1 Yesusi molorumu koleamo mundupe kelepa yunge pulu-kolea ˻Nasarete˼ purumu, yu lombili andoli yema pea puringi.^b

2 ˻Koro moloringi˼ Wale-Sambatemo^c wendo orumu kinie ene máku toko Pulu Yemonga ungumu piliringi ulkena suku pupelie yamboma mane-sipe molorumu. Yunge ungumu pilku moloringi yambo aisilini suru ningu mini-wale mundukulie ningindu: “Ne yemo aku unguma tena lirimunje? Yunge pilipe konginjilimu kinie yunge ulu-tondolo telemomanga tondolomo kinie yu tena lirimuye?

3 Yu ulkema takonjirimu yemo^d móloye? Yu Maria malo móloye? Jemisi keme Josepo keme, Judasi keme Saimono keme, akume yu enenga angenu móloye? Yunge kemulupili olio-kinie pea naa molemoloye? ˻Yu paa sike aku yemo molemomo˼.” niringi. ‘Yu paa we-yemo nambe-tepa i tondoloma yu-kinie pelemoye?’ ningu pilkulie ene yu kanoko keri kanoko yu-kinie paa konopu keri panjiringi.

4 Kanu-kinie ˻ene yu-kinie mumindili koloringimunge ulu-pulumu pilipelie˼ Yesusini enendo nimbendo:

5 ˻Yunge ungumu liku su siringi-ne˼ kolea akuna yuni ulu-tondoloma manda naa terimu. Kuru torumu yambo telu-telu nimbe mindi kimuni ambolopalie tepa konde lirimu.

6 Yu ˻ungu nimbe uluma tepa molorumu mele˼ ‘Sike.’ ningu tondolo-munduku naa piliringimunge yu paa konopu aisili kimbú sirimu.

7 Yesusini yu lombili andoli ye engaki rurepondo “Yando wai!” nimbelie enene yambomanga konopuna kuru molemoma “Ongo wendo pai!” ningu toko makoronge tondolomo sipelie ene talo-talo nimbe “Koleamanga ando-pai!” nimbe lipe mundurumu.

8-9 ˻Lipe mundupelie˼ ene tenge mele ungu-mane sipelie nimbendo:

10 “Pe kolea tenga suku pukulie akuna molongendo ulke teluringe suku pukulie akuna mindi peko molkolie pe aku koleamo munduku kelko pangi! ˻Ulke pinie-pinie naa andoko ulke teluringe mindi langi nongo peangi!˼ⁱ

11 Kolea marenga suku pungí kinie kolea pulu-yambomane “Pea peamili wai!” ni naa ningu enene ungu ningíme pilku naa língi liemo kanu koleana yambo kerime munduku kelko pungíndu kanu koleana yambomane ene liku su singímunge ‘Ene kamu molko kenjengi! Pulu Yemone ene lipe naa taponjimbe mele piliengi!’ ningu enenga kimbuna kanu koleamanga ma angilimbema kulu toko pangi!” nirimu.

12 ˻Yu lombili andolime yuni aku-sipe lipe mundurumu-na pilku˼ pukulie yambomando ningindu: “Ulu-pulu-keri telemelema kanoko keri kanoko konopu alowa teai!” ningu

13 yambomanga konopuna kuru aisili moloringime ˻‘Ongo wendo pai!’ ningu˼ toko makoroko, kuru torumu yambo aisili ‘Konde pangi!’ ningu enenga kangine ollipi-kopongo ondo lelko kanjinjiku teko konde liku, teliku andoringi.

14 Kanu-kinie Yesusi yunge imbimu yamboma pilku leringimunge ye-nomi-kingi Erote Yesusini terimu mele temane toringi pilirimula.

15 Yambo marene ningindu: “Yu ˻ou konde molopili Pulu Yemone olando lirimu^k ye˼ Illainja kelepa omba molemo.”^l niringi.

16 ˻Yambomane aku-siku ningu piliringi˼ nakolo ye-nomi-kingi Erotene ˻Yesusi yuni terimu mele temane toringi˼ pilipelie nimbendo: “I uluma telemo yemo ˻No-Linjili˼ Jono, ‘Yunge pengemo wendo pupili!’ nimbu nomi karu lerindu kanu yemo. Yu kolopalie lomboropa wendo omu lepamo.” nirimu.

17-18 ˻Kingi Erotene aku-sipe nirimu ungumunge pulumu i-sipe:˼ Ou walse Erotene yunge angenu Pillipunge ambo-menu Erodiasi mangopa lirimu. ˻No-Linjili˼ Jonone Erote aku-sipe terimu kanopalie yundu alieli nimbendo: “Nuni ˻Pulu Yemonga˼ ungu-mane te pulue toko^m angenanga ambomo mangoko lirinu. Akumu teko kenjirinu.” nirimu kinie Erotene yu lipe ka sipe ka-ulkena panjirimu.

