2 Aku teringi kanokolie Parisi-yemane^e Yesusi yundu ningendo: “Kána! ˻Koro molemolo˼ Wale-Sambatemonga ‘Kongono naa teangi!’ nimbe pelemo ungu-manemo^f nambemu-ne nunge lombili andoli yemane ungu-manemo pulue tokolie aku-siku tekemeleye?” niringi.

3 Yesusini topondopa nimbendo: “Eno Pulu Yemonga bokune sukundu ˻anda-kolepa ye-nomi-kingi˼ Depisini^g terimu mele nimbe molemo temanemo kanokolie temanemonga pulumu naa pilimeleye? Depisi kinie yu pea puringi yema kinie eno engelene kolkolie niringimuni,

4 Depisi Pulu Yemo molorumu sele-ulkena sukundu pupe, Pulu Yemonga kumbi-kerena lierimu pillawa kalolime lipe nomba, yu pea puringi yema sirimu noringila kanumu.^h Kanu pillawa kalolimendo Pulu Yemone ungu-mane sipelie nimbendo:

5 “Manie Omba Mana-Ye A Lierimu Yemone Sambate-Walema nokolemo-na ˻Sambate-Wale kinie yemboma molko kondongendo tenge mele manda nimbé kanumu˼.” nirimu.

6 Pe walse, koro mololi Wale-Sambate tenga, Yesusi omba Juda-yemboma máku toko Pulu Yemonga ungumu pilieringi ulkena suku pupelie ungu-mane sirimu. Kanu ulkena ye te molorumu, yunge ki-umbukundu kamu kolopa kukorumu.

7 Kanu-kinie akune moloringi Parisi-yema kinie, Pulu Yemonga ungu-manemanga pulume pilku mane siringi yema kinie,^j enone ‘Yesusini ulu te tepa kenjimbe kinie yu kote tendemolo.’ ningu ulu te tepa kenjimbe te ˻alieli koroko molkolie˼ ‘˻Koro molemolo˼ Wale-Sambate kinie yuni yemo tepa konde limbenje.’ ningu yu mimi-siku kanoko moloringi.

8 Eno konopuni pilieringi mele pilipelie Yesusini kanu ki kolopa kukorumu yemondo nimbendo: “Yemboma molemelena ongo ola angilieni!” nirimu kinie yemo yu akune omba ola angilierimu.

9 Kanu-kinie yemando nimbendo: “Eno i-sipu walsipu pilkiru. ‘Sambate-Wale kinie ulu nambolka ulu te manda temoloye? ‘Sambate-Walemonga ungu-manemone “Teangi!” nilimo mele teamili!’ nimbu yemboma lipu tapondomolo kinie manda molo yemboma tepo kenjimolo kinie mandaye? ‘Naa kolangi! Konde pangi!’ nimbu temolomo manda molo topo kondomolomo mandaye?’ nimbu walsikiru.” nirimu.

10 Aku-sipe eno nimbe walsipelie yuni eno pali neme-neme nimbe kanopalie ki kukoli yemondo nimbendo: “Nunge kimu sinio si!” nirimu kinie yemone yunge kimu sinio sirimu kinie ki kolopa kukorumumu altopa kamu peanga lierimu.

11 Aku terimu kanokolie mumindili awili-teko kolko enone enono anjo-yando ungu-mele teko ningendo: “Tepa kenjikimumunge yu nambe-eamiliye?” ningu moloringi.

12 Pe walse ipulueli Yesusi yu Pulu Yemo-kinie ungu nimbendo ma-pangi tenga ola pupe Pulu Yemo-kinie ungu nimbe molopili kolea tangorumu.

