POLLONE “KIRASINGE KORINI YEMBOMA KINIE ULU KERIME WENDO ORUMUME MUNDUKU SIYE KOLKO “KAMU MANIE PUPILI.” NIENGI.” NIRIMU UNGU TE
Kolomongo Awili 5–6
Pollone “Enonga Angenu Tene Ambo Te Kinie Wa Ulu Kerinele Telemo Yemo Makorangi!” Nirimu Ungumu
Kolomongo-awili 5
Wa-Ulu-Kerinele Teli Ulu Te Kirasinge Korini-Yemboma Kinie Perimu Ungu Te
5
a Eno-kinie wa-ulu-kerinele teli ulu te wendo olemo mele temane toko silimele akumu na pilkiru. Kanu ulumu ulsu molemele yembomaneb teko kenjilimele mele maniendopa, i ulumu olandopa. Enonga ye tene lapanga ambomo yu lipe memba andolemo.c 2 ˻Enonga angenu ye tene aku-sipe telemomonga˼ enone ‘Olio yembo peangama molemolo.’ ningu enono nambemune kapi nilimeleye? ˻Enonga imbi liku ola munduku ulume telemele mele munduku siye kolkolie,˼ konopu keri panjiku kola teko, tepa kenjilimo ye kanumu ‘Eno kinie tapu topa naa molopili!’ ningu toko makoroko ulsu mundulimelanje papu. 3 Sike nanga kangimu eno kinie naa molemolo nalo nanga konopumuni ‘Eno-kinie molemolo.’ konopu lepolie, na pea molemelanje yunge kotemo pilipulie “Yuni akumu terimu kene tepili!” nilke mele ou na pilipu molio. 4 ˻Enone tenge mele pilkirumu niembo:˼ Olionga Awili Yesusid-kinie máku toko molonge kinie na konopuni enonga máku tongemo nokombo none temba, olionga Awili Yesusinge engemo eno kinie molombala. 5 ˻Aku-sipu máku topo molomolo˼ kinie ne tepa kenjilimo yemo ‘˻Kurumenga nomi˼ Setenene e yu nokopili!’ ningu yu Setene liku siengi! ˻Ya mana˼ Setenene yunge kangimu tepa kenjimbe mindili nombá kinie ˻yu konopu alowa tembanje. Pe˼ Awilimu omba yembomanga kote pilimbe walemonga ‘Yemonga minimu kolea kerine naa pupe mindili nomba, yu-kinie pea molopa kondomba.’ ningu yemo yu kinie aku-siku teangi!5:6-13 Pollone Kirasinge Korini Yembomando “Wa Ulu Kerinele Telemo Yemo Toko Makorangi!” Nirimu Ungumu (5:1 pulu polko kanani.)
6 ˻Eno kinie ye te molemomone ambo te kinie tepa kenjipe molopili˼ enone enono kapi nilimele akumu paa kapola naa telemo. Paa teko kenjilimele. Pillawa akoli mele yisi pillawana mundukulie pillawa teko mimi telemele kinie yisi paa wallo-koltene pillawa awisili akolemo melef eno naa pilimeleye? 7 Akumunge, ˻Juda-yembomane ou teringi mele pilkulie˼ yisi oume toko ltekolie, yisi naa peli pillawa kondemo molangi! ‘Pulu Yemonga angellomone olio naa topa we omba pupili.’ ningu Juda-yembomane sipisipi walomo toringi mele Kirasini ‘enonga sipisipi walomo mele molambo tangi!’ nimbe kolo wangopa kolondorumumunge eno sike pillawa konde mele molemele. ˻Aku kene ne yemo ‘yisi mele molemo.’ ningu yu makorangi!˼ 8 Aku kene ˻Pulu Yemonga angellomone we omba pupe Juda-yemboma naa torumu mele konopu siku pilingendo Juda-yembomane isime pali liku lteringi mele˼g Kirasi olionga nimbe kolondorumu mele konopu sipu pilimolondo ulu-pulu-kerime kinie tepo kenjilimolo ulume pali kinie ‘yisi oume mele’ nimbu mundupu siye kolopo, yu kapi nimolondo Pulu Yemone ‘ulu kake telime’ nimbe kanolemo ulume tepo, ungu sikema mindi nimbu molamili! ˻Aku ulume pillawa yisi naa pelimu mele.˼
9 Nane ou pepá te topo sirindu akumuh i-sipu nimbu topo sirindu: ‘Wapora toli yemboma kinie eno telune tapu toko naa molangi!’ nirindu kanumu. 10 ˻Nalo aku nirindumu˼, ulsukundu molemele yembomane wapora toko, yembomanga mélema kanoko yama mengo, yembomanga mélema kolo toko wa liku, we mélema ‘Olionga pulu yema.’ ningu liku anjiku popo toko mélema kalko silimele yembomando naa nirindu. ‘Kanu yemboma kinie tapu topo naa molopo mundupu siye kolamili!’ nilimelanje ya ma koleamo kamu munduku siye kolemela, ˻akumu manda molo˼. 11 Nane pepá topo sirindumunge pulumu i-sipe: ‘Yembo tene “Na Kirasinge yembomo.” nimbelie wa ulu kerinele tepa, yembomanga mélema kanopa yama memba, we mélema lipe anjipe ‘Nanga pulu yema.’ nimbe popo topa mélema kalopa sipe, yembomanga ungu bulkundu nindipe, no nomba kekelepa topa, yembomanga mélema kolo topa wa lipe, temba yembo te kinie paa telune tapu toko naa molangi! Yembo tene ‘Na Kirasinge yembomo molio.’ nimbe aku-sipe temba yembomo kinie telune langi paa naa nangila.’ ˻nimbu pepá torundu kanumu.˼ 12 Kirasinge yembo naa molko ulsu molemele yemboma telemele mele manda apurumboye? ˻Akumu nanga kongono te paa mólo!˼ Nalo Kirasinge yembo eno kinie molemelema kanoko apurunge kinie papu. Akumu paa sike enonga kongonomo. 13 ˻Kirasinge yembo talapena˼ ulsukundu molemele yemboma Pulu Yemone yuyu kanopa apurumbe. ˻Nalo eno Pulu Yemonga bokune ungu te molemo mele piliengi niembo! Kanu ungumu i-sipe:˼
‘Eno kinie telune tapu topa molemo yembo tene
ulume tepa kenjipe mindi tepa molomu liemo
kanu yembo kerimu toko makoroko ulsu mundengi.’i
nilimo, ˻aku mele pilku teangi!˼