19-20 Jonone aku nirimumunge ambo Erodiasini yu mumindili kolopa “Yu topo konjembo!” nimbe molorumu nakolo Erotene ‘Jono yu konopu sumbi-sipe pepa Pulu Yemonga ye kake telimu molemo.’ nimbe kanopa yu pipili kolopalie nokopa konjirimumunge ambo Erodiasini Jono-kinie ulu te manda naa terimu. Jonone ungu nirimuma pilipelie ye-nomi-kingi Erote yu paa konopu aisili lipe mundupe mini-wale mundurumu nakolo aku unguma yu paa konopu sipe pilirimu.

21 Pe walse, ˻ambo Erodiasi˼ konopuni pilipe molorumu ulumu manda temba walemo wendo orumu. Wendo orumu mele i-sipe: Kingi Erote meringi walemo wendo orumu kinie yunge kendemande ailime kinie, yunge ami-yemanga ye-nomime kinie, kolea Gallilli disiriki yambomanga ye-nomi ailime kinie, enendo “Langi pea namili wai!” nirimu.

22 ˻Ene ongo yu-kinie pea langi nongo molangi˼ Erodiasi lemenu ulkena sukundu omba ene moloringine denisi terimu. Erote kinie, yu-kinie pea langi nongo moloringi yema kinie enene ambo-wenepomo aku terimu kanoko paa peanga kanoringi. Kingimuni paa kanopa peanga kanopalie ambo-wenepomondo nimbendo: “Nuni konopu monjikinu mélte na mawa téa! Mawa teni mélemo nu simbu.” nirimu.

23 Pulu Yemonga imbi lepa mi lepalie yundu kelepa nimbendo: “Paa sike nikiru. Nuni na mawa teni méle te paa sike simbu. Nane ye-nomi-kingi molopo nokolio koleamonga ekendo kepe “Si!” ninu liemo paa sike simbu.” nirimu.

24 Erotene yundu nirimu mele pilipelie ambo-wenepomo pena pupe, anumu molorumuna pupe walsipelie nimbendo: “Méle nambolka mélemo ‘Si!’ niemboye?” nirimu kinie

25 Anumuni aku nirimu pilipelie yu kingimu molorumuna tamburembu lkisipe omba mawa tepalie nimbendo: “Paa isili-ou No-Linjili Jono ˻nomi karu lelko˼ⁿ yunge pengemo pellete tenga nosiku yando si!” nirimu. ˻Jonone ou alieli “Erote kinie Erodiasi-tolone teko kenjiringili.” nirimumunge mumindili kolopalie Erodiasini ‘Yu kolopili! Sike kolomunje na kanambo!’ nimbe “Pengemo ongo si!” nirimu.˼

26 Yuni aku-sipe mele mawa terimu kinie pilipelie Erote paa konopu umbuni terimu nakolo yuni “Paa sike simbu.” nimbe, nimbe panjipe Pulu Yemonga imbi lepa mi lerimu mele kepe, yu konopu alowa temba kinie yu-kinie pea langi nongo moloringi yema yu kanoko keri kanonge mele kepe, aku ulutolo pilipelie, “Yuni mawa tepa “Si!” nikimu mele “Mólo!” manda naa nimbú.” nimbe pilipelie

27 yu nokoringi ami-yemanga te lipe mundupelie “˻No-Linjili˼ Jono ˻nomi karu lelko˼ yunge pengemo yando mengo oi!” nirimu kinie kanu ami-yemone ka-ulkena pupe Jononga nomimu karu lepalie

28 yunge pengemo pellete tenga nosipe yando memba omba ambo-wenepomo sirimu kinie yuni anumu sirimu.

29 Aku teringi pilkulie Jono lombili andoringi yema ongo yunge ónomo liku mengo puku óno teringi. ˻Kingi Erotene No-Linjili Jono ou aku-sipe topa konjirimu kolorumumunge pe Yesusini ulu-tondoloma terimu mele pilipelie “Jono nomi karu lerindu yemo lomboropa ola molemo lemo.” nirimu.˼^o

30 ^q Yesusini “Nanga kongonomo tenji-pai!” nimbe lipe mundurumu yema^r yu molorumuna kelko yando ongolie niringimuni, ulu teringime kinie yamboma ungu-mane siringime kinie yu temane toko siringi.

31 Nakolo yambo aisili ongo puku ongo puku ˻teko ungu ningu panjiku˼ teringimunge Yesusi kinie ˻yuni lipe mundurumu ye yando oringime˼ kinie langi nonge ena wallo-kolte kepe naa lerimumunge^s kanopalie Yesusini yemando nimbendo: “Ene-eneno yambo naa mololi kolea ku tenga laye-kolte múlu piliengi kene na-kinie pea pamili wai!” nirimu.

32 Kanu-kinie ene-eneno mindi nomúna andoli sipi tenga suku puku yambo naa mololi kolea ku leli tenga puringi.

33 Nakolo pungí puringi kinie kanokolie yambo aisili Yesusi kinie yu lombili andolime kinie kanoko imbi siringimunge koleamanga yamboma pali kimbu-kongono teko lkisiku nomú-kélona makaye teko puku ene nomúna wendo pungí koleana kumbi lelko puku nokoko angiliringi.

