Juda-Ye-Awilimene Yesusi Tonge Aulke Te Kororingi Kinie Judasini “Lipu Tapondambo!” Nirimu Temanemo, Akumunge
Yesusi Tongendo Langi Niringi Temanemoa
14
(Kolomongo-kanga wane. Pulu Yemonga ungumu.)
˻Juda-yembomane ponie tenga-tenga kolea-awili Jerusalleme ongo akune suku˼ Pulu Yemone enonga anda-kolepalime Naa Topa We Omba Purumu meleb pilku, Pillawa Akoli Mele Yisi Naa Munduku Pillawa We Kalko Noringi Walemo talóu-mele wendo ombándo, kinié-mele Pulu Yemo popo tondoringi ye-awilime kinie, Pulu Yemonga ungu-manemanga pulume pilku mane siringi yema kinie,c enone Yesusi kiyengo ningu ka siku toko kondonge aulke te koroko moloringi.
2 Akumundu ungu-mele tekolie ningendo: “˻Nondopo tamili,˼ mangali Pulu Yemone olionga anda-kolepalime Naa Topa We Omba Purumu Mele ˻Pilimolo˼ Walemanga ˻‘ulume tepo molamili!’ ningu˼ yembo awisili ya Jerusalleme ongo máku toko molongemonga yu isili-ou tomolo kinie enone olio-kinie mumindili kolko opa tenge kene isili-ou naa topo, keleamili!” niringi.
Ambo Tene Yesusinge Pengena Kopongo-Wele Ondo Lenderimu Temanemod
3 Kolea-kanga Betani ye te ou kuru-laká nombalie kelierimu ye te,e imbi leko “Ye Kuru-Laká Noli Saimono” niringi kanumunge ulkena Yesusi pupe langi nomba molopili ambo te kopongo-wele mingi paa peanga te yu molorumune meli orumu. Kanu wele paa mune toli, natene teko mimi teringi, akumunge kou-mone paa awili-tepa purumu. Akumu memba ombalie Yesusi langi noli polo molorumune meli omba ˻‘Yu tepo kondambo!’ nimbe˼ mingimu kako topa welemo pengena ondo lenderimu.f
4 Yuni aku terimu kinie kanokolie kanune moloringimenga marene konopu keri panjikulie anjo-yando enono ningendo: “Aku kopongo-welemo nambemune we tepa kenjikimuye?
5 Aku welemo kou-mone limelanje kou awisili, kou-mongo wane tausini mele, lipulie yembo-koropama moke tepo silimela.” ningu ambomo tondolo-munduku iri toringi.
6 ˻Enone ambomondo aku-siku niringi pilipelie˼ Yesusini enondo nimbendo: “I ambomo-kinie nambemune ungu awisili nikimiliye? Yuni na-kinie ulu peanga te temu kene yu-kinie ungu awisili naa ningu munduku siye kolangi!
7 Yembo-koropama eno-kinie alieli molonge kene ‘Eno lipu tapondamili!’ ninge walemanga pali eno manda liku tapondonge nalo na eno-kinie alieli naa molombo.
8 Ambomone ‘Manda tembo.’ konopu liemu mele temu. Na ˻kolombo kinie˼ óno tengemonga yuni isili-ou i wele mune tolimu nanga kangine omba ondo lendemu.g
9 Nane enondo paa sike nimbu sikirumu: “Ma-koleamanga pali ˻nanga˼ temane-peangamo andoko toko singe kinie i ambomone kinié temu temanemo kepe ‘Yembomane pilkulie ‘Yuni tepa kondorumu.’ ningu piliengi!’ ningulie aku temanemo toko singela.” nikiru.” nirimu.
Judasini Yesusi Yunge Opa-Puluema “Lipu Simbo.” Nimbe, Nimbe Panjerimu Temanemoh
10 Kanu-kinie ˻Yesusi yu lombili andoli˼ ye rurepo akumenga ye te, Judasi-Isikeriote, ‘Pulu Yemo popo tondoringi ye-awilimene Yesusi ka singe aulkemo yuni akisindembo!’ nimbe eno moloringine pupe, temba mele nimbe sirimu.
