2 Aku temanemo toringi kinie pilipelie Yesusini enendo nimbendo: “Kanu kolea Gallilli-yamboma aku-siku mindili noringi-ne pilkulie ‘Gallilli-yambo moloringi lupe wemane ulu-pulu keri teringi mele maniendopa, kanu mindili noringi yamboma ulu-pulu keri teringi mele paa olandopa.’ konopu lekemeleye?

3 Paa sike nane enendo “Aku-sipe mólo!” nikiru. Ya molkomele yamboma, ene ulu-pulu keri telemelema bulu siku munduku kelko konopu alowa naa tengi liemo ene aku-siku toko konjingíla.” nirimu.

4 Pe kelepa Yesusini temane te topalie nimbendo: “Kolea-aili Jerusalleme sukundu kolea-kanga Silloamo kouni takoli ulke aili olana te topa kalalu sipe topa manie mundupelie yambo-supunge talo^a topa konjirimu koloringi. Kanu yamboma ‘Kolea-aili Jerusalleme yambo lupe moloringimene pali ulu-pulu-keri teringi mele maniendopa, koloringi yambomane ulu-pulu keri teringi mele paa olandopa.’ konopu lekemeleye?

5 Paa sike nane enendo ‘Aku-sipe mólo!’ nikiru. “Ya molkomele yamboma, ene ulu-pulu-keri telemelema bulu siku munduku kelko konopu alowa naa tengi liemo ene aku-siku kolongela.” nikiru.” nirimu.

6 Aku nimbelie kelepa ungu-iku te^b topalie enendo nimbendo:

7 Piki-mongo te naa torumu-na yunge unju-waene ponie tápu terimu yemondo nimbendo: “Pílie! Ponie talo yepoko pea i unju-piki angilimomonga ombo kanorundu nakolo piki-mongo telu kepe naa torumu kene yuni ma-kopongo we nolemo kene peko toko ele-tei!” nirimu.

8 Ponie pulu yemone aku-sipe nirimu kinie ponie tápu terimu yemone yundu pundu topa nimbendo: “Ailimu, i ponie telumu mindi aku unjumu we angilipili! ‘Unjumu akopa mongo topili!’ nimbu unju-puluna era tepo, ma mundupu, kongi-le lipu mundupu, teambo!

9 Pe nekendo poniemonga mongo tomu liemo papu. Naa tomu liemo kamu peko tani!” nirimu.” ˻nimbe Yesusini˼ nirimu.

10 Walse, ˻Juda-yambomanga koro moloringi˼ Wale-Sambate tenga^d Juda-yamboma máku toko Pulu Yemonga ungumu piliringi ulke tenga suku Yesusi pupelie yamboma ungu-mane sipe molorumu.

11 Akuna ambo te molorumu, yu kuru topa bulu langorumu-na ola angilipe sinio simbendo perepa molorumu. Yu aku-sipe molopili ponie supunge talo omba purumu.

12 Yesusini kanu ambomo kanopalie yundu “Oi!” nimbelie nimbendo: “Ambomo, nu kuru torumumu topa kelepili!” nimbelie

13 ambomo kini ambolorumu kinie yu tamburembu sumbi-sipe ola angilipelie Pulu Yemo kapi nirimu.

14 Nakolo kanu ulkemo nokorumu yemo yuni Yesusi ˻koro mololi˼ Wale-Sambatemonga yambo tepa konde lirimu-na kanopa keri kanopalie akuna máku toringi yambomando nimbendo: “Kongono-wale talo-pakara lemomanga ‘‘Kuru tomba yamboma konde pamili!’ ningu onge manda. ˻Koro mololi˼ Sambate-Walemonga manda mólo!” nirimu.

15 Yemone aku-sipe nirimu kinie Yesusini nimbendo: “Ene topele-mapele toli yema,^e alieli ˻koro mololi˼ Wale-Sambate wendo olemo kinie ene pali yu-mele-mele enenga kongi-kao molo kongi-dongi langi nomba molemona moki lelko no olemo kolea tenga ‘No nopili!’ ningu mengo pulimele kanumu.

16 Ene enenga kongime Sambate-Walemonga papu moki lelko nokolemele kene i ambomo Sambate-Walemonga papu lipu taponjikirula. Kongime maniendopa mele, yamboma olandopa mele kanumu. Akumunge i ambomo, yu Eporayamone kalopa lirimu ambo te, ˻kurumanga nomi˼ Setenene^f yu ponie tene eti ka-mele sirimu ambomo Sambate-Walemonga moki lepo nokokoromo tepo kenjikiruye?” nimbe walsirimu.

17 Yuni aku-sipe nirimu kinie kanu ungumuni yu terimu mele kanoko keri kanoringime olie poloringi nakolo we-yambomane yu ulu-tondolo peangama terimu kanokolie konopu aili-teko siringi.

18 Kanu-kinie Yesusini ˻yambomando˼ kelepa nimbendo:

19 Akumu i-sipe mele: Ye tene yu unju-masetete umbu te lipe yunge poniena umbumu mundurumu kinie kanu unju-umbumu wendo omba ai-lepa unjumu angilirimu kinie aku unjumunge kolamanga kerama ongo peringi. Pulu Yemo ye-nomi-kingi molemo mele aku-sipe.” nirimu.

