Taa, Huben yepamtho komo tak wekatîmyas hara awya so. Ixaw pen mumutho tî mîk xakn̂e Huben, poturme ewruxapu. Potuthîrî rma re mîk xakn̂e. Tîîm pici poko tko tî xakn̂e kica. Ero ke takno komo yopo tîîm pen yemyawno yahsîn̂e mera tî xakn̂e. Xose mumuru komo xa tî xatken̂e ero wa ahsîn̂e me. Ero ke poturme ewruxapu warahra tak nasî tmewreso Huben yepamtho komo yosotî.

2 Xuta tko tî xakn̂e takno komo yopono me kar̂pe xa. Noro yepamtho tak xatken̂e kayaritomo me. Asak hakno me tporin pen yemyawnonho yahsîn̂e me tko tî xakn̂e Xose.

3 On wara tî xatken̂e Huben mumuru komo, Ixaw mumuru komo potutho mumuru kom ha, Enoke, Paru, Esîron, Kahmi, ero wara.

4 On wara tî xatken̂e Xoew yepamtho komo, Semaias tî xakn̂e yumumuru, Koke tî xakn̂e Semaias mumuru hara, Simei tî xakn̂e Koke mumuru hara.

5-6 Mika tî xakn̂e Simei mumuru hara, Heaias tî xakn̂e Mika mumuru hara, Baaw tî xakn̂e Heaias mumuru hara, Beera tî xakn̂e Baaw mumuru hara. Cikrace Pirese narîtho tî mîk xakn̂e Beera pen, Asiriu komo kayaritomon narîtho. Mokuhnî me thakwa tî naar̂akn̂e. Noro penî tî ka xakn̂e Huben yepamtho komo yantoman̂e me.

7 On wara tî xakn̂e noro pen yananînho komo. Osotî komo tî mewretken̂e karita yaka, Huben Yepamtho Komo Yosotî Tan, kacho yaka. Noro re me cehsom komo tî iito re xakn̂e tmewreso. Ero yimaw tî Xeiew xakn̂e tîyanan komo yantoman̂e me. Sakarias marha tî xakn̂e n̂examro yantoman̂e me.

8 Bera marha tî xakn̂e n̂examro yantoman̂e me, Asas mumuru ha, Sema mumuru tî mîk xakn̂e Asas, Xoew mumuru tî mîk xakn̂e Sema hara. Miya so tî n̂esekenmetken̂e n̂examro Aroe pona roro. Nebo pona roro marha tî n̂esekenmetken̂e, Baaw-Meon pona roro marha.

9 Resce yaw roro tî n̂esenmamyatken̂e axawa imo yemyatkoso, Ewpratesî Yepu xehxan yemyatkoso ha. Ero wa tî n̂esenmamyatken̂e mer̂pora ro mak exirî ke iyoh komo. Xireace po tî ka exitaw so n̂epamyakn̂e iyoh komo mer̂pora cehso ro.

10 On wara tî xatken̂e Huben yepamtho komo pahxa kayaritomo me exitaw Sau pen, Akarenu pen komo waparî me tî cetken̂e. N̂examro pen tî waihketken̂e. Yîmînthîrî komo takî tî nahsiyatken̂e. Ero wa tî n̂esekenmetken̂e Xireace mehxan pona, resce n̂ixan pona. Ero wa tî xatken̂e Huben yepamtho komo.

11 Taa, on wara tî xatken̂e Kace yepamtho kom hara, Huben yepamtho komo panawno me tî xatken̂e. Basan tî xakn̂e eken komo. Miya rma tî xakn̂e eken komo Sawka pona roro.

12 Kace yepamtho komo yenîn̂e tî xakn̂e Xoew. Noro xawyakan tî Sapan xakn̂e hara. Yîxawyaka so takî tî xakn̂e Xanai enîn̂e komo me hara, Sapace marha. Basan pono komo tî n̂examro xatken̂e.

13 On wara tî xatken̂e n̂examro yakno komo, Mikaew, Mesuraw, Seba, Xorai, Xakan, Sia, Ebe, ero wa tî xatken̂e n̂examro yanan komo. 7 tî mîkyam xatken̂e.

14 On wara tî Abiaiw porin pen komo yosotî, Uri mumuru tî mîk xakn̂e Abiaiw, Xaroa mumuru tî mîk xakn̂e Uri, Xireace mumuru tî mîk xakn̂e Xaroa, Mikaew mumuru tî mîk xakn̂e Xireace, Xesisai mumuru tî mîk xakn̂e Mikaew, Xato tî mîk xakn̂e Xesisai mumuru, Bus tî mîk xakn̂e Xato mumuru. Ero wa tî xatken̂e Abiaiw porin pen komo yosotî.

15 Ai tî xakn̂e tîyanan komo yantoman̂e me hara. Abiciew mumuru tî mîk xakn̂e Ai, Kuni parî ha.

16 Xireace pono komo tî mîkyam xatken̂e Kace yepamtho komo, Basan pono komo marha tî. Ero po tî xakn̂e n̂examro yewton komo roowo po. Miya rma tî xakn̂e woskaran komo, iyoh komo nahrî yewtî, Saron rowon poko hakî tî xakn̂e.