11 Yuni temba mele nirimu kinie pilkulie eno konopu awili-teko siku “Nu kou-mone te simolo.” ningu, ningu panjeringi. Kanu-kinie yu Yesusi eno lipe simbe mele aulkemo koropa molorumu.
Yesusi Lombili Andolime-Kinie Pea Kamu Langi Noringi Temanemoi
12 Pillawa Akoli Méle Isimu Naa Munduku Pillawa We Kalko Noringi Kóromongaj pulu-pulu walemo wendo orumu kinie Juda-yembomane Pulu Yemone ou enonga anda-kolepalime Naa Topa We Omba Purumu mele pilingendo kongi-sipisipi walo te toko nonge mele pilkuliek niringimuni, Yesusi lombili andoli yema yu molorumune ongo walsiku pilkulie ningendo: “Pulu Yemone olionga anda-kolepalime Naa Topa We Omba Purumu mele pilimolondo kongi-sipisipi walo te kinié nonimu kolea tena pupu tepo mimi te-pamili konopu lekenoye?” niringi.
The Last Supper (Mark 14:12-26)
13 Aku-siku ningu walseringi kinie yuni yu lombili andoli talo lipe mundupelie nimbendo: “Ne kolea-awili ˻Jerusalleme˼l suku pukululie, ye te mingine no kolopa meli ombá aulkena puku kane-kane tokololie yu lombili pangili!m
14 Yu suku pumbe ulkena ˻suku pukululie˼., ulke pulu yemondo ningelendo: “Ungu-Mane Silimuni i-sipe walsipelie nimbendo: “Na kinie na lombili andolime kinien olione Pulu Yemone olionga anda-kolepalime Naa Topa We Omba Purumu mele pilimolondo kongi-sipisipi walomo tena nomoloye? Nomolo suluminiamo tena lemoye?” nimu.” niengili!
15 Aku ningele kinie yuni elo ulkemonga olakondo suluminia awili te, akune langi noli polo te kinie, manie molomolo poloma kinie, mélema pali ou teko mimi tengi lembamo, lipe ora simbe. Aku suluminiamonga ˻nomolo sipisipi-walomo˼ teko mimi teangili!” nirimu.
16 Kanu-kinie yu lombili andoli ye akuselo kolea-awili akumunge suku pukulu, Yesusini nirimu kanu-mele ulu akume teli lierimu kanoko lendekololie, akune Pulu Yemone enonga anda-kolepalime Naa Topa We Omba Purumu mele pilinge kongi-sipisipi walo nongemo teko mimi teko noseringili.
17 Ipupene ena pupe kolea kala torumu kinie Yesusi kinie yu lombili andoli rurepo kinie oringi.
18 Langi nongo moloringi kinie Yesusini nimbendo: “Nane enondo paa sike nimbu sikirumu: “Eno-pea molopo langi nokomolomanga ye tene na lipe nanga opa-puluema simbe,” nikiru.” nirimu.
19 ˻Aku nirimu kinie pilkulie˼ enonga konopune umbune terimu pilkulie yu-mele-mele walsikulie ningendo: “Awilimu, nando nikinuye?” niringi.
20 Yesusini topondopa nimbendo: “Eno nanga ye rureponga ye te na-kinie langime polo awi-suku-singine ola lemo te walsikele lipu nombolo yemone na lipe, opa-puluema anjo simbe.
21 Kinié Manie Omba Mana-Ye A Lierimu Yemo-kinie tenge mele koronga-ou ningu panjeringi temanemo ˻Pulu Yemonga˼ bokune sukundu molemo meleo sike opa-puluemane tenge, nalo yu lipe opa-puluema simbe yemo mindili nomba paa molopa kenjimbe. Yu molopa kenjimbemonga yu anumuni naa melkanje papu. ˻Yu mindili naa nolka.˼” nirimu.
