2 Enone walseringi mele Yesusini pilipelie yu ambolango kanga te “Na moliona ou!” nimbe eno moloringine mondopalie

3 enondo nimbendo: “Nane eno paa sike nimbu sikirumu: “Eno konopu alowa teko ambolango kangama mele naa molongi liemo Pulu Yemo ye-nomi-kingimu molopa yemboma nokolemo koleana^c suku paa manda naa punge.” nikiru.

4 Akumunge, yembo tene ‘Na we-yembomo molambo! Nanga imbi te olandopa naa molopili!’ nimbe i ambolango kangamo mele molemo yembomo yu Pulu Yemo ye-nomi-kingimu molopa nokolemo koleana yembo imbi paa mololimu molemo.”^d ˻nirimu.˼

5 “˻I ambolangomondo ungu te pea niembo:˼ Yembo tene ‘Na Awilimunge yembomo molio.’ nimbe i ambolangomo mele lipe tapondomba kinie kanu yembomone aku tembamonga na lipe tapondombala.

6 Nalo yembo tene i ˻ambolango˼ kangamonga ˻mele yembo˼ te ˻na ‘Sike’ nimbe˼ tondolo-mundupe pilimo ˻ambolango˼ kanga te^f ‘Ulu-kerime tepili!’ nimbe kondi tombamonga kanu ˻ambolango˼ kangamo tondolo-mundupe pilimo mele mundupe siye kolopa bulu simu liemo ˻ambolango˼ kangamo ou kondi naa topili kanu yembomo kou paa awili te^g moko toko nomine lendeko ‘Yu kamu kolo-popili!’ ningu paka toko nomúne paa maniekondo mundulimelanje paa papu.^h

7 “˻Na˼ ‘Sike’ ningu tondolo-munduku pilimele yemboma kelko bulu-siku munduku siye kolonge ulume ya mana lemomonga na eno kondo tekemo. Sike aku-sipe ulume wendo ombá nalo yembo tene nanga yembo te kondi tombamonga kanu yembomo na bulu-sipe anjo pumu liemo kanu kondi tomba yembomo mindili nomba paa molopa kenjimbe.

8 “Nunge kiselone molo kimbuselone ulu-pulu-keri te temu liemo aku kiselo molo kimbuselo kari leko lteani! Nu konde mololiku mindi puni koleanaⁱ kiselo molo kimbuselo naa angiliepili puni kinie peangamo. Nunge kimbu-ki pali we angiliepili tepe naa kumbulupe nomba pepa mindi pumbe koleana suku liku toko mundunge kinie kerimu.

9 Molo nunge mongoselone mélte kanokolie konopuni ‘liemboa!’ ningu pilku ulu-pulu-keri te tenu liemo aku mongoselo akuku lteani! Nu konde mololiku mindi puni koleana mongoselo naa angiliepili puni kinie peangamo. Mongo talo we angiliepili nu tepe-koleana suku liku toko mundunge kinie kerimu.”^j ˻nirimu.˼

10 “I ˻ambolango˼ kangama ˻mele yemboma˼nga te^k kanoko keri kanoko ‘Yu koropamo.’ ningu paa naa teangi! Enonga nokolemele mulú-koleana angelloma^l alieli Tata mulú-koleana molemona pea molemele kene ˻aku naa teaa˼!

11 (Manie Omba Mana-Ye A Lierimu Yemone ‘Yembo aulke lou leko molko kenjilimele yemboma koropo lipu tapondambo!’ nimbe orumu kanumu.)”^m ˻nirimu.˼

12 “Eno nambolka ningu pilkimiliye?

15 “˻Na lombili andolimenga˼ angenu tene nu^q tepa kenjemu liemo nu puku tepa kenjimbe yembomo pea elolo molangili kanu ulu-pulu-kerimu yuni nu temba mele ningu sieni! Nuni nini ungumu tepa kenjimbe angena piliemu liemo angena kinie elo altoko kapola-kapola molongele.

16 Nalo nuni nini ungumu yu naa piliemu liemo pe nuni ‘I ungumu pora nipili kene tembo mele yembo mare kanoko molangi altopo niembo!’ ningulie, kanonge yembo talo molo yepoko liku angena molombana mengo ongo eno kanoko molangi angenando ‘Telune molambili!’ altoko nieni!^r Kanu-kinie nuni teni kinie angenane temba mele kanu yembomane kanokolie yembo lupemando manda temane toko singe.

17 Kanu-kinie yuni enonga ungumu kepe naa piliemu liemo Kirasinge yembo talapemondo^s puku ningu sieni! Pe Kirasinge yembo-talapemo kepe angenane naa piliemu liemo ‘Yu olionga angenu mólo! Yu ulsukundu molko konopu alowa naa teli yemboma mele^t molemo lémo.’ ningu kanayo!^u

18 ^v “Nane enondo paa sike nimbu sikirumu: “Ya mana enone ˻ulume kinie yemboma kinie˼ “Mólo!” ninge kinie Pulu Yemone mulú-koleana sukundu “Mólo!” nimbéla; enone mana “Kapola.” ningema Pulu Yemone mulú-koleana sukundu “Kapola.” nimbéla.^w” nikiru.

