˻Juda-yambomane ponie tenga-tenga kolea-aili Jerusalleme ongo akuna suku˼ Pulu Yemone enenga anda-kolepalime Naa Topa We Omba Purumu mele pilingindu kongi-sipisipi nonge walemo opali mele wendo ombá terimu.^a Yesusi yu nondopa ma-koleamo mundupe kelepa Lapa molorumuna pumbe yu kinié-mele pilirimu.^b Yuni yunge mana moloringi yamboma konopu monjipe molorumu mele pe kinié kepe yu kolombando ene kamu paa konopu monjipe kolomba terimu.

2 Yesusi yunge opa-tou yema Saimono-Isikeriote malo Judasini lipe simbe ungumu ˻kurumanga nomi˼ depelemone^c Judasi yunge konopuna koronga panjinjipili,^d Yesusi kinie yu lombili andolime kinie ipupini langi nongo moloringi.^e 3 Yesusini pilipelie, Lapane mélema pali yu “Nokoi!” nirimu, yu Pulu Yemo mundupe kelepa manie orumu, altopa Pulu Yemo molombana olando kelepa pumbe terimu mele pilipe molorumu.

4 Aku-sipe pilipelie, yu langi nongo moloringimu mundupe kelepa ola angilipelie yunge ola-wale-pakoli pakorumumu kulupe wendo lipe nosipe, kendemande-yambomane yambomanga kimbu kulumiye tonjingindu teringi mele^f yuni aku-sipe kangi kulu toli múlu te lipe panjipelie nirimumuni, 5 pellete tenga no ondo-lepa mundupe yu lombili andolimenga^g kimbuma pulu monjipe kulumiye tonjipe kulu toli múlumu porona panjirimumuni kulu tonjirimu.

6 Kulumiye topa kulu tonjilipe ombalie Saimono-Pita molorumuna orumu kinie Pitane yundu nimbendo: “Ailimu, nuni nanga kimbumu kulumiye tonjini tekenoye? Paa manda mólo!” nirimu.

7 Yesusini pundu topa yundu nimbendo: “I tekero mele nu kinié naa pilkinu nakolo pe piliní” nirimu.

8 Pitane yundu nimbendo: “Nu nanga ye-ailimu kene kinié kepe pe kepe nuni nanga kimbutolo kulumiye paa naa tonjini, mólo!” nirimu.

Yesusini nimbendo: “Kulumiye naa tonjindu liemo nu kinie na kinie pea tapú-topo naa molombolo.” nirimu.

9 Yesusini aku nirimu-na pilipelie Saimono-Pitane ˻‘Kimbu ki kepe kangime pali kulumiye tonjimbe kinie paa kamu kamu pea tapú-topo andombolonje.’ konopu lepalie˼ nimbendo: “Ailimu, aku temba kene kimbu mindi mólo! Kimbu-ki kepe kangime pali kulumiye tonji!” nirimu.

10 Yesusini nimbendo: “Yambo te yunge kangime pali kulumiye topalie pe yu kolea tenga pulimo kinie yunge kimbuna ma angilimoma kelepa kulumiye tolemo kinie yu kangime pali altopa kake telemo. Kinié ene kake tepili molemele, nakolo ene pali mólo!” nirimu. 11 Yuni pilipelie, ‘Ene molemelemanga ye tene na lipe nanga opa-touma simbe tekemo.’ nimbe pilipelie ‘Kanu yemo konopu kalaro molopili molemo.’ nimbendo ungu-iku topa “Ene pali kake tepili naa molemele.” nirimu.

12 Kanu-kinie yuni enenga kimbuma kulumiye topa pora sinjipe, yunge ola-wale-pakolimu lipe pakopa kelepa manie molopalie nirimumuni, ene walsipe pilipelie nimbendo: “Nane kinié enenga tenjindumunge ulu-pulumu enene pilkimiliye? 13 Enene na imbi lelkolie “Ungu-Mane Sílimu” nilimelela, “Ailimu”^h nilimelela. Aku imbitolo papu lemele, na aku-sipu moliomo. 14 Na enenga Ailimu molopo enenga Ungu-Mane Sílimu molio nakolo pe kinié kendemande-koropamane telemele mele tepo enenga kimbuma kulumiye tonjindu kene ene kepe ‘Kendemande-koropama mele molamili!’ ningu anju-yando eneno kimbu kulumiye tonjengila.ⁱ 15 I ulu-pulumu nane ‘Ene teangi!’ nimbu lipu ora sindu kene enene aku-siku pe-pe-kepe teangi! ˻Kimbumundu mindi naa nikiru. ‘Ene ‘Yambo peangama molopolie yamboma lipu naa taponjimulú.’ naa ningu, ‘Kendemandema mele molamili!’ ningu molangi!’ nimbu i ulumu tendu.˼

16 “Nane enendo paa sike nimbu sikirumu: “Kongono tenjili yambo tene yunge nokoli yemo ‘Manie-mele pupili! yu ‘Ola-mele pambo!’ manda naa nimbé.^j Yambo kongono pupe tenjilimo yambo tene ‘Yu kongono pupe tenjipili!’ nimbe mundulimo yambomo ‘Manie pulimo.’ yu ‘Olandopa-mele molemo.’ manda naa nimbé kene na enenga ailimu molopolie enenga kongono keri te tenjindu aku-mele ene yambo-lupemanga aku-siku kongono tenjengila!” nikiru. 17 Enene i unguma pilku konjikulie nikiru mele tenge kinie ene molko konjiku konopu singí.” nirimu.^k

