Jisas Disaipel 12-pla kairai roiy kenopi
(Matyu 10.5-15; Mak 6.7-13)
9
Jisas-a kairiy disaipel 12-pla ya,
yah kupuana re namba karoiy vora olgeta spirit taipere neririkeiki yah aro bombiam ahva korai ero,
va nepaiy neneman varu.
2 Yah kope kasalim yei kenopi vora awirai vo kingdom ya God nirai poiy.
Yah aro ahva korai emo,
nepaiy neneman varu.
3 Tah kairai roiy veka,
“Taim nonopi,
beya ao ovu nopuiriri vai.
Beya titi vo nopu choko re ekoko,
akorom koraꞌa,
mani,
yah noreka raꞌa vova beya nopuko minia vai.
4 Oꞌro rope neko mopu,
va nokepi piꞌiy nonoi nuiniari taim mopu nopepe mataimon voro.
5 Boh aro oꞌro voro beya oꞌto noteiy ropu,
va mataimon yei nopepeki.
Yah amo vo meꞌri kere poro poro kanro mopu ero,
va nopu purarakia veka mak vo noriritaiy beyo vo mataimon vemona veka beya awirai ya God-a kepere poꞌo vai.”
6 Yah yei disaipel kenopi popore boko maomao vere yah awirai neman ya God-a kirai poiy yah aro ahva koraiy emo,
yah kepaiy keneman varu.
Cha Herot karere rou revo va nasave ya Jisas bia emo nape
(Matyu 14.1-2; Mak 6.14-16)
7 Taim vemona ya Cha Herot kakei gavanab vo boko vemona.
Yah taim awirai karivo veka Jisas-a ao prumo karare rare,
yah kakei karirio.
Ku vo koraka aro ovu kirai veka Cha Jon Baptais,
bia vemo karai veꞌen emo,
kope kavariko varu.
8 Aro ovu kirai veka,
Jisas,
ya Cha Elaija kakai varu,
yah aro ovu kirai veka,
Jisas ya raꞌa yei profet tora kavariko varu.
9 Yah Cha Herot kairai veka,
“Cha Jon opo ya keniaoro yah karai veni,
kope bia emo inia kirirai pova ero,
ya bia ero nape?”
Yah kope kaore naka Jisas vora nayaraka.
Jisas-a akorom-a karoiy 5,000 Beyo
(Matyu 14.13-21; Mak 6.30-44; Jon 6.1-13)
10 Kope taim aposel-a kekape varu,
kirai poa Jisas roꞌo ao prumo kepare pare emo.
Yah kope kako yei kenopi pova yah kepepeiy aro bombiam vemona yah yei pon kenopi mataimon Betsaida.
11 Yah aro bombiam vemona kerivo veka Jisas kanoi boko vere yah pava kepekeiya.
Tah ova korova roiy aro koka kekape emo,
yah awirai vo kingdom ya God-a kairai roiy yah kope aro ahva koraiy emo,
kope karaiy keneman varu.
12 Kope barbaririki yah 12-pla disaipel kekape piya Jisas yah kirai poa veka,
“Namairai moiy aro maomao vemona va nenopi popore boko mememe kerinia kakuke vora akorom re bo yei nevovo neore nao.
Ku vo koraka,
bo emo,
beyo kebaun yah akorom minia kere bauni.”
13 Yah Jisas kairai roiy veka,
“Mopu veku va akorom-a nopoiy vora nepa.”
Yah kope kirai poa veka,
“Bret 5-plac re ba riyempin pon kerinia emo.
Era memi va nenomi akorom nemiko moiy aro bombiam koka vemona vai?”
14 Taim vemona,
biam koka awei kekepi,
namba yei aro ve,
kuiniari veka faiv tausen.d
Tah kope Jisas kairai roiy disaipel ya veka,
“Nopirai poiy va nekepi popore ku mememe yah ku moike moike va namba yei va nuinia veka fifti fifti.”
15 Yah kope disaipel kepao veka Jisas kairai roiy emo,
yah aro bombiam puru pako vemona kekepio.
16 Jisas-a bret 5-pla re ba riyempin vemona kako yah ine kaoreko heven yah oꞌti karao roa God yah ba re bret-a kakorari.
Yah karoiy disaipel yah kope kevani nonoi roiy aro bombiam koka vemona.
17 Tah aro vemona akorom-a kepa konoi yah romova komoi yah kope akorom kora kora kerinia.
Kope disaipel akorom kora kora kiopokeke yah ketcha kere raro yamene 12-pla rova kerevuraki.
Cha Pita kairai rova Jisas ya bia nape
(Matyu 16.13-19; Mak 8.27-29)
18 Roraꞌa,
Jisas unake kakei beten-a karao yah yei disaipel ya kekepi piya,
yah katere roiy veka,
“Aro koka kirai veka nena bia nape?”
