Mariane Yesusi Merimu Temanemo
2
(Kolomongo-kanga wane. Pulu Yemonga ungumu.)
˻Jono pamemo molopili˼ Romo-Gapomano-Ye Paa Aili Kumbine ‘Sisa-Okasitasi’ nilimuni ungu-mane te nimbe panjipelie “Romo-gapomanomone nokolemo koleamanga molemele yamboma pali imbime liemili!” nirimu.
2 (Kiriniasi kolea Siria-poropinji nokorumu yemo molopili Romo-gapomanomone yambomanga imbime pulu-pulu torumu.)
3 ˻Ungu-mane akumu Okasitasini nimbe panjirimu kinie˼ yamboma pali enenga anda-kolepalimene kalko liringi koleamanga yu-mele-mele ene puringi.
4 Ye Josepo kolea Gallilli-disiriki Nasarete-taonona molopa, ˻Romo ye-nomimuni ‘Yamboma imbi liemili!’ nirimu˼ pilipelie nirimumuni, Nasarete mundupe kelepa yu kalopa lirimu anda-kolepa Depisi ou perimu kolea Judia-Disiriki pupe Betellieme-taononaa purumu.
5 Akuna “Oltonga imbitolo tangi pambili!” ningulu yu nondopa limbe ambo Maria-kinie elte akuna puringili. Maria ulke pélimu pea puringili.
6-7 Betellieme suku pukululie, yambo-ponenge ongo pe-pu-opu teringi ulkemo si nirimu-na ˻elte kongi dongi kinie kaoma panjiringi ulkena puku peringili. Akuna peringili kinie˼ Maria ambolango mini torumu. Pe kango te kanopa lirimu. Aku kangomo yunge komolayemo. Kanopa lipelie mulu-wambale marene lipe kangomo okopa, kongime langi noli kete tenga suku nosirimu.
Mulú-Koleana Angello Te Manie Omba Kongi-Sipisipi Tápu-Ye Mare Ye-Nomi Kirasimu Meringi Mele Nimbe Sirimu Temanemob Kinie
Kongi-Sipisipi Tápu-Yema Yesusi Mengo Nosiku Moloringi Mele Puku Kano-Puringi Temanemo
8 ˻Betellieme˼ ulsukundu kongi-sipisipi tápu-ye mare era-poniemanga ipulueli enenga sipisipime tápu-teko moloringi.
9 Kanu-kinie ene moloringine Ailimunge angello te omba mona angilirimu kanoko, Ailimunge pa tondolo-tepa telimu omba ene moloringi kolea pa terimu kanokolie, ene mini-wale aili-teko munduringi.
10 Nakolo angellomone nimbendo: “Nane ene temane peanga te topo simbu okoro kene pipili naa kolayo! I temanemo yamboma pali konopu singí temanemo.
11 Kinié ˻ou molorumu ye-nomi-kingi˼ Depisinge taononac ambo tene kango te memu. Yu Yamboma Lipe Taponjipe Mindili Nongo Molko Kenjilimele Aulkena Wendo Lipe, Kapola Molko Konjingí Aulkena Lipe Monjimbe Kangomo;d yu Pulu Yemone “Ene nokopa konjimbe ye te lipu mundumbu.” ou nimbe mako torumu ye-nomi Kirasimu; yu Ailimu.e
12 Sike nikiru molo kolo tokoronje ene puku kanangi mele nimbu siembo! Ambolango-kiki te mulu-wambalene okoko, kongimenga langi noli kete tenga nosingímu puku kanoko lenjingí. Aku-siku kanoko lenjikulie nane ‘Sike nimu lemo.’ ningu pilingí.” nirimu.
13 Aku nirimu kinie tamburembu mulú-koleana angello paa aisili ou orumu angellomo angilirimuna ongo mona angilkulie niringimuni, Pulu Yemonga imbi ambolko ola linjiku yu kapi ningulie ningindu:
14 “Mulú-Koleana Paa Olandopa Pulu Yemonga imbi
paa ola molopili!
Mana-yambo yuni kanopa peanga kanolemo yamboma,
konopu wayongo siku molangi!” niringi.
15 Aku ningulie ene kongi-sipisipi tapu-yema munduku kelko mulú-koleana kelko olando puringi.
Angelloma kelko mulú-koleana olando puringi kinie sipisipi tapu yemane anju-yando ningindu: “Olio Betellieme pupu i ulu kinié wendo okomo mele Ailimuni nimbe simumu kano-pamolo!” niringi.
16 Aku ningulie popenge teko pukulie niringimuni, Maria Josepotolo moloringili kanoko, ambolango-kikimu kongimenga langi noli ketena suku lerimu kanoko lenjiringi.
17 Yu kanokolie, ou angellomone ene aku ambolangomondo nimbe sirimu mele yamboma ningu siringi.
18 Kanu-kinie sipisipi tapu-yemane ningu siringi mele pilkulie yambomane konopu aisili liku munduringi.
19 Nakolo Maria i unguma-kinie ulu wendo orumuma pali konopuna panjipelie, pe kepe konopu kimbu-sipe molorumu.
20 Sipisipi tapu-yema kelko yando ongolie niringimuni, angellomone nimbe sirimu mele pali pilku kanoringimunge Pulu Yemo kapi niliku yunge imbi ambolko ola linjiliku yando oringi.
