Yesusini Pulu Polopa Ye Mare “Na Lombili Waa!” Nirimu Temanemoa
5
(Pulu Yemonga ungumu. Kolomongo-kanga wane.)
Walse, Yesusi Nomú-Geneserete, ˻akumundu ‘Nomú-Gallilli’ niringila kanumu,˼ aku nomú-kélona angilipe yemboma Pulu Yemonga ungumu nimbe sirimu kinie pilingendo eno yu angilierimune puku máku toko nondoko-nondoko puku ekelepa teko molko pilieringi.
2 Kanu-kinie yuni nona andoli sipi talo nomú-kélona lierimu-selo kanopalie, oma lili yema koronga nomú-kélona wendo puku enonga oma lili walema kulumiye toko moloringi kanorumu.
3 Sipi te Saimono-Pitanga, akune sukundu pupelie yuni yundu mawa tepalie nimbendo: “Sipimu laye-kolte paka toko nona sukundu mundou!” nirimu. Paka topa nona sukundu mundorumu kinie aku sipimunge suku yu manie molopalie nirimumuni, no-kélona liku máku toko moloringi yemboma ungu-mane sirimu.
4 Eno ungu-mane sipe pora sipelie yuni Saimonondo nimbendo: “Sipimu nomú awi-suku-singine kunduku mengo pukulie oma lili walema nona manie mundou!” nirimu.
5 Saimonone topondopa nimbendo: “Ye-Nomimu,b kinié ipulueli pali oma lili kongono tondolo-mundupu tepo molopo tangondopoliec oma te paa naa límulu. Nalo aku nikinu kene walemo nona manie mundembo!” nirimu.
6 Kanu-kinie walema nona manie mundoringi kinie oma awisili walemanga sukundu puringi kulu walema sipine sukundu linge teringi kinie sungu nimbé terimu.
7 Walema sungu nimbé terimu kanokolie enone enonga oma lili kongono pea tapú-toko teringi yema, sipi tenga moloringime walsikulie “Ongo liku tapondangi waa!” niringi. Oringi kinie sipi talo pea peko siringi umbune tepa nona manie pumbe terimu.
8 Aku ulumu kanopalie Saimono-Pita Yesusinge kumbi-kerena omba manie molopa tamalu pepalie nimbendo: “Ye-Awilimu,d na ulu-pulu-keri ambololi yemo ˻nu kake teli yemo˼. ˻Telune molkombolo kapola naa tekemo˼ kene anjo puku nu lupe molou!” nirimu.
9 Saimono kinie, yu-kinie pea moloringime kinie, enone oma awisili walsikele tangoli lsingi kanokolie eno suru ningu mini-wale mundoringi kulu ˻Saimono-yuni aku-sipe nirimu˼.
10 Seperinge malo Jemisi kinie Jonoselo elo Saimono-Pita kinie kongono telune tapú-toko teringili yeselo, elo pea mini-wale mundoringilila.
Kanu-kinie Saimonone nirimumu pilipelie Yesusini yundu nimbendo: “Nu pipili naa koloyo! Kinié oma linindu oma lili wale liku nona manie mundulino kinie omama walena omba pelemo mele, pe nanga kongono tendenindu nanga ungumu pilku ningu siliku andoni kinie yemboma nanga talapena sukundu ongo molonge.” nirimu.
11 Kanu-kinie enonga sipiselo nomú-kélona mengo ulsu ongolie, sipiselo mélema pali liepili munduku siye kolko Yesusi lombili puringi.e
Yesusini Kuru-Kendi Norumu Ye Te Tepa Konde Lsimu Temanemof
12 ˻Kolea Gallilli-Disiriki sukundu lierimu˼ koleamanga tenga Yesusi molorumu kinie ye te kuru-kendi awili-tepa nomba perimumu omba Yesusi kanopalie manie molopa tamalu pepa yu mawa tepalie nimbendo: “Awilimu, nunge konopumuni na ‘Konde pambo!’ konopu lienu liemo nuni na manda teko konde lini.” nirimu kinie
13 Yesusini yemo kini ambolopalie yundu nimbendo: “ ‘Nu konde pani!’ konopu lekero kene konde pu!” nirimu kinie tamburumbu kuru-kendimu nomba kelepa kangimu peanga lierimu.
14 Kanu-kinie Yesusini yu ungu te tondolo-mundupe nimbendo: “Nuni ya ulu tekeromo yembo telurindu kepe paa naa ni! Sumbi-siku puku Pulu Yemo popo tondoli yemo nunge kangimu liku ora siku, ‘Na altopo kangi peanga liepili molkoro kene.’ ningu Mosisini “Tei!” nimbe ungu-mane sirimumug pilku liku tenindu “Pulu Yemo popo toko kalko si!” nirimu mélemo liku Pulu Yemo popo tondoli yemondo “Kalondou!” ningu yu sieni! Pe yembomane nu kanokolie ‘Yu sike kangi peanga liepili molemo.’ ningu piliengi kene nikiru mele isili-ou te-pou!” nirimu.
