Yesusini Juda-Yambomanga Ye-Ailime Umbuni Aili Yepoko-Pakaranga Nirimu Temanemoa
Kolomongo-Aili 23 pali
Umbune-Aili Telu-Sipemo: Parisi-Yema Kinie Ungu-Manema Pilku Mane Siringi Yema Kinie Enene Teko Kenjiringi Ulumanga Ungu Teb
23
(Kolomongo-kanga wane. Pulu Yemonga Ungumu.)
Kanu-kinie Yesusini yambo máku toringime kinie, yunge lombili andoli yema kinie, ungu nimbe sipelie nimbendo:
2 “Pulu Yemonga ungu-manemanga puluma pilku mane silimele yema kinie Parisi-yema kiniec enene Mosisini ungu-manemanga puluma mane sirimu mele yandopa mane silimele.
3 Akumunge kanu yemane ene mane silimelema pali mimi-siku pilku teangi, nakolo kanu yemane mane silimele mele kanu yema eneno pilku liku naa telemelemonga kanu yema enene ulu telemelema manda lelko naa teangi!d
4 Yambo tene wale umbuni teli te tepa mimi tepalie yambo te ‘mepili!’ nimbe ola lipe buluna menjilimo mele ˻aku-siku kanu yemane yambomando ungu-mane siku “I-siku i-siku teai!” ningu˼ umbuni silimele nakolo laye-kolte kepe ‘Lipu taponjipu meamili!’ naa nilimele.e
5 “Kanu yemane ulu telemelema ‘we teamili!’ ningu naa telemele. ‘Yambomane olio kanokolie ‘molko konjilimele.’ ningu kanangi!’ ningu uluma telemele. Pulu Yemonga ungu-manema molemo pepá te kulupi toko mambelena molo kíne ka tongendo ‘Yamboma paa kanangi!’ ningu kulupi paa aili teko toko,f enenga wale-pakolimenga ka moko toko monjingíndu ka sulu peanga mare aili-teko moko toko monjilimele.g
6 Yambomane langi nongo yambomando “Namili wai!” nilimele kinie kanu yema ongolie ye-ailimenga polo kumbikundu ‘olio molamili!’ ningu konopu siku molemelela. Yamboma máku toko Pulu Yemonga ungumu pilimele ulkena sukundu pukulie manie molongendo ye ailime molemele polo peanga akuna ‘molamili!’ ningu mendo puku polo akuna konopu siku molemelela.h
7 Yamboma máku toko molemele koleana andongendo mongo-kenge teko ‘We-yambomane olio kanoko kapi niengi!’ ningu pilkulie konopu siku pilku andoko molemelela. Yambomane enendo ‘Rapai’i nilimele kinie paa konopu silimelela.
8 “˻Kanu yemane aku telemele˼ nakolo enenga nokoli ye-aili telumu mindi molemo, ene pali angenupili molemele kene yambomane “ene olionga Rapaime.” naa niengi!
9 Enenga Lapa telumu mindi molemo, akumu mulú-koleana molemo, akumunge mana-yambo tendo ˻‘olionga ye-ailimu’ ningu˼ “Tara” naa niengi!
10 Pulu Yemone “Ene nokopa konjimbe ye te lipu mundumbu.” ou nimbe mako torumu ye-nomi Kirasimuj mindi enenga nokoli-ye-ailimu molemo kene yambomane enendo ˻‘olio nokolemo yemo’ ningu˼ “Ye Ailimu” naa-la niengi!
11-12 Yambo tene yunge imbimu yuyu ambolopa ola limbe kinie ˻Pulu Yemone˼ yunge imbimu topa manie mundumbe; yambo tene yunge imbimu yuyu topa manie mundumbe kinie ˻Pulu Yemone˼ yunge imbimu ambolopa ola linjimbe kene enenga ye te ene nokomba ye-aili te molopa enenga kongono-kendemande-yemo molopili!”k ˻nirimu.˼
Umbuni Mare Walse: Parisi Yema Kinie Ungu-Manema Pilku Mane Siringi Yema Kinie Akumando Yesusini Iri Topa Teko Kenjiringimunge Mindili Nonge Mele Nirimu Temanemol
13 ˻Yu lombili andolimendo ungu nimbe kelepalie Yesusini Juda-yambomanga ye-aili moloringimendo nimbendo:˼
“Ene Pulu Yemonga ungu-manemanga puluma pilku mane silimele yema kinie, Parisi-yema kinie, ene mindili nongo paa molko kenjingí! Ene topele-mapele toli yema!m Enene yamboma Pulu Yemo ye-nomi-kingi molopa nokolemon mulú-koleana pungí pulimele kere-pulumu pipi silimele. Ene-eneno sukundu naa pulimele; yambo-lupema pungí telemele kinie aulkemo pipi siku “Mólo!” nilimelela.o
14 “(Ene ungu-manemanga puluma pilku mane silimele yema kinie Parisi-yema kinie ene mindili nongo paa molko kenjingí.
Ene topele-mapele toli yema! Enene ambo-wayema liku lou siku enenga ulkema wa liku, enene ‘Yamboma kanangi!’ ningu Pulu Yemo-kinie unguma sulu teko we ningu angilimele, akumunge kote-walemo wendo ombá kinie ene kinie umbuni aili-tepa pemba.)p
15 “Ene ungu-manemanga puluma pilku mane silimele yema kinie Parisi-yema kinie ene mindili nongo paa molko kenjingí!
Ene topele-mapele toli yema! ‘Yambo telu mindi kepe konopu alowa tepa olio lombili andomba kinie papu.’ ningu ma-koleamanga kimbu-kongono teko kolea sulumanga puku, nomú-kusa sipimenga andolemele nakolo pe yambo te sike enene nilimele unguma pilipe lipe konopu alowa tepa lombili andolemo kinie kanu yambomo tepa kenjilimo mele paa olandopa, enene teko kenjilimele mele maniendopa, akumunge yu tepe-koleana paa sike pumbe aulkemo akisinjilimele.
16 “Ene mongo keri lelimene “˻Mongo keri leli˼ yamboma aulkemo lipu ora siemili!” nilimele yema ene mindili nongo paa molko kenjingí! Enene yamboma mane sikulie ningindu: “Yambo tene mi lembando ‘ulke-tembelemo’ imbi lepa “Paa sike tembo.” nimbelie pe “Tembo.” nimbe panjimbe mele naa temba kinie uluri mólo! Nakolo yambo tene mi lembando “ulke-tembelena ape kanjiringi kou-gollomo” imbi lepa “Paa sike tembo.” nimbelie pe “Tembo.” nimbe panjimbe mele naa temba kinie kapola naa temba. Yu sike kamu tepili!” nilimele.q
17 “Ene aroma toko mongo keri leli yema! Méle nambolka mélemo olandopaye? Kou-gollo akumu méle olandopamo molo Pulu Yemo molemo ulke-tembelemone kou-gollo mako topa ‘Pulu Yemonga’ nimbe kake tenjilimo ulkemo olandopaye?
18 “Enene ungu te pea yamboma mane sikulie ningindu: “Yambo tene mi lembando ‘Pulu Yemo popo toko mélema kalemele polomo’ imbi lepa “Paa sike tembo.” nimbelie pe “Tembo.” nimbe panjimbe mele naa temba kinie uluri mólo! Nakolo yambo tene mi lembando “aku polona ola mélte singímu” imbi lepa “Paa sike tembo.” nimbelie pe “Tembo.” nimbe panjimbe mele naa temba kinie kapola naa temba. Yu sike kamu tepili!” nilimele.
19 Ene mongo keri leli yema! Méle nambolka mélemo olandopaye? Polona ola ‘Pulu Yemo popo toko kalonjengi!’ ningu silimele mélemo olandopamo molo polomone kanu mélema mako topa ‘Pulu Yemonga’ nimbe kake tenjilimo polomo olandopaye?
20 “Akumunge, yambo tene mi lembando ‘Pulu Yemo popo toko mélema kalemele polomo’ imbi lemba kinie méle polona ola lemba mélemo kepe imbi lepa mi lemba.
21 Aku-sipela yambo tene mi lembando ‘ulke-tembelemo’ imbi lemba kinie ulke-tembelemo kinie akuna sukundu molemo yemo kinie imbi lepa mi lemba.
22 Yambo tene mi lembando ‘mulú-koleamo’ imbi lemba kinie Pulu Yemo ye-nomi-kingimu molopa kolea nokombando molemo polomo kepe aku polona ola molemo yemo kepe imbi lepa mi lembala.
23 “Ene ungu-manemanga puluma pilku mane silimele yema kinie, Parisi-yema kinie, ene mindili nongo paa molko kenjingí! Ene ‘sike unguma nikimulu.’ ningu kolo toko topele-mapele toli yema!r Langi kalongendo ‘songo tepili!’ ningu enenga poniena méle kanga lupe-lupe olemomanga inie toko langine mundulimele akumanga ungu-mane te pelemomo pilku rureponga-talo rureponga-talo ningu nosilimelemanga telu-telu Pulu Yemonga ningu yu silimeles. Aku telemele nakolo ungu-mane tondolo olandopa mare munduku kelko naa pilku telemele. ‘Yamboma apuruku yambo-ailime liku taponjiku yambo kerime teko kenjiku naa teko, yamboma naa apuruku pali kondo kolko, Pulu Yemo ‘Sike.’ ningu tondolo-munduku pilku “Temolo.” nilimele mele sumbi-siku teko molko, aku teangi!’ nimbe pelemo ungu-manemando nikiru.t Ungu-mane wema pilku telemelema munduku naa kelko ‘mare naa telemele’ nikiru akuma pali telemelkanje papu.
24 Ene mongo keri lelimene “˻Mongo keri leli˼ yamboma aulkemo lipu ora siemili!” nilimele yema,u ene ˻ungu-mane wema tondolo-munduku pilku teko, ungu-mane tondoloma naa pilku telemele aku telemele mele ungu-iku topo niembo:˼ Langi nongendo méle kanga lopalo molo lomou langine pelemo kanokolie ‘Naa namili!’ ningu wendo liku ele-telemele, nakolo kongi-kao te langine pelemo kinie naa kanoko we liku toko penge mundulimele.v
25 “Ene ungu-manemanga puluma pilku mane silimele yema kinie Parisi-yema kinie, ene mindili nongo paa molko kenjingí!
Ene topele-mapele toli yema! Pellete-kápomanga ulsukundu kulumiye toko konjilimele nakolo akumanga sukundu langi pelemoma enene tondolo-munduku wa liku, enene eneno waka kolko eneno konopu kimbú-siku limele uluma.w
26 Ene mongo keri leli Parisi-yema! Pellete-kápomanga sukundu kulumiye tonge kinie ulsukundu kepe kake temba.
27 “Ene ungu-manemanga puluma pilku mane silimele yema kinie Parisi-yema kinie, ene mindili nongo paa molko kenjingí!
Ene topele-mapele toli yema! ‘Yambo-ono-koleamo kanoko peanga kanangi!’ ningu pene kake telimu ape kanjilimele mele ene aku-sílime mele molemele. Yambo-ono-koleama sike ulsukundu peanga lemo kanolemele nakolo sukundu yambo kololimenga ombelema kinie méle puruli nurupuluma kinie peke lepa pelemo.
28 Ene aku-siku mele molemele. Yambomane enenga kangikundu kanokolie ‘Ene ye sumbi-nílime’ konopu lemele nakolo enenga konopuna sukundu kolo toli uluma kinie ulu-pulu-kerime kinie mindi si nimbe pelemo.
29 “Ene ungu-manemanga puluma pilku mane silimele yema kinie Parisi-yema kinie ene mindili nongo paa molko kenjingí!
Ene topele-mapele toli yema! Pulu Yemone ungu-umbu tonjilimoma pilku yando ningu silime kolemele kinie enenga ono telemele koleama teko mimi teko, sumbi-nili yambomanga óno-koleama au silimele.
30 Aku tekolie enene ningindu: “Olio olionga anda-kolepalime-kinie molemelkanje enene Pulu Yemone ungu-umbu tonjirimuma pilku yamboma ningu siringi yemax toko konjiringi kinie olionga anda-kolepali naa lipu taponjipu ene naa tolemelka.” nilimele.
31 Aku nilimelemonga ‘Kanu yema toko konjiringi yambomane kalko liringi yema molemolo.’ ningu eneno liku ora silimele.
32 Aku liemo kapola enenga anda-kolepalimene pulu monjiku teko kenjiringi mele enene kamu teangi!
33 “˻Yamboma nongo konjili˼ kongi-ka wambiyema! Ene kolo topa yamboma tepa kenjili wambiyemonga waloma!y Pulu Yemone enendo “Teko kenjiringimunge tepe-koleana pai!” nimbé kinie ene manda kowa pungí aulke te lembaye?
34 Akumunge nane Pulu Yemone ungu-umbu tonjimbema pilku yamboma ningu singí yema kinie, pilipe konginjili pemba yema kinie, mane singí yema kinie, ene molemelena lipu mundukuru. Aku yemanga mare toko konjiku, mare ‘Kolangi!’ ningu unju-perana uku toko panjiku, mare ene máku toko Pulu Yemonga ungumu pilili ulkemanga mengo puku ka-pulsene toko, koleamanga ‘tamili!’ ningu pulú siku akilku lombili pungí.
35 Aku tengemonga ou-pulu-pulu ˻Pulu Yemone mulú-matolo terimu kinie˼ kepe yandopa kinié kepe yambo sumbi-nílime toko konjiringimunge ulu-umbunime ene ˻Juda-yambomanga ye-ailime˼-kinie pemba. ˻Pulu Yemonga bokuna˼ ou-pulu-pulu sumbi-nili ye Epele kinie, yandopa moloringi yambo sumbi-nílime kinie, yandopa ˻Pulu Yemonga bokumu pora nilimo akuna˼ Berekia malo Sekaraya kinie toko konjiringi akumanga paliz ulu-umbunime ene-kinie pemba. Sekaraya akumu Pulu Yemonga ulke-suluminia lerimu ulkemo kinie Pulu Yemo popo toko mélema kaloringi polomo kinie ai-suku-singine toringi kanumu.
36 Nane paa sike enendo nikiru: Ou teko kenjiringi ulumanga pali ulu-umbunime i yambo kinié molkomelema-kinie pemba.” nikiru.” ˻nirimu.˼
Jerusalleme-Yamboma Toko Kalonge Pilipelie Yesusini Ene Kondo Kolorumu Temanemoa
37 ˻Aku nimbelie Yesusini Jerusalleme moloringi yamboma yu kondo kolopa akumundu ungu te nimbelie nimbendo:˼
“O Jerusalleme˻-yamboma˼, Jerusalleme˻-yamboma˼, Pulu Yemone ungu-umbu tonjirimuma pilku yamboma ningu siringi yema toko konjiku, yuni yamboma ‘liku taponjengi!’ nimbe ene moloringine lipe mundurumu yema kouni toko konjiku telemele yamboma, kera-gulta anumumuni yunge waloma lipe yunge kongomone aki topa nokolemo mele nane wale aisili ene aku-sipu nokolka nakolo eneno “Mólo!” niringi.
38 Akumunge pilieme! ˻Opa-touma ene tonge onge kinie Pulu Yemone altopa ene naa nokopa naa lipe taponjimbemonga˼ opa-toumane ongo sike toko munduku enenga koleamo kinie enenga ulke-tembelemo kinie kamu toko kalongemonga ene ku penge.
39 Akumunge nane ene ungu te pea nimbu sikiru:
“Ene Jerusalleme yamboma, enene nando
“Pulu Ye Yawene lipe mundurumuna okomo yemo
imbi ola molopa, molopa konjipili!”b Konana 118:26
ningí walemonga na altoko kanonge. Ou mólo!” nikiru.” nirimu.