YESUSINI UNGU-IKO MARE TORUMU UNGUME
Yesusini Ungu-Iko Mare Torumumenga Pulu-Pulu Ungumua
4
(Kolomongo-kanga wane. Pulu Yemonga ungumu.)
Walse Yesusi altopa Nomú-˻Gallilli˼ kélona pupe yemboma mane-sipe molorumu kinie yembo paa awisili yu molorumune ongo máku toko moloringimunge nona andoli sipi te lierimumunge suku pupe manie molorumu, yemboma nomú-kélona angilieringi.
2 Yuni enondo ungu awisili nimbe simbendo ungu-iko pokore torumu.
Ye Tene Langi-Umbu Poniena Tanda Sirimu Ungu-Ikomob Kinie
Yesusindu “Ungu-Ikoma Nambemune Tolenoye?” Ningu Walsiku Pilieringi Temanemoc
“Ye tene rasi-witi umbu poniena andopa tanda sirimu.
4 Tanda silipe andorumu kinie umbu mare aulkena manie purumu, kanume keramane ongo liku noringi.
5 Umbu mare kou perimune manie pupelie ma wallo-kolte mindi lierimu kulu nondopa muli topa wendo orumu.
6 Nalo pulkinio naa mundorumu kulu ena terimu kinie kanume kolorumu.
7 Umbu mare kombulu siri-ka mele molorumune manie purumu, siri-ka melemo wendo omba witi-umbume topa norumu kulu omba peanga naa lepa mongo te naa torumu.
8 Umbu mare ma peangana manie purumume wendo-wendo omba akopalie mongo peangama torumu. Mare mongo tokapu-telu mele topa, mare mongo tokapu-yepoko mele topa, mare tokapu-kise mele torumu.” ˻nirimu.˼
9 Aku nimbelie “Yembo komu-peo lemomane i ungumu piliee!” nirimu.
10 Pe we-yemboma pali puringi kinie yu lombili andoli ye engaki-rurepo kinie yembo mare pea yu-kinie moloringime kinie, enone yu walsikulie ningendo: “Nu yembomando ungu te ninindu nambemune ungu-iko tolenoye?” d niringi.
11-12 Yuni enondo topondopa nimbendo: “Pulu Yemo ye-nomi-kingimu molopa yemboma kinie mélema kinie nokolemomonga ulu-pulue ou yuyu pilierimu kanu ulu-pulume ‘Kinié eno ˻na lombili olemele yemboma˼ piliengi!’ nimbelie eno nimbe sikimu. Nalo ulsu molemele yemboma ‘Ungume nimbu siembo!’ nimbulie ungu-ikoma mindi topo silio.
˻Pulu Yemone Aisayanga kerena nimbendo:˼
‘Eno mongone kanokolie, kanoko imbi naa silimele;
komuni pilkulie, pilku imbi naa silimele.
Konopuni pilkulie alowa telemela kinie,
˻Pulu Yemone˼ enonga ulu-pulu-kerime
‘Manie pupili!’ nimbe siye kolka.’f
nirimuAisaya 6:9-10
akumunge we yembomando ungu-ikoma mindi tolio.” nirimu.
13 Aku nimbelie Yesusini enondo kelepa nimbendo:
“Ungu-iko topo nindug akumunge ungu-pulumu naa pilimeleye? Akumu naa pilkulie we ungu-ikomanga pali ungu-pulume nambeko pilingeye? ˻Ungu-ikomonga pulumu i-sipe:˼
14 Langi-umbu tanda sirimu yemone tanda sirimu umbume ˻Pulu Yemonga˼ ungumu.
15 Umbu mare tanda sirimu aulkena manie purumume yembo mare aku-siku mele molemele. Enone ungumu pilimele kinie pe ˻kurumenga nomi˼ Seteneneh sumbi-sipe omba ungu tanda sili konopune pupe pelemoma wendo limo.
