Mélema Kake Telemomonga Pulumu Kinie Mélema Kalaro Molemomonga Puluselonga Ungu Marea
Ungu Te: Pulu Yemonga Ungu-Manema Olandopa, Anda-Kolepalimenga Ungu-Manema Maniendopa, Ungu Teb
7
(Kolomongo-kanga wane. Pulu Yemonga ungumu.)
˻Walse˼ Parisi-ye mare kinie Pulu Yemonga ungu-manemanga pulume pilku mane siringi ye mare kiniec eno Jerusalleme munduku siye kolko Yesusi molorumune ongo máku toko moloringimene
2 yu lombili andolimened ki kalaro molopili ou kulumiye naa toko langi we ambolko noringi kinie kanokolie kanoko keri kanoringi.
3 (˻Sike kalaro naa molorumu nalo˼ Parisi-yema kinie we Juda-yemboma kinie enonga anda-kolepalimene “Teaa!” niringi mele pilku liku tengendo ou ki pali nona munduku kulumiye toko kondokolie langi pe noringi. We naa noringi.
4 Makete-koleana puku ulkendo ongolie ki ou kulumiye naa tokolie ˻maketena topo toko lsingi˼ langime naa noringi. Anda-kolepalimenga teringi ulu-pulu lupe-lupe awisili pilku liku teko moloringila. Kápoma kinie, mingime kinie, langi noringi poloma kinie, aku-sipe mélema taki-teki we kulumiye toringi.)
5 ˻Juda-yembomane aku-siku teringi˼-kulu Parisi-yema kinie, Pulu Yemonga ungu-manemanga pulume pilku mane siringi yema kinie, enone ˻Yesusi lombili andolimene aku-siku ki kulumiye naa toko langi we noringi kanokolie˼ Yesusindu walsiku pilkulie ningendo: “Anda-kolepalimene “Teaa!” niringi mele nunge lombili andolimene nambemune naa pilku liku telemeleye? Enonga kime kalaro molopili langi nolemele kanumu.” niringi.
6 Yesusini enondo topondopa nimbendo: “Eno ˻ungu-manema pilku mane silimele yema kinie Parisi-yema kinie˼ eno topele-mapele toli yema molemele!e Pulu Yemone ungu-umbu tondorumume pilipe yemboma nimbe sirimu ye Aisayane enondo nirimu mele papu nirimu. ˻Enone kinié telemele mele yuni ou nimbe Pulu Yemonga˼ bokune torumu molemo mele i-sipe:
˻Pulu Yemone nimbendo:˼
“Kanu yemboma enonga keremane na kapi ningu
‘Ye awili olandopamo.
Nu lipu awi silimolo.’ ningu
na imbi liku ola mundundulimele nalo
enonga konopume kinie nanga konopumu kinie
telune naa pulimo. Lupe-lupe pelemo.
7 Enone ‘Nanga imbi lipu ola mundundemili!’ ningu
na we popo toko kapi nilimele.
Mana-yembomane mane silimele ungume mindi
mane sikulie
‘I ungu-manema Pulu Yemone “Teaa!” nilimo ungu-manema.’
ningu pilku liku telemele,
akumunge na popo tonge kinie
uluri naa temba.”
˻nirimu˼’ Aisaya 29:13
kanumu.f
8 Pulu Yemone “Teaa!” nirimu ungu-manema munduku siye kolkolie anda-kolepalimene “Teaa!” niringi mele mindi ambolko molemele.” ˻nimbe Yesusini˼ nirimu.
9 ˻Yesusini˼ ungu mare pea enondo nimbendo: “Enonga anda-kolepalimene “Teaa!” niringi mele pilku liku tengendo Pulu Yemone “Teaa!” nirimu ungu-manema bulu silimele mele papu telemeleye?
10 Akumunge Mosisini nimbendo:
“Aminieli-lanielinge ungume pilku liku,
liku awi-siku teaa!”g Wendo Oringi 20:12, Ungu-Manema 5:16
nimbe
“Yembo tene yunge anumundu molo lapando
ungu te nimbe kenjipe iri tomu liemo
kanu yembomo toko kondangi!”h Wendo Oringi 21:17, LLipai 20:9
nirimu kanumu.