18 “Nane “enendo” nikiru akumu enendo pali naa nikiru. Nane enenga konopuma kanopolie ‘Nanga yema molangi!’ nimbu ou mako torundu,^l nakolo ‘Pulu Yemonga bokuna ungu te molemo mele aku-sipe wendo opili!’ nimbu nane enenga ye te mako torundu. Aku ungumu molemo mele i-sipe:

19 “ ‘Aku ulumu wendo ombá kinie ‘Na sike ou molorumu, kinié molopa mindi pulimo yemo.’ⁿ ningu tondolo-munduku piliengi!’^o nimbu aku ulumu ou wendo naa opili nane aku ungumu ene nimbu sikiru. 20 Nane enendo paa sike nimbu sikirumu: “Yambo te “Nanga kongono tenji-pui!” nimbu lipu mundulio yambomo kolea tenga pupe yambo te molemona pulimo kinie ‘Papu okono. Pea molambili oi!’ nilimo yambomone na kepe ‘Pea molambili oi!’ nilimola. Kanu-kinie kanu yambo nando “Pea molambili oi!” nilimo yambomone na lipe mundurumu ye Tara kepe “Pea molambili oi!” nilimola.” nikiru.” nirimu.

21 Yesusini aku nimbelie nirimumuni, yunge konopumu paa umbuni terimu-na yu lombili andoli yemando nimbe sipelie nimbendo: “Nane ene paa sike nimbu sikirumu: “Ene molkomele yemanga tene na lipe nanga opa-touma simbe.” nikiru,” nirimu.

22 Yuni aku nirimu-na pilkulie lombili andolime eneno anju-yando kumbikerena nemo-nemo ningu kanokolie ‘Naene aku tembamondo nikimunje?’ konopu leringi.

23 Enenga ye te, kanumu Yesusini paa konopu monjirimu,^p aku yemo Yesusi molorumuna nondopa molorumu. 24 Akumunge, Saimono-Pitane aku yemondo ólo topa kiyongo nimbelie nimbendo: “Yu naendo nikimunje? Walsiku pilí!” nirimu.

25 Kanu-kinie lombili andoli kanumu Yesusi molorumuna nondopa pupe molopalie yundu komuna ólo topalie nimbendo: “Ailimu, naendo ninuye?” nirimu.

26 Yesusini pundu topa nimbendo: “Nane langi te lipu simbu ye akumundu nindu.” nirimu. Aku nimbelie langi te lipe Saimono-Isikeriote malo Judasi sirimu.

27 Yesusini langi sirimumu Judasi lirimu kinie yunge konopuna ˻kurumanga nomi˼ Setene^q sukundu purumu kinie Yesusini yundu nimbendo: “Nuni ulu teni tekenomo welea puku te-pui!” nirimu, 28 nakolo langi pea nongo moloringi yema Yesusini Judasindu ungu nirimumunge pulumu naa piliringi. 29 Judasini enenga kou-walemo nokonjilimomonga marene pilkulie, ‘ ‘Pulu Yemone olionga anda-kolepalime Naa Topa We Omba Purumu mele^r pilimulúndu langi nomolo mare pupe topo topa li-pupili!’ nimbe nikimunje molo ‘Yambo-koropama lipe taponjipe kou te pupe si-pupili!’ nimbe nikimunje.’ konopu leringi. 30 Judasi langi sirimumu lipelie walsikale omba pena purumu. Omba pena purumu kinie kolea sumbulu topa pepili omba pena purumu.

31 Judasi-Isikeriote pena purumu kinie Yesusini we lombili andoli ulkena pea moloringimendo nimbendo: “Kinié Manie Omba Mana-Ye Au Lerimu Yemonga imbimu paa olandopa molomba tekemo.^t Kanu-kinie yunge imbi paa olandopa molombamonga Pulu Yemonga imbimu kepe paa olandopa molomba. 32 Kanu-kinie Manie Omba Mana-Ye Au Lerimu Yemonga imbi paa olandopa molombamonga Pulu Yemonga imbimu paa olandopa molomu liemo^u Pulu Yemone kanu yemonga imbimu kinie ‘peatolo paa olandopa molopili!’ nimbé. Aku nimbémo paa nondopa isili-mele nimbé.

33 “Nanga ambolangoma, na ene-kinie laye-kolo molkoro. Pe enene na koroko kelenge. Juda ye-ailime ou aku-sipu nindu mele^v kinié enendo aku-sipu nimbu sikiru. Na pumbu tekero kolea akuna ene manda naa onge.”^w˻nirimu.˼

34 “Nane ‘ene teangi!’ nimbu ungu-mane kondengamo ene nimbu sikirumu: “Ene anju-yando konopu monjengi!”^x nikiru. Nane ene konopu monjindu mele ene anju-yando aku-siku konopu monjengila! 35 Ene anju-yando konopu monjíngi liemo aku-siku tenge kinie we-yambomane kanokolie ‘Ene nanga lombili andolime molemele.’ ningu kanonge.” nirimu.

36 Saimono Pitane yu walsipelie nimbendo: “Ailimu, nu tena puniye?”^y nirimu.

Yesusini pundu topa nimbendo: “Na pumbuna nu isili-ou manda naa oni. Nakolo pe nu sike lombili oni.” nirimu.

37 Pitane walsipelie nimbendo: “Ailimu, nu puni aulkena na isili-ou nambemuna manda lombili naa omboye? Na nu lipu taponjipu kolondu liemo mandala.” nirimu.^z

38 Yesusini pundu topa nimbendo: “Nu sike na liku taponjiku koloniye? Nane nundu paa sike nimbu sikirumu: “Kera-gulta ou ko naa topili nuni ˻pipili kolkolie˼ wale yepoko nando kolo toko “Yu naeye? Na naa kanolio..” nini.”^a nikiru.” nirimu.