Cha Timoti va naorerariy revo aro bombiam veka aro noo ya veku
5
Beya nama toweiy beyo kepawope veꞌen vai.
Awirai-a namairai namananare moiy revo mariro veka kamao moa aka mema.
Pasin veka emo va namao moiy minia aro biam yangpla veka inia kamao moiy aro raꞌai mema veku.
2 Yah pasin veka emo minia va namao more aro bom kererawore veꞌen veka kamao more aro moꞌo mema veku.
Tah pasin vemona minia va namao more aro bom yangpla veka kamao more aro rou mema veku,
emo pasin koneman yah koniniu riya ine ya God.
Bia nape va naorerarire aro bom am-a keviri pere veꞌen?
3 Mema va namaore mamire revo aro bom am-a keviripere veꞌen ero yah pasin neman-a namao more.
4 Toh boh,
bia bom am-a karai reu veꞌen tah me o apoti o oputi pon nerekeri,
kope ri ine ya God namba wan boꞌo rere,
va neyore rarire revo famili rere veku.
Korao veka tah kuiniari neyorerari revo opu pana vemona.
Pasin vemona va nererao roiy akamoꞌo rere.
Ero korao veka,
taim keremememe,
akamoꞌo boꞌo kepao pore.
Tah pasin vemona koneman ri ine ya God.
5 Boh bia bom raꞌa,
am-a karai reu tah vou unake pon nokei tah beyo beya neorepari,
va nobilip rova revo God yah umonai roro beten-a inia norao notere roa God vora nalpim vou.
6 Toh bia bom am-a karai reu veꞌen yah kokei inia kokoku rore revo pasin vo meꞌri ve,
koritoro veka kokei tare,
toh vou veku kokei veka bio korai veꞌen.
7 Korao veka tah mema va namairai more revo aro bom am-a keviripere veꞌen ero vora pa nererekeu pasin vo beten-a nererao roa God.
Yah pasin neman-a nererao roiy aro bombiam ovu vora beya nevitikere veka nai-a kererao vai.
8 Yei aro beya keorepapiy revo aro noo yei awei aro ovu inia kekepi piy oꞌro yei ero,
emo bilip yei yake kepepeuki veꞌen tah ketaipo poaka ketawoiki vova aro haiden ro pasin taipere aka.
9 Mema va awoꞌo namakonare aro bom am-a keviripere veꞌen ero tah ainini rere kotawo 60.
Aro bom vemona,
biam-a kererunai yah kope biam-a keviripere yah rere unake pon kerekeri tah beya biam tare kererunai vai.
10 Bia bom vemona awoꞌo neman-a koko tah inia boꞌo neman neman-a korao.
Boꞌo veka tah korerariy revo me vou veku yah akorom-a koko koroiy aro ovu yei boko raꞌa.
Aro vemona kekape tah oꞌto kotei roiy aro kebilip pova God,
tah kekape oꞌro vou yah kom-a pi koreiniri.
Kope boꞌo raꞌa vova,
va noalpim yei aro bombiam taim nai-a neko,
yah vora boꞌo awaka maraꞌa neparepare.
Mopu va awoꞌo nopuko nare aro veka vemo pon.
11 Mema beya awoꞌo namakonare aro bom yangpla am-a keviripere veꞌen ero vai.
Ero korao veka,
ova norareko vova va am-a nererunai.
Ao vemona kuiniari norao oreva nerero boꞌo ya Krais.
12 Boh pasin veka nokamap,
aro bom vemona taipo kereko kokai rire laip rere veku tah beya pava kererekeu promisa titja kererao ero.
13 Ao raꞌa minia,
va neyonire yah neretova rorore oꞌro yei aro ovu.
Tah beya pasin vemona pon kererao vai,
bauni.
Va neretovatova yah ao yei aro ovu kepao ero neyirirai roiy tah raꞌa minia va pianererari roiy aro ovu.
Korao veka tah awirai prumo veka inia keyirirai ero memi beya nemao vai.
14 Nena kanairai veka,
aro bom ve am-a keviripere veꞌen ero,
am-a va nererunai vova yah me va nereru yah neyorerari revo oꞌro rere.
Boh nererao veka,
aro ine kepemi trotropu,
rara yei nebagarapim yei aro bombiam kebilip ero va nobaun reiy.
15 Aro bom ovu am-a keviripere veꞌen ero,
kererovoru yah rara neman-a kererereuki veꞌen yah pa kererekeya Satan.
16 Boh bia bom raꞌa kobilip rova Krais tah aro bom ovu am-a keviripere veꞌen nerekeri riu veka aro famili vou,
boꞌo vou va noalpim rere.
Yah ao vemona beya kuiniari nai-a noroiy sios-a neorepapire vai.
Sios-a kuiniari neorepapire aro bom am-a keviripere veꞌen tah beyo beya keorepapire ero vai.
Memi va nemoremamiy revo aro boꞌo vo sios-a kepao tah kenopi cha
17 Aro kenopi cha tah boꞌo vo sios-a keorepapi ero,
boꞌo yei kepao koneman revo.
Sios-a va awoꞌo yei niawoko nake yah mani va nebaim yei titja wo yah kope aro ovu.
Tah yei ovu boꞌo kepao revo tah skul-a kepoiy aro bombiam tah awirai-a chiriraiꞌvo ero,
sios-a va oꞌto notei roiy titja nini wo.
18 Emo korao veka,
awirai-a kemi ritim kwinia buk ya God kwirai veka,
“Taim bulmakau-a boꞌo norao noroitatare rais ke taꞌa nereriri,
beya rova nopuapo vai.”b
Mopu awirai raꞌa kopuyara kwirai veka,
“Yei wokman vo sios,
mani va nekopo boꞌo yei kepao ero.”
19 Awirai ya bio raꞌa beya nama rivo moa navitikeiy beyo kenopi cha boꞌo vo sios-a keorepari veka nai-a kepao vai.
Boh beyo riyempin o beyo 3-pla neyarai veka ao vemona kepao,
kuiniari nama rivo.
20 Boh raꞌa yei wokman vo sios sin-a baunke inia narao,
pasin ya va namairiraiꞌvo revo ine yei aro bombiam ovu vo sios,
tah yei ovu minia va neriri yah beya nepao veka vai.
Cha Timoti va pasin ya veku naorerari
21 Kanairai noma revo ri ine ya God,
tah Krais Jisas tah yei ensel ya veka,
va namaoremari revo boꞌo prumo kanairai noma ero.
Pasin vemona pon va namao moiy minia aro bombiam koka.
Pasin neman-a beya namao moiy pon aro voro kameremoiy ero vai.
22 Tah beya noririkema bereren eno nameretai aro kenopi cha yah nama mompe yei va boꞌo ya God-a nepao vai.
Boh namao veka,
God-a va napirikema veka mema minia kakemi rovo miy aro voro eno kameretai tah kamamompe yei,
ero pasin taipo kamao.
Korao veka tah namaoremari mema veku vora kuiniari nama niniu revo ine ya God.
23 Mema beya pi pon namaton vai.
Koneman wain mentanaka namatonko vora noalpim vo riꞌi mema tah ava inia korama ero noreremaki.