9
(Kolomongo-kanga wane. Pulu Yemonga Ungumu.)
Kanu-kinie Yesusi altopa nona andoli sipi tenga sukundu pupelie nirimumuni, Nomú-˻Gallilli˼ yakondo omba yunge kolea ˻Kapeniame taono˼ orumu.
Yesusini Kimbu Ki Kolopa Pora Sirimu Ye Tenga Ulu-Pulu-Kerime Mundupe Siye Kolopa, Yu Tepa Konde Lsimu Temanemoa
2 Yu ˻Kapeniame kelepa˼ omba molorumune ye marene kimbu-ki kolopa pora sirimu ye te taropola teko mengo oringi. Enone ‘Yesusini i yemo manda tepa konde limbe.’ ningu pilkulie yu mengo oringi, Yesusini kanopa pilipelie kimbu-ki kolopa pora sirimu yemondo nimbendo: “Nanga kangomo, nunge konopu waengo nipili! Nunge konopune ulu-pulu-keri terinu pelemoma manie pupili, mundupu siye kolkoro.” nirimu.
3 Aku nirimu kinie pilkulie Pulu Yemonga ungu-manemanga pulume pilku mane siringi ye mareneb enono konopuni pilkulie, ‘I yemone Pulu Yemo marake tekemo.’ ningu pilieringi.
4 Eno konopu lieringi mele Yesusini pilipelie nimbendo: “Eno nambemune konopu leko kenjikimiliye?
5 I yemondo “Nunge ulu-pulu-kerime manie pupili, siye kolkoro.” nimbo kinie eno ulu te naa kanokolie ‘We-we tepa nikimu.’ konopu lengeye? Molo “Ola angilku nunge kunungumu liku mengo kimbu-kongono teko andou!” nimbo kinie yu ola angilimbene naa angilimbenje mona lemba manda kanokolie ‘Aku-sipe mindili sipe nikimunje?’ konopu lengeye?
6 Nalo ‘ ‘Manie Omba Mana-Ye A Lierimu Yemoc tondolo pelemomone ya ma-koleana yembomanga ulu-pulu-kerime “Manie pupili, siye kolkoro.” manda nimbé.’ ningu piliengi!’ nimbu aku-sipu nindu.” nirimu.
Aku nimbelie kimbu-ki kolopa pora sili yemondo nimbendo: “Nu ola angilku nunge kunungumu liku mengo ulkendo pu!” nirimu.
7 Aku nirimu kinie yemo ola angilipe ulkendo purumu.
8 Yembo awisili akune máku toko moloringimene yu aku terimu kanoko mini-wale mundukulie, mana-yemboma ulu-tondolo aku mele tenge tondolomo sirimu Pulu Yemonga imbi liku ola mundunduku kapi niringi.
Yesusini Mateyundu “Na Lombili Ou!” Nirimu Temanemod
9 Kanu-kinie Yesusi pumbe pupelie nirimumuni, kou-takisi lipe molorumu ye te, yunge imbi Mateyu, kanopalie yundu “Na-kinie pea pambili lombili ou!” nirimu. Kanu-kinie Mateyu yu ola angilipe yu lombili purumu.
10 Pe Yesusi Mateyunge ulkena langi nomba molorumu kinie kou-takisi lili yema kinie, ˻Juda-ye awilimene˼ “ulu-pulu-kerime teli ye” ˻niringi˼ wema kinie awisili ongo Yesusi kinie yu lombili andoli yema kiniee eno pea manie molko langi noringi.
11 ˻Eno aku-siku telune langi nongo moloringi kulu˼ Parisi-yemane kanokolie yu lombili andolimendo walsiku pilkulie ningendo: “Enonga ungu-mane sili yemo kou-takisi lili yema kinie ulu-pulu-kerime teli ye wema kinie eno-kinie yu nambemune langi pea nokomeleye?” niringi.f
12 Aku-siku niringi mele pilipelie Yesusini enondo nimbendo: “Kuru naa tolemo yemboma doketana naa pulimele. Kuru tolemo yemboma mindi doketana pulimele kanumu.g
13 Nane “Yembo sumbi-nílime na molombona wangi!” nimbondo ma-koleana naa orundu.h ‘Ulu-pulu-keri teli yemboma na molombona wangi!’ nimbondo orundu. Ulu-pulu-keri teli yemboma lipu tapondombondo orundu kenei eno puku Pulu Yemonga bokune molemo ungu tenga pulumu puku pili-peyo. Pulu Yemone nimbendo:
“ ‘Na mélema popo toko kalko siengi!’
nimbu pilipu naa molio.