Yesusi Imbi Siringi Temanemo
21 Kangomo kanoko liku nosiku molangi wale yepoko-pakara omba purumu kinie wale engaki-sipemonga yunge kangi te kopisiku makaye teko wendo likulie,f anumuni yu olona naa monjipili angellomone nirimu mele pilkulie yunge imbi “Yesusi” ningu leringi.
Josepo Kinie Maria-tolo Kango Yesusi Mengolo Jerusallemendo Pukulu Ulke-Tembelena Sukundu Puringili Kinie Ulu Mare Wendo Orumu Temanemo
22-24 Maria ˻bolango merimumunga˼ “Yu kalaro molemo.” niringimunga walema pora nimbe, yu kamu kake tepili molomba walemo wendo orumu kinie, Mosisini ungu-mane sirimu teg pilku liku tengelendo Josepo-kinie elte kolea-aili Jerusalleme pukululie niringilimuni, kake tepili molongelendo Pulu Yemo popo toko kalo-puringili. Ailimunge ungu-mane te ou sirimu perimu akumu i-sipe:
˻‘Ambo tene ambolango kanopa lipelie
ambomo yu pena pemba mele molomba.
Pena pemba walema pora nimbé kinie
kake tepili molombando˼
kera-waembono mele talo molo kera-imili mele talo
Pulu Yemo popo topa kalopa sipili!’h LLipai 12:8
nimbe ungu-mane aku-sipe nimbe perimu kanumu pilkulie tengelendo puringili.
Ailimunge ungu-mane nimbe perimu te pea pilku liku tengelendo puringilila. Aku ungu-manemo i-sipe:
‘Kango-komo kanoko lingíme pali
“Ailimunge” ningu yu siengi!’i Wendo Oringi 13:2,12,15
nimbe perimu kanumu. Aku ungu-manemo nimbe perimu-na pilkululie ‘Oltonga kango komomo Pulu Ye Ailimu siembili!’ ningululie Jerusalleme pungilindu Yesusi mengo puringilila.
25 Ye-anda te Jerusalleme molopili elte puringili, yunge imbi Simiono. Yu sumbi nirimu yemo; yu Pulu Yemonga ungumu pilipe alieli Pulu Yemo-kinie ungu nirimu yemo; yu Isirele-yamboma kapola-kapola molangi omba tenjimbe yemo kanombando nokopa molorumu;j Mini Kake Telimu yunge konopuna sukundu molorumu.
26 Mini Kake Telimuni yundu ungu te ou nimbendo: “Nu ou we naa koloni. Nu ou Ailimuni “Ene nokopa konjimbe ye te lipu mundumbu.” nimbe mako torumu ye-nomi Kirasimu kanokolie pe koloni.” nirimu.
27 Mini Kake Telimuni Simiono yu lipe mundurumu-na yu Pulu Yemo popo toko kaloringi ulke-tembelena purumu.
Kanu-kinie Yesusi anumu lapatolo ungu-manemone kangomando “Teai!” nimbe sirimu mele tengelendo kango Yesusi mengolo ulke-tembelena sukundu puringili kinie
28 Simionone omba kangomo kangulupe lipe Pulu Yemonga imbi ambolopa ola linjipelie nimbendo:
29-30 “Ye Aili Tondolo Olandopamo,
yamboma lipe taponjipe
mindili nolemelka aulkena wendo lipe
nu-kinie pea molko konjingí aulkena
lipe monjimbe ye sikinumuk
na kinié nanga mongone kanokoro kinie
ou nando ningu panjirinu mele wendo okomo kene
kinié na nunge kendemande-yemo
konopu pe nipili kolombo.”
nirimu.
31 “ ‘Kanu lipe taponjipe wendo lili ulumu
koleamanga pali yambomane kanangi!’ ningu tekeno.
32 Yu Isirele-yambomanga ulsu
molemele yambomanga pa tenjipe,
nunge Isirele-yambomanga imbi
ambolopa ola linjimbendo
pa tenjili mélemo molemo.”
nirimu.
33 Anumu-lapatolo Simionone kango Yesusindu nirimu mele pilkululie konopu aisili liku munduringili.
34 Simionone “Pulu Yemone ene tepa konjipili!” nimbelie Yesusi anumu Mariando nimbendo: “Pílie! I kangomo molombamonga Isirele-yambo aisili imbi ou molorumuma pe manie pungíla; aisili imbi ou naa molorumuma pe kinié imbi molombala. Yu molomba kinie yambomane kanokolie bulu siku ungu-taka tonjingí.
35 Ambomo, nu kepe ulu te wendo ombá. Nunge kamelena mindili aili-tepa temba kinie yambo aisili konopu lenge mele mona lemba.” nirimu.