19 Yah kirai poa veka,
“Ovu kirai veka mema Cha Jon Baptais,
tah yei ovu kirai veka mema Cha Elaija,
kope yei ovu kirai veka mema profet raꞌa yei profet titja kope kama variko varu.”
20 Yah tare katere roiy disaipel veka,
“Toh mopu veku kopirai nena bia nape?”
Yah Cha Pita kairai roa veka,
“Mema Kraise ya God.”
Jisas-a kairai va narai yah kope navariko varu
(Matyu 16.20-28; Mak 8.30–9.1)
21 Yah kope Jisas-a awirai kupuana kairai rariꞌiy vora beya awirai vemo nirai poa bia raꞌa vai.
22 Yah kairai roiy veka,
“Ma Biam ya Bio va nai pako napoiy yah aro hetman,
yah yei aro bikpris awei aro saveman vo lo va oreva nepoa.
Tah va nepieya narai yah kope umo namba 3 va navariko varu.”
23 Yah kairai roiy disaipel-a veka,
“Boh bia raꞌa karao pava narekena,
va ova nona paraka rova ya veku yah umumoka,
kruse ya poꞌon napoiyf yah pava narekena.
24 Boh bia raꞌa laip ya veku karao nawo kupuana,
laip ya va noreiy rokire.
Kope bia raꞌa laip ya naroko reriki rona,
emo korao veka pava karekena,
tah laip ya beya kuiniari noreiy rokire vai.
25 Kope bia raꞌa ao maomao vo meꞌri vemona nainiari tah kope laip ya notaipo o laip ya noreirokire,
toh kope ao prumo vemona va nere helpim ya vekarope?
26 Boh bia raꞌa reka noyova rona re awirai nena,
kope Ma Biam ya Bio minia va reka noyova rova bia voro,
taim nararo naꞌao lait pako ya re Aka ya,
awere holi ensel.
27 Awaka kanairai nopu,
aro ovu kekepi emo,
beya kuiniari neviri vai,
va nekepiki kake yah kingdom ya God-a va neyara nokai emo.”
Reka ya Jisas komaraꞌa
(Matyu 17.1-13; Mak 9.2-13)
28 Kope umo 8-pla ya Jisas awirai vemona kairai emo konoiki nao veni,
yah kope kako ya Cha Pita,
Cha Jon re Cha Jems yah awei kakoi tou nake vora nabeten.
29 Taim inia beten-a karao,
yah ine ya konoi komaraꞌa tah noreka ya kobusoki poaka.
30 Yah bia riyempin kereropi ava kirai piya.
Bia riyempin vemona,
Cha Moses re Cha Elaija.
31 Kerekape nao lait pako.
Yah kereropi ava chirai piya Jisas rore ao vemona va nere kamap riya taim nanoi Jerusalem yah meꞌri ve narereo yah nakoi nake.
32 Cha Pita re disaipel riyempin kevovo keraikipe toro,
yah kope taim keverekope,
yah lait pako ya Jisas kapirike tah bia riyempin kere ropi piya minia.
33 Taim bia riyempin vemo kepao nere pepeiya Jisas,
yah Cha Pita kairai roa veka,
“Biabiꞌiy,
koneman tah nekame moma,
va oꞌro sel 3-pla nemaremare,
raꞌa mema,
raꞌa ya Cha Moses yah raꞌa ya Cha Elaija.”
Awirai vemo kairai kope ya veku beya ku vo awirai ve kayara vai.
34 Taim Cha Pita awirai vemona kairai,
akron buso koraro koririy yah keriri toro.
35 Yah poko raꞌa kokai akron buso yah kwirai veka,
“Bia vemona ya Ma nena,
nena veku kana mompe.
Awirai nopu rivo poa.”
36 Taim awirai vemona konoi kobaunki,
Cha Pita awei disaipel riyempin kepirikeiya Jisas unake poꞌon karoi.
Yah beya chirai poa bia raꞌa roꞌo ao vemona keyara emo.
Jisas-a karao bia mentanaka raꞌa spirit taipo kakei riya emo kaneman varu
(Matyu 17.14-21; Mak 9.14-29)
37 Kope uri wo,
Jisas awei 3-pla disaipel kekepi tou nake yah kope keparo varu pika.
Yah aro bombiam prumo kekape kevakakeiya Jisas.
38 Bia raꞌa kakei riꞌiy aro bombiam prumo vemona tah kaꞌai kairai veka,
“Mah Tikse,
ma nena emo,
ya biam moike raꞌa kanapo,
tah kana tere nama poaka nakame vora nama yaraka wo.
39 Spirit taipo inia korikirowa yah bererenki kaororo yah spirit taipo vemona karao reka ya korikirowa yah buo buso keiya turuke kokai roo.
Spirit taipo vemona inia korao reka ya ine korao toro poaka tah beya korereiya bereren vai.
40 Nena inia kana tere naiy disaipel mema vora neririkeiyaki,
toh beya kiniapi vai.”