19 “˻Akumunge˼ nane enondo ungu te pea nimbu sikirumu: “Enonga yembo talone ya mana “I-sipu mawa teambili!” ningu panjengili liemo elone mawa tengele mele mulú-koleana molemo Tatane elonga mawa tengele mele aku-sipe tendemba.^x” nikiru.

20 Yembo ˻koltalo,˼ talo molo yepoko, na enonga Awilimu imbi leko walsiku, ‘Pea tapu topo molemolo.’ konopu leko máku toko molemelemanga na eno-kinie molemolo-na ˻mawa tenge mele Tata yuni aku-sipe tendembamo˼.” nirimu.

21 ˻Yesusini yembo teko kenjilimelemando ungu-mane aku-sipe sirimu˼ kinie yu molorumune Pita nondopa omba yu walsipe pilipelie nimbendo: “Awilimu, nanga angenu tene na wale nambepa tepa kenjimbe kinie na we ‘Manie pupili!’ nimbu siye kolomboye? Wale sepene^y yuni temba mele siye kolopo we molopolie engaki-sipemonga ‘Pundu topili!’ nimbo kinie papuye?” nirimu.^z

22 Yesusini topondopa nimbendo: “Nane “Wale sepene mindi yuni nu tepa kenjimbe kinie yuni tembama siye kolko altoko pilku naa molou!” ni naa nikiru. “Wale sepene anderete sependi sepene yuni nu tepa kenjimbe walema pali yu tepili, siye kolko we molou!” nikiru.

23 “Akumunge Pulu Yemo ye-nomi-kingimu molopa mélema nokolemo^a akumu i-sipe mele:

24 Aku-sipe nirimu kinie kingimuni kou tene-milliene kína mele^b ou pundu angilierimu ye te kumbi-leko yu molorumune mengo oringi.

25 Nalo yu manda aku kou-pundumu tomba aulke te paa naa lierimu kulu awilimuni nimbendo: “Kapola, i yemo kinie yunge ambo ambolangoma kinie yunge mélema pali kinie makete teko kou-mone likulie^c koumu mengo ongo pundu tondangi!” nirimu.

26 Aku nirimu kulu pilipelie kendemandemo ye-nomimunge kumbikerena koporongo langopa tamalu pepa mawa tepalie nimbendo: “Nuni na kondo kolko we nokoko moloyo! Nane pundu pali tombo.” nirimu.

27 ˻Kanu-kinie˼ ye-nomimuni yunge kendemandemo paa kondo kolopa yu kendemandemo-kinie pundu angilierimume pali “Yu tepili! Altoko pundu naa tani!” nimbe kamu siye kolopa yemo ka naa sipe “We pu!” nirimu.

28 Nalo ˻ka singe teringi˼ kendemande kanumu yu pena pupe kendemande te yunge kou wane anderete kina mele sirimumu kanopalie, yu pupe yunge nomine ambolopa ‘Yu kolopili!’ nimbe ambolopa elkele lakurupelie “Nanga kou sirindumu pundu tou!” nirimu.

29 Aku terimu kinie yuni tomba terimu yemo yunge kumbikerena koporongo langopa tamalu pepa mawa tepalie nimbendo: “Nuni na kondo kolko we nokoko moloyo! Nane pundu pali tombo.” nirimu.

30 Nalo kendemande lupemone “Mólo! Paa i-sili pundu tani!” nimbelie “Nu ka-ulkena pekolie pundu toko pora siku wendo wani!” nimbe yu ka sipe ka-ulkena panjerimu.

31 Yuni aku terimu mele kendemande wemane kanokolie eno konopu keri panjiku puku enonga ye-nomimundu kendemandeselo teringili kanoringi mele kondi toringi.

32 Kanu-kinie ye-nomimuni aku niringi pilipelie kendemande yunge pundu “Naa toko we pu!” nirimu kendemande kanumu “Yando ou!” nimbelie yundu nimbendo: “Kendemande kerimu, nuni na tondolo-munduku mawa tenu-ne nu na-kinie pundu paa awili-tepa angilierimumu “Yu tepili, naa tou!” nimbulie we siye kolondu kanumu.

33 Pe nane nu we kondo kolondu mele nuni aku-siku kendemande te nambemune kondo naa kolonuye?” nirimu.

34 Ye-nomimuni yu mumindili kolopalie ka-ulke nokoko ka-ulkena peringi yemboma teko mindili kondoringi yema yu lipe sirimu. Yuni nimbendo: “Nu mindili nongolie pundu tani! Ou pundu pali toko pora sikulie pe mindi wendo wani! Ou mólo!” nirimu.” ˻nimbe Yesusini nirimu.˼^d

35 ˻Yesusi yuni aku nimbelie ungu-ikomonga pulumu kamu nimbendo:˼ “Aku-sipela, angenalini eno aku-siku teko kenjinge kinie eno kerena mindi “Manie pupili! Siye kolkoro.” we ningu, sike munduku siye naa kolko, we konopuni pilku molongi liemo, ˻kendemandemonga ye-nomimuni kendemandemo tepa kenjerimu mele˼ mulú-koleana molemo Tatane siye naa kolko we konopuni pilku molonge yembo kanume enonga ulu-pulu-kerime ‘Manie naa pupili!’ nimbe, we siye naa kolopa kanu ulu-pulu-kerimenga “Mindili nangi!” nimbe aku tembala.” nirimu.^e