15 Nalo yuni terimu mele anjo-anjo yembo awisilini pilkulie niringimuni, yu molorumune sukundu-sukundu ongo yu temane-peanga topa nirimumu pilingendo ongo, kuru torumu yemboma yuni ‘Eno tepa konde lipili!’ ningu oringi kanopalie
16 yu eno oringine mundupe siye kolopa kolea ku lieli tenga pupe Pulu Yemo-kinie ungu nirimu.
Yesusini Kimbu-Ki Kolopa Pora Sirimu Ye Tenga Ulu-Pulu-Kerime Mundupe Siye Kolondopa, Yu Tepa Konde Lsimu Temanemoh
17 Walse Yesusi yuni yemboma ungu-mane sipe molorumu. Kuru toli yemboma tepa konde lili tondolomo yu-kinie pepili molorumu. Pulu Yemone kanu tondolomo yu sirimu. Parisi-yema kinie, Pulu Yemonga ungu-manemanga pulume pilku mane siringi yema kinie,i yu ungu-mane sirimume pilku moloringila. Kanu yema, kolea Gallilli-Disiriki sukundu lierimu koleamanga moloringime kinie, kolea Judia-Disiriki sukundu lierimu koleamanga moloringime kinie, kolea-awili Jerusalleme moloringime kinie, Yesusi molorumune ongo máku toko yu ungu-mane sirimume pilku moloringi.
Jesus Heals a Paralytic (Luke 5:17-26)
18-19 Yu molorumune ye marene kimbu-ki kolopa pora sirimu ye te taropola teko mengo onge oringi nalo yembo awisili ulke-kerepulune ekelepa teko angilieringi kulu ulkena suku Yesusi molorumune nondoko mengo punge aulke te naa kanokolie niringimuni, ulke-imune mengo ola pukuliej Yesusi molorumune ˻kana-kana ulkemo tekisikulie˼ yemo taropola pali moko toko manie mundoringi.
20 ‘Yesusini i yemo manda tepa konde limbe.’ ningu tondolo-munduku pilkulie yu mengo oringi kanopa pilipelie Yesusini kanu yemondo nimbendo: “Kangomo, nunge konopune ulu-pulu-keri terinu pelemoma manie pupili, we siye kolkoro.” nirimu.
21 Parisi-yema kinie, Pulu Yemonga ungu-manemanga pulume pilku mane siringi yema kinie, Yesusini aku nirimu pilkulie ˻pilku keri pilku˼ konopu kimbú-sikulie, “I ye Pulu Yemo marake tekemo yemo naweye? Yembomane ulu-pulu-keri telemelema nawene ‘Manie pupili, we siye kolkoro.’ manda nimbéye? Pulu Yemone mindi manda telemo.” ningu enono ningu pilku molko konopu kimbú-siringi.k
22 Kanu-kinie Yesusini eno aku-siku konopu kimbú-siku moloringi mele pilipelie enondo nimbendo: “Enone ˻nane nikirumunge˼ aku-siku nambemune konopu kimbú sikimiliye?
23 I yemondo “Nunge ulu-pulu-kerime manie pupili, we siye kolkoro.” nimbo kinie eno ulu te naa kanokolie ‘We-we tepa nikimu.’ konopu lengeye? Molo “Ola angilku nunge kunungumu liku mengo kimbu-kongono teko andou!” nimbo kinie yu ola angilimbene naa angilimbenje mona lemba manda kanokolie ‘Aku-sipe mindili sipe nikimunje?’ konopu lengeye?
24 Nalo ‘ ‘Manie Omba Mana Ye A Lierimu Yemo tondolo pelemomone ya ma-koleana yembomanga ulu-pulu-kerime “Manie pupili, siye kolkoro.” manda nimbé.’ ningu piliengi!’ nimbu ˻aku-sipu nindu˼.” nirimu.
Aku nimbelie kimbu-ki kolopa pora sili yemondo nimbendo: “Nane ‘Nu ola angilku nunge kunungumu liku mengo ulkendo pu!’ nikiru.” nirimu.
25 Aku nirimu kinie eno kanoko molangi yemo sumbi-sipe ola angilipe yunge kunungumu lipe memba omba pena pupelie Pulu Yemo kapi nilipe ulkendo purumu.