36 Pulu Yemone ungu-umbu tonjirimuma pilipe yamboma nimbe sirimu ambo te, yunge imbi Ana, yu Juda-yambomanga talape kanga Asa, ye Panuelenga lemenu; yu paa ambu lerimu; yunge menu yemo pea molangili ponie yepoko-pakara omba purumu, pe yunge menu kolorumu kinie yu ambo-wayemo molorumu.
37 Yu mana molopili yunge ponie paono-kise kelepa yepoko omba pupe paono-kise kelepa kise-sipemonga yu we molorumu.l Yu ulke-tembelemo mundupe naa kelepalie alieli kanuna mindi molopa ipulueli kepe tangoli kepe Pulu Yemo popo topa imbi ambolopa ola linjimbendo taki-taki langi naa nomba Pulu Yemo-kinie ungu nimbe mawa tepa mindi molorumu.
38 Simionone Yesusindu ungu nimbe molopili ene moloringine kanu ambomo yu ombalie ˻Pulu Yemone kanu kangomo Juda-yamboma sirimumunge˼ Pulu Yemo-kinie “Ange, papu tekeno.” nirimu. Kanu-kinie pe Jerusalleme-yamboma lipe taponjipe, umbuni tene ene ambolorumu-na mindili nongo moloringi kanu umbunimunge wendo limbendom ombá yemo ‘Ombá.’ ningu nokoko moloringi yambomando Ana yuni kango akumu orumu mele kinie temba mele kinie nimbe sirimu.
Josepo Kelepa Nasaretendo Purumu Temanemo
39 Josepo Maria-tolo eltene Ailimunge ungu-manetolo nimbe perimu melen pali pilku liku tekololie niringilimuni, elte Yesusi-kinie kelko kolea Gallilli disiriki pukulu eltenga kolea-kanga Nasarete yando oringili.
40 Kangomo ai lepa enge nimbe molopa yunge konopuna pilipe konginjili aisili omba pepili molorumu, Pulu Yemone yu kanopa peanga kanopa yu tepa konjirimu.o
Kango Yesusi Ulke-Tembelena Pupe Terimu Mele Temanemo
41 Juda-yambomane ponie tenga-tenga kolea-aili Jerusalleme ongo akuna suku Pulu Yemone enenga anda-kolepalime Naa Topa We Omba Purumu melep pilku ulu mare teringi kanu walema Yesusi anumu lapatolo kepe ‘Kanu walemo piliembili!’ ningulu ponie tenga-tenga Jerusalleme olando puringili.
42 Kango Yesusi molopili yu ponie engaki-rurepoq omba purumu kinie kanu wale ‘Pulu Yemonga wale.’ ningu koro moloringi walemo altopa wendo orumu kinie alieli Juda-yamboma Jerusalleme puringi mele Yesusi anumu lapatolo kinie yu kinie pea olando puringi.
43 ˻Jerusalleme puku˼ kanu ulumu piliringi walema pali pora nirimu kinie anumu-lapatolo ulke-koleando pungilí puringili kinie kango Yesusi anju molorumu elte naa kanoringili.
44 ‘Olionga yambo mare-kinie okomo.’ konopu lelkolo wale telumunge we pukululie niringilimuni, pe ipupini kolea kalá torumu kinie puku aulkena pengendo eltenga pulu lerimu yamboma kinie we yamboma kinie pea puku moloringimendo walsiku piliku andoko kororingili.
45 Yu naa kanoko lenjikulie Jerusalleme altoko puku koro-puringili.
46 Wale talo koroko kelkololie niringilimuni, pe wale yepoko-sipemonga ˻Pulu Yemo popo toko kaloringi˼ ulke-tembelena puku kanoringili kinie yu akuna suku molorumu kanoko lenjiringili. Yu ungu-manemanga puluma pilku mane siringi yema kinier pea moloringi, yuni enenga ungu niringime pilipelie, anju enendo ungu mare walsipe pilirimula.
47 Yu enene niringime mimi-sipe pilirimu mele kepe, pundu topa nimbe konjirimu mele kepe, yambo moloringimene pilkulie enene ‘Yunge pilipe konginjili paa pepamo.’ ningu pilku konopu liku munduku mini-wale munduringi.
48 Eltene yu kanu ulkena molorumu puku kanokololie suru ningulu anumuni yundu nimbendo: “Kangomo, olto-kinie pea pamili ou naa oli, nambemu-na tenuye? Lanie olto mini-wale mundulipulu nu andopo koropo kelembulu.” nirimu.
49 Aku nirimu kinie yuni anumu-lapatolondo nimbendo: “Elte ˻koleamanga pali˼ nambemuna na andoko korongiliye? ‘Na ya Taranga ulkena molemo.’ konopu naa lengiliye?” nirimu.
50 Nakolo yuni nirimu ungu-pulumu eltene naa piliringili.
51 Yu elte-kinie Nasarete-Taono maniendo pupelie nirimumuni, eltenga unguma pilipe tenge panjipe molorumu. Yunge anumuni kanu uluma konopuna panjipe pilipe mindi molorumu.
52 Yesusi yu ai-lemba lerimu kinie yu pilipe konginjili olandopa-olandopa pemba perimu; Pulu Yemo kinie yamboma kinie yu kanoko paa peanga kanoko moloringila.s