Yesusi Yu Kolomba Mele ‘Pe Pilku Molangi!’ Nimbe Langi Sirimu Noringi Temanemop
22 Eno langi nongo moloringi kinie Yesusini berete te lipe Pulu Yemo-kinie “Ange.” nimbelie ambolopa pike lepa ˻yu lombili andolime˼ sipelie nimbendo: “Imu nanga kalumu eno liku ˻nangi˼!” nirimu.q
23 Pe no-waene kapo te lipelie Pulu Yemo-kinie “Ange.” nimbe eno sirimu kinie enone pali ˻kanu no-waenemo˼ noringi.
24 Yuni nimbendo: “I ˻no-waene˼ sikirumu nanga mememo. Pulu Yemone ˻yu kinie yunge yemboma kinie molonge mele˼ ungu te nimbe panjipe mi lierimu kanu ungumur ‘Kamu wendo omba pepili!’ nimbu yembo awisilinge nimbu nanga mememo ondo lendepolie ˻kolombo˼ aku mememo imu.s
25 Nane enondo paa sike nimbu sikirumu: “Isili-ou na no-waene altopo paa naa nombó. Pe mindi, Pulu Yemo ye-nomi-kingimu molopa nokolemo koleanat no-waene kondemo kelepo nombó,” nikiru.” nirimu.
26 ˻Langi nongo pora sikulie˼ eno Pulu Yemonga konana te ningulie, pena puku Unjo-Ollipi Ponie Lieli Ma-Pangine ola puringi.
Pitane Yesusi “Na Naa Kanolio.” Nimbé Mele Yesusini Ou Yu Nimbe Sirimu Temanemou
27 Kanu-kinie Yesusini lombili andolimendo nimbendo: “Pe ˻opa-puluemane na-kinie tengemonga kanokolie˼ enone pali na munduku siye kolonge. Aku-siku tenge mele Pulu Yemone ou nirimu yunge bokune molemo kanumu. Pulu Yemone ˻ungu-iko te topalie˼ nimbendo:
“ ‘‘Kongi-sipisipi tapu-yemo tangi!” nimbo,
yu tonge kinie sipisipime bulu-balu ninge.”v
nirimu, ˻aku mele kinié wendo ombá˼. Sekaraya 13:7
28 ˻Isili-ou na toko kondonge kinie eno sike bulu-balu ninge˼ nalo na lomboropo ola molopolie nimbomone, na kumbi-lepo kolea Gallillindu pumbo, eno pe akilku akune onge kinie ˻altopo pea molomolo˼.” nirimu.w
29 ˻Yesusini aku-sipe nirimu kinie pilipelie˼ Pitane nimbendo: “Enone pali ‘Nu sike’ ningu tondolo-munduku pilimele mele manie pumbe kinie nu munduku siye kolongi liemo nane nu aku-sipu paa mundupu siye naa kolombo, paa molo!” nirimu.
30 Yesusini topondopa nimbendo: “Nane nu paa sike nimbu sikirumu: “Paa kinié ipulueli, kera-gulta wale talo-sipemo ou ko naa topili nuni pipili kolkolie wale yepoko nando kolo toko “Yu naweye? Na naa kanolio.” nini,” nikiru.” nirimu.
31 Nalo Pitane tondolo-mundupe nimbendo: “Na nu-kinie tapú tolembolomonga olto pea “Topo kondomolo.” ningi liemo kepe nu “Naa kanolio.” paa naa nimbo.” nirimu. Lombili andoli ye wemane pali “ “Nu naa kanolemolo.” paa naa nimolo.” niringila.
Kolea Gesemani Yesusini Pulu Yemo-Kinie Popo Topa Ungu Nimbe Mawa Terimu Mele Temanemox
32 ˻Kanu-kinie˼ Yesusi kinie yu lombili andoli yema kinie kolea ‘Gesemani’ níline puringi. Akune puringi kinie yuni enondo nimbendo: “Na Pulu Yemo-kinie popo topo ungu ni-pukuru kene eno ya molaa!” nirimu.
Jesus is Arrested and Tried (Mark 14:32-72)
33 Aku nimbelie Pita keme Jemisi keme Jono keme lipe memba pupelie ˻‘Na teko kenjinge ulumu paa nondopa wendo ombá tekemo.’ nimbe pilipelie˼ yu-yuyu kondo kolopa konopu keri panjipe kamelena mindili tepili molorumu.
34 Yuni enondo nimbendo: “Nanga konopune umbune paa awili te tepamomonga na kolombo none tekemo. Eno uru naa peko, ya kanoko kondoko molaa!” nirimu.
35 Aku nimbelie yu-yuyu laye-kolte anjo pupe koporongo langopa tamalu pepalie yu-kinie nondopa wendo ombá mele ‘Wendo naa omu liemo paa papu.’ nimbey Pulu Yemo-kinie popo tombando ˻ungu-iko topa˼ mawa tepalie nimbendo:
36 “Nanga Tata, nuni ulume pali manda teleno kene na mindili noli no-mingine no nombómoz ‘Naa nambo!’ nieni! Nalo ‘Nane tepolie nanu konopu simbo.’ konopu lekero mele naa teambo! Nuni kanoko peanga kanoni ulumu mindi teambo!” nirimu.
37 Aku nimbelie kelepa yunge lombili andoli ye yepoko moloringine yando omba eno uru peringi kanopalie Pitando nimbendo: “Saimono, nu uru penu lemo. Nu uru naa peko ena laye-kolte manda we kanoko kondoko naa molenaye?
38 ‘˻Kurumenga nomi Setenene˼ olio kondi tomba kinie tepo kenjimolo kene.’ ningulie ˻uru naa peko˼ Pulu Yemo-kinie popo toko ungu ningu kanoko kondoko molayo! Sike ‘tepo kondamili!’ nimbu konopumene pilimolo nalo temolondo kangimu siye tepa tondolo naa pulimo.” nirimu.
39 Aku-sipe nimbelie yu altopa anjo pupe ou Pulu Yemo-kinie popo topa ungu nimbe mawa terimu mele altopa nirimu.
40 Altopa yando orumu kinie eno uru paa orumu kulu altoko uru peringi kanorumu. Enone uru peringimunge pipili kolkolie yundu ninge mele naa pilieringi.
41 ˻Altopa˼ wale yepoko-sipemonga ˻anjo pupe Pulu Yemo-kinie popo topa ungu nimbé pupe˼ kelepa yando ombalie yuni enondo nimbendo: “Nambemune we uru peko múlu pilku molemeleye?a Manda peame! Manie Omba Mana-Ye A Lierimu Yemo ˻tonge˼ ulu-pulu-keri telemele yema liku singe enamob wendo ombá tekemo.
42 Ola angilku pamili wame! Na lipe anjo simbe yemo okomo kanaa!” nirimu.
YESUSI KA SIKU, KOTE TENDOKO, “KOLOPILI!” NINGU UNJO-PERANA OLA TOKO KU TOKO PANJIKULIE, KOLORUMU KINIE ÓNO TERINGI TEMANEMA
Yesusi Ka Siringi Temanemoc
43 Yesusini ˻kolea Gesemani yu lombili andolimendo˼ aku nimbe molopili yu lombili andoli rurepo akumenga ye Judasi orumu. Pulu Yemo popo tondoringi ye-awilime kinie, Pulu Yemonga ungu-manemanga pulume pilku mane siringi yema kinie,d Juda-yembomanga tápu-yema kinie, kanu yemane liku mundoringi ye awisili, yembo toli lou-pulsema kinie kopema kinie mengo Judasi-kinie oringi.
44 Ou Yesusi molorumune naa wangi Yesusi Juda-ye awilime lipe simbe nimbe panjerimu ye ˻Judasini˼ eno Yesusi yu ipulueli manda kanonge mele nimbe sipelie nimbendo: “Nane ye te kanopolie kangulumbo akumu Yesusi. Yu ambolko ka siku mengo pangi!” nirimu.
45 ˻Aku yema˼ oringi kinie ˻Judasi˼ yu Yesusi molorumune sumbi-sipe ombalie “Rapai,e nu akune angilienu lemo.” nimbe omba yu kangulorumu.
46 Aku terimu kinie kanokolie Yesusi liku ka siringi.
47 Aku teringi kinie kanopalie ˻Yesusi-kinie˼ nondoko angilieringi ye tene yungef lou-pokete-napimu kulu topa wendo lipe Pulu Yemo popo tondoringi ye-awili-olandopamonga kendemande-ye te yunge komu te topa laká lenderimu, aku komumu wendo orumu.
48 Kanu-kinie Yesusini ˻yu ka singe oringi˼ yemando nimbendo: “Na ‘yembo topa wa noli yere molemo.’ konopu lekolie na ka singendo yembo toli lou-pulsema kinie kopema kinie mengo okomeleye?