26 ˻Yu aku terimu kanokolie˼ eno suru ningu mini-wale munduku Pulu Yemo paa pipili kolko yunge imbi liku ola mundunduku yu kapi ningulie ningendo: “Olio i ulu wendo okomo kanokomolomo ulu paa te-lupe lepamo.” niringi.
Yesusini Ye Mateyu-LLipaindu “Na Lombili Ou!” Nirimu Temanemol
27 Kanu-kinie Yesusi ˻ulkemo mundupe siye kolopa˼ pena pupelie nirimumuni, kou-takisi lsimu ye te, yunge imbi LLipai, kou-takisi lipe molorumu kanopalie yundu “Na-kinie pea pambili lombili ou!” nirimu.
28 Kanu-kinie LLipai yu ola angilipe kou-takisi mélema we liepili mundupe siye kolopa yu lombili purumu.
29 Pe LLipaini yunge ulkena Yesusinge langi awisili kalondorumu. Akune kou-takisi lili ye awisili kinie, we-ye mare kinie, eno Yesusi LLipaiselo-kinie pea manie molko kanu langime noringi.
30 Aku teringi kanokolie Parisi yema kinie, Pulu Yemonga ungu-manemanga pulume pilku mane siringi yema kinie,m enone Yesusi yu lombili andolimendo ningendo: “Eno kou-takisi lili yema kinie ulu-pulu-kerime teli wema kinie eno pea nambemune langi nokomeleye?” niringi.
31 Aku-siku niringi pilipelie Yesusini enondo nimbendo: “Kuru naa tolemo yemboma doketana naa pulimele. Kuru tolemo yemboma mindi doketana pulimele kanumu.
32 Nane ‘Yembo sumbi nilime na molombona wangi!’ nimbondo ma-koleana naa orundu.n Ulu-pulu-keri teli yemboma ˻lipu tapondopo˼ enondo ‘Eno ulu-pulu-keri telemelema kanoko keri kanoko konopu alowa teko ˻na molombona wangi˼!’ nimbondo orundu.” nirimu.
Yembomane Walse-Walse Langi Naa Nongo Mi Tolemele Ulumunge Ungu Teo
33 ˻Kanu-kinie˼ enone Yesusindu walsiku pilkulie ningendo: “˻No-Lindeli˼ Jono lombili andolime kinie, Parisi-yema lombili andolime kinie, enone walse-walse langi mi toko naa nongop Pulu Yemo-kinie mawa telemele nalo nu lombili andolimene aku-siku naa telemele, langi kinie no kinie we nolemele. ˻Pe nu lombili andolimene telemele mele papuye˼?” niringi.
34 Aku-siku niringi pilipelie Yesusini topondopa enondo ˻ungu-iko te topa yu toko kondonge kolombamonga ungu te nimbelie˼ nimbendo: “Ambo limbe ye te yunge pulu lemo yema-kinie molemo kinie eno konopu sikulie “Langi mi topo naa namili!” manda ningeye? Manda naa ninge.
35 Pe mindi, ambo limbe yemoq eno molongena ongo wendo linge kinie kanu walemanga sike ˻konopu keri panjiku˼ langi naa nongendo mi tonge. ˻Isili-ou mólo!˼” nirimu.
36 Yesusini aku nimbelie nirimumuni, ˻‘Ou Juda-yembomane ulu teringi ulume kinie pe ulu konde wendo okomomo kinie telune manda naa pengele mele paa piliengi!’ nimbe˼ ungu-iko talo topalie nimbendo:
“Mulumbale ou te sungu nilimo kinie olione mulumbale paa konde tenga te kopisipu lipu, sungu nilimomonga naa topo tambululimolo kanumu. Yembo tene aku-sipe topa tambulkenje kanu mulumbalemo nona panjilke kinie mulumbale konde kopiselimu kanga-lepa lli-nimbelie mulumbale oumu kelepa kamu awili-tepa sungu nilke. Ulu te i-sipela: Mulumbale oumu kinie mulu kopiseli kondemo telu-sipe mólo, akumunge kapola-kapola mólo!
37 Kongi-meme kalumuni teli mingi ou tengar no-waene konde naa kolemolo kanumu. Yembo tene mingi ou tenga no-waene konde te kolkanje kanu no-waenemo mingine sukundu pepalie pe akolka kinie kanu mingi oumu naa akopa sungu nilke. Kanu-kinie nomo kepe mingimu kepe kamu keri lelka.
38 Akumunge no-waene konde kongi-meme kalumuni teli mingi kondena mindi kolemolo kanumu.
39 Ye tene no-waene ou te nombalie kanu waene-oumu nomba peanga pilipelie no-waene konde waka naa kolemo.”s nirimu.