2 Aku temanemo toringi kinie pilipelie Yesusini enondo nimbendo: “Kanu kolea Gallilli-yemboma aku-siku mindili noringi kulu pilkulie ‘Gallilli-yembo moloringi lupe wemane ulu-pulu-keri teringi mele maniendopa, kanu mindili noringi yemboma ulu-pulu-keri teringi mele paa olandopa.’ konopu lekemeleye?

3 Paa sike nane enondo “Aku-sipe mólo!” nikiru. Ya molkomele yemboma, eno ulu-pulu-keri telemelema bulu siku munduku siye kolko konopu alowa naa tengi liemo eno aku-siku toko kondongela.” nirimu.

4 Pe kelepa Yesusini temane te topalie nimbendo: “Kolea-awili Jerusalleme sukundu kolea-kanga Silloamo kouni takoli ulke awili olana te topa kalalu sipe topa manie mundupelie yembo-supunge talo^a topa kondorumu koloringi. Kanu yemboma ‘Kolea-awili Jerusalleme yembo lupe moloringimene pali ulu-pulu-keri teringi mele maniendopa, koloringi yembomane ulu-pulu-keri teringi mele paa olandopa.’ konopu lekemeleye?

5 Paa sike nane enondo ‘Aku-sipe mólo!’ nikiru. “Ya molkomele yemboma, eno ulu-pulu-keri telemelema bulu siku munduku siye kolko konopu alowa naa tengi liemo eno aku-siku kolongela.” nikiru.” nirimu.

6 Aku nimbelie kelepa ungu-iko te^b topalie enondo nimbendo:

7 Piki-mongo te naa torumu kulu yunge unjo-waene ponie tápu terimu yemondo nimbendo: “Pílie! Ponie talo yepoko pea i unjo-piki angilimomonga ombo kanorundu nalo piki-mongo telu kepe naa torumu kene yuni ma-kopongo we nolemo kene peke toko ltei!” nirimu.

8 Ponie pulu yemone aku-sipe nirimu kinie ponie tápu terimu yemone yundu topondopa nimbendo: “Awilimu, i ponie telumu mindi aku unjomo we angiliepili! ‘Unjomo akopa mongo topili!’ nimbu unjo-pulune era tepo, ma mundupu, kongi-le lipu mundupu, teambo!

9 Pe nekendo poniemonga mongo tomu liemo papu. Naa tomu liemo kamu peke tani!” nirimu.” ˻nimbe Yesusini˼ nirimu.

10 Walse, ˻Juda-yembomanga koro moloringi˼ Wale-Sambate tenga^d Juda-yemboma máku toko Pulu Yemonga ungumu pilieringi ulke tenga suku Yesusi pupelie yemboma ungu-mane sipe molorumu.

11 Akune ambo te molorumu, yu kuru topa bulu langorumu-ne ola angilipe sinio simbendo perepa molorumu. Yu aku-sipe molopili ponie supunge talo omba purumu.

12 Yesusini kanu ambomo kanopalie yundu “Ou!” nimbelie nimbéndo: “Ambomo, nu kuru torumumu topa keliepili!” nimbelie

13 ambomo kini ambolorumu kinie yu tamburumbu sumbi-sipe ola angilipelie Pulu Yemo kapi nirimu.

14 Nalo kanu ulkemo nokorumu yemo yuni Yesusi ˻koro mololi˼ Wale-Sambatemonga yembo tepa konde lsimu kulu kanopa keri kanopalie akune máku toringi yembomando nimbendo: “Kongono-wale talo-pakera lemomanga ‘Kuru tomba yemboma konde pamili!’ ningu onge manda. ˻Koro mololi˼ Sambate-Walemonga manda mólo!” nirimu.

15 Yemone aku-sipe nirimu kinie Yesusini nimbendo: “Eno topele-mapele toli yema,^e alieli ˻koro mololi˼ Wale-Sambate wendo olemo kinie eno pali yu-mele-mele enonga kongi-kao molo kongi-dongi langi nomba molemona moki leko no olemo kolea tenga ‘No nopili!’ ningu mengo pulimele kanumu.

16 Eno enonga kongime Sambate-Walemonga papu moki leko nokolemele kene i ambomo Sambate-Walemonga papu lipu tapondokorola. Kongime maniendopa mele, yemboma olandopa mele kanumu. Akumunge i ambomo, yu Eporayamone kalopa lsimu ambo te, ˻kurumenga nomi˼ Setenene^f yu ponie supunge talo ka-mele sirimu ambomo Sambate-Walemonga moki lepo nokokoromo tepo kenjikiruye?” nimbe walserimu.

17 Yuni aku-sipe nirimu kinie kanu ungumuni yu terimu mele kanoko keri kanoringime olie poloringi nalo we-yembomane yu ulu-tondolo peangama terimu kanokolie konopu awili-teko siringi.

18 Kanu-kinie Yesusini ˻yembomando˼ kelepa nimbendo:

19 Akumu i-sipe mele: Ye tene yu unjo-masetete umbu te lipe yunge poniena umbumu mundorumu kinie kanu unjo-umbumu wendo omba awi-lepa unjomo angilierimu kinie aku unjomonga kolamanga kerama ongo peringi. Pulu Yemo ye-nomi-kingi molemo mele aku-sipe.” nirimu.

