No-Lindeli Jonone Konopu Alowa Teringi Yemboma No Linderimu Temanemoa
3
(Pulu Yemonga Ungumu. Kolomongo-kanga wane.)
˻Yesusi Nasarete-taonona we molopili˼ No-Lindeli Jono omba kolea Judia-Disiriki sukundu kolea ku lieline opa-ungu nimbelie nimbendo:
2 “Pulu Yemo ye-nomi-kingimu molomba walemo nondopa wendo ombá tekemo kene enonga ulu-pulu-keri teringi konopune pelemoma munduku siye kolko konopu alowa teaa!” nirimu.
3 Kanu yemo ˻ou naa molopili paa koronga-ou˼ Pulu Yemone ungu-umbu tondorumume pilipe yemboma nimbe sirimu ye b Aisayane Pulu Yemonga ungu te nimbe sipe boku torumu. Kanu ungumu i-sipe:
“Kolea ku lieline yembo tenga kerena
ungu te nimbendo:
“Awilimu ombá aulkemo teko mimi tendaa