2 Aku teringi kinie kanokolie Parisi-yemane^e Yesusi yundu ningindu: “Kána! ˻Koro molemolo˼ Wale-Sambatemonga ‘Kongono naa teangi!’ nimbe pelemo ungu-manemo^f nu lombili andoli yemane ungu-manemo pulue tokolie aku-siku tekemele.” niringi.

3 Yesusini pundu topa nimbendo: “Ene Pulu Yemonga bokuna sukundu ˻anda-kolepa ye-nomi-kingi˼ Depisini ^gterimu mele nimbe molemo temanemo kanokolie temanemonga pulumu naa pilimeleye? Depisi kinie yu pea puringi yema kinie ene engelene kolkolie niringimuni,

4 Depisi Pulu Yemo molorumu sele-ulkena sukundu pupe, Pulu Yemonga kumbi-kerena lerimu pillawa-kalolime lipe nomba, yu pea puringi yema sirimu noringila kanumu.^h Kanu pillawa-kalolimendo Pulu Yemone ungu-mane te sipelie nimbendo:

5 “Ungu-mane te pelemola. “Pulu Yemo popo tonjili yemane^j ˻koro mololi˼ Wale-Sambatemanga Pulu Yemonga ulkena kongono telemele kinie Sambate-walemanga ungu-manemo pulue tolemele nakolo aku kongono telemelemonga mongo naa pemba.” nimbe molemo^k akumu naa-la pilimeleye?

6 Nane enendo nimbu sikiru: “Méle konde te^l kinié pelemo akumu Pulu Yemo popo toko kalemele ulke-tembelemonga olandopamo.” nikiru.

7 ˻Pulu Yemone nirimu ungu te yunge bokuna molemo mele i-sipe:˼

9 Kanu-kinie Yesusi aku koleamo mundupe kelepa pupe Juda-yamboma máku toko Pulu Yemonga ungumu piliringi ulke tenga purumu.

10 Kanu ulkena ye te molorumu, yunge ki te kamu kolopa kukurumu. Kanu-kinie akuna moloringi ye marene ‘Yesusini tepa kenjimbe kinie kote tenjemili!’ ningu yu walsiku pilkulie ningindu: “Koro molemolo Wale-Sambate-kinie yambo kuru tolemoma tepo konde limulú kinie manda molo aku temulu liemo Pulu Yemonga ungu-manemo pulue tomoloye?” niringi.

11 Yesusini yemando pundu topa nimbendo: “Sambate-wale kinie ye tenga kongi-sipisipi te muruna topa manie mundumbe kinie sipisipi ari telemo yemone kundupe ola lipe memba naa ombáye?

12 Aku liemo sipisipi maniendopa mele, yamboma paa olandopa, akumunge, Sambate-wale kinie ulu peangama manda naa temoloye?” nirimu.

13 Aku nimbelie ki kolopa kukurumu yemondo nimbendo: “Nunge kimu sinio si!” nirimu kinie yemone yunge kimu sinio sirimu kinie yunge ki ekendo peanga lerimu mele ki keri lerimumu altopa kamu peanga lerimu.

14 Nakolo ˻Yesusini aku terimu kinie kanokolie˼ Parisi-yemane pena puku máku toko “Yu nambe tepo topo konjimulúye?” ningu aulke te kororingi.

15 ˻Parisi-yemane˼ yu tonge teringi pilipelie Yesusi aku koleamo mundupe kelepa purumu. Kanu-kinie yambo aisili Yesusi purumu mele yu lombili puringi kinie yuni yambo kuru torumuma pali tepa konde lipelie

16 nimbendo: “Na sike-yemo molopolie i ulu-tondoloma tekero mele enene yambo lupe marendo naa ningu siei!” nirimu.^o

17 Aku-sipe wendo orumumunge koronga-ou Pulu Yemone ungu-umbu tonjirimuma pilipe yamboma nimbe sirimu ye Aisayane^p ulu te pe wendo ombá ou nirimu mele kamu wendo orumu. Aisayane nimbendo:

22 Kanu-kinie ye te yunge konopuna kuru te molorumu-na mongo keri lepa mélema naa kanopa ungu naa nirimu ye te Yesusi molorumuna mengo oringi kinie Yesusini yemo tepa konde lirimu kinie kanu yemo ungu nimbe mélema kanorumu.

23 Aku terimu kanokolie yambomane pali mini wale mundukulie ningindu: “I yemo ye-nomi-kingi Depisinge Malonje?” ^u niringi.

24 Nakolo aku niringi ungumu pilkulie Parisi-yemane^v ningindu: “Mólo! Kurumanga nomi Belsipuli^w mindi i ye Yesusinge konopuna molopalie yu tondolo silimo-na yuni kuruma topa makorolemo.” niringi.