20 Aku nimbelie kelepa walsipe pilipelie nimbendo: “Pulu Yemo ye-nomi-kingimu molopa yemboma nokolemo mele pilinge nambepo nimbu siemboye?

21 Akumu i-sipe mele: Ambo tene yu langi pillawa akoli mele yisiⁱ wallo-kolte lipelie pillawa awisilinge mundorumu kinie pillawa pali akorumu. Pulu Yemo ye-nomi-kingi molemo mele aku-sipe.” nirimu.

22 Aku-sipe nimbelie pe Yesusi kolea-awili Jerusalleme pulimo aulkena pumbe pupelie kolea-awilime kinie kangama kinie pupe, akumenga moloringi yemboma ungu-mane sirimu.

23 Kanu yembomanga tene yu walsipe pilipelie nimbendo: “Awilimu, mindili nomolo aulke molemolona Pulu Yemone yemboma lipe tapondopa wendo lipe yu-kinie molko kondonge aulkena lipe mondomba^j yemboma koltalo mindiye?” nimbe walserimu.

24 “Ulke-kerepulu paa kanga si níline yembo awisili ongo suku pungendo perenge. Akumunge ‘Kanu kerepulune eno ongo sukundu puku molongendo mindili siku pangi!’ nimbu nikiru.^k

25 Ulke pulu yemone ola angilipe kune anjimbe kinie eno pena molkolie ningemone, kune toko walsikulie ningendo: “Awilimu, olio nu-kinie pea molamili wamili kene olionga kune lindi!” ninge kinie yuni enondo nimbendo: “Enonga imbime na naa pilipu eno kepe enonga koleama kepe na naa kanolio.” nimbé.

26 “Yuni aku nimbé kinie enone yundu ningendo: “Nu pea ga norumulu. Olionga koleamanga nu ongolie olio ungu-mane sirinu.” ninge.

27 “Nalo yuni enondo nimbendo: “Eno niembo piliee! Enonga imbime na naa pilipu, enonga koleama na naa kanolio. Eno ulu-pulu-keri teko molemele yemboma pali na moliona anjo paa!” nimbé.

28 Akune ulsu molkolie eno ˻anda-kolepali˼ Eporayamo kinie, Aisake kinie, Jekopo kinie, Pulu Yemone ungu-umbu tondorumume pilku yemboma ningu siringi yema pali kinie, eno Pulu Yemo ye-nomi-kingimu molopa nokomba koleana sukundu molonge kanokolie eno-enono akune ulsu molonge kanokolie eno-enono mumindili kolko kola teko mini-wale mundunge.” nirimu.^l

29 Isirele-yemboma eno Pulu Yemo ye-nomi-kingimu molopa nokomba koleana sukundu eno manjiku naa punge ‘Piliengi!’ nimbelie yuni kelepa nimbendo: “Ma-koleana pali yembo mare Pulu Yemo ye-nomi-kingimu molopa nokomba koleana sukundu puku Pulu Yemo pea langi nonge.

30 Pilieme! Akiliku olemele yembo mare Pulu Yemo ye-nomi-kingimu molopa nokomba koleana sukundu kumbi-leko punge. Kumbi-leko oringi yembo mare akiliku punge.” nirimu.^m

31 Walse, Yesusi ou Jerusalleme naa pupelie kolea tenga ungu nimbe molorumu kinie Parisi-ye marene^o ongo yundu ningendo: “˻Ye-nomi-kingi˼ Erotene ‘Nu topo kondambo!’ nimbe molemo kene nu ya naa molkolie tenga kowa pu!” niringi.

32 Yesusini enondo nimbendo: “Na tomba tekemo yemo, yu kolo topa konopu keri peli owa-takera pokisi^p mele akumu molemona i ungumu puku ningu si-pee!” nimbelie nimbendo: “Kinié mele kepe opali talou mele kepe kurume yembomanga konopune pelemoma makoropo, kuru toli yemboma tepo konde lipu, molopolie laye pe-mele na kongono tepo moliomo pora simbo.

33 Nalo Jerusalleme pumbondo kinié kepe opali talou kepe na we-kongono telipu pumbo. Pulu Yemone ungu-umbu tondolemoma pilipe yemboma nimbe silimo ye te kolea-awili Jerusalleme ulsukundu manda naa kolomba kene ˻na Pulu Yemone ungu-umbu tondolemoma pilipulie yemboma nimbe silimo yemo molio kene˼ na Jerusalleme ulsukundu manda naa kolombo.” ˻nirimu.˼^q

34 ˻Aku nimbelie Yesusini Jerusalleme moloringi yemboma yu kondo kolopa akumundu ungu te nimbelie nimbendo:˼

35 Akumunge pilieme! ˻Opa-puluema eno tonge onge kinie Pulu Yemone altopa eno naa nokopa naa lipe tapondombamonga˼ opa-puluemane ongo sike toko munduku enonga koleamo kinie enonga ulke-tembelemo kinie kamu toko kalongemonga eno ku penge.^r Nane eno ungu te pea nimbu sikiru: