Yesusini Kimbu-Ki Kolopa Pora Sirimu Ye Tenga Ulu Pulu Kerime We Siye Kolopa, Yu Tepa Konde Lsimu Temanemoa
2
(Kolomongo-kanga wane. Pulu Yemonga ungumu.)
Wale mare omba purumu kinie Yesusi Kapeniame taono altopa sukundu purumu. Yu ou perimu ulkena altopa omba molorumu yembomane pilkulie
2 eno awisili ongo ulkena sukundu-sukundu ongo liku máku toko moloringi kinie ulke kanune ekelepa terimu-kulu yembo mare molonge kolea te naa lierimu-kulu pena moloringila. Yuni eno ˻Pulu Yemonga˼ ungumu nimbe sipe molorumu.
3 ˻Yuni nirimu mele aku-siku máku toko pilku molangi˼ yembo marene kimbu-ki kolopa pora sirimu ye te mengo oringi. Kanu yembomanga ye kisene kanu yemo taropola teko mengo Yesusi molorumune onge oringi nalo
4 yembo awisili ulkena ekelepa teko angilieringi-kulu yu molorumune nondoko mengo punge aulke te naa lierimu-kulu ulke-imune mengo ola pukulieb Yesusi molorumune kana-kana ulkemo tekisikulie yemo taropola pali moko toko manie mundoringi.
5 ˻‘Yesusini i yemo manda tepa konde limbe.’ ningu˼ tondolo-munduku pilkuliec yu mengo oringi kanopa pilipelie Yesusini kimbu-ki kolopa pora sirimu yemondo nimbendo: “Nanga kangomo, nunge konopune ulu-pulu-keri terinu pelemoma manie pupili, we siye kolkoro.” nirimu.
6-7 ˻Kanu-kinie,˼ Pulu Yemonga ungu-manemanga pulume pilku mane siringi ye mared enono akune molko ˻Yesusini aku nirimu kinie pilkulie pilku keri pilku˼ konopu kimbu sikulie, “Nendi yemone ungu aku-sipe nambemune nikimuye? Yu Pulu Yemo marake tekemo. Yembomane ulu-pulu-keri telemelema nawene ‘Manie pupili, siye kolkoro.’ manda nimbéye? Pulu Yemone mindi manda telemo.” ningu enono ningu pilku molko konopu kimbú siringi.
8 Kanu-kinie Yesusini eno aku-siku konopu kimbú-siku moloringi mele yunge konopuni sumbi-sipe pilipelie enondo nimbendo: “Enone ˻nane nikirumunge˼ aku-siku nambemune konopu kimbú-sikimiliye?
9 I yemondo “Nunge ulu-pulu-kerime manie pupili, we siye kolkoro.” nimbo kinie eno ulu te naa kanokolie ‘We-we tepa nikimu.’ konopu lengeye? Molo “Ola angilku nunge kunungumu liku mengo kimbu-kongono teko andou!” nimbo kinie yu ola angilimbene naa angilimbenje mona lemba manda kanokolie ‘Aku-sipe mindili-sipe nikimunje.’ konopu lengeye?
10 Nalo ‘ ‘Manie Omba Mana-Ye A Lierimu Yemoe tondolo pelemomone ya ma-koleana yembomanga ulu-pulu-kerime “Manie pupili, we siye kolkoro.” manda nimbé.’ ningu piliengi!’ nimbu aku-sipu nindu.” nirimu.
Aku nimbelie kimbu-ki kolopa pora sili yemondo nimbendo:
11 “Nane ‘Nu ola angilku nunge kunungumu liku mengo ulkendo pu!’ nikiru.” nirimu.
12 Aku nirimu kinie yemo ola angilipe tamburumbu kunungumu lipe memba, eno pali kanoko molangi omba pena purumu. Yu aku terimu kanokolie eno suru ningu mini-wale mundukulie Pulu Yemonga imbi liku ola mundunduku yu kapi ningulie ningendo: “Olio i ulu wendo okomo kanokomolo mele ou walse kepe ulu te aku-sipu paa naa kanorumulu.” niringi.
Yesusini Mateyu-LLipaindu “Na Lombili Ou!” Nirimu Temanemof
13 Yesusi ˻ulkemo mundupe siye kolopa˼ pena pupelie altopa Nomú-Gallilli kélona pupe andopa molorumu. Kanu-kinie yu molorumune yembo awisili ongo liku máku toko moloringi kinie yuni eno mane sirimu.
14 Kanu-kinie yu pumbe pupelie nirimumuni, Allapiasi-malo LLipaig kou-takisi lsingi ulkena ˻kou-takisi lipe˼ molorumu kanopalie yundu “Nu na-kinie pea pambili lombili ou!” nirimu. Kanu-kinie LLipai yu ola angilipe yu lombili purumu.
15 Pe Yesusi LLipainge ulkena langi nomba molorumu kinie kou-takisi lili yema kinie, ˻Juda-ye awilimene˼ “ulu-pulu-keri teli ye” ˻niringi˼ ye wema kinie awisili ongo Yesusi kinie yu lombili andoli yema kinie eno pea manie molko langi noringi. Aku-sili yembo awisili alieli yu lombili andoringimunge eno awisili ˻akune lombili puku˼ pea langi nongo moloringi.
16 Yesusi yu “ulu-pulu-keri telime” niringi yembo wema kinie kou-takisi lili yema kinie pea langi nongo moloringi kanokolie Parisi ye marene,h Pulu Yemonga ungu-manemanga pulume pilku mane siringi kanu yemane, Yesusi lombili andolimendo ningendo: “Kou-takisi lili yema kinie, ulu-pulu-kerime teli wema kinie, eno-kinie yu nambemune langi pea nokomeleye?” niringi.