13 Ipulueli-ou yu lombili andolimendo “Waa!” nimbelie ‘Enonga ye engaki-rurepo nanga kongonomo teangi lipu mundembo!’ nimbelie aku yema mako topalie enondo nimbendo: “Eno ‘Nanga kongonomo tende-pangi!’ nimbu lipu mundukuru yema.” nirimu.^l

14 ˻Kanu ye engaki-rurepo mako torumumenga imbime i-sipe:˼

17 Kanu-kinie yu kinie, yuni “Nanga kongonomo tende-pangi!” nimbe lipe mundorumu yema kinie, ma-pangine manie oringi kinie yu lombili andoringi yembo awisili kinie, kolea Judia-Disiriki moloringi yembo awisili kinie, kolea-awili Jerusalleme peringi yembo awisili kinie, nomú-kusa kélona lierimu kolea-awili Taya kinie Saidono-selonga peringi yembo awisili kinie, yu molorumune sukundu-sukundu ongo liku máku toringi.

18 Yu temane peanga topa, ungu-mane sipe terimu pilingendo ongo, yuni eno kuru torumume ‘Tepa konde lipili!’ ningu oringi. Enonga yembo mare konopune kuru keri molorumume tepa konde lsimula.

19 Kuru toli yemboma tepa konde lili tondolomo yu-kinie pepili molorumu kulu eno oringime pali ‘Yu ambolamili!’ ningu yu molorumune nondoko-nondoko oringi. Kanu-kinie ongo yu amboloringi kinie kanu tondolomone eno pea pali tepa konde lsimu.

20 Kanu-kinie Yesusi manie molopa yu lombili andoringime olando-sipe kanopalie enondo nimbendo:

23 “˻Yembomane eno aku-siku mele telemelemonga˼ eno mulú-koleana punge kinie kanune ˻Pulu Yemone˼ eno méle kalopa kondomba kene ˻kanu yembomane eno aku-siku teko kenjinge˼ kinie konopu awili-teko siku, konopu paa peanga pepili molangi!^r Yembomane kinié eno mindili silimele mele, aku-siku eno naa molangi koro-ou Pulu Yemone ungu-umbu tondorumume pilku yemboma ningu siliku andoringi yemboma we-yembomane eno kepe mindili siringila kanumu.

24 “Nalo eno kamako lemelema,

27 ˻Aku nimbelie Yesusini we moloringi yembomando nimbendo:˼ “˻Akumu na lombili andolimendo nikiru˼ nalo nane ungu nikirume pilku molemele yemboma, enondo ungu te pea niembo piliengila!

32 “Ulu-pulu-keri telemele yemboma kepe enono anjo-yando kondo kolemele pilkulie eno yando kondo kolemele yemboma mindi kondo kolonge manda mólo! Eno kanoko keri kanolemele yemboma pea kondo kolangi!

33 Ulu-pulu-keri telemele yemboma kepe enono anjo-yando kondo kolko teko kondolemele pilkulie eno yando kondo kolko teko kondolemele yemboma mindi teko kondonge manda mólo! Eno teko kenjilimele yemboma pea teko kondangi!

34 Ulu-pulu-keri telemele yemboma kepe enono anjo-yando pundu anjiku, ‘Walse altopo sukundu limbo,’ ningu pundu anjilimele pilkulie, eno yando pundu tolemele yemboma mindi pundu anjinge manda mólo! Eno pundu naa tolemele yemboma pea pundu anjengi!

35 “˻Ulu-pulu-keri telemele yemboma enono anjo-yando telemele mele eno ulu te olandopa teangila!˼ Enone enonga opa-puluema kepe kondo kolko, teko kondoko, pundu anjiku, teangi! ‘Enone pe walse altoko aku-siku yando teangi!’ ni naa ningu, we teangi! Aku-siku tenge kinie Pulu Yemonga ambolangoma molkolie,^v yuni eno méle awisili kalomba linge. Pulu Yemo yuni mana-yemboma-kinie aku-sipe tepa molemola. Yu teko kenjilimele yemboma kinie, yundu ‘Ange.’ naa ningu we molemele yemboma kinie kanume tepa kondolemo.

