Kurumenga Nomi Setene Ponie Wane-Tausini Ka-Ulkena Pemba Temanemo
20
Kanorundu kinie mulú-koleana angello te, kowa muru te paa lepa mindi pupe naa pora nilimomonga kere pulu kimu kinie ka-séne paa awili te kinie ambolopa meli, manie orumu. 2 Aku angellomone wambiye derekonomo ambolopa lipe ‘Ponie wane tausini aku-sipe molopili!’ nimbe ka-sénene ka torumu. Aku wambiye-derekonomo yu koronga ou molorumu kongi-ka-wambiyemo,a yu depelemo,b yu Setene.c 3 Angellomone yu ambolopa lipe ka-sénene ka topalie yu mana manie kowa muru te paa lepa mindi pupe naa pora nilimomonga topa manie mundupe, ‘Ponie wane tausini omba pupili yu altopa wendo omba ma koleana yembo talapema andopa kolo topa kondi naa topili!’ nimbe kere-pulumu pipi sipe lloko torumu. Ponie akume pora nimbé kinie ‘Yu wendo omba laye-kolte andopili!’ ningu wendo liku mundunge.4 Ye-nomi-kingi molemele poloma kanorundu, akumenga Pulu Yemone ‘Yemboma apurengi!’ nimbe namba sirimu yemboma moloringi.d Yembomane mana molko Yesusinge ungume andoko ningu siku, Pulu Yemonga ungumu tondolo-munduku pilku amboloringi kulu eno nomime kari leko toko kondoringi, akumenga minime kanorundu. Eno méle-takeramo kinie méle-takeramo none teli melte teko mimi teko anjeringimu-selo popo toko kapi ningu imbi liku ola naa mundunduku, méle-takeramonga makomoe enonga mambelena molo kíne ‘Naa molopili!’ niringi yemboma kanorundu. Akume lomboroko ola molko, ponie wane tausini Kirasi pea ye-nomi-kingime molko mélema nokoringi.f 5 Yemboma pali lomboroko ola molongemonga eno kumbi leko lomboroko ola moloringi. (We yembo koloringime aku yemboma kinie walsikele lomboroko ola naa moloringi. Ponie wane tausini pora nirimu kinie lomboroko ola moloringi.) 6 Kumbi leko ola moloringi akume yembo kake telime, eno malo. Yemboma wale talo siku kolonge aku ulumuni eno uluri manda naa temba. Eno Pulu Yemo kinie Kirasiselo popo tondoli yembomag molko, Kirasi kinie pea ponie wane tausini kingime molko mélema nokonge.
20:7-10 Setene Kamu Mindili Nomba Manie Pumbe Temanemo
7 Ponie wane tausini pora nimbé kinie kurumenga nomi Setene ka ulkena wendo liku mundunge kinie 8 ma koleana pali molemele yemboma, Goko kinie Mekoko kinieh kondi topa ‘Opa teangi wangi!’ nimbe sukundu sukundu limbe. Aku yemboma kou ukiya mele kapola. 9 Ma koleana pali kimbu kongono teko ongo ongolie, Pulu Yemonga yemboma moloringi koleamo, Pulu Yemo konopu mondolemo kolea-awilimu,i makaye teko tonge teringi nalo mulú-koleana tepe te manie omba aku amime norumu. 10 Kanu-kinie depelemone eno kolo topa sipe kondi torumu yemo, liku kou sallapaj tepe nomba kondopa perimu muruk paa awiline, méle-takeramo kinie, Pulu Yemone ungu-umbu tondorumume naa pilipe ungumu we kolo topa yando nimbe sirimu yemo kinie, elo ou liku toko manie mundoringi murune, yu liku toko manie mundoringila. Akune eno ipulueli tangoli alieli mindili nongo mindi molonge.
20:11-15 Yembomanga Kotemo Kamu Wendo Omb Temanemo
11 Kanu-kinie pe kanorundu kinie ye-nomi-kingi tenga polo kake teli awili te lierimu, akune ye te molorumu kanorundu. Mamo kinie mulumu selo yu kinie tere leko molonge kolea te naa lierimu kulu yu molorumune munduku siye kolko kowa puringi. 12 Yembo koloringime pali, wema kinie imbi mololime kinie yu molorumu polomonga kumbikundu angilieringi kanorundu. Boku mare wendo lipe kanorumu. Pe boku te lipe kanorumu, akumu konde molopa mindi puli bokumu.l Kanu-kinie bokumenga sukundu enonga ulu teringime kanopa apurupe kote pilierimu. 13 Nomu kusana koloringi yemboma lomboroko ola molko, yembo óno koleana lieringi yemboma kepe Yembo Kolemelemanga Minime Pulimele Koleana puringi yemboma kepe lomboroko ola molko kotena puku angilieringi. Kanu-kinie enonga ulu teringimenga yembo telu telu nimbe kote tenderimu. 14 Kanu-kinie kololi ulu pulumu kinie ou kolkolie minime moloringi murumu kinie akuselo tepe nomba perimu muru paa awilimunge topa manie mundorumu. Itepe nomba pelemo muru paa awilimu yemboma wale talo siku kolemele ulumu. 15 Kote pilimbe yemone yembo tenga imbimu konde molopa mindi puli bokune naa molorumu kinie kanopalie kanu yembomo tepe nomba perimu muru paa awilimunge topa manie mundorumu.