49 Ulke-tembele ˻kerepulune we-yemboma máku toko molemele˼ koleana alieli eno pea molemolo kinie ungu-mane sipu molio kinie na liku ka naa silimele kanumu. Nalo ˻Pulu Yemonga˼ bokune toringi molemo mele kamu wendo ombámonga enone tenge tekemele ulume wendo okomo.” nirimu.
50 Kanu-kinie yu lombili andolime pali ˻‘Olio pea ka singenje.’ ningu pilkulie˼ yu munduku siye kolko eno talopa leko puringi.
51 Kango-ye te múlu telu mindi pakopa Yesusi lombili andorumu. Kanu kangomo ˻Yesusi ka siringi yemane˼ amboloringi kinie
52 yunge múlumu ˻mindi˼ ambolko molangi, mélte naa panjipe we-we talopa lepa purumu.g
Juda-Ye-Awilimene Enono Yesusinge Kote Pilku Yu Teko Kenjeringi Temanemoh Kinie
Pitane Kolo Topa “Yesusi Yu Naa Kanolio!” Nirimu Temanemoi
14:(54),66-72
53 Kanu-kinie Yesusi ˻ka sikulie˼ Pulu Yemo popo tondoringi ye-awili-olandopamo molorumune mengo puringi. Pulu Yemo popo tondoringi ye-awilime kinie, Juda-yembomanga tápu-yema kinie, ˻Pulu Yemonga˼ ungu-manemanga pulume pilku mane siringi yema kinie,j enone pali ˻‘Yesusi kote tendepo piliemili!’ ningu˼ akune ongo máku toringi.
54 Yesusi ˻mengo puringi˼ kinie Pita lombili akilipe táka-lipe pupe, Pulu Yemo popo tondoringi ye-awili-olandopamonga ulkena, ulke angilipe makapu terimu, awi-suku-singine yembo máku toringi kolea we lierimune paa sukundu pupe, ˻Yesusi nokoko moloringi˼ ele-yema kinie tepe pilipe molorumu.
55 Pulu Yemo popo tondoringi ye-awilime kinie, Juda-yembomanga kanjollo-yema palik kinie, akumene Yesusi yu toko kondongendo ulu te tepa kenjerimu ulu te ‘Yembo tene ‘yu i-sipe i-sipe tepa kenjerimu.’ nipili!’ ningu yembo te kororingi nalo yembo te naa kanoko lsingi.
56 Yembo awisilini ongo ungu mare kolo toko “I-sipe i-sipe tepa kenjerimu.” niringi nalo enonga ungume kapola-kapola naa terimu.
57 Kanu-kinie ye marene yu tepa kenjerimu mele ola angilku kolo toko ningendo:
58 “I yemo i-sipe nirimu pilierimulu: “I ˻Pulu Yemo popo topo kaloli˼ ulke-tembelemo, mana-yemane takoringimu nane topo tekisipulie mana-yemane manda naa takonge ulke te wale yepoko omba pupili kolo-wangopo takombo.” nirimu.l ˻Yuni aku nirimumunge ‘Yu Pulu Yemo mele molio.’ konopu lepalie aku nirimumu nimbe kenjerimunje˼.” niringi.
59 Eno kepe laye lupe-lupe niringi, enonga ungume kapola-kapola naa-la terimu.
60 Aku niringi pilipelie Pulu Yemo popo tondoringi ye-awili-olandopamo eno máku toringine ola angilipe Yesusi walsipelie nimbendo: “Ungu te topondoko naa nikinuye? Nu ningu kenjerinu mele nikimilimu nambolka ulumu teko kenjerinumundu nikimiliye?” nirimu.
61 Nalo Yesusi ungu te topondopa naa nimbe we angilierimu.
Pulu Yemo popo tondoringi ye-awili-olandopamone yu altopa walsipe pilipelie nimbendo: “Pulu Yemone olio ‘Nokopa kondomba ye te lipu mundumbo.’ ou nimbe mako torumu ye-nomi Kirasimu sike nu molo móloye? Kapi Nimbu Imbi Lipu Ola Mundundulimolomonga Malo nu molo móloye?” nirimu.