36 Enonga Lapa Pulu Yemo teko kenjilimele yemboma kepe yu aku-sipe kondo kolopa we tepa kondolemo mele eno teko kenjinge yemboma aku-siku kondo kolko teko kondangi!” ˻nirimu˼.

37 “Enone yemboma telemele ulume naa apurunge kinie ˻Pulu Yemone˼ eno ulu telemelema naa apurumbela. Enone anjo yembomane telemele mele apuruku kanokolie “Teko kenjikimili. Tekemele mele ˻Pulu Yemone˼ kanopa keri kanopili!” naa ninge kinie ˻Pulu Yemone˼ enone telemele mele apurupe kanopalie “Teko kenjikinu. Tekeno mele kanopo keri kanokoro.” naa nimbéla.^x Yembomane eno-kinie teko kenjinge ulume ‘Manie pupili!’ ningu siye kolonge kinie ˻Pulu Yemone˼ enonga ulu-pulu-kerime ‘Manie pupili!’ nimbe siye kolombala.^y

38 Enone yemboma pe-pe kepe ‘Pundu naa tangi!’ ningu mélema we singe kinie yuni eno aku-sipe we simbela. Mélema simbendo koltalo naa simbe; olandopa-olandopa simbe. Enone anjo singe kanopalie eno yando aku-sipe simbela.” nirimu.

39 Yesusini enondo ungu-iko te topa sirimula. Akumu i-sipe:

40 Ungu-mane pilku mololi yemboma enonga ungu-mane sili yembomo toko manie naa mundulimele. Ou ungu-mane pilku puku pora silimele kinie pe mindi enonga ungu-mane sili yembomo pea kapola-kapola mele molemele.^a

41 “Nuni angenanga mongona nurupulu te lemo kanoleno nalo nunge mongona unjo awili te lemomo naa kanoleno akumu nambemu-ne telenoye?

42 Nunge mongona unjo awili lemomo naa kanokolie angenando “Ano, nunge mongona nurupulu te lemomo wendo lindembo!” nambeko nilinoye? Topele-mapele toli yembomo,^b nuni nunge mongona lemo unjo awilimu ou wendo lieni! Aku tekolie pe kanoko kondoko angenanga mongona lemo nurupulumu manda wendo lindení.” ˻nirimu.˼

43 ˻Kanu-kinie Yesusini ungu te pea nimbelie ungu-iko pokore topalie nimbendo:˼

44 Unjo-mongo te kanokolie kanu mongo torumu unjomo imbi manda silimele.^d ‘Amu nambo!’ ningu, takeme manda olko toko naa nolemela. Molo ‘Me te nambo!’ ningu, silipu manda mengo naa nolemela. Amu lupela takeme lupela kanoko, me lupela silipu lupela kanolemele kanumu.^e

45 Aku-sipe mele, yembo peanga tene yunge konopune ulu peanga pelemoma telemo, nalo yembo keri tene yunge konopune ulu keri pelemoma telemo. Yembo te yunge konopune pelemo ungume mindi kerena nilimo.” ˻nirimu.˼

46 “Nane nilio ungume pilku liku naa tekolie enone nando “Awilimu” we nambemu-ne nilimeleye?” ˻nimbelie pe yuni ungu-iko te pea enondo topa nimbéndo:˼

47 “I nanga ungume pilku liku tenge yemboma eno ye te molemo mele niembo:

48 Ye te yuni yunge ulkemo ‘Ingi nimbe angiliepili!’ nimbe we ma kinie ukia kinie akupe ltepalie, akune manie kou-polona ola takorumu. Ulkemo aku-sipe takopa kondorumu kulu pe no topa ulkemo paa topa kalalu simbe terimu kinie topa tekise naa tekisipe ingi nimbe we angilierimu.

49 “Nalo i nanga ungume pilku liku naa tenge yemboma eno ye te molemo mele niembo: Ye te yunge ulke we ma pange teline ola walu takorumu. Pe no topa ulke kanumu walsikele topa kalalu sirimu.” nirimu.