9:1-12 Biyukele Kise Pakera Sipemo Ungu Sirimu Kinie Wendo Orumu Mele Temanemo (Inie yakondo 8:6-9:21 pali kanani.)
9
Biyukele ambolko angilieringi angellomanga kise pakera sipemone yunge biyukelemo ungu sirimu kinie kombukandipi te mulune mundupe siye kolopa mana manie omba lierimumu kanorundu. Kanu kombukandipimua mana manie kowa-muru te paa lepa mindi pupe naa pora nilimomongab kerepulu kimu sirimu. 2 Aku kowa murumunge kerepulumu omba ki lsimu kinie kuli tepe nombalie ilie telemo mele murune paa awili tepa ilie wendo ombalie ena kinie mulu kinie pipi sipe sumbulu tondorumu. 3 Kanu iliena suku kuli-kumbe paa awisili wendo wendo ongo ma koleana ongo moloringi. ‘Pilimu kerena tomo pepili yembo nolemo kinie mindili nolemele melec aku-sipe aku kuli-kumbemanga alined tomo pepili yemboma topili!’ nirimu.4 Kuli-kumbemando nimbendo: “Unjo kepe era kepe mana molemo mélemanga gomoma naa nangi! Pulu Yemonga makomo yembo tenga mambele naa molomba yemboma mindie nangi!’ nirimu. 5 ‘Yemboma toko kondangi!’ nimbe tondolomo naa sirimu. ‘Nonge kinie oli kise pakera mindili nongo molangi!’ nimbe tondolomo sirimu. Kanu-kinie pilimuni yembo tolemo kinie mindili nolemele mele kuli-kumbemane yembo toringi kinie yemboma aku-siku mindili awili teko nongo moloringi. Nalo pilimuni nolemo kinie mindili nolemele akumu laye teko nolemele. Ne kuli-kumbemane noringi kinie paa mindili awili teko noringi. 6 Aku ulumu wendo ombá kinie mindili nonge yembomane “Paa kolamiliya!” ninge nalo kololi ulu pulumu kowa pumbe naa kolonge. Mindili nongo mindi molonge.
7 Kuli-kumbema kanorundu kinie ami yema opa tengendo kongi otena pulimele kongi ote none telime kanorundu. Kuli-kumbemanga pengena kou-gollone teli ye-nomi-kingime pakolemele wanie mele pakoko, enonga kumbikerema yembo kumbikere none terimu. 8 Enonga penge indime paa sulu pupe,f enonga ungúme lopa-posi llayono ungú none terimu. 9 Ami yema opa tengendo wale-pakoli kapane telime luwine pakolemele mele kanu kumbemanga olona aku-sipe none tepa, opa tengendo kongi otene karo kundupe lkisipe omba pulimo kinie ungu nilimo mele aku-sipe enonga poume ungu nirimu. 10 Kanu kuli-kumbemanga aline kale-nili mele angilipe yembomanga kangine tonge kinie tomomo aline pepalie kangine sukundu pumbe kinie oli kise pakera mindili nongo molonge tomomo sirimu. 11 Kuli-kumbema nokorumu ye-nomi-kingimu kowa-muru lepa mindi pupe pora naa nilimo murumug nokolemo angello kerimu, kanumunge imbimu Ipuru ungune ‘Apadono’ ningu, Giriki-Ungune ‘Apolliono’ nilimele. ˻Aku unguselonga pulumu ‘Melema Pali Topa Kondolimu’.˼
12 ˻Kera iliakamone “Umbune yepoko wendo ombá.” nirimumunge˼h umbune te ipora nirimu. Talo we perimuselo pe wendo ombá terimu.
9:13-21 Biyukele Talo Pakera Sipemo Ungu Sirimu Kinie Wendo Orumu Mele Temanemo (Inie yakondo 8:6-9:21 pali kanani.)
13 Biyukele ambolko angilieringi angellomanga talo pakera sipemone yunge biyukelemo ungu sirimu kinie ungu te wendo orumu pilierindu. Paura-keku mune tolime kaloringi polo kou-gollone telimu Pulu Yemonga kumbikerena lierimu akune ola kongi kao ungú mele kise teko mimi teko anjeringii akune kanu ungumu wendo orumu pilierindu. 14 Akumuni angello biyukele ambolorumumundu nimbendo: “Angello kise no awili Yuperetisi ka siku panjeringi akume wendo liku mundou!” nirimu. 15 Kanu-kinie ‘Ponie imunge, oli imunge, wale imu kinie, ena mongo imunge yemboma ówe toko yepoko teko, ówe te toko kondangi!’ nimbe mako topa ka sipe panjerimu angelloma wendo lipe mundorumu. 16 Ami ye kongi ote bulu mingine ola moloringimenga kambumu pilierindu mele i-sipe: tu anderete milliono.
17 Kongi otema kinie otemanga bulu mingine moloringi yema kinie kanorundu mele i-sipe: ‘Luwine mera naa molopili!’ ningu wale-pakoli kapane telime pakoringi akume mare kondolime pakoko, mare mukume pakoko, mare kanie telime pakoringi. Kongi otemanga pengema lopa-posi llayono pengema none tepa, tepe kinie ilie kinie kou-sallapa tepene noli kiniej akume enonga keremanga wendo orumu. 18 Yemboma ówe toko yepoko tekolie, kongi otemanga kerena umbune sili mele yepoko wendo orumumene ówe tenga yemboma toko kondoringi.k 19 Kanu kongi otemanga engema enonga kerena kinie aline kinie perimu. Enonga alime yembo nomba kondoli kongi ka wambiye mele, akumenga pengemane yemboma toko mindili siringi.
20 Umbune wendo orumumene toko naa kondoringi we moloringi yemboma aku umbunema wendo orumu kinie kepe kini teko kenjeringi ulume kanoko keri naa kanoko konopu alowa naa teringi. Kurume popo toko, kou-gollo kinie kou-sillipa kinie kou-barase kinie kou kinie unjo kinie akumene mélema kini teko mimi teko anjiku, kanu mele mongone naa kanoko ungu manda naa ningu aulke manda naaandoringi akume ‘Olionga pulu yema’ ningu popo toringi mélema munduku siye naa koloringi.l 21 Yembo toko kondoko, tomo ambolko, meambu liku, wa ulu kerinele teko, mélema wa nongo, aku ulu teko kenjeringime kepe palim munduku siye kolko konopu alowa naa lateringi.