34 Yesusi nomú-kélona ulsu omba kanopa yambo paa aisili akuna ongo máku toko moloringi kanopalie ene kongi-sipisipi tápu-teli ye te naa mololi sipisipime mele^t ku peko moloringi-ne nimbe kanopalie ene kondo kolopa ungu aisili mane simbe terimu.

35 Kanu-kinie ˻mane sipe molopili˼ ena pumbe terimumunge yu lombili andolime yu molorumuna ongo yundu ningindu: “I koleana yambo te naa pelemo, ena kamu pukumu kene

36 ya máku toko molemele yamboma “Puku kolea marenga langi topo toko li-pangi!” ni!” niringi.

37 Nakolo yuni ˻yu lombili andolimendo˼ pundu topa nimbendo: “Enene eneno yamboma langi mare liku siei!” nirimu.

38 ˻Aku-siku niringi pilipelie˼ yuni ene walsipe pilipelie nimbendo: “Pillawa kaloli nambepa nosikimiliye? Puku kano-pai!” nirimu.

39 Kanu-kinie Yesusini nimbendo: “Yambomando “Era kondili-niline máku toko manie molangi!” niei!” nirimu kinie

40 yamboma tokapu-talo molo tokapu-kise ningu máku toko moloringi.

41 Kanu-kinie Yesusini pillawa kaloli te-pakara kinie oma talo kinie kanuma lipelie mulú-koleana olando-sipe kanopa ˻Pulu Yemo-kinie˼ “Ange.” nimbe pillawa kalolime ambolopa pike lepa lombili andolime moke tepa sipelie “Anju yamboma siei!” nirimu, ˻enene˼ yamboma ˻moke teko siringi˼. Oma talo kepe lipe moke tepa yamboma pali sirimula.

42 Ene pali kanu langime noringi kinie olo terimu.

43 Kanu-kinie lombili andolimene pillawa kaloli kinie oma kinie kanumanga goli lerimuma liku máku toko wale basikete engaki-rurepo toko peke siringi.

44 Langi noringi yema manjipe pape-tausini (5,000) mele.^v

45 ˻Yamboma langi sirimu noringi˼ kinie Yesusini yu lombili andoli yemando sumbi-sipe nimbendo: “Maku toko molemele yamboma nane “Pangi!” niembo! Ene nona andoli sipine ola puku no-nekendo, Besaida taono lemona, kumbi-lelko pai!” nirimu.

46 Kanu-kinie yamboma mundupe kelepalie yu-yuyu Pulu Yemo-kinie ungu nimbendo ma-pangine ola purumu.

47 Kanu-kinie ena pupe kolea kala torumu kinie sípimu nomú ai-suku-singine purumu, Yesusi yuyu ma-˻pangi˼ne molorumu.

48 Sipi kumbikundu mendo-sipe poporomene torumumunge ˻yu lombili andoli yema sipine suku molkolie˼ sípimu nomú-kélona mengo pungíndu pereringi kanopalie ipulueli kolea muni naa lepili ene puringine yu nona-ola kimbu-kongono tepa ombá ombalie ene sipine puku molangi yuni ene topa akilinjipe yu kumbi-lepa pumbe orumu.

49-50 Nakolo yu lombili andolimene pali yu nona-ola kimbu-kongono tepa orumu kanokolie niringimuni, paa pipili aili-teko kolkolie “Kuru te okomaa!” ningu mini-wale munduringi kinie Yesusini tamburembu enendo nimbendo: “Ene konopu tondolo pupili molayo! Na mindi okoro. Pipili naa kolai!” nirimu.

51-52 Kanu-kinie yu sipine suku purumu kinie poporome topa kelerimu. Aku terimu-na kanokolie paa mini-wale munduringi. Yuni ˻ou tangoli˼ pillawa kalolime ˻moke˼ terimumunge pulumu naa pilku we konopu lou lelko moloringi. Yu-kinie tondolo te perimu-na pillawa kalolime kinie ulu-tondolo te terimu mele mimi-siku naa pilkulie ene konopu naa perimu-na kanu tondolomone poporomemo topa kelerimu mele kepe naa pilku konjikulie^x poporomemo topa kelerimu kinie kanokolie ene paa mini-wale munduringi.^y

53 ˻Yesusi kinie yu lombili andolime kinie˼ Nomú-˻Gallilli˼ nekendo pukulie nomú-kélona kolea Geneserete lerimuna wendo ongolie sípimu ka teringi.

54 Sipine manie oringi kinie akuna moloringi yambomane Yesusi tamburembu kanoko imbi sikulie

55 akundu lerimu koleamanga pali lkisiku puku yu andorumu koleama pilkulie enenga kuru torumu yamboma liku taropola teko yu andorumuna mengo oringi.

56 Yu andorumu koleamanga pali, kolea-kangamanga kinie, kolea-ailimenga kinie, kolea-wemanga kinie, aku koleamanga yamboma máku toko moloringi koleamanga kuru torumu yamboma mengo ongo nosikulie, “ ‘Nunge wale-pakoli pundumu kepe ambolangi!’ ni!” ningu mawa teringi. Kanu-kinie kuru torumu yambomane yunge wale-pakolimu amboloringi yamboma pali kamu konde puringi.^a