16 Aku-sipela, umbu mare tanda sirimu kou perimune manie purumume yembo mare aku-siku mele molemele. Enone ungumu pilkulie walsikele sumbi-siku konopu siku pilku limele.
17 Nalo eno pulkinio naa mundukulie ungumu laye-kolte mindi pilku molemele. Pe eno konopune umbune telemo kinie molo eno ˻Pulu Yemonga˼ ungumu pilku liku molemele mele yembo-lupemane kanoko keri kanokolie ungu-taka tondoko teko kenjiku mindili silimele kinie enonga pilimele ungume siye kolemele.
18-19 Umbu mare tanda sirimu siri-ka mele molorumune manie purumume yembo mare kepe aku-siku mele molemele. Enone ungumu pilimele nalo konopune umbune telemo umbunema kinie, méle awisili nosikulie ‘Aku mélemane olio lipe tapondolemo tapondomba.’ ningu pilku molemele ulume kinie,i méle naa nosilimelema waka kolko ‘liemili!’ konopu lemele ulu mare kinie, kanu-sili ulu mare wendo omba ungu kanumu topa nolemo kinie ungumuni uluri naa tepa langi-mongo naa tolemo.
20 Umbu mare tanda sirimu ma peangana manie purumume, yembo mare aku-siku mele molemele. Enone ungumu pilkulie ungu-pulumu pilku kondoko ungumu kamu pilku limele. Pe eno langi-mongo mele tolemo. Kanu yembo marenga langi mongo tokapu-telu mele topa, yembo marenga mongo tokapu-yepoko mele topa, marenga mongo tokapu-kise mele topa, aku-sipe tolemo.j
˻Ungu-ikomonga ungu-pulumu aku-sipe.˼” nirimu.
Tepe-LLamemonga Ungu-Ikomok
21 ˻Aku nimbelie ungu-iko te pea topa nimbendo:˼
“Yembomane tepe-llame kandokolie mingine suku panjilimeleye? Molo polo maniekondo nosilimeleye? ˻Mólo! ‘Kolea pa tepili, kolea kepe mélema kepe kanamili!’ ningu˼ polo tenga ola nosilimele kanumu.
22 Aku-sipe mele, kinié lopi telemo mélema pe walse mona lemba yemboma kanonge; kinié aki topa lemo mélema pe walse pa temba kinie yembomane kanu mélema kanonge.
23 Yembo komu-peo lemomane ˻ungu nikirumu˼ piliee!” ˻nirimu.˼
24 “Enone ungu pilimele akumu mimi-siku piliengi! Enone mélema yemboma silimele mele ˻Pulu Yemone˼ eno aku-sipe méle kalomba. Mare olandopa simbela.
25 Mélema nosilimo yembomo nane mare pea simbo, yu paa awisili nosimbe. Nalo mélema naa nosilimo yembomo yu nosilimoma kepe wendo limbo.”l nirimu.
Pulu Yemo Ye-Nomi-Kingimu Molemomonga Ungu-Iko Talo
Te: Langi-Umbume Muli Topa Omba Awi Lemomonga Ungu-Ikomo Kinie
Te: Unjo-Masetete Umbumunge Ungu-Ikomom
26 Yesusini ungu te pea nimbendo:
“Pulu Yemo ye-nomi-kingimu molopa yemboma nokolemo akumun i-sipe mele:
“Ye tene langi-umbu mana tanda silimo.
27 Aku yemo ipulueli uru pepa, tangoli ola molopa ˻andopa kongono tepa˼, telemo kinie langi-umbu tanda silimoma muli topa omba awi lemo nalo aku-sipe telemomonga pulumu yemone nimbe naa kanopa naa pilimo.
28 Langi-umbu tolemoma mamone yu-yuyu ‘wendo opili!’ nilimo. Ou kumbi-lepa muli tolemo. Pe gomo tolemo. Pe langi-mongo tolemo.