20 Aku nimbelie kelepa walsipe pilipelie nimbendo: “Pulu Yemo ye-nomi-kingimu molopa yamboma nokolemo mele pilingí nambe-tepo nimbu siemboye?

21 Akumu i-sipe mele: Ambo tene yu langi pillawa akoli méle yísiⁱ wallo-kolte lipelie pillawa aisilinge mundurumu kinie pillawa pali akorumu. Pulu Yemo ye-nomi-kingi molemo mele aku-sipe.” nirimu.

22 Aku-sipe nimbelie pe Yesusi kolea-aili Jerusalleme pulimo aulkena pumbe pupelie kolea-ailime kinie kangama kinie pupe, akumanga moloringi yamboma ungu-mane sirimu.

23 Kanu yambomanga tene yu walsipe pilipelie nimbendo: “Ailimu, mindili nomolo aulke molemolona Pulu Yemone yamboma lipe taponjipe wendo lipe yu-kinie molko konjingí aulkena lipe monjimbe^j yamboma wallotolo mindiye?” nimbe walsirimu.

24 “Ulke-kerepulu paa kanga si niline yambo aisili ongo suku pungíndu perenge. Akumunge ‘Kanu kerepuluna ene ongo sukundu puku molongendo mindili siku pangi!’ nimbu nikiru.^k

25 Ulke pulu yemone ola angilipe kune anjimbe kinie ene pena molkolie ningímuni, kune toko walsikulie ningindu: “Ailimu, olio nu-kinie pea molamili wamili kene olionga kune linji!” ningí kinie yuni enendo nimbendo: “Enenga imbime na naa pilipu ene kepe enenga koleama kepe na naa kanolio.” nimbé.

26 “Yuni aku nimbé kinie enene yundu ningindu: “Nu pea ga norumulu. Olionga koleamanga nu ongolie olio ungu-mane sirinu.” ningí.

27 “Nakolo yuni enendo nimbendo: “Ene niembo piliei! Enenga imbime na naa pilipu, enenga koleama na naa kanolio. Ene ulu-pulu-keri teko molemele yamboma pali na moliona anju pai!” nimbé.

28 Akuna ulsu molkolie ene ˻anda-kolepali˼ Eporayamo kinie, Aisake kinie, Jekopo kinie, Pulu Yemone ungu-umbu tonjirimuma pilku yamboma ningu siringi yema pali kinie, ene Pulu Yemo ye-nomi-kingimu molopa nokomba koleana sukundu molonge kanokolie ene-eneno akuna ulsu molonge kanokolie ene-eneno mumindili kolko kola teko mini-wale mundungí.” nirimu.^l

29 Isirele-yamboma ene Pulu Yemo ye-nomi-kingimu molopa nokomba koleana sukundu ene manjiku naa pungí ‘Piliengi!’ nimbelie yuni kelepa nimbendo: “Ma-koleana pali yambo mare Pulu Yemo ye-nomi-kingimu molopa nokomba koleana sukundu puku Pulu Yemo pea langi nonge.

30 Pilieme! Akilku olemele yambo mare Pulu Yemo ye-nomi-kingimu molopa nokomba koleana sukundu kumbi-lelko pungí. Kumbi-lelko oringi yambo mare akilku pungí.” nirimu.^m

31 Walse, Yesusi ou Jerusalleme naa pupelie kolea tenga ungu nimbe molorumu kinie Parisi-ye marene^o ongo yundu ningindu: “˻Ye-nomi-kingi˼ Erotene ‘Nu topo konjembo!’ nimbe molemo kene nu ya naa molkolie tenga kowa pui!” niringi.

32 Yesusini enendo nimbendo: “Na tomba tekemo yemo, yu kolo topa konopu keri peli owa-takara pokisi^p mele akumu molemona i ungumu puku ningu si-pai!” nimbelie nimbendo: “Kinié mele kepe opali talú mele kepe kuruma yambomanga konopuna pelemoma makoropo, kuru toli yamboma tepo konde lipu, molopolie laye pe-mele na kongono tepo moliomo pora simbu.

33 Nakolo Jerusalleme pumbundu kinié kepe opali talú kepe na we-kongono telipu pumbu. Pulu Yemone ungu-umbu tonjilimoma pilipe yamboma nimbe silimo ye te kolea-aili Jerusalleme ulsukundu manda naa kolomba kene ˻na Pulu Yemone ungu-umbu tonjilimoma pilipulie yamboma nimbe silimo yemo molio kene˼ na Jerusalleme ulsukundu manda naa kolombo.” ˻nirimu.˼^q

34 ˻Aku nimbelie Yesusini Jerusalleme moloringi yamboma yu kondo kolopa akumundu ungu te nimbelie nimbendo:˼

35 Akumunge pilieme! ˻Opa-touma ene tonge onge kinie Pulu Yemone altopa ene naa nokopa naa lipe taponjimbemonga˼ opa-toumane ongo sike toko munduku enenga koleamo kinie enenga ulke-tembelemo kinie kamu toko kalongemonga ene ku penge.^r Nane ene ungu te pea nimbu sikiru: