Pilipe Konginjili Peli Ye Pokore Yesusi Ongo Kanoringi Temanemo
2
(Pulu Yemonga Ungumu. Kolomongo-kanga wane.)
Erote kolea Judia-Disiriki yambomanga ye-nomi-kingi molopili Mariane kolea Judia, Betellieme taonona Yesusi merimu. Kanu walemanga ena wendo oli koleana pilipe konginjili peli ye pokore alieli ‘Ulu mare wendo okomonje piliemili.’ ningu kombu-kandipime mimi-siku kanoko moloringime kolea-aili Jerusalleme ongolie ningindu:
2 “Juda-yambomanga ye-nomi-kingi molomba kango meringimua tena molemoye? Olio ena wendo olemo koleana molopolie ye te ye-nomi-kingi molomba meringimu lipe ora sili kombu-kandipi te pulu-pulu wendo omba angilirimu kanopolie nirimulumuni, yu popo topo imbi ambolopo ola linjimulundu okomolo.” niringi.
Visit of the Magi (Matthew 2:1-23)
3 Ye-nomi-kingi Erote i ungumu pilipelie ‘Ye te yu kolo wangopa kingi molomba lepamo.’ nimbe pilipelie yu mini-wale mundupe, Jerusalleme yamboma pali mini-walela munduringi.
4 Kanu-kinie yuni Juda-yambomanga Pulu Yemo popo tonjiringi ye-ailime pali kinie, Pulu Yemonga ungu-manemanga puluma pilku mane siringi yema pali kinie,b “Sukundu wai!” nimbelie ene walsipe pilipelie nimbendo: “Pulu Yemone “Ene nokopa konjimbe ye te lipu mundumbu.” nimbe mako torumu ye-nomi Kirasimuc tena mengemondo niringiye?” nirimu.
5 Enene yundu ningindu: “Kolea Judia sukundu Betellieme taonona yu menge. Pulu Yemone ungu-umbu tonjirimuma pilipe yamboma nimbe sirimu ye ˻Maikane˼d pe aku-sipe wendo ombamondo ou nimbe boku torumu akuna molemo kanumu. Yuni nimbendo:
6 “Betellieme, kolea Judae lemo kolea te,
yu kolea Juda sukundu kolea-ailimenga
yu kolea manie te mólo!
Yunge sukundu ye-nomi aili te wendo ombá,
aku yemone nanga Isirele-yambomanga
sipisipi tapu-yemo molopa ene nokomba.”f Maika 5:2
nirimu kanumu.” niringi.
7 Kanu-kinie we-yamboma naa kanoko naa pilku molangi Erotene pilipe konginjili peli yema “Wai!” nimbe kombu-kandipimu pulu-pulu wendo omba angilirimu walemo walsipe pilipelie nirimumuni, yundu ningu siringi kinie
8 pilipelie enendo nimbendo: “Ene Betellieme puku kangomo wamoko koro-payo! Kanoko lenjikulie na ongo ningu sieyo! Na kepe yu ombo popo topo imbi ambolopo ola linjembo!” nirimu.
9 Kingimuni aku-sipe nirimu pilkulie ene kelko puku kano-puringi.
Kanu-kinie ena wendo oli koleana molkolie kombu-kandipi kanoringimu ene puringine kumbi-lepa pumbe pupelie kangomo molorumu ulke-imuna pupe ola angilirimu.
10 Enene kombu-kandipimu kanokolie konopu paa aili teko siringi.
11 Ulkena sukundu pukulie kangomo kinie anumu Maria kinie moloringili puku kanoko lenjiringi. Kanokolie kangomonga kumbikerena koporongo langoko ma kanokolie yu popo toko imbi ambolko ola linjiringi. Linjikulie ene wale peanga mengo oringime apisiku méle peangama wendo liku yu siringi. Kou-gollo kinie, paura kalemele kinie mune paa toli paura te kinie, kopongo-wele mune paa toli te kinie, aku mélema yu siringi.
12 Kanu-kinie Pulu Yemone ene uru-kumbu sipelie enendo nimbendo: “Ene Erote molemona kelko pui naa pangi, mólo!” nirimu kinie pilkulie ene aulke tenga lupe ongolie ulkendo puringi.
Josepone Anumu-Malotolo Kolea Isipi Memba Kowa Purumu Temanemo
13 Kanu-kinie pilipe konginjili peli yema kelko puringi kinie Ailimunge angello tene Josepo uru-kumbu sipelie nimbendo: “Ye-nomi-kingi Erotene nondopa yunge ami-yemando “Kangomo koroko toko konji-pai!” nimbé kene nu ola molkolie kangomo kinie anumu kinie liku mengo kolea Isipindu kowa puku molo-payo! Ne anju molkolie ningímuni, pe nane “Kelko yando wai!” nimbú kinie wangi! Ou mólo!” nirimu.
14 Aku nirimu kinie pilipelie Josepo ola molopalie ipulueli anungulutolo lipe memba Isipindu purumu.
15 ‘Erote kolomba kinie kelepo ulkendo pumulú.’ ningu ou Isipi anju moloringi.g Aku teringimunge Pulu Yemone ungu-umbu tonjirimuma pilipe yamboma nimbe sirimu ye tene ulu te pe wendo ombá ou nirimu mele kamu wendo orumu. Akumu i-sipe:
“Pulu Yemone nimbendo:
“Nanga kangomondo “Kolea Isipi munduku kelko
wendo oi!” nirindu.” nirimu.”h Osia 11:1
nimbe kanu ye ˻Osiane˼ nirimu kanumu.
Ye-Nomi-Kingi Erotene Betellieme Kango-Pamema Topa Konjirimu Temanemo
16 Kanu-kinie anumu-lapatolo Yesusi pea Isipi puku molangi, pilipe konginjili peli yemane Erote yu liku lou lenjiringi Erote yuni pilipelie mumindili paa pulumu kolorumu. Mumindili kolopalie ami-ye marendo nimbendo: “Betellieme taono kinie Betellieme nondopa lemo koleama kinie kanumanga puku kango ponie talo omba puli kangoma kinie ponie talo naa pora nili kangoma kinie koroko toko konji-pai!” nirimu. Kombu-kandipi kanoko pilipe konginjili peli yemane kombu-kandipimu pulu monjipe wendo omba angilirimu walemo yundu ningu siringi mele pilipelie ponie aku-sipe nirimu.
17 Aku-sipe terimumunge koronga-ou Pulu Yemone ungu-umbu tonjirimuma pilipe yamboma nimbe sirimu ye Jeremayane ulu te pe wendo ombá ou nirimu mele wendo orumu.
18 Yuni nimbendo:
“Ene kolea Ramai suku ungu te piliringi;
kola teringi pilku,
yambo kolemele kinie kola telemele mele
kola aku-siku teringi piliringi.
Ambo Reselene yunge ambolangomanga kola terimu.
Yu ‘Konopu pe nipili!’ ningulie teringi nakolo
yunge ambolangoma naa moloringi-ne
yu kondo kolopa mindi molorumu.”j Jeremaya 31:15
nimbe Jeremayane ou aku nirimu kanumu.
Josepone Anumu-Malotolo Kelepa Isirelendo Yando Memba Orumu Temanemo
19 Pe Erote kolorumu kinie Ailimunge angello tene Josepo Isipi molopili uru-kumbu sipelie nimbendo:
20 “ “Kangomo toko konjengi koro-pai!” nirimu yemo kolorumu kene ola molko anumu malotolo liku mengo kolea Isirelendo kelko pui!” nirimu kinie
21 pilipelie yu ola molopa anumu-malotolo lipe memba Isirelendo purumu.
22 Nakolo Akellesi yunge lapa Erote kolo wangopa ye-nomi-kingimu molopa kolea Judia-Disiriki nokorumu pilipelie Josepo yu kanuna altopa pumbendo pipili kolorumu. Kanu-kinie Pulu Yemone uru-kumbu sipelie nimbendo: “Marena tongenje kene akuna naa pui!” nimbe yundu lepi-lepi torumu kinie yu kelepa kolea Gallilli disiriki pupe
23 akuna lerimu Nasarete taonona pupe molorumu-na Pulu Yemone ungu-umbu tonjirimuma pilku yamboma ningu siringi yemane ˻Yesusi-kinie˼ ulu te pe wendo ombá ou niringi mele kamu wendo orumu. Enene ningindu:
“Yambomane yu imbi lelko
“Yu Nasarete taono ye te.” ningí.”
niringi kanumu.