29 Pe langi nou lemo kinie ‘Langi inie topo sukundu-sukundu limbo walemo wendo okomo.’ nimbelieo langi-umbu tolemo yemone langi inie tolemo. ˻Pulu Yemo ye-nomi-kingi molopa yemboma nokolemo aku-sipe molemo.˼” nirimu.
30 Pe Yesusini enondo kelepa nimbendo:
“Pulu Yemo ye-nomi-kingimu molopa yemboma nokolemo akumu nambolka mélte mele niemboye? ‘Yu kingimu molopa yemboma nokolemo mele piliengi nimbu siembo!’ nimbulie nambolka ungu-ikomo topo niemboye?” ˻nimbelie nirimumuni, altopa ungu-iko te pea topalie nimbendo:˼
31 “Pulu Yemo ye-nomi-kingi molopa yemboma nokolemo akumu unjo-masetete umbu mele. Yemboma langi-umbu poniena mundulimelemanga pali unjo-masetete umbumu yu paa kangamo.
32 Nalo poniena mundulimele kinie wendo omba awi lemo kinie poniena molemo mélemanga pali yu paa awilimu. Kamu awi-lepa unjo-mele angilimo kinie kerama kanu unjo-kolamanga ongo pelemele. Pulu Yemo ye-nomi-kingi molopa yemboma nokolemo mele aku-sipe.” nirimu.
Yesusini Ungu-Ikoma Mindi Torumumunge Ungu-Pulu Tep
33 Yesusini ungume yemboma nimbe simbendo ungu-iko awisili aku-sipema topa sirimu. Eno manda pilinge mele topa sirimu.
34 Eno ungu te nimbe simbendo ungu-iko te mindi torumu. ˻Ungu te sumbi-sipe naa nimbe sirimu.˼ Nalo yu kinie yu lombili andolime kinieq eno-enono moloringi kinie yuni yunge ungumenga pulume pali eno sumbi-sipe nimbe para sirimu.
Poporome Awili Te Torumumuni Yesusinge Ungumu Pilipe Lsimu Temanemor
35 Kanu walemonga kolea kala torumu kinie Yesusini yu lombili andoli yemando nimbendo: “Nomú nekendo pamolo!” nirimu kinie
Jesus Calms the Storm (Mark 4:35-41)
36 nona andoli sipi tenga Yesusi ou suku molopalie ungume nirimus akune suku yu we molopili nomú-kélona máku toko moloringi yemboma munduku siye kolko yu mengo puringi. Sipine puringi kinie sipi mare pea puringila.
37 Kanu-kinie, nomúne punge puringi kinie poporome paa awili te nomúne torumu. Aku terimu-ne nomúmu apisipe ola ombalie no sipine sukundu-sukundu omba peke lepalie sipimu memba nona manie pumbe terimu,
38 nalo Yesusi sipimunge bulkundu penge-kanda wale tenga we uru mindi perimu. Yu lombili andoli yemane yu toko makinjindikulie ningendo: “Ungu-Mane Silimu, olio no wangopo kolomolomonga nu mini-wale naa pukumuye?” niringi.
39 Yu makilipelie poporomemo iri topa nomúmundu nimbendo: “Taka liku molou!” nirimu kinie poporomemo topa kelepa nomúmu lope naa tepa paa we lierimu.
40 Kanu-kinie yuni lombili andolimendo nimbendo: “Eno nambemune mini-wale mundukumiliye? ˻Telio mele wale awisili kanolemele nalo˼ yandopa kinié kepe ‘Olio manda naa nokombanje.’ ningu na tondolo-munduku naa pilimeleye?” nirimu.
41 ˻Yuni terimu mele kanokolie˼ yemane mini-wale munduku pipili awili-teko kolkolie anjo-yando enono walsikulie ningendo: “Apa! I yemo nawenje? Poporomemone kepe nomúmuni kepe yunge ungumu pilku liku kelkembele.” niringi.