Cha Pol kakei ailan Malta
28
Taim kemura kemineman yah kekom keromitao ramata nake,
yah kope kemiyara veka ailan vemona awoꞌo vo kepina veka Malta.
2 Yah aro vemo kekepi ailan vemona,
pasin neman aka kepao pomi.
Aikera kepere kobriri tah chirai pomi kenomi kekemi mo vora reka memi nuiꞌim.
Ku vo korao veka,
ava kwai tah bova komariri poaka.
3 Yah Cha Pol aiyu rove mememe pina kairiri kakai yah kareretata aikera.
Yah mini rava kakei aꞌai rove vemona,
iꞌim vo aikera koko ya tah karaiyu kakai yah kaiꞌria Cha Pol eno tah kareru.
4 Taim aro bombiam vo boko vemona kepirikeiya mini eno keyairita Cha Pol yah kareru eno ya,
yah yei veku chirai varuvaru veka,
“Bia vere,
bio kayei keviri ke,
yah taim kaura nao beya kawuwo vai.
Tapara mare god vo pasin taipo nabekim konia beya karaoke narao nakei natare vai.”
5 Yah Cha Pol eno kairere naka mini yah kararo kareita aikera tah beya ao taipo rava kokamap riya vai.
6 Aro bombiam-a keropi yah kepitoro veka va naputuputu o va bererenki narei yah narai.
Keropi kiorepapiya konoi yah taim-a koririva naiy tah beya ao taipo rava kokamap riya vai.
Yake,
ruru kerovoru yah chirai veka,
“Bia emo,
ya god raꞌa vaire.”
7 Meꞌri kora kwiniaka kakuke ri boꞌo ve kekepi emo,
emo meꞌri ya bia biꞌiy raꞌa vo ailan vemona,
awoꞌo ya Cha Publius.
Bia emo,
kako memi kenomi kekemi oꞌro ya konoi kuiniari umo 3-pla tah pasin neman-a karao romi.
8 Kope aka ya Cha Publius ah reka iꞌim-a koraka tah aꞌa kaverevere.
Yah Cha Pol kanoi are vora nayaraka,
yah beten-a karao rova yah eno kareretaka yah karao kaneman varu.
9 Taim Cha Pol ao vemona karao,
aro bombiam koka ah va koraiy kekepi ailan vemona kekape piya Cha Pol tah karao keneman varu.
10 Pasin neman-a kepao pomi rore ao neman maramaraꞌa.
Yah kope taim kemao nememeiy yah nenomi,
ao prumo voro kerebaun rem ero,
kepimi.
Cha Pol kanoi Rom
11 Kekemi ailan Malta konoi kuiniari ura 3-pla,
yah kope kemaro sip raꞌa kwinia ailan vemona,
yah vo taim vemona puꞌu pako koputu.
Sip emo yei aro Aleksandria.
Cha vo sip vemona,
piksa yei me biam riyempin vo god Sus,
moꞌo koaveiy minia ketutari naꞌaiy.
Awoꞌo yei Cha Kaster re Cha Polaks.
Yah kope kemi turukeki yah kemiparara.
12 Kenomi kemirinko mataimon Sirakyus yah kekemi konoi kuiniari umo 3-pla.
13 Yah kope mataimon vemona kememeu yah kemiparara vova kenomi mataimon Regium.
Kope uri roronai,
puꞌu va koputukare paraꞌa saut tah mataimon Regium emo kememeu yah kemiparara kenomi vovake.
Kope umo namba 3,
keremiki mataimon Puteoli.
14 Yah kope mataimon vemona,
kemivakakeiy aro ovu kesave kebilip pova Jisas.
Yah keipimi kenomi kekemi miꞌiy konoi kuiniari umo 7-pla,
yah kope kememeiy yah kenomi mataimon pako Rom.
15 Taim aro bombiam vemo kebilip tah kekepi mataimon pako Rom emo awirai-a kerivo veka inia kemute kekame,
yah kiute papimi vora nevakakemi po rara.
Kiute kekape yah kevaka kemi boꞌo maket ya Cha Apius,
yah boꞌo kepina minia veka Oꞌro Pasindia Tripla.
Taim Cha Pol kapirikeiy,
oꞌti karoa God yah kupuana ya God-a kako.