‘Eno yembo-lupema konopu mondoko
kondo kolangi!’
nimbu pilipu mindi molio.”j Osia 6:6
nirimu kanumu.” nimbe Yesusini nirimu.
Yembomane Walse-Walse Langi Naa Nongo Mi Tolemele Ulumunge Ungu Tek
14 Pe ˻No-Lindeli˼ Jono lombili andoringi yema Yesusi molorumune ongolie yundu walsiku pilkulie ningendo: “Olio kinie Parisi-yema kinie olio alieli langi mi topo naa nolemolol nalo nu lombili andolime aku-siku naa telemele akumu nambemune naa telemeleye?” niringi.
15 ˻Aku-siku niringi kinie pilipelie˼ Yesusini topondopa enondo ˻ungu-iko te topa yu toko kondonge kolombamonga ungu te nimbelie˼ nimbendo: “Ambo limbe ye te yunge pulu lemo yema kinie molemo kinie eno konopu sikulie “Kola tepo langi naa namili!” manda ningeye? Manda naa ninge. Pe mindi, ambo limbe yemo eno molongena ongo wendo linge˼ kinie kanu walemanga sike ˻konopu keri panjiku˼ langi naa nongendo mi tonge. ˻Isili-ou mólo!˼m
16 “Mulumbale ou te sungu nilimo kinie olione mulumbale paa konde tenga te kopisipu lipu, sungu nilimomonga naa topo tambululimolo kanumu. Yembo tene aku-sipe topa tambulkenje kanu mulumbalemo nona panjilke kinie mulumbale konde kopiselimu kanga lepa lli nimbelie mulumbale oumu kelepa kamu awili-tepa sungu nilke.n
17 “Kongi-meme kalumuni teli mingi-ou tenga no waene konde naa-la kolemolo kanumu. Yembo tene mingi-ou tenga no-waene konde te kolkanje kanu no-waenemo mingine sukundu pepalie pe akolka kinie kanu mingi-oumu naa akopa sungu nilke. Kanu-kinie nomo kepe mingimu kepe kamu keri lelka. Akumunge no-waene konde kongi-meme kalumuni teli mingi kondena mindi kolemolo kanumu. ˻Pe nomo akolemo kinie kalumuni teli mingi kondemo anjo-yando pupe sungu naa nilimomonga˼ nomo kinie mingi kondemo pea kapola lemo.” nirimu.
Ambola Te Kolorumumu Kinie,
Kuru Te Topa Naa Kelierimu Ambo Te Kinie,
Elo Yesusini Tepa Konde Lsimu Temaneseloo
18 Yesusini Jononga lombili andoli yemando ungu nimbe molopili ˻Juda-yemboma máku toko Pulu Yemonga ungumu pilieringi ulke te˼ nokorumu ye te Yesusi molorumune omba yunge kumbikerena koporongo langopa yundu nimbendo: “Nanga ambolamo kinié isili kolopa pora sikimu. Nalo nu ongo yu kimuni amboloni kinie yu konde pumbe.” nirimu.
19 Aku nirimu kinie Yesusi ola angilipe yu lombili purumu. Yesusi lombili andolime pea puringila.
20-21 Kanu-kinie ambo te molorumu kanumunge pena perimu walema pora naa nirimu. Yu pena mindi pepili ponie engaki-rurepop omba purumu. Kanu ambomone ‘Yunge wale-pakolimu mindi ambolondu liemo na konde pumbo.’ nimbe pilipelie Yesusi pumbe purumu kinie bulkundu omba, yunge wale-pakolimunge pundumu ambolorumu.q
22 Ambolorumu kinie Yesusi topele topa yu kanopalie nimbendo: “Ambolamo, nu konopu waengo nipili moloyo! ‘Nu manda tepa konde limbe.’ konopu lienu kanu ulumuni nu konde pukunu.” nirimu. Kanu enamonga ambomo konde pupelie we molorumu.
23 Kanu-kinie Yesusi ˻Juda-yemboma máku toko Pulu Yemonga ungumu pilieringi ulkemo˼ nokoli yemonga ulkena sukundu ombalie yembo awisili molko kondo kolko, kolape-mingi langoko, kola awili-teko teko moloringi kanopalie yuni nimbendo:
24 “Eno anjo pame! Ambolamo kolou naa kolomu. We uru mindi pelemo.” nirimu.r Aku nirimu kinie ˻ambola kanumu sike kolopa pora sirimu pilkulie yuni “We uru pelemo.” nirimumunge˼ yu ungu-taka tondoko tawe tenderingi.
