Kurumenga Nomi Setenene Yesusi Kondi Torumu Temanemoa Kinie
Yesusini Kolea Gallilli Disiriki Pulu Polopa Yemboma Ungu Nimbe Sirimu Temanemob
4
(Pulu Yemonga Ungumu. Kolomongo-kanga wane.)
Yesusi ˻no lsimu kinie Pulu Yemonga Minimu yu-kinie omba molopalie nirimumuni,˼ Minimu yuni ‘˻Kurumenga nomi˼ depelemonec yu kondi topili!’d nimbe Yesusi kolea ku lieline memba purumu.
2 Akune Yesusi oli te koro talo melee langi naa noli we molopa perimu kinie yu engelene kolopa molorumu.
3 Kanu-kinie kondi toli ˻kuru Setene˼ ombalie yundu nimbendo: “Nu Pulu Yemonga Malof liemo i koume ‘Pillawa-kaloli a liepili!’ ni!” nirimu.
4 Nalo yuni topondopa nimbendo: “Pulu Yemonga bokumuni nimbendo:
‘Langimene mindi yemboma konde mololi ulu-pulumu
naa silimo.
Pulu Yemone ungu nilimoma pali
pilku liku teko molonge kinie konde mololi ulu-pulumu linge.’ Ungu Manema 8:3
nimbe molemo.”g nirimu.
5 Kanu-kinie depelemone Yesusi lipe kolea-awili Jerusalleme, akumundu ‘kolea-awili kake teli’ nilimu, akune memba pupe Pulu Yemo popo toko kaloringi ulke-tembelena memba, paa ola imune pupe anjipelie nirimumuni,
6 yundu nimbendo: “Nu Pulu Yemonga Malo liemo nu lipe tapondomba kene pou ningu manie pu!” ˻nirimu.˼ “Pulu Yemonga bokumuni nimbendo:
‘Pulu Yemone yunge angellomane
‘Nu ongo nokangi!’ nimbé.
Enone nu ‘Kou tene kepe naa topili!’ ningu
nu enonga kimene oko polko linge.’h Konana 91:11-12
nimbe molemo kanumu. Aku-sipe nirimu kene pilkulie aku-siku tei!” nirimu.
7 Yesusini yundu nimbendo: “Pulu Yemonga yembomando ungu te pea nimbe molemola. Akumu i-sipe:
‘Pulu Yemo enonga Awilimuni “Tembo.” nilimo mele
‘Sike nilimonje molo kolo tolemonje kanamili!’ ningu
enone yu manda manjiku naa teangi!’i Ungu-Manema 6:16
nimbe molemola kanumu.” nirimu.
8 Altopa depelemone yu lipe mulú te paa olandopa lierimune ola memba pupe anjipelie, yu ma-koleama pali kinie koleamanga méle peangama pea lipe ora sipelie
9 yundu nimbendo: “Nu nanga kumbikerena koporongo langoko manie molko na popo toko nanga imbi liku ola mundundonu liemo i nu kanokono ma-koleana lemó mélema pali nu simbo.” nirimu.
10 Kanu-kinie Yesusini yundu nimbendo: “Setene,j nu anjo pa! Pulu Yemonga bokumuni nimbendo:
‘Pulu Yemo enonga Awilimu manjiku popo toko
imbi liku ola mundunduku,
yunge kongonoma manjiku tendeko molangi!’k Ungu-Manema 6:13
nimbe molemo kanumu.” nirimu.l
11 Kanu-kinie depelemo Yesusi yu mundupe siye kolopa yu purumu. Purumu kinie mulú-koleana angelloma ongo Yesusi nokoringi.m
12 Kanu-kinie ˻No-Lindeli˼ Jono ka siku ka-ulkena panjeringin kinie pilipelie Yesusi kelepa kolea Gallilli disirikindu yando omba
13 Nasarete taonona ombalie nirimumuni, pe aku taonomo mundupe siye kolopa Kapeniame taono, Nomú Gallilli kélona lierimu, akune pupe ‘Kinié i koleamo nanga kamu molombo koleamo liepili!’ nimbe akune molorumu. Kapeniame taono ye Sepullano kinie Napatallai-selone kalko lsingili yemboma ou moloringi koleanao lierimu.