62 Yesusini nimbendo: “Akumu na.” nirimu. “Pe walse Manie Omba Mana-Ye A Lierimu Yemo,m Ye Tondolo Olandopa Púlimu˻-kinie mélema nokombando˼ yunge ki-umbukundu molopa, kupemanga ola molopa manie ombá eno kanonge.” nirimu.n
63 Aku-sipe nirimumunge ˻yu ‘Pulu Yemo-mele molio.’ nimbe nirimu kulu˼ pilipelie Pulu Yemo popo tondoringi ye-awili-olandopamone ˻paa pilipe keri pilipe˼ yunge wale-pakolimu yuyu ambolopa sungu-sipelie nimbendo: “Kinié yuni mongo lsimu mele nimbe simbe yembo te pea nambemune koromoloye?
64 Yu-yuyu paa sike Pulu Yemo ungu-taka tondopa marake tekemo pilkimulu. Nambolka konopu lekemeleye? ˻Yu-kinie nambe-eamiliye?˼” nirimu kinie
enone ningendo: “Yu Pulu Yemo ungu-taka tondopa marake temumunge topo kondomulu liemo papu.” niringi.
65 Kanu-kinie enonga ye marene yunge kumbikerena olkambe toko munduku, yunge kumbikeremo múlu tene pipi sindikulie ki-lumuni toko ˻“Nu ‘Pulu Yemonga yere molio.’ konopu leno kene˼ nawene nu tokomonje, ningu si!” niringi. Ele-yemane yu liku larauwene toringi.
66 Kanu-kinie Pita ulke maniekondo, yemboma liku máku toko moloringi koleana molorumu kinieo Pulu Yemo popo tondoringi ye-awili-olandopamonga kendemande-ambo te Pita molorumune ombalie
67 yu tepe pilipe molorumu kanopalie neme-neme nimbe kanopalie nimbendo: “Nu kepe Nasarete-Ye Yesusi-kinie pea tapú-toko moloringi kanumenga ye te lemo.” nirimu.
68 Pitane kolo topalie “Mólo!” nimbe “Nu nikinu mele na naa pilkiru!” nirimu. Aku-sipe nimbelie ulke-kerepulune purumu kinie kera-gulta ko torumu.
Ooooooooooooooooooo oooooooooo.
69 Pita yu ulke-kerepulune pupe molopili kanu kendemande-ambomone yu kanopalie akune angilieringi yembomando altopa nimbendo: “I yemo Yesusinge talape-ye te lemo.” nirimu.
70 Pitane altopa “Mólo!” nirimu.
Laye-kolte pe-mele Pita angilierimune nondoko angilieringi yemane ˻yu ungu laye-lupe mele nirimu pilkulie˼ yundu ningendo: “Kolea Gallilli disiriki yembomane ungu nilimele mele nu aku-siku ungu nikinu pilkimulu. ˻Yesusi kinie yu lombili andoli yema kinie kolea Gallilli disiriki yemala,˼ nu kepe Gallilli ye te, aku kene ‘Nu paa sike yu lombili andoli ye te.’ konopu lekemolo.” niringi.
71 Aku niringi kinie Pitane Pulu Yemonga imbi lepa tondolo-mundupe mi lepalie nimbendo: “Paa sike nikiru. “Eno nikimili yemo paa naa kanolio! Kólo tokoro liemo Pulu Yemone na topa kondopili!” nikiru.” nirimu.
72 Aku nirimu kinie tamburumbu kera-gulta wale talo-sipe ko torumu.
Oooooooooooooooooo oooooooooo.
Aku terimu kinie pilipelie Yesusini yundu “Kera-gulta wale talo-sipe ko naa topili nuni wale yepoko kólo tokolie “Yu naa kanolio.” nini.” nirimu ungu kanumup Pita kelepa pilierimu. Pilipelie ˻‘Ama, paa tepo kenjendu lepamo. ‘Paa naa tembo.’ konopu lierindu mele sike tendu.’ nimbe pilipelie˼ kola paa awili-tepa terimu.
Ipulueli-ou kolea kokele tangorumu kinie Pulu Yemo popo tondoringi ye-awilime kinie, Juda-yembomanga tápu-yema kinie, Pulu Yemonga ungu-manemanga pulume pilku mane siringi yema kinie, kanjollo-yema pali, ˻Yesusinge kotemo pilku pora sikulie˼ enone pali ˻yu tenge mele˼ ungu te ningu panjeringi.