25 Kanu-kinie yembo máku toko moloringime pulú-sipe pena-pena tepalie ˻ambola-ónomo lierimu˼ suluminiana pupe yunge kimu ambolorumu kinie ambolamo ola molorumu.
26 I ulu-tondolo terimumunge temanemo kanu koleamonga sukundu lierimu koleamanga pali anjo-anjo purumu pilieringi.
Yesusini Mongo Keri Lierimu Ye Talo Tepa Konde Lsimu Temanemos Kinie
Kuru Tene Ye Tenga Kere Pipi Sirimumu Yesusini Topa Makororumu Kinie Yu Ungu-Taka Tondoringi Temanemo
27 Yesusi kanu koleamo mundupe siye kolopa pumbe purumu kinie mongo keri lierimu ye talo yu lombili ongo walsikululie ningelendo: “˻Ye-Nomi-Kingi˼ Depisini Kalopa Lsimu Yemo,t nu olto kondo kolou!” ningu wale awisili niliku oringili.
28 Yu ulke tenga sukundu purumu kinie mongo keri lieli yeselo yu molorumune lombili oringili kinie yuni elo walsipelie: “Elo na mawa tekembele mele ‘Manda temba.’ konopu lekembeleu molo móloye?” nirimu kinie
elone ningelendo: “Awilimu, ‘Manda teni.’ konopu lekembolo.” niringili.
29-30 Kanu-kinie yuni elonga mongoselonga ambolopalie nimbendo: “Nane ‘manda temba.’ konopu lekembele mele aku-sipe wendo opili!” nirimu kinie elonga mongoselo peanga lierimu, mélema altoko kanoringili. Yesusini elo tondolo-mundupe mane sipelie nimbendo: “Elone i ulu wendo okomomo yembo teluri kepe paa naa piliengi, naa ningu siele!” nirimu.
31 Nalo elo pena pukulu Yesusini terimu mele aku koleamonga sukundu lierimu koleamanga pali temane toko silikulu andoringili.
32 Kanu yeselo Yesusi munduku siye kolkolo pungele puringili kinie ye te konopune kuru molorumumunge ungu te naa nirimu ye te Yesusi molorumune mengo oringi.
33 Yesusini yemonga konopune molorumu kuru kanumu topa makororumu kinie ungu naa nirimu ye kanumuni ungu nirimu kulu yembo máku toko moloringimene kanokolie konopu awisili liku mundukulie ningendo: “Ou Isirele-koleana sukundu i-sipe ulu te wendo naa orumu kanumu.” niringi.
34 Nalo Parisi-yemanev ningendo: “Kurumenga nomimuni yu lipe tapondolemo-na yuni kurume topa makorolemo.” niringi.w
YESUSINI YUNGE LOMBILI ANDOLIME “KONGONO TEANGI PAA!” NIMBE LIPE MUNDORUMU TEMANEMOx Akumunge
Yesusini Yemboma Kondo Kolorumu Temanemo
35 Yesusi kolea-awilimenga kinie, kolea kangamanga kinie pelipe andopalie nirimumuni, Juda-yemboma máku toko Pulu Yemonga ungumu pilieringi ulkemanga pupe ungu-mane sipe; Pulu Yemo ye-nomi-kingi molopa yemboma nokolemoy nokomba ungu-pulumunge temane-peangama topa sipe; kuru lupe-lupema torumu yemboma tepa konde lsimula.
36 Yembo paa awisili yu molorumune ongo liku máku toko moloringime kanopalie eno umbu-konopu naa pepili andoko, kangime enge naa perimu-kulu eno-enono manda liku naa tapondoko molkolie eno kongi-sipisipime enonga tapu-ye te naa molorumumunge we moloringi mele eno aku-siku moloringi kuluz kanopalie eno paa kondo kolorumu.
37 Kanu-kinie ˻yembo awisili ‘Yuni lipe tapondopili!’ ningu moloringi kulu kanopalie˼ lombili andolimendo nimbendo: “Langi awisili poniena nou lemo nalo kongono-ye awisili mólo!
38 ˻Na ye telumu mindi i kongonomo tekero kene˼ Langimenga Pulu Yemo mawa tekolie yuni “Langi nou lielime linge kongono tenge yemboma yunge poniena lipe mundopili!” niee!” nirimu.a
Yesusini yu lombili andoli ye engaki-rurepondob “Yando waa!” nimbelie enone yembomanga konopune kuru molemoma “Ongo wendo paa!” ningu toko makoronge tondolomo sipelie, yembo kuru tolime kinie kangi pange-mange telime kinie “Konde pangi!” ninge nambamo sirimu.