Aro wokboi kanapo va pasin neman pon nepao
6
Aro bombiam inia kebilip pova Jisas tah kekepi veka wokboi kanapo yei aro ovu ero,
va nepei kepiroko bos yei yah awoꞌo yei niawoko.
Pasin vemona va norao aro beya kebilip ero,
beya kuiniari awoꞌo ya God re skul vo awirai neman ya netereu vai.
2 Boh bos yei wokboi kanapo nesave nebilip pova Jisas,
wokboi kanapo vemona beya nepitoro veka,
“Bos ve,
emo raꞌai nena,”
va nebikhet yah beya awirai ya nerivo vai.
Wokboi kanapo vemona,
ruru veka va nuinia riya,
“Bia ve boꞌo kanao noa ve,
bia ero raꞌai nena tah kanere nova revo.”
Yah pasin vemona va boꞌo narao kupuana.
Pasin vo mani nemeremo revo emo ku vo rara taipo
Ao vemona va skul-a namoiy aro bombiam vora ova noraiko yah boꞌo aka nepao.
3 Boh bia raꞌa pianarari ro skul voro kemoiy aro bombiam,
toh kope ya veku skul maramaraꞌa karoiy beya korao ri minia awirai ya Biapako memi Jisas Krais tah beya pasin neman God-a karerero kairitai vai,
4 bia vemona karerero revo pasin ya veku tah kebikhet.
Ruru awaka kobaun reya poaka.
Laik taipo vo awirai resis kwinia riya,
tah awirai-a kairai rore ao mememe veka,
awoꞌo veka rope va nemore pasin memi.
Awirai veka emo,
kosave korao beyo rimo yei kotaipo wararoiy beyo ovu,
tah ketovetove,
yah piakepari yah beya kuiniari ruru awaka neko vai.
5 Kekepi inia ova koraiko ro netovetove tah ruru yei kotaipo revo tah awirai awaka beya keyara vai.
Yei kepitoro veka,
pava kepekeu rara vo pasin neman aka ri ine ya God,
vora noalpim memi kago prumo o mani prumo nemiko.
6 Awirai awaka varu vemona,
boh ova noromi ro revo ao vemona God-a kasave karomi,
kuiniari nemiyara veka rara vo pava nemekeu pasin niniu ri ine ya God kuiniari noalpim memi revo.
7 Kemisave veka,
taim moꞌo koavemi,
kekame kanapo.
Ao raꞌa beya kemiko kekame meꞌri vemona vai.
Korao veka tah,
taim meꞌri vemona nememeu,
va nenomi kanapo.
8 Kope boh akorom o aimino ao veka nerinia rimi,
kuiniari nemirai veka ao memi yake kwiniari ke.
9 Toh yei beyo kepere pore revo ao prumo na mani,
traim-a va nokai riy yah noaveiy veka chao ame koavei.
Rimo yei va nokonore naiy va ao taipere prumo neparepare yah va nopaulim yei poaka.
Yah pasin vemona va noraipaiy yah laip yei nonoi notaipo poaka.
10 Pasin vo mani nemeremo va pasin taipere maramaraꞌa nerekamap rimi poaka.
Yei beyo ovu mani kepere pore ero,
bilip yei kepepeu yah pasin taipere koka vemona kerekamap riy veka ao pepepen raꞌa koteiy.
Mema va nama parara bereren vora laip kwinia toratora namako
11 Yah mema bia ya God,
pasin taipo vemona namemere yah nakemimere rarapa.
Mema va boꞌo namao kupuana yah pa namekeu pasin niniu ri ine ya God,
yah namabilip mova ya unake.
Va namere moiy revo aro ovu yah naromi kupuana tah nai-a namapoi yah ava namairai mariro moiy aro bombiam.
12 Pasin vo bilip,
korao veka resis.
Korao veka tah va nama parara bereren vora laip kwinia toratora God-a kamompe veꞌen ero namako.
Awirai vo ao vemona kamairiraiꞌvo revo ri ine yei aro bombiam koka.
13 Kemisave,
God-a kasave laip ya karore ao koka.
Yah raꞌa minia,
kemisave veka,
Cha Pontius Pailat aotere prumo katere roa Jisas Krais,
awirai awaka kairai roa.
Yah mare,
ri ine ya God re Krais Jisas,
awirai kupuana kanairai noma veka,
14 ao koka vemona va pava namikere revo veka kamako ero.
Tah beya kuiniari ao raꞌa namao notaipo vora norao aro bombiam-a aomomu nirai nama vai.
Namao pon veka nonoi nuiniari taim aro bombiam koka neyaraka Biapako memi Jisas Krais-a nararo varu.
15 Ao vemona va nokamap taim voro God-a veku kamompe veꞌen ero.
God-a ya veku ku vo blesing tah ao prumo vemona kararerare.
Ya King yei king koka,
tah ya Biapako yei aro biꞌiy koka.
16 Ya unake pon beya kuiniari narai vai.
Kakei boꞌo vo lait,
tah bio raꞌa beya kuiniari nanoi riya kakuke vai.
Bio raꞌa beya kapirikeya God tah beya kuiniari nepirikeya vai.
Korao veka tah toratora awoꞌo ya nemawoko nake re kupuana ya.
Awaka revo.
Aro mani koka kwinia riy ero va nebilip pova God yah nialpim yei aro bombiam
17 Namairai moiy aro mani koka tah ao neman neman vo meꞌri kwinia riy ero,
beya pianorerei tah awoꞌo yei veku niawoko vai.
Ao voro va notaipo beya nebilip po revo vai.
Va nebilip pova God,
ero korao veka,
ao koka neman korao ovakoromi ero,
ya kasave karomi.
18 Namairai moiy mani yei va boꞌo nepao po revo.
Mani beya neyara tah neperepo revo veka ao neman vai.
Ao neman awaka yei ero,
ero pasin vo nemao moiy revo aro ovu.
Pasin neman-a va nepao nialpim yei aro ovu ava kobaun rei ero.
19 Boh pasin vemona nepao,
va norao veka ao kupuana bilip yei koawo,
veka akairi kupuana oꞌro raꞌa koawo tah beya kuiniari notaipo vai.
Korao veka tah bilip yei va nokupuana yah kuiniari laip vemona neko,
emo laip aka tah kwinia toratora.
Cha Timoti va boꞌo ya naorerari
20 Ma Timoti,
mema va namaoremami revo boꞌo voro God-a karoma eno peꞌe mema ero.
Oreva namore awirai taipere beya korao ri minia ruru ya God vai.
Nakemimei rarapa aro voro kepitoro savea neman-a kwinia riy ero.
21 Aro ovu kebilip pava kepekeu save vemona,
tah bilip yei kepao koreiroki veꞌen.
Marimari ya God kwinia ripu.