah ova noromi.
Ao neman vemona kekemi kekeu emo,
em Jisas Krais God kupuana memi.
Bia ya nako memi varu va nakai pa re glori pako ya.
14 Laip ya veku karereuki yah karai tah kako memi varu yah sin koka memi kapereuki.
Ao ve karao romi emo,
ku vo korao veka,
kuiniari nekemi nemininiu ri ine ya tah nemave aro bombiam ya veku.
Yah kekemi kemiredi pon more boꞌo vo pasin neman pon va nemao.
15 Mema va namba ve kwinia rima namayusim yah awirai kupuana namairai naiy aro bombiam vora nokokore naiy yah pava nepekeu.
Raꞌa vo minia,
namairai naiy aro voro oreva kepo awirai vemona,
vora pasin yei nestretim.
Tah beya namin beyo awirai mema nepiewope vai.