17 Ero warai komo yosotî tî mewretken̂e karita yaw pahxa n̂he Xotaw exitaw Xuta yepamtho komo kayaritomon me, Xeroboaw exitaw marha Ixaw Yana komo kayaritomon me.

18 On wicakî tî xatken̂e n̂examro sowtatun komo, Huben yepamtho komo, Kace yepamtho komo, Manases yepamtho poyinonho komo sowtatun kom ha. 44.760 tî mîkyam xatken̂e. Karitî komo tî mîkyam xatken̂e, yaana me tî xatken̂e cecen̂an komo yaatopo poko, kacipara imo ke waihkano ritopo poko marha, waiwî yar̂macho poko marha tî. Ahce na ke na cetar̂macho poko xatken̂e yaana me. Ero wa tî xatken̂e n̂examro, sowtatu me cehsom me tî xatken̂e.

19 Pahxa tî Akarenu komo yakro tî n̂etar̂metken̂e. On wara tî xatken̂e n̂examro pen kayaritomonho komo, Xetu, Napis, Notabe, N̂examro pen yakro tî n̂etar̂metken̂e Huben yepamtho komo.

20 Akarenu komo yakro cetar̂metaw so rma tî Kaan yakro tî nîmtapowatken̂e takronomacho komo poko. Yîmtapotarî komo tî n̂encekn̂e Kaan. Ero ke n̂examro tî nakronomekn̂e tpona enîrî ke yîwya so. Akarenu pen komo tî nar̂mapekn̂e yîwya so, akrononhîrî pen komo marha. Ero warai komo tî nar̂mapekn̂e Kporin komo Huben yepamtho komo ya, Kace yepamtho komo ya, Manases yepamtho komo ya marha.

21 Akarenu pen komo yokutho pen tî naar̂atken̂e mer̂pono pîn. Kameru tî naar̂atken̂e 50.000, oper̂a tî 250.000, buhu tî 2.000. Ero wicakî tî naar̂atken̂e iyokuthîrî komo. Tooto pen komo marha tî naar̂atken̂e 100.000 yakenon.

22 Anarî pen komo tî waihyatken̂e paraxkaxapu me, mer̂pono pîn. Ero wa tî xatken̂e Ixaw Yana komo iyopo so Kaan yanme mak ar̂mano rirî ke. Ero yinhîrî takî tî ekenhîrî komo po xatken̂e miya roro twaparî komo mohtopo pona roro ha. Ero wa tî xatken̂e.

23 Taa, iito marha tî xatken̂e Manases poyinonho komo cekenke. N̂epamyatken̂e marha tî n̂examro. Basan po tî xatken̂e. Miya roro tî xatken̂e Baaw Ehmon pona roro. Seniri, kacho rma tî mîn xakn̂e Ehmon Yîpîn.

24 On wara tî xatken̂e n̂examro yantoman̂e komo yosotî, tîyanan komo yantoman̂e komo yosot ha, Epe, Isi, Eriew, Asîriew, Xeremias, Otapias, Xaciew, ero wara. Sowtatu me cehsom komo tî mîkyam xatken̂e erasîn kom ha, miya so cekaiporesom komo marha. Tîyanan komo yenîn̂e me tî xatken̂e.

25 Kaan poko tko tî n̂eponarononketken̂e kica, ponaro tporin pen komo yehtoponho ha. Ponaro iitononhîrî pen komo yehtoponho ya takî tî n̂etîmyatken̂e okwe, Ixaw Yana komo ya n̂examro pen nar̂mapekn̂e Kaan, ponaro n̂examro pen komo yehtoponho ya tî n̂etîmyatken̂e. Kporin komo yai ro mak takî tî xatken̂e ciin̂onhîrî yai ro cehsom wara rma kica.

26 Ero ke ponaro Ixaw Yana yehtopo rma tî Asiriu komo kayaritomon n̂iirakn̂e expora Ixaw Yana komo poko. Puw tîmîk xakn̂e noro yosotî, Cikrace Pirese kacho rma mîk ha. Noro tî n̂iir̂akn̂e Kaan expora Ixaw Yana komo poko. Noro takî tî iitononhîrî komo naar̂atken̂e mokuhnî me hara okwe. Huben yepamtho pen komo, Kace yepamtho pen komo, Manases yepamtho poyinonho pen komo, noro yipu komo tî naar̂akn̂e noro. Meyeno pona kr̂a n̂examro pen naar̂akn̂e Ara pona, Abo pona, Ara pona, iina tî n̂examro n̂ekenmekn̂e. Kosan Yepu yecihtaka marha tî n̂ekenmekn̂e. Iito rma naxe oroto. Ero wa tî anana ekenmano n̂iir̂akn̂e Asiriu komo kayaritomon.