25 Enene aku-siku konopuni piliringi mele Yesusini pilipelie ˻‘Yesusi ‘Setene-kinie opa-tou moloringimunge Setenene yu naa lipe taponjilke.’ ningu paa piliengi!’ nimbe˼ enendo nimbendo: “Yambo-talape te konopu teluna naa pupili molko suku-singine ówe panjiku ene-eneno opa teko lupe-lupe molemele kinie kanu talapemo pora nilimo. ˻Molo˼ kolea tenga yamboma molo ulke teluna pelemele yamboma konopu teluna pupili naa molko ene-eneno opa telemele kinie kanu yambo-talapemo sungu-siku yu-mele-mele molemele.

26 Aku-sipela, Setenene^x yunge kuru te makorolkanje aku telkamonga yunge talapemo kinie opa-mele telka. Pe yunge talapemo nambe-tepa kapola molemelkaye? ˻Pora nilke.˼

27 “Ungu te piliengila! Nane Belsipulinge tondolomone kuruma makorolio liemo enenga yemane naenga tondolomone kuruma makorolemeleye? Akumunge, ˻enenga ye kuruma makorolemele yemane ‘Pulu Yemone olio tondolo silimo-na olione kuruma makorolemolo.’ ningu pilimele-na˼ enene nando i nikimili unguma kanu yemane pilku apurukulie “Ene kolo tokomele.” ningí.

28 Nakolo sike Pulu Yemonga Minimuni na tondolo silimo-na nane kuruma makorolio liemo Pulu Yemo ye-nomi-kingimu molopa yamboma nokomba walemo^y ene molemelena koronga wendo omu.” ˻nirimu.˼

29 “Ungu te pea i-sipe: Ye enge nili tene yunge ulkemo nokopa konjilimo kinie ye tene we manda sukundu omba mélema wa lipe memba pulimoye? Akumu manda mólo! Ou wa noli yemone ye enge nílimunge kimbu-kime ka topalie yunge ulkena manda omba mélema wa limo kanumu.^z

30 “Na naa lipe taponjilimo yambomone na kinie opa-tou molemo. Yambo tene na lipe taponjipe ˻kongi-sipisipime˼ sukundu naa limo yambomone ˻kongi-sipisipime˼ topa bulu-balu silimo.

31 Akumunge, nane enendo nikiru: “Yambo tene ulu-pulu-kerime tepa, ungu-taka tonjipe nimbe kenjilimo uluma Pulu Yemone manda ‘Manie pupili!’ nimbe siye kolomba. Nakolo yambo tene Pulu Yemonga Minimu nimbe kenjipe ungu-taka tonjipu yunge imbimu makare mele temba uluma Pulu Yemone ‘Manie naa pupili!’ nimbe siye naa kolomba.” nikiru.

32 Manie Omba Mana-Ye Au Lerimu Yemo^a ungu-taka tonjipe ungu nimbe kenjilimo yambomo aku-sipe ulu-keri telemoma Pulu Yemone ‘Manie pupili!’ nimbe siye kolomba. Nakolo Mini Kake Telimu˻ni ulu te telemo kinie˼ yambo tene ungu-taka tonjipe, opa tepa sipe ˻“Yuni naa tekemo. Kurumanga nomi Setenene yu lipe taponjilimona aku telemo.˼” nilimo yambomo aku-sipe ulu-keri telemomo kinié kepe mulú-ma pora nimbé wale kinie kepe ‘Manie naa pupili!’ nimbe paa siye naa kolomba.^b

33 “Unju peanga te kanokolie ‘Mongo peangama tomba nomolo.’ ningu kanolemele. Unju keri te kanokolie ‘Mongo kerime tomba manda naa nomolo.’ ningu kanolemele. Unju te mongo tolemo kinie kanokolie ‘I unjumu peanga, i unjumu keri.’ ningu apuruku kanolemelemonga aku-siku ningu kanolemele.^d

34 Ene Parisi-yema, kolo topa yamboma tepa kenjili wambiyemonga waloma,^e ene ye keri molemelemane nambe-teko ungu peangama manda ningíye? Yambo te yunge konopuna pelemo unguma mindi kerena nilimo akumunge ene ye kerimene nambe teko ungu peangama manda ningíye?

35 Aku-sipe-mele, yambo peanga tene yunge konopuna ulu-peanga pelemoma telemo, nakolo yambo keri tene yunge konopuna ulu-keri pelemoma telemo.

36-37 Akumunge, nane enendo nimbu sikirumu: “Pulu Yemone yamboma kote tenjimbe walemonga eneno ungu nilimelema apurupe pilipelie “Nu yambo peangamo, nu yambo kerimu.” nimbé akumunge yambomane mana we ungu nilimelema pali kepe apurupe pilipelie “Aku unguma nambemuna niringiye?” nimbé.”^f nikiru.” nirimu.

38 Kanu-kinie Parisi-ye mare kinie Pulu Yemonga ungu-manemanga puluma pilku mane siringi ye mare^h kinie enene Yesusindu ningindu: “Ungu Mane Sílimu, ‘Nu sike Pulu Yemone ‘Kongono tenjeni!’ nimbe mana lipe mundurumunje olio kanamili!’ ningu Pulu Yemone mindi manda ulu-tondolo telemo mele te tei!” niringi.ⁱ

39 Yesusini pundu topa nimbendo: “Kinié mana molemele yamboma keri mindi molemele. Ene teko kenjiku Pulu Yemo liku su silimele yambomane “Pulu Yemone mindi ulu-tondoloma manda telemo mele kanamili tei!” ningu na mawa telemele. Nakolo ˻Pulu Yemone na lipe mundurumu-na ombo molkoro. Yu-kinie tapu topo kongono telembolo mele^j lipe ora simbe ulu-˼tondolo te wendo naa ombá. Pulu Yemone ungu-umbu tonjirimuma pilipe yamboma nimbe sirimu ye^k Jona-kinie wendo orumu ulu akumuni mindi lipe ora silimo manda kanonge.

40 Oma aili tene Jona topa penge mundurumu kinie yu omamonga olona ipulueli tangoli wale yepoko molopa perimu ˻kinie omamone yu nomú-kélona meku topa wendo mundurumu kinie yu altopa we molorumu˼ mele^l Manie Omba Mana-Ye Au Lerimu Yemo ˻kolomba, óno teko panjingí kinie˼ aku-sipe ipulueli tangoli wale yepoko mana sukundu pepalie ˻lomboropa ola molomba˼.^m

41 “Ou kolea-aili Ninipa yamboma ˻sike molko kenjiringi nakolo Pulu Yemone ungu-umbu tonjirimu mele˼ Jonane ˻pilipe˼ Ninipa yamboma pupe nimbe sirimu kinie pilkulie teko kenjiringi mele kanoko keri kanoko konopu alowa teko molko konjiringi.ⁿ Aku teringimunge kinié molemele yambomane Jonanga olandopa ye te ya molemo yemonga ungumu liku su-siku naa pilimelemonga kote-walemo pe wendo ombá kinie Ninipa yambomane kotena angilku, kinié molemele yambomando “Teko kenjiringi. Mindili nonge kinie papu.” ningí.” ˻nirimu.˼

42 “Ou olio Isirele-yambomanga ye-nomi-kingi Sollomono yu ye paa tondolo te molopa, yu ungu lupe-lupema pilipe konginjilimu pepili molorumu mele kolea Sipa nokorumu ambo-nomi-kuinimu pilipelie, Sollomonone ungu peangama mindi nirimu mele pilimbendo yu kolea suluna molopalie ˻Sollomono molorumuna˼ wale aisili aulkena pelipe orumu.^o Aku-sipe terimumunge, ye-nomi Sollomononga olandopa ya molemo yemone nilimo ungumu kinié mana molemele yambomane naa pilku, liku su silimelemonga kote-walemo wendo ombá kinie kolea Sipa ambo-nomi-kuinimuni nimbendo: “Nane Sollomonone ungu peanga nirimu mele pilimbundu aulke suluna orundu nakolo Sollomononga olandopa molorumu yemone nirimu ungumu ene naa pilku, liku su siringi yamboma aku teringimunge ene papu mindili nonge.” nimbé.”^p ˻nirimu.˼

43 “Kuru te ye tenga konopuna wendo ombalie, no naa mololi koleamanga pupe manda koro molomba kolea te korolemo. Te naa kanopa lenjipelie

44 yuni nimbendo: “Na ou molopolie wendo ondu ulkena^r kelepo pambo!” nimbe yu omba yu ou molopa purumu ulkemo kanolemo kinie ulke puri memba tepa peanga tepa we lepa yambo te naa molemo kinie kanopalie nilimomone,

45 yu kelepa anju pupelie kuru kara puli paa olandopa yepoko-pakara lipe memba omba ene pea kanu ulkena sukundu puku molemele. Kanu-kinie kanu yemo ou molopa kenjilimo nakolo pe paa kamu olandopa mele molopa kenjilimo. Aku-sipe, kinié ya teko kenjiku molemele yamboma pe kamu molko kenjingí.” nirimu.

46 Yesusi yambo máku toko moloringime ungu-mane sipe molopili yunge anumu kinie angenupili kinie yu-kinie ungu ningindu ongo pena angiliringi.

47 Yambo tene yundu nimbendo: “Aminie kinie angenali kinie^t enene nu-kinie ungu ningindu ongo pena angilimele.” nirimu.

48 Yesusini yundu pundu topa ˻ungu-iku topalie˼ nimbendo: “Nanga anumu naeye? Nanga angenupilime nameleye?” nimbelie nirimumuni,

49 yu lombili andoli yamboma lipe ora sipelie nimbendo: “I yamboma nanga anumu kinie nanga angenupili kinie molemele.

50 Nanga Lapa, mulú-koleana molemomone “Teangi!” nilimo mele pilku liku telemele yambo akuma nanga anumu kinie nanga angenupili kinie nanga kemulupilime kinie molemelemonga aku-sipu nikiru.” nirimu.