11 Nalo eno ˻Juda-yembomanga tápu-yema˼ne ningendo: “Ye tene yunge anumu-lapaselondo nimbendo: “Nane elo méle mare lipu tapondopo silkema koronga ‘Pulu Yemo simbo.’ nimbu panjerindu kanumunge elo manda naa lipu tapondopo simbo.” nimbelie
12 yunge anumu-lapaselo naa lipe tapondomba kinie papu.” ningu mane silimele.
13 Aku-siku mane silimele ungumuni ‘Anda-kolepalimene mane siringi ulu-pulume olandopa.’ ningu ‘Pulu Yemone nirimu ungumu uluri mólo! Manie pupili!’ nilimele. Enone ulu lupe-lupe awisili aku-siku teko molemele.” nirimu.
Ungu Te: Mélemane Yemboma Tepa Kalaro Mondondolemomonga Ungu Tei
14 Aku nimbelie Yesusini máku toko moloringi yembomando “Na moliona waa!” nimbelie enondo nimbendo: “Nane ˻aku nikirumungej ungu te˼ nimbo tekero ungumu enone pali komu tendeko ungumunge pulumu pilku kondayo!
15 Yembomanga kangine ulsukundu lepalie kerena pupe olona suku pulimo méltene ˻Pulu Yemo manda popo tonge aulkemo pipi silimo˼ kalaro te manda naa mondolemo. Yembomanga konopune sukundu pepalie wendo olemo ulumene mindi yemboma kalaro mondolemo.
16 (Yembo komu-peo lemba yemboma i ungumu mimi-siku piliengi!” nirimu.)k
17 Kanune máku toko moloringi yemboma Yesusini mundupe siye kolopa ulkena suku purumu kinie yu lombili andolimene yu walsiku pilkulie ningendo: “Aku ungu-ikomonga pulumu nambolkanje? Ningu para sieni!” niringi kinie
18-19 Yesusini enondo nimbendo: “Kinié kepe naa pilkimiliye? Yembo tenga kangine ulsu lepalie sukundu pulimo mélte yunge konopune naa pupe, olona suku pupe ulsu omba le-murune kamu pulimomonga yu kalaro manda naa mondolemo mele naa pilkimiliye?” nirimu. (Yesusini aku-sipe nirimumunge “Langimene pali yemboma kalaro te naa mondolemo.” nimbendo nirimu.)l
20-21 ˻“Kerena sukundu pulimo mélemane aku-sipe uluri naa telemo.” nimbelie˼ yuni kelepa nimbendo: “Yembo tenga konopune sukundu pepalie wendo olemo kanu mélemane yembo te ˻Pulu Yemo popo tomba aulkemo pipi silimo˼ kalaro te mondolemo. Ulu-pulu-kerime ou konopumuni pilkulie ˻pe kamu telemelemonga˼ “Konopune pepalie wendo olemo mélemane kalaro mondolemo. ˻We naa telemele.˼” ˻nikiru.˼ Kanu mélema i-sipe:
Konopumuni ulu-kerime pilimele;
wa-ulu-kerinele lupe-lupema andoko telemele;
wa nolemele;
yemboma toko kondolemele;
ambo ye pulime molo ye ambo lilime
yembo lupema-kinie ulu-kerinele telemele;
22 yembomanga méle nosilimelema ‘Na liembo!’ nilimele;
ulu-pulu-keri lupe-lupema telemele;
kolo tolemele;
yembomane kanokolie pipili kolemele ulume
pipili naa kolko sumbi-siku telemele;
yembo lupema molemele mele kepe enonga mélema yama mengo ‘Yu maloya!’ konopu lemele;
‘Yemboma pipili kolko molko kenjengi!’ ningu ungu-bulkundu nindilimele;
‘Na imbi ola molemo. Na pilipe konginjeli olandopa pelemo.
Yembo lupema tondolo te naa pelemo.’ ningu kara pulimele;
kekelepa toli ulume telemele;
ulu-pulu akume pilku telemele.m
23 Aku ulu-pulu-kerime pali yembomanga konopune sukundu pepa wendo olemomane yemboma tepa kalaro mondolemo; ˻Pulu Yemonga kumbi-kerena punge aulkemo pipi silimo˼ tepa kalaro mondolemo. ˻Ulsu lepa olona pulimo mélemane uluri naa telemo˼” nirimu.