41 Yah kope Jisas-a kairai veka,
“Mopu aro bombiam vo taim vemona beya kopu bilip vai,
tah ao taipere aka inia kopare pare.
Era kopitoro veka baunke va inia nakeni nipu,
vora nopu bilip pona vai?
Ma mema namako ya nakai ina.”
42 Taim ma vemona kaute kakai riya Jisas,
spirit taipo vemo,
koavia koraraiyo meꞌri yah korao bia mentanaka karereꞌre.
Tah Jisas katove spirit taipo vemona yah korereiya.
Yah kope Jisas-a karao bia mentanaka vemona kaneman varu.
Yah kope kaiviakire roa varu aka ya.
Namba 2 taim Jisas-a kairai vova veka va narai
(Matyu 17.22-23; Mak 9.30-32)
43 Yah aro bombiam koka kupuana ya God-a keyara tah keririko toro.
Taim aro bombiam prumo ova kekina kina pako pore ao prumo Jisas-a karare emo,
yah kairai roiy disaipel ya veka,
44 “Awirai emo nanairai nopu,
nopu rivo revo,
Ma Biam ya Bio,
va neperiaki nanoi eno peꞌe yei aro taipo.”
45 Toh yei disaipel awirai vemona kairai emo beya ku vo keyara vai.
Ku vo awirai vemona kwinia rokire reiy tah beya keyara vai.
Keriri tah beya ketere poa Jisas ro awirai vemona.
Nape va nakei veka bia pako
(Matyu 18.1-5; Mak 9.33-37)
46 Yei disaipel ya Jisas kekepi ketove tove bia nape va nonoi roiy cha.
47 Yah taim Jisas romoꞌo kuro yei kayara,
yah kope bio mentanaka raꞌa kako ya tah karoi riya.
48 Tah kairai roiy veka,
“Bio ova nakina rona yah narao roa revo bia mentanaka vemona,
emo karao rona revo.
Yah bio narao rona revo,
emo karao roa revo bia ya kairai rona tah kanaro emo.
Emo korao veka,
bio voro beya awoꞌo pako kako romopu vai,
bia ero ya bia pako.”
Bio voro beya kabirua mopu bia ero ya kura mopu
(Mak 9.38-40)
49 Yah kope Cha Jon kairai roa Jisas-a veka,
“Biabiꞌiy,
bio raꞌa kemi yaraka spirit taipo karirikeiki roꞌo awoꞌo mema tah inia kemao mariya,
ku vo koraka,
bia emo beya kakai romi tah inia pa kemekema vai.”
50 Yah Jisas kairai roa veka,
“Beya nopapariya vai,
bia ero beya kabirua mopu vai,
bia voro,
va naroi ripu.”
Samaria beya kepin Jisas-a kakai riꞌiy boko yei vai
51 Taim ya God karao nako ya Jisas nakoi nakeg yake kokakuke ven,
yah Jisas-a ruru katiti moike raꞌa veka va nanoi mataimon Jerusalem.
52 Yah kairai roiy beyo awirai keko kenopi poa cha.
Kenopi boko raꞌa Samaria vora ava nepao keiya va kope nakai.
53 Toh yei aro boko vere beya oꞌto koteiy rova vai,
ku vo koraka,
ya va nanoi mataimon Jerusalem.h
54 Taim disaipel riyempin emo,
Cha Jems re Cha Jon ao vemona kereyara,
yah kere tere poa Jisas veka,
“Biapako,
kamitoro veka rope,
memi va aikera vo heven niymi noraro vora aro vemo nekipari,
o bauni?”
55 Kope Jisas-a karovoruka yah katovei,
56 yah kenopi vova boko raꞌa.
Jisas kairai rou rara vo pa nepekeya
(Matyu 8.19-22)
57 Taim kiute poꞌo rara,
bia raꞌa kairai roa Jisas veka,
“Boko rope nanom nena minia va pa nane kema.”
58 Yah Jisas-a kairai roa veka,
“Yei naki uka,
bo yei nenopi nekepi roki kwinia,
yah rere ruꞌu minia oꞌro rere kwinia.
Kope Ma Biam ya Bio,
bo ya nainia roki kobauni.”
59 Yah kairai roa bia raꞌa vova veka,
“Pava name kena.”
Yah kope bia emo kairai roa veka,
“Biapako,
kuiniari namiꞌin nanoni aka nena karai nanere wo.”
60 Kope Jisas-a kairai roa veka,
“Aro keviri veni va yei veku nepere kamo,
nanomi awirai vo kingdom ya God-a namairirai moiy.”
61 Kope bia raꞌa kairai roa Jisas veka,
“Biapako,
nena va pava nane kema.
Toh namin nanoni varu va eno nane naraiyo aro nena wo.”
62 Yah Jisas-a kairai roa veka,
“Bio boꞌo nena narao tah kope ao vo meꞌri narin noraipaka,
beya kuiniari boꞌo ya God-a narao vai.”