17 Aku-siku niringi pilipelie Yesusini enondo nimbendo: “Kuru naa tolemo yemboma doketana naa pulimele. Kuru tolemo yemboma mindi doketana pulimele kanumu.i Nane “Yembo sumbi-nílime na molombona wangi!” nimbondo ma-koleana naa orundu.j ‘Ulu-pulu-keri teli yemboma na molombona wangi!’ nimbondo orundu. Ulu-pulu-keri teli yemboma lipu tapondombondo orundu.” nirimu.
Yembomane Walse-Walse Langi Naa Nongo Mi Tolemele Ulumunge Ungu Tek
18 ˻No-Lindeli˼ Jono lombili andoringi yema kinie, Parisi yema lombili andoringime kinie, eno walse-walse langi mi toko naa noringi melel walse aku-siku teko moloringila. ˻Aku teringi-kulu˼ yembo mare Yesusi molorumune ongo yu walsiku pilkulie ningendo: “Jono lombili andolime kinie,m Parisi yema lombili andolime kinie,n alieli langi mi toko naa nolemele nalo nu lombili andolimeo aku-siku naa telemele akumu nambemune naa telemeleye?” niringi.
19 ˻Aku-siku niringi kinie pilipelie˼ Yesusini topondopa enondo ˻ungu-iko te topa yu toko kondonge kolombamonga ungu te nimbelie˼ nimbendo: “Ambo limbe ye te yunge pulu lemo yema-kinie molemo kinie eno konopu sikulie “Langi mi topo naa namili!” manda ningeye? ˻Manda naa ninge.˼
20 Nalo pe, ambo limbe yemo eno molongena ongo wendo linge kinie kanu walemanga sike ˻konopu keri panjiku˼ langi naa nongendo mi tonge. ˻Isili-ou mólo!˼”p ˻nirimu.˼
21 q “Mulumbale ou te sungu nilimo kinie olione mulumbale paa konde tenga te kopisipu lipu, sungu nilimomonga naa topo tambululimolo kanumu. Yembo tene aku-sipe topa tambulkenje kanu mulumbalemo nona panjilke kinie mulumbale konde kopiselimu kanga lepa lli-nimbelie mulumbale-oumu kelepa kamu awili-tepa sungu nilke.
22 Kongi-meme kalumuni teli mingi-ou tengar no-waene konde naa-la kolemolo kanumu. Yembo tene mingi-ou tenga no-waene konde te kolkanje kanu no-waenemo mingine sukundu pepalie pe akolka kinie kanu mingi-oumu naa akopa sungu nilke. Kanu-kinie nomo kepe mingimu kepe kamu keri lelka. Akumunge no-waene konde kongi-meme kalumuni teli mingi kondena mindi kolemolo kanumu.” nirimu.
Kóro Moloringi Sambate-Walemonga Temane Talo
Te: Yesusi Yuni Sambate-Walemo Nokolemomonga Temane Tes
23 Walse, ˻koro moloringi˼ Wale-Sambate tenga,t Yesusi kinie yu lombili andolime kinie rasi-witi poniemanga ongo puringi kinie yu lombili andoli yemane rasi-witi mongo mare ˻nongendo˼ inie toringi.
24 Aku teringi kanokolie Parisi-yemaneu Yesusindu ningendo: “Kána! ˻Koro molemolo˼ Wale-Sambatemonga ‘Kongono naa teangi!’ nimbe pelemo ungu-manemov nambemune nu lombili andoli yemane manemo pulue tokolie aku-siku tekemeleye?” niringi.
25 Yesusini topondopa nimbendo: “Eno Pulu Yemonga bokune sukundu ˻anda-kolepa ye-nomi-kingi˼ Depisiniw terimu mele nimbe molemo temanemo kanokolie ˻temanemonga pulumu˼ naa pilimeleye? Depisi kinie yu pea puringi yema kinie eno ˻langi˼ mólo torumu˻munge˼ engelene kolkolie niringimuni,
26 Pulu Yemo popo tondoringi ye awili olandopa Apayata molopili Depisi Pulu Yemo molorumu sele-ulkena sukundu pupe, Pulu Yemonga kumbi-kerena lierimu pillawa kalolime lipe nomba, yu pea puringi yema sirimu noringila kanumu.x Kanu pillawa-kalolimendo Pulu Yemone ungu-mane sipelie nimbendo:
“We-yembomane paa naa nangi!
Pulu Yemo popo tondoli yema manjiku nangi!”y LLipai 24:5-9
nirimu ˻kanu ungu-manemo pulue torumu˼ kanumu.
˻Eno konopu talo nambemune lemeleye? Depisi yuni ou aku terimu mele eno pilku keri naa pilimelemonga pe kinié na lombili andoli yemane tekemele mele kanoko keri naa-la kanaa!˼” nirimu.
27 Aku nimbelie ungu te pea nimbendo: “Pulu Yemone ‘Yemboma molko kondangi!’ nimbe ˻koro molonge˼ Wale-Sambatemo lipe eno sirimu kanumu. ‘Sambate-Walemo pepa kondopili!’ nimbe yemboma lipe Sambate-Walemo naa sirimu.
28 Akumunge Sambate-Walemo kepe Manie Omba Mana-Ye A Lierimu Yemo nokolemo yemo molemo-na ˻Sambate-Wale kinie yemboma molko kondongendo tenge mele manda nimbé kanumu˼.” nirimu.