Ero yinhîrî takî tî Xoo nîmtapowakn̂e, enmarî tî nîwîrîmapekn̂e cewrutoponhîrî.

2-3 On wara tî kekn̂e, Enmarî kr̂a ehcamnopu xe wasî oyewrutoponho. Pahxa tî yememe ya ketken̂e, Mewru ham okre kîîrî cik ha, ketken̂e. Kosope tî ketken̂e yîwya. Ero yimawnonho yehcamnopu xe kr̂a wasî kokmamrî pen.

4 Ero enmarî kr̂a tak nawarpantape. Ero ponarora ro mak n̂expe Kaan. Katpape exihra marha n̂expe.

5 Eronhîrî kr̂a tak nawarpantape ro mak tak, kwaihtopo yimawno warai nahsîpe awarpan. Tahruso kr̂a n̂expe kaapu smun ke. Cicwiy xa tak n̂expe ero yeraspetome. Ero wara kr̂a n̂expe enmarî, oyewrutoponho.

6 Ero kokmamrî marha nawarpantatîkape. Enmarî mko yukuknometaw ero enmarî yukuknomara ro mak n̂ehcowpe. Nuun̂i pono mko yukuknometaw kaamo komo, Ero nuun̂i pono mîn enmarî, kacho mewrera ro mak n̂ehcowpe.

7 Wooxam wara ro mak n̂expe ero kokmamrî ha, yîmxîtanî ro wara. Okre, okre, kacho ken̂ehra ro mak n̂expe.

8 Ero ponaro exi xe wasî enmarî yîwîrîmapon̂e komo, Ero kokmamrî yîwîrîmapon̂e me meero exi xe so wasî. Ero wa ka xe wasî Repiatan yenpakan̂e komo.

9 Ero yimawnonho tak nawarpantape marha xir̂ko mko, enmayatawnonhîrî mko. Katpan xe wasî, kan̂e wara n̂expe. Katpan ken̂ehra rma tko n̂expe. Kaamo yepatakacho yenîn̂e pîn me ro mak n̂expe.

10 Ero wa n̂expe ero kokmamrî, oyewrutoponho, yememe pen ropotarî yahrura exirî ke. Oyahwokacho n̂enpekn̂e owya, eyamra xakn̂e enîhra oyehtome okwe. Ero ke ero wa n̂expe oyewrutoponho enmarî ha.

11 Ahce kacho waipîra wîxakn̂e oyewruyataw rma? Ahce kacho yememe pen ropotainonho rma waipîra wîxakn̂e okwe.

12 Ahce kacho yememe pen yosokmuru xakn̂e oyeceton̂e me? Ahce kacho yememe pen manatîrî xakn̂e okwe owokru me?

13 Ero exihra exitaw ketaw ha re oroto tak tîrapo weexirî ha re tîtken̂e. Yîwînîkyatawno wara weexirî ha re okre, cepokaresom wara.

14 Kayaritomo pen komo yakro tak weexirî, roowo pono komo yakîhren̂e pen komo yakro marha. Cewton komo cma re n̂iir̂atken̂e noro yipu komo. Oroto tko ewtotho me mak tak nasî yin̂irithîrî komo. Noro yipu pen komo yakro tak weexirî ha re.

15 Pahxa antomano rin̂e komo xatken̂e, ooru yosom pen komo. Tîmîn komo copoyinketken̂e prata ke marha. Noro yipu pen komo yakro re weexirî. Ero wara re weexirî owaiyataw ewruxapunhîrî rma.

16 Ahce kacho oyokoputho yahrura xatken̂e waihxapu me cewrusom wara? Ero wa naxe anarî komo rikomo pen komo ciki, twaihso n̂eruyaxe katpan yenîhra rma. Ahce kacho ero warahra wîxakn̂e ow hara okwe?

17 Twaipuche so tak eserepokara tak naxe kicicitho pen komo rma. Ekar̂kaxapu pen komo marha tak n̂epokarexe waipuche.

18 Waixapu komo yeken po tak n̂epokarexe kahrutopo yawnonho pen komo. Cemetanmekn̂enhîrî komo mtapotarî yentara tak naxe.

19 Cemyawnoyemînhîrî pen komo naxe iito, emyanomnînhîrî pen komo marha. Tantoman̂enhîrî komo yai towso marha tak naxe okre antonînhîrî komo. Noro yipu komo yakro oyexi xe wasî.

20 Ahce kacho katpan n̂esenpe ahwokatîkaxapu komo ya? Ahce kacho, Okwe okwe, kan̂e ro komo karihce Kaan ha?

21 Twaipu xe mak naxe noro yipu komo. Waipîra so rma tko naxe okwe anarimaw. Twaihtopo komo n̂epor̂axe puranta yepor̂atawno wara ro mak, eyamxapu yepor̂atawno wara.

22 Tawake ro mak tak naxe noro yipu pen komo twaipuche so, cetahruche so roowo cheka.

23 Ahce kacho katpan n̂esenpe cesamarî yenîn̂e pînî ro komo ya okwe? Anarî komo wahkocesî ro mak Kaan ahce na poko exihra ehtome so. Ahce kacho katpan n̂esenpe noro yipu komo ya okwe?

24 Okwe okwe, wîîkesî oyeseresmarî yarohra ro mak okwe. Kemkutunasî ro mak tuuna yarketawno wara.

25 Pahxa oyetwîrîmacho pona keraswakn̂e ro mak. Ero rma tak oyeporas okwe. Ketwîrîme tak na okwe amn̂e, wîîkekn̂e. Ero wara rma tak wai ham okwe.

26 Cereporem me exihra tak was okwe, tîtken̂e exihra wasî. Epokarera ro mak was okwe. Oyemetanmecho mak oyepor̂a ham okwe. Ero wa was okwe, kekn̂e. Ero wa kekn̂e Xoo.