2 ene aisili ongo ulkena sukundu-sukundu ongo liku máku toko moloringi kinie ulke kanuna ekelepa terimu-na yambo mare molonge kolea te naa lerimu-na pena moloringila. Yuni ene ˻Pulu Yemonga˼ ungumu nimbe sipe molorumu.

3 ˻Yuni nirimu mele aku-siku máku toko pilku molangi˼ yambo marene kimbu-ki kolopa pora sirimu ye te mengo oringi. Kanu yambomanga ye kisene kanu yemo taropola teko mengo Yesusi molorumuna onge oringi nakolo

4 yambo aisili ulkena ekelepa teko angiliringi-ne yu molorumuna nondoko mengo pungí aulke te naa lerimu-na ulke-imuna mengo ola pukulie^b Yesusi molorumuna kana-kana ulkemo tekisikulie yemo taropola pali moko toko manie munduringi.

5 ˻‘Yesusini i yemo manda tepa konde limbe.’ ningu˼ tondolo-munduku pilkulie yu mengo oringi kanopa pilipelie^c Yesusini kimbu-ki kolopa pora sirimu yemondo nimbendo: “Nanga kangomo, nunge konopuna ulu-pulu-keri terinu pelemoma manie pupili, we siye kolkoro.” nirimu.

6-7 ˻Kanu-kinie,˼ Pulu Yemonga ungu-manemanga puluma pilku mane siringi ye mare^d eneno akuna molko ˻Yesusini aku nirimu kinie pilkulie pilku keri pilku˼ konopu kimbu sikulie, “Nendi yemone ungu aku-sipe nambemuna nikimuye? Yu Pulu Yemo marake tekemo. Yambomane ulu-pulu-keri telemelema naene ‘Manie pupili, siye kolkoro.’ manda nimbéye? Pulu Yemone mindi manda telemo.” ningu eneno ningu pilku molko konopu kimbú siringi.

8 Kanu-kinie Yesusini ene aku-siku konopu kimbú-siku moloringi mele yunge konopuni sumbi-sipe pilipelie enendo nimbendo: “Enene ˻nane nikirumunge˼ aku-siku nambemuna konopu kimbú-sikimiliye?

9 I yemondo “Nunge ulu-pulu-kerime manie pupili, we siye kolkoro.” nimbú kinie ene ulu te naa kanokolie ‘We-we tepa nikimu.’ konopu lengeye? Molo “Ola angilku nunge kunungumu liku mengo kimbu-kongono teko andoi!” nimbú kinie yu ola angilimbene naa angilimbenje mona lemba manda kanokolie ‘Aku-sipe mindili-sipe nikimunje.’ konopu lengeye?

10 Nakolo ‘ ‘Manie Omba Mana-Ye Au Lerimu Yemo^e tondolo pelemomone ya ma-koleana yambomanga ulu-pulu-kerime “Manie pupili, we siye kolkoro.” manda nimbé.’ ningu piliengi!’ nimbu aku-sipu nindu.” nirimu.

11 “Nane ‘Nu ola angilku nunge kunungumu liku mengo ulkendo pui!’ nikiru.” nirimu.

12 Aku nirimu kinie yemo ola angilipe tamburembu kunungumu lipe memba, ene pali kanoko molangi omba pena purumu. Yu aku terimu kanokolie ene suru ningu mini-wale mundukulie Pulu Yemonga imbi ambolko ola linjiku yu kapi ningulie ningindu: “Olio i ulu wendo okomo kanokomolo mele ou walse kepe ulu te aku-sipu paa naa kanorumulu.” niringi.

13 Yesusi ˻ulkemo mundupe kelepa˼ pena pupelie altopa Nomu-Gallilli kélona pupe andopa molorumu. Kanu-kinie yu molorumuna yambo aisili ongo liku máku toko moloringi kinie yuni ene mane sirimu.

14 Kanu-kinie yu pumbe pupelie nirimumuni, Allapiasi-malo LLipai^g kou-takisi liringi ulkena ˻kou-takisi lipe˼ molorumu kanopalie yundu “Nu na-kinie pea pambili lombili oi!” nirimu. Kanu-kinie LLipai yu ola angilipe yu lombili purumu.

15 Pe Yesusi LLipainge ulkena langi nomba molorumu kinie kou-takisi lili yema kinie, ˻Juda-ye ailimene˼ “ulu-pulu-keri teli ye” ˻niringi˼ ye wema kinie aisili ongo Yesusi kinie yu lombili andoli yema kinie ene pea manie molko langi noringi. Aku-sili yambo aisili alieli yu lombili andoringimunge ene aisili ˻akuna lombili puku˼ pea langi nongo moloringi.

16 Yesusi yu “ulu-pulu-keri telime” niringi yambo wema kinie kou-takisi lili yema kinie pea langi nongo moloringi kanokolie Parisi ye marene,^h Pulu Yemonga ungu-manemanga puluma pilku mane siringi kanu yemane, Yesusi lombili andolimendo ningindu: “Kou-takisi lili yema kinie, ulu-pulu-kerime teli wema kinie, ene-kinie yu nambemuna langi pea nokomeleye?” niringi.

17 Aku-siku niringi pilipelie Yesusini enendo nimbendo: “Kuru naa tolemo yamboma doketana naa pulimele. Kuru tolemo yamboma mindi doketana pulimele kanumu.ⁱ Nane “Yambo sumbi-nílime na molombona wangi!” nimbundu ma-koleana naa orundu.^j ‘Ulu-pulu-keri teli yamboma na molombona wangi!’ nimbundu orundu. Ulu-pulu-keri teli yamboma lipu taponjimbundu orundu.” nirimu.

18 ˻No-Linjili˼ Jono lombili andoringi yema kinie, Parisi yema lombili andoringime kinie, ene walse-walse langi mi toko naa noringi mele^l walse aku-siku teko moloringila. ˻Aku teringi-ne˼ yambo mare Yesusi molorumuna ongo yu walsiku pilkulie ningindu: “Jono lombili andolime kinie,^m Parisi yema lombili andolime kinie,ⁿ alieli langi mi toko naa nolemele nakolo nu lombili andolime^o aku-siku naa telemele akumu nambemuna naa telemeleye?” niringi.

19 ˻Aku-siku niringi kinie pilipelie˼ Yesusini pundu topa enendo ˻ungu-iku te topa yu toko konjingí kolombamonga ungu te nimbelie˼ nimbendo: “Ambo limbe ye te yunge pulu lemo yema kinie molemo kinie ene konopu sikulie “Langi mi topo naa namili!” manda ningíye? ˻Manda naa ningí.˼

20 Nakolo pe, ambo limbe yemo ene molongena ongo wendo lingí kinie kanu walemanga sike ˻konopu keri panjiku˼ langi naa nongendo mi tonge. ˻Isili-ou mólo!˼”^p ˻nirimu.˼

21 ^q “Mulu-wambale ou te sungu nilimo kinie olione mulu-wambale paa konde tenga te kopisipu lipu, sungu nilimomonga naa topo tambululimolo kanumu. Yambo tene aku-sipe topa tambulkenje kanu mulu-wambalemo nona panjilke kinie mulu-wambale konde kopisilimu kanga-lepa lli-nimbelie mulu-wambale oumu kelepa kamu aili-tepa sungu nilke.

22 Kongi-meme kalumuni teli mingi-ou tenga^r no-waene konde naa-la kolemolo kanumu. Yambo tene mingi-ou tenga no-waene konde te kolkanje kanu no-waenemo mingine sukundu pepalie pe akolka kinie kanu mingi-oumu naa akopa sungu nilke. Kanu-kinie nomo kepe mingimu kepe kamu keri lelka. Akumunge no-waene konde kongi-meme kalumuni teli mingi kondena mindi kolemolo kanumu.” nirimu.

23 Walse, ˻koro moloringi˼ Wale-Sambate tenga,^t Yesusi kinie yu lombili andolime kinie rasi-witi poniemanga ongo puringi kinie yu lombili andoli yemane rasi-witi mongo mare ˻nongendo˼ inie toringi.

24 Aku teringi kanokolie Parisi-yemane^u Yesusindu ningindu: “Kána! ˻Koro molemolo˼ Wale-Sambatemonga ‘Kongono naa teangi!’ nimbe pelemo ungu-manemo^v nambemuna nu lombili andoli yemane manemo pulue tokolie aku-siku tekemeleye?” niringi.

25 Yesusini pundu topa nimbendo: “Ene Pulu Yemonga bokuna sukundu ˻anda-kolepa ye-nomi-kingi˼ Depisini^w terimu mele nimbe molemo temanemo kanokolie ˻temanemonga pulumu˼ naa pilimeleye? Depisi kinie yu pea puringi yema kinie ene ˻langi˼ mólo torumu˻munge˼ engelene kolkolie niringimuni,

26 Pulu Yemo popo tonjiringi ye aili olandopa Apayata molopili Depisi Pulu Yemo molorumu sele-ulkena sukundu pupe, Pulu Yemonga kumbi-kerena lerimu pillawa kalolime lipe nomba, yu pea puringi yema sirimu noringila kanumu.^x Kanu pillawa-kalolimendo Pulu Yemone ungu-mane sipelie nimbendo:

27 Aku nimbelie ungu te pea nimbendo: “Pulu Yemone ‘Yamboma molko konjengi!’ nimbe koro molonge Wale-Sambatemo lipe ene sirimu kanumu. ‘Sambate-Walemo pepa konjipili!’ nimbe yamboma lipe Sambate-Walemo naa sirimu.

28 Akumunge Sambate-Walemo kepe Manie Omba Mana-Ye Au Lerimu Yemo nokolemo yemo molemona ˻Sambate-Wale kinie yamboma molko konjingindu tenge mele manda nimbé kanumu˼.” nirimu.