16 Kenomi Rom yah gavman-a kairai va Cha Pol nakei tirin oꞌro raꞌa yah soldia raꞌa va nakei naore rariya.
Cha Pol awirai neman ya God-a kairiraiꞌvo Rom
17 Cha Pol kakei Rom umo 3-pla konoiki naka veꞌen,
yah kairiy hetman yei Juda kekape.
Taim kekape kiopokeu veꞌen,
yah kairai roiy veka,
“Aro raꞌai nena,
beya ava raꞌa kanao kotaipo riꞌiy aro memi o kotaipo ri kastam yei aro apo memi vai.
Toh keperenaki kanakalabus mataimon pako Jerusalem yah keperenaki poiy eno peꞌe yei Rom.
18 Yah kope aro Rom-a kot nena kerivo tah keyara veka beya ao taipo rava kanao,
va nepiena narani,
korao veka tah kepake nerokoperinaki.
19 “Toh yei aro Juda kioniy va gavman vo Rom-a beya nerokoperinaki vai.
Yake rara nena kobaun,
tah kanairai va Cha Sisar kot nena narivo.
Toh emo beya korao veka kanao kot-a nanenao aro nena vai.
20 Ku vo kainipu kokape,
va nanayarapu yah awirai-a nanairai nopu.
Nena kanabilip tah kakenikekeu ao vemona memi aro Israel-a kekemikekeu emo.
Tah ao vemona pon korao tah vemo sen-a kwavena ke.”
21 Kope chirai poa veka,
“Beya bio raꞌa yei Judia pas-a kako kakai vora awirai-a nuirai romi roma vai.
Raꞌa vo minia,
beya Juda rava kakai ava kairai romi tah awirai taipere kairai roma vai.
22 Toh memi veku kemao va awirai kerinia ruru mema namairai momi.
Ero korao veka,
kemi yara veka aro bombiam koka vo boko maomao inia awirai taipo chirai naꞌai aro tare vemona kekape kekepi romomi aro Juda emo.”
23 Yah kope umo rava kemompe,
tah aro prumo kekape oꞌro vemona Cha Pol kakei emo.
Roronai aka kope konoi kobaririki,
awirai vo kingdom ya God-a kautim roiy.
Yah awirai ovu kerinia lo ya Cha Moses re buk yei profet minia kairai roiy vora narao nebilip pova Jisas.
24 Aro ovu kebilip po awirai vemona Cha Pol kairai emo,
toh yei ovu beya kebilip vai.
25 Yake yei veku ketove tove varuvaru,
yah inia kiutute kenopi taim Cha Pol awirai vemona kairaiki roiy,
“Holi Spirit-a awirai neman-a kwirai roiy aro apo memi revo roꞌo ya profet Aisaia.
26 ‘Nanomi miꞌiy aro bombiam vemona yah namairai moiy veka,
“Awirai-a va inia nopurivo toh beya kuiniari ku vo nopuyara vai.
Kuiniari inia nopu yara toh beya kuiniari nopuyara revo emo arape vai.”
27 Aro bombiam vemo,
cha re rimoꞌo yei kokupuana revo ero,
kuiniari awirai-a nerivo,a
toh teve yei ketupapa va beya ku vo awirai-a neko vai,
yah ine yei kevovore veni.
Boh ao vemona beya nepao,
va ava raꞌa nepirikeu,
yah awirai-a va nerivo yah ku vo awirai vemona neyara,
yah va riꞌi nerovoru yah nekape pina varu tah nanaiy neneman varu.’ ”
28-29 Kope Cha Pol kairai roiy veka,
“Korao veka tah,
kanao va nopu save revo.
Awirai ya God emo kwirai veka,
va nako memi varu.
Yah awirai vemona God-a karoiy veꞌen aro beya kiave Juda ero va nerivo.”b
30 Cha Pol kakei pon oꞌro moike konoi kuiniari ainini riyempinc.
Mani inia karoa aka vo oꞌro vora nariꞌin inia nakei.
Oꞌto kotcha roꞌoiy aro bombiam taim nayarai nekape oꞌro ya.
31 Awirai vo kingdom ya God-a inia kairiraiꞌvo,
yah skul-a karao roiy aro bombiam ro awirai ya Biapako Jisas Krais.
Beya kariri va awirai-a nairiraiꞌvo vai,
tah beya bia raꞌa karao rariya vai.