Yesusini Pulu Polopa Ye Mare “Na Lombili Wai!” Nirimu Temanemoa
5
(Pulu Yemonga ungumu. Kolomongo-kanga wane.)
Walse, Yesusi Nomú-Geneserete, ˻akumundu ‘Nomú-Gallilli’ niringila kanumu,˼ aku nomú-kélona angilipe yamboma Pulu Yemonga ungumu nimbe sirimu kinie pilingindu ene yu angilirimuna puku máku toko nondoko-nondoko puku ekelepa teko molko piliringi.
2 Kanu-kinie yuni nona andoli sipi talo nomú-kélona lerimu-tolo kanopalie, oma lili yema koronga nomú-kélona wendo puku enenga oma lili walema kulumiye toko moloringi kanorumu.
3 Sipi te Saimono-Pitanga, akuna sukundu pupelie yuni yundu mawa tepalie nimbendo: “Sípimu laye-kolte paka toko nona sukundu mundoi!” nirimu. Paka topa nona sukundu mundurumu kinie aku sipimunge suku yu manie molopalie nirimumuni, no-kélona liku máku toko moloringi yamboma ungu-mane sirimu.
4 Ene ungu-mane sipe pora sipelie yuni Saimonondo nimbendo: “Sípimu nomú ai-suku-singine kunduku mengo pukulie oma lili walema nona manie mundu!” nirimu.
5 Saimonone pundu topa nimbendo: “Ye-Nomimu,b kinié ipulueli pali oma lili kongono tondolo-mundupu tepo molopo tangonjipuliec oma te paa naa límulu. Nakolo aku nikinu kene walemo nona manie mundembo!” nirimu.
6 Kanu-kinie walema nona manie munduringi kinie oma aisili walemanga sukundu puringi-ne walema sipine sukundu lingí teringi kinie sungu nimbé terimu.
7 Walema sungu nimbé terimu kanokolie enene enenga oma lili kongono pea tapú-toko teringi yema, sipi tenga moloringime walsikulie “Ongo liku taponjengi wai!” niringi. Oringi kinie sipi talo pea peke siringi umbuni tepa nona manie pumbe terimu.
8 Aku ulumu kanopalie Saimono-Pita Yesusinge kumbi-kerena omba manie molopa tamalu pepalie nimbendo: “Ye-Ailimu,d na ulu-pulu-keri ambololi yemo ˻nu kake teli yemo˼. ˻Teluna molkombolo kapola naa tekemo˼ kene anju puku nu lupe moloi!” nirimu.
9 Saimono kinie, yu-kinie pea moloringime kinie, enene oma aisili walsikale tangoli liringi kanokolie ene suru ningu mini-wale munduringi-ne ˻Saimono-yuni aku-sipe nirimu˼.
10 Seperinge malo Jemisi kinie Jonotolo elte Saimono-Pita kinie kongono teluna tapú-toko teringili yetolo, elte pea mini-wale munduringilila.
Kanu-kinie Saimonone nirimumu pilipelie Yesusini yundu nimbendo: “Nu pipili naa koloyo! Kinié oma linindu oma lili wale liku nona manie mundulino kinie omama walena omba pelemo mele, pe nanga kongono tenjinindu nanga ungumu pilku ningu siliku andoni kinie yamboma nanga talapena sukundu ongo molonge.” nirimu.
11 Kanu-kinie enenga sipitolo nomú-kélona mengo ulsu ongolie, sipitolo mélema pali lepili munduku kelko Yesusi lombili puringi.e
Yesusini Kuru-Kendi Norumu Ye Te Tepa Konde Lirimu Temanemof
12 ˻Kolea Gallilli-disiriki sukundu lerimu˼ koleamanga tenga Yesusi molorumu kinie ye te kuru-kendi aili-tepa nomba perimumu omba Yesusi kanopalie manie molopa tamalu pepa yu mawa tepalie nimbendo: “Ailimu, nunge konopumuni na ‘Konde pambo!’ konopu lenu liemo nuni na manda teko konde lini.” nirimu kinie
13 Yesusini yemo kini ambolopalie yundu nimbendo: “ ‘Nu konde pani!’ konopu lekero kene konde pui!” nirimu kinie tamburembu kuru-kendimu nomba kelepa kangimu peanga lerimu.
14 Kanu-kinie Yesusini yu ungu te tondolo-mundupe nimbendo: “Nuni ya ulu tekeromo yambo telurindu kepe paa naa ni! Sumbi-siku puku Pulu Yemo popo tonjili yemo nunge kangimu liku ora siku, ‘Na altopo kangi peanga lepili molkoro kene.’ ningu Mosisini “Tei!” nimbe ungu-mane sirimumug pilku liku tenindu “Pulu Yemo popo toko kalko si!” nirimu mélemo liku Pulu Yemo popo tonjili yemondo “Kalonji!” ningu yu sieni! Pe yambomane nu kanokolie ‘Yu sike kangi peanga lepili molemo.’ ningu piliengi kene nikiru mele isili-ou te-pui!” nirimu.
15 Nakolo yuni terimu mele anju-anju yambo aisilini pilkulie niringimuni, yu molorumuna sukundu-sukundu ongo yu temane-peanga topa nirimumu pilingindu ongo, kuru torumu yamboma yuni ‘Ene tepa konde lipili!’ ningu oringi kanopalie
16 yu ene oringine mundupe kelepa kolea ku leli tenga pupe Pulu Yemo-kinie ungu nirimu.
Yesusini Kimbu-Ki Kolopa Pora Sirimu Ye Tenga Ulu-Pulu-Kerime Siye Kolonjipe, Yu Tepa Konde Lirimu Temanemoh
17 Walse Yesusi yuni yamboma ungu-mane sipe molorumu. Kuru toli yamboma tepa konde lili tondolomo yu-kinie pepili molorumu. Pulu Yemone kanu tondolomo yu sirimu. Parisi-yema kinie, Pulu Yemonga ungu-manemanga puluma pilku mane siringi yema kinie,i yu ungu-mane sirimuma pilku moloringila. Kanu yema, kolea Gallilli-Disiriki sukundu lerimu koleamanga moloringime kinie, kolea Judia-Disiriki sukundu lerimu koleamanga moloringime kinie, kolea-aili Jerusalleme moloringime kinie, Yesusi molorumuna ongo máku toko yu ungu-mane sirimuma pilku moloringi.
Jesus Heals a Paralytic (Luke 5:17-26)
18-19 Yu molorumuna ye marene kimbu-ki kolopa pora sirimu ye te taropola teko mengo onge oringi nakolo yambo aisili ulke-kerepuluna ekelepa teko angiliringine ulkena suku Yesusi molorumuna nondoko mengo pungí aulke te naa kanokolie niringimuni, ulke-imuna mengo ola pukuliej Yesusi molorumuna ˻kana-kana ulkemo tekisikulie˼ yemo taropola pali moko toko manie munduringi.
20 ‘Yesusini i yemo manda tepa konde limbe.’ ningu tondolo-munduku pilkulie yu mengo oringi kanopa pilipelie Yesusini kanu yemondo nimbendo: “Kangomo, nunge konopuna ulu-pulu keri terinu pelemoma manie pupili, we siye kolkoro.” nirimu.
21 Parisi-yema kinie, Pulu Yemonga ungu-manemanga puluma pilku mane siringi yema kinie, Yesusini aku nirimu pilkulie ˻pilku keri pilku˼ konopu kimbú-sikulie, “I ye Pulu Yemo marake tekemo yemo naeye? Yambomane ulu-pulu keri telemelema naene ‘Manie pupili, we siye kolkoro.’ manda nimbéye? Pulu Yemone mindi manda telemo.” ningu eneno ningu pilku molko konopu kimbu-siringi.k
22 Kanu-kinie Yesusini ene aku-siku konopu kimbú-siku moloringi mele pilipelie enendo nimbendo: “Enene ˻nane nikirumunge˼ aku-siku nambemuna konopu kimbú sikimiliye?
23 I yemondo “Nunge ulu-pulu kerime manie pupili, we siye kolkoro.” nimbú kinie ene ulu te naa kanokolie ‘We-we tepa nikimu.’ konopu lengeye? Molo “Ola angilku nunge kunungumu liku mengo kimbu-kongono teko andoi!” nimbú kinie yu ola angilimbene naa angilimbenje mona lemba manda kanokolie ‘Aku-sipe mindili sipe nikimunje?’ konopu lengeye?
24 Nakolo ‘ ‘Manie Omba Mana-Ye Au Lerimu Yemo tondolo pelemomone ya ma-koleana yambomanga ulu-pulu kerime “Manie pupili, siye kolkoro.” manda nimbé.’ ningu piliengi!’ nimbu ˻aku-sipu nindu˼.” nirimu.
Aku nimbelie kimbu-ki kolopa pora sili yemondo nimbendo: “Nane ‘Nu ola angilku nunge kunungumu liku mengo ulkendo pui!’ nikiru.” nirimu.
25 Aku nirimu kinie ene kanoko molangi yemo sumbi-sipe ola angilipe yunge kunungumu lipe memba omba pena pupelie Pulu Yemo kapi nilipe ulkendo purumu.
26 ˻Yu aku terimu kanokolie˼ ene suru ningu mini-wale munduku Pulu Yemo paa pipili kolko yunge imbi ambolko ola linjiku yu kapi ningulie ningindu: “Olio i ulu wendo okomo kanokomolomo ulu paa te-lupe lepamo.” niringi.
Yesusini Ye Mateyu-LLipaindu “Na Lombili Ou!” Nirimu Temanemol
27 Kanu-kinie Yesusi ˻ulkemo mundupe kelepa˼ pena pupelie nirimumuni, kou-takisi lirimu ye te, yunge imbi LLipai, kou-takisi lipe molorumu kanopalie yundu “Na-kinie pea pambili lombili oi!” nirimu.
28 Kanu-kinie LLipai yu ola angilipe kou-takisi mélema we lepili mundupe kelepa yu lombili purumu.
29 Pe LLipaini yunge ulkena Yesusinge langi aisili kalonjirimu. Akuna kou-takisi lili ye aisili kinie, we-ye mare kinie, ene Yesusi LLipaitolo-kinie pea manie molko kanu langime noringi.
30 Aku teringi kanokolie Parisi yema kinie, Pulu Yemonga ungu-manemanga puluma pilku mane siringi yema kinie,m enene Yesusi yu lombili andolimendo ningindu: “Ene kou-takisi lili yema kinie ulu-pulu kerime teli wema kinie ene pea nambemuna langi nokomeleye?” niringi.
31 Aku-siku niringi pilipelie Yesusini enendo nimbendo: “Kuru naa tolemo yamboma doketana naa pulimele. Kuru tolemo yamboma mindi doketana pulimele kanumu.
32 Nane ‘Yambo sumbi nilime na molombona wangi!’ nimbundu ma-koleana naa orundu.n Ulu-pulu-keri teli yamboma ˻lipu taponjipu˼ enendo ‘Ene ulu-pulu-keri telemelema kanoko keri kanoko konopu alowa teko ˻na molombona wangi˼!’ nimbundu orundu.” nirimu.
Yambomane Walse-Walse Langi Naa Nongo Mi Tolemele Ulumunge Ungu Teo
33 ˻Kanu-kinie˼ enene Yesusindu walsiku pilkulie ningindu: “˻No-Linjili˼ Jono lombili andolime kinie, Parisi-yema lombili andolime kinie, enene walse-walse langi mi toko naa nongop Pulu Yemo-kinie mawa telemele nakolo nu lombili andolimene aku-siku naa telemele, langi kinie no kinie we nolemele. ˻Pe nu lombili andolimene telemele mele papuye˼?” niringi.
34 Aku-siku niringi pilipelie Yesusini pundu topa enendo ˻ungu-iku te topa yu toko konjingí kolombamonga ungu te nimbelie˼ nimbendo: “Ambo limbe ye te yunge pulu lemo yema-kinie molemo kinie ene konopu sikulie “Langi mi topo naa namili!” manda ningíye? Manda naa ningí.
35 Pe mindi, ambo limbe yemoq ene molongena ongo wendo lingí kinie kanu walemanga sike ˻konopu keri panjiku˼ langi naa nongendo mi tonge. ˻Isili-ou mólo!˼” nirimu.
36 Yesusini aku nimbelie nirimumuni, ˻‘Ou Juda-yambomane ulu teringi uluma kinie pe ulu konde wendo okomomo kinie teluna manda naa pengele mele paa piliengi!’ nimbe˼ ungu-iku talo topalie nimbendo:
“Mulu-wambale ou te sungu nilimo kinie olione mulu-wambale paa konde tenga te kopisipu lipu, sungu nilimomonga naa topo tambululimolo kanumu. Yambo tene aku-sipe topa tambulkenje kanu mulu-wambalemo nona panjilke kinie mulu-wambale konde kopisilimu kanga-lepa lli-nimbelie mulu-wambale oumu kelepa kamu aili tepa sungu nilke. Ulu te i-sipela: Mulu-wambale oumu kinie mulu kopisili kondemo telu-sipe mólo, akumunge kapola-kapola mólo!
37 Kongi-meme kalumuni teli mingi ou tengar no-waene konde naa kolemolo kanumu. Yambo tene mingi ou tenga no-waene konde te kolkanje kanu no-waenemo mingine sukundu pepalie pe akolka kinie kanu mingi oumu naa akopa sungu nilke. Kanu-kinie nomo kepe mingimu kepe kamu keri lelka.
38 Akumunge no-waene konde kongi-meme kalumuni teli mingi kondena mindi kolemolo kanumu.
39 Ye tene no-waene ou te nombalie kanu waene-oumu nomba peanga pilipelie no-waene konde waka naa kolemo.”s nirimu.