8:1-5 Sipisipi Walomone Bokune Wakaye Yepoko Pakera Siku Lieringimu Wendo Lsimu Kinie
8
Sipisipi Walomone bokune wakaye yepoko pakera siku lieringimu wendo lsimu kinie ena mongo telu mele mulú-koleana melte paa ungu naa nirimu.2 Kanu-kinie pe kanorundu kinie angello yepoko pakera Pulu Yemonga kumbikerena angilimelema kanorundu, biyukele yepoko pakera sirimu lsingi.
3 Angello te lupe kou-gollone teli pellete, mune toli paura-kekume kalko Pulu Yemo siringi pellete ambolorumu kanumu memba omba Pulu Yemo popo toko mélema kaloringi polona nondopa omba angilierimu. Kanu-kinie paura-keku kaloringi kinie mune paa torumu paura-keku awisili kanu angellomo sirimu. ‘Pulu Yemonga ningu paura-keku aku-sipe mune tolemoma kaloringi polo kou-gollone teli, aku polomo ye-nomi-kingi polona lierimumunge aku paura kekumu kalopa Pulu Yemonga yembomane pali Pulu Yemo kinie ungu ningu mawa teringi ungume Pulu Yemo yu piliepili.’ nimbe paura-keku kanume kalopa mune tombamo yu sipili.’ nimbe aku paura awisili sirimu.a 4 Aku terimu kinie paura-keku kalorumumunge iliema kinie Pulu Yemonga yembomane Pulu Yemo kinie ungu ningu mawa teringi ungume angellomo angilierimune mundupe siye kolopa Pulu Yemo molorumune purumu. 5 Kanu-kinie angello kanumuni paura-keku kaloringi pelletemo lipe, Pulu Yemo mélema popo toko kaloringi polona tepe norumu tepe mare lipe pelletena mundupe peke sipelie mana topa mundorumu kinie mulú topa kolea kariapá tepa ma jimi-jimi terimu.
8:6-9:21, 11:15-18 Biyukele Yepoko Pakera Angello Yepoko Pakerane Ungu Siringi Temanemo
8:6-13 Biyukele Kise Angello Kisene Ungu Siringi Temanemo (8:1 pulu polko kanani.)
6 Kanu-kinie angello yepoko pakera biyukele ou siringi amboloringime ungu singe teringi.
7 Angello tene kumbi lepa biyukele ungu sirimu kinie lo kopu-mongo kinie tepe kinie meme kinie waka-maka mana manie purumu. Kanu-kinie ma kinie unjo kinie ówe topa yepoko tepa, ówe te ma kinie unjo kinie pali tepene nomba, era kondema pali tepe norumu.
8 Angello talo sipemone biyukele ungu sirimu kinie ma-pangi paa awili kuli tepe nomba aki torumu none teli te nomú-kusana toko mundoringi kinie nomú-kusamo ówe topa yepoko terimu, ówe te meme a-lepa, 9 nomú-kusana moloringi mélema ówe topa yepoko terimu, ówe te koloringi, nomú-kusana sipi lierimume ówe topa yepoko terimu, ówe te keri lierimu.
10 Angello yepoko sipemone biyukele ambolorumumu ungu sirimu kinie kombukandipi paa kapo te, paa kiye mele nomba, mulune manie omba noma ówe topa yepoko tepa, ówe tenga yu nona sukundu purumu. 11 Kombukandipimu yunge imbimu ‘Kombili Telimu’. Akumu nona suku purumu noma ówe topa yepoko tepa, ówe te kombili terimu. No kombili terimu akume yembo awisili noringime koloringi.
12 Angello biyukele ambolko angilieringimenga kise sipemo yunge biyukele ambolorumumu ungu sirimu kinie ena kinie oli kinie kombukandipime kinie yu-mele-mele yepoko yepoko ningu ówe toringi, ówe te keri lepa sumbulu topa pa naa terimu, akumunge tangoli ówe topa yepoko tepa ówe te kolea pa naa tepa, ipulueli ówe topa yepoko tepa, ówe te kolea pa naala terimu.
13 Na kanopo molorundu kinie kera-iliaka teb mulúne ola mangopa andopalie tondolo ru nimbelie nimbendo: “Mana molemele yemboma eno kinie paa umbune awili pokore wendo ombá, paa umbune awili pokore wendo ombá, paa umbune awili pokore wendo ombá. Angello yepoko enonga biyukele ungu naa sili we ambolko angilimelema ungu singe kinie mini-wale mundunge umbune paa awili pokore wendo ombá.” nirimu.