Kolea-Pinisia Ambo Tene ‘Yesusini Ulu-Tondolo Te Manda Temba.’ Nimbe Tondolo Mundupe Pilierimu Temanemon
24 Kanu-kinie Yesusi molorumu kolea ˻Geneserete˼o mundupe siye kolopa ˻Juda-yemboma moloringi kolea Gallilli-Disiriki ulsukundu˼ kolea-awili Taya kinie Saidono-selo lierimu koleana sukundu purumu. Akune purumu kinie yembomane yu ‘naa kanangi!’ nimbe ulke tenga sukundu pupe molorumu nalo yu omba molorumu mele yemboma pilieringi.
25-26 Yesusi yu omba molorumu akumu pilipelie ambo te yu molorumune sumbi-sipe omba yunge kumbi-kerena manie molopa tamalu perimu. Kanu ambomo yu ˻Pulu Yemonga˼ Juda-yembomanga talapena ulsukundu ambo te, kolea Siria poropinji sukundu kolea Ponisia-disiriki yunge pulu koleamo. Ambomonga lemenunge konopune kuru te molopa ambolorumu kulu Yesusi molorumune omba manie molopa tamalu pepa yundu mawa tepalie nimbendo: “Nanga ambolamo kuru te konopune sukundu molemo kene yu ˻kondo kolko˼ kurumu toko makorou!” nirimu.
27 ˻Ambomo yu ambo-lupe, Juda-ambo te mólo, nimbe kanopalie˼ Yesusini ambomondo ˻ungu-iko te topalie˼ nimbendo: “Ambolangoma langi ou nangi olo tepili! Enonga langime lipu owama simolo kinie kapola naa temba.” nirimu.p
28 Ambomone yundu nimbendo: “Awilimu,q sike nikinu nalo owamane kepe ambolangomanga langi-pundu manie pulimoma liku nolemele kanumu.” nirimu.
29 Kanu-kinie Yesusini yundu nimbendo: “Ambomo, nu aku-siku nikinumu papu nikinu. Aku-siku nikinumunge kuru kanumu nunge ambolamonga konopune sukundu molopa omba wendo pumu kene nu ˻konopu waengo siliku˼ pu!” nirimu.
30 ˻Yesusini aku-sipe nirimu pilipelie˼ ambomo kelepa ulkendo pupe kanorumu kinie lemenu konopune kuru te naa molopili uru peli polona ola we molorumu kanorumu.
Yesusini Ye Komu Sipe Ungu Naa Nirimu Te Tepa Konde Lsimu Temanemo
31 Yesusi kolea-awili Taya mundupe siye kolopa kolea-awili Saidono sukundu omba pupe, ‘Kolea Awili Rureponga Talo’ niringi koleana sukundu omba pupe, Nomú-Gallilli kélona ˻sukundu˼ orumu.
32 Akune moloringi yembomane yu molorumune ye komu sipe ungu sumbi-sipe naa nirimu ye te mengo ongo “˻Yu konde pupili˼ nunge kimuni ambolou!” ningu tondolo-munduku mawa teringi.
33 Kanu-kinie yembo kakapu teko moloringime mundupe siye kolopa “Oltolo molambili!” nimbe kanu yemo tenga memba pupelie nirimumuni, komu-selonga ki-sundu suku mundupe, lkambe topa yemonga alumbelumu kimuni ambolopalie,
34 mulúne olando-sipe kanopa, tondolo-mundupe múlu lipe, Juda-yembomanga ungu lepa yemondo nimbendo: “Epata!” nirimu. (Kanu ungumunge pulumu “Komumuni piliei!” nirimu.)
35 Aku nirimu kinie tamburumbu yemo komu peo lepa yu ungu kapola pilipe, alumbelumu takele terimu kanumu pe nimbe umbu-alumbelu angilierimu kinie yu ungu sumbi-sipe nirimu.
36 Kanu-kinie Yesusini enondo tondolo-mundupe nimbendo: “Nane i ulu tekero mele anjo yembo telurindu kepe paa naa ningu siee!” nirimu. Nalo yuni “Mólo!” nimbe wale awisili nirimu mele ta ningu anjo yemboma yuni terimu mele temane toko siliku mindi andoringi.
37 ˻Yuni terimu mele kanoringi yemboma kinie, anjo temane toko siringi pilieringi yemboma kinie˼ eno paa mini-wale mundukulie ningendo: “Apa! Yuni telemo ulume peangama mindi telemo. “Komu silimoma ungu pilku, ungu naa nilimelema ungu ningu, teaa!” nilimo kinie kepe ungume pilku ungume ningu telemele.” niringi.