14 ˻Kapeniame taonona pupe molorumumunge˼ koronga-ou Pulu Yemone ungu-umbu tondorumume pilipe yemboma nimbe sirimu ye Aisayanep ulu te pe wendo ombá ou nirimu mele kamu wendo orumu. Aisayane nimbendo:
15 “Sepullanone kalopa lsimu yemboma
pelemele koleamo kinie,
Napatallaini kalopa lsimu yemboma
pelemele koleamo kinie,
nomúne pulimo aulkemo
No-Jodane nekendo lemo koleamo kinie,
kolea Gallilli wikindu yembo-lupe awisiliq
molemele koleamo kinie,
aku koleamanga molemele yemboma
˻paa sumbulu toline molemele.˼
16 Kanu yembo paa sumbulu toline molemelema
pa tondolo paa awili-tepa teli te kanoringi.
Kololi ulu-pulumu aki topa sumbulu tondolemo koleana
pelemele yembomanga koleana pa tendekemo.” Aisaya 9:1-2
nirimu.r
YESUSINI PULU YEMO YE-NOMI-KINGIMU MOLOPA MÉLEMA NOKOMBAMONGA TEMANE PEANGAMO TOPA SIPE, KURU TORUMU YEMBOMA TEPA KONDE LSIMU TEMANEMA
17 ˻Kapeniame omba molorumu˼ kanu walemonga Yesusini yemboma pulu polopa ungume nimbe sipelie nimbendo: “Pulu Yemo ye-nomi-kingimu molopa nokomba walemos nondopa wendo ombá tekemo kene ˻‘Pulu Yemo yuni nokomba yembomanga talapena sukundu molamili!’ ningu˼ ulu-pulu-keri telemelema munduku siye kolko konopu alowa teaa!” nirimu.t
Yesusini Ye Kisendo “Na Lombili Waa!” Nirimu Temanemou
18 Yesusi Nomu Gallilli kélona andopalie angenungulu talo kanorumu, akuselo Saimono kinie angenu Enderuselo oma lili wale te nomúne toko suku munduku moloringili kanorumu. Pe Saimononga imbi te Pita niringila. Oma lsingili akumu elonga kou-kongono teringili kanumu.
19 Aku-siku teko moloringili kanopalie nimbendo: “Na lombili wangili! Oma lingelendo oma lili wale te liku nona suku mundulimbele kinie omama walena omba pelemo mele, pe ‘nanga kongonomo tengelendo nanga ungumu pilkulu ningu siliku andongele kinie yemboma nanga talapena sukundu ongo molangi!’ nimbu ‘Elo na lombili wale!’ nikiru.” nirimu.
20 Aku nirimu kinie pilkululie tamburumbu elonga oma lili walema munduku siye kolkololie Yesusi lombili puringili.
21 Kanu-kinie yu laye-kolte welto pupelie angenungulu talo lupe kanorumu, akuselo Seperi malo Jemisi kinie Jemisi angenu Jonoselo, lapa Seperi kinie enonga nona andoli sipine sukundu oma lili walema toko tambulku moloringi kanopalie elo walsipelie “Na lombili wale!” nirimu.
22 Aku nirimu kinie pilkululie elonga lapa Seperi kinie nona andoli sipimu kinie tamburumbu munduku siye kolkololie Yesusi yu lombili puringili.
Yesusini Kolea Gallilli Disiriki Ungumu Nimbe Silipe Andopa Yembo Awisili Tepa Konde Lsimu Temanemov
23 Kanu-kinie Yesusi kolea Gallilli disiriki sukundu koleamanga pali andopa, yemboma máku toko Pulu Yemonga ungumu pilieringi ulkemanga yemboma ungu-mane sipe, Pulu Yemo nondopa ye-nomi-kingimu molopa nokomba melew temane peangamo topa sipe, yembo kuru lupe-lupe torumume kinie kangine ulu awisili terimume kinie tepa konde lsimu.
24 Yu terimu mele temanemo kolea Siria poropinji koleamanga pali anjo-anjo purumu pilkulie enonga yembo
kuru lupe-lupe torumu yemboma kinie,
mindili lupe-lupe nongo moloringi yemboma kinie,
yembomanga konopune kuru molko amboloringi yemboma kinie,
kuru-kopari torumu yemboma kinie,
kimbu-ki kukorumu yemboma kinie,
yu molorumune mengo oringi kinie yuni eno tepa konde lsimu.
25 Yembo paa awisili yu lombili puringi. Kolea Gallilli disiriki yemboma kinie, ‘Kolea Awili Rureponga Talo’x niringi kolea yemboma kinie, kolea Judia-Disiriki lierimu kolea-awili Jerusalleme yemboma kinie, kolea Judia sukundu lierimu we-koleamanga moloringi yemboma kinie, No-Jodane nekendo koleamanga yemboma kinie, paa awisili yu lombili puringi.