Taa, on wara kekn̂e hara Kporin komo Moises ya, On wara marha kasko Ixaw Yana komo ya, Puruma tîmî xe na nai anarî Aporin komo ya. Ero warai tîmî xe cexitaw aposokaxapu n̂esmape katî yakro, kotoporem yakro marha.

2 Ero yipu poi ka n̂ekpe Araw mumuru yaka, tîmsom pokono yaka. Noro tak namekpe wahra makî tamorî yaw mak. Tînamekîthîrî tak nakn̂ipe akn̂itopo pona Kaan ponaro n̂he ehtome tîmn̂e. Ero wa akn̂iyataw kotoporem me xa nasî yîsîn okre Aporin komo ya.

3 Puruma yakwenho tak nasî Araw komo yuru me, yumumuru komo yakro. Ero rma nasî Aporin komo ya tîmtopo ha. Yîwya tîmtopo ro xa mîn, akn̂itopo ha, kekn̂e. Ero wa kekn̂e Kporin komo Moises ya.

4 Anarimaw puruma yekî xe rma na matu owya tîmsom, yupuxapu reha. Ero yipu yekî xe awexitaw so puruma ehcoko aposokaxapu. Ero yipu cheka wahrututpamnotopo cirihra ro mak ehcoko. Porin me so yupu xe cexitaw katî yakro esmacoko yuputome tak. Wahrai mko yupu xe cexitaw kapecoko yîmkari yupuche mak. Ero yipu akn̂icoko owya tîmsom me.

5 Anarimaw er̂po pona na mayatu puruma owya tîmsom. Ero wa ai xe awexitaw so puruma aposokaxapu rma esmacoko katî yakro. Wahrututpamnotopo cirihra ro mak ehcoko. Ero yipu tak aicoko er̂po pona.

6 Ero yinhîrî tak aixapu poikacoko. Ero wa ciixapu pore tak katî yukmamcoko. Ero wa puruma ciicoko owya tîmsom ha.

7 Anarimaw puruma yupu xe na matu prixiteira yaw. Ero wa ciri xe awexitaw so katî ka esmacoko puruma cheka aposokaxapu cheka. Ero yinhîrî tak yupucoko. Ero wa ciicoko owya tîmsom.

8 Ero wa ciixapu tîmî xe awexitaw so ohyaka ehcoko Aporin komo yaka. Tîmsom pokono ya tîmcoko. Noro tak naar̂a tîmsom yakn̂itopo pona.

9 Iina arîche takn̂isom namekpe wahra mak. Ero yipu tak nakn̂ipe oponaro awehtopo komo me. Ero wa akn̂iyataw kotopore nasî yîsin Aporin komo ya.

10 Ero yakwenho tak nahsîpe Araw tuuru me, yumumuru komo yuru me marha. Ahnoro rma tko nasî Aporin komo ya tîmxapu me ero wa akn̂iyataw, tîmyataw marha tîmsom pokono komo ya.

11-12 Ero wara men ciicoko puruma, owya tîmsom ha, wahrututpamnotopo ken̂ehra ro mak ciicoko. Wahrututpamnotopo ken̂arî akn̂ipîra ro mak ehcoko owya tîmsom, weenu ken̂arî akn̂ipîra marha. Ero warai komo akn̂ipîra ehcoko. Yihcirî me epetaxapu yekyataw reha owya tîmsom me akn̂ipîra ro mak ehcoko. Kotoporem me takn̂isom mera ro mak nasî ero yipu.

13 Puruma yekyataw owya tîmsom me, yîmîtî ke yîkporexapu men ehcoko. Kaanî mtapotacho ponarono ow ha, kacho rma mîn yîmîtî ken̂arî. Ero ke puruma yekyataw owya tîmsom me yîmîtî ken̂arî mak tîmcoko owya.

14-15 Yîhcirî me epetaxapu yekî xe awexitaw so puruma, owya tîmsom me ekî xe awexitaw so yaxkuru yupucoko kir̂wan, ehyatkawnonhîrî potuxapu ha. Yupuruche ero yakro tak katî esmacoko, kotoporem marha.

16 Ero poyino ciki nakn̂ipe tîmsom pokono owya tîmsom me, katî ken̂arî rma nakn̂ipe, kotoporem ken̂arî. Ero warai nakn̂ipe Kaan ponaro n̂he awehtome so, kasko yîwya so, kekn̂e. Ero wa kekn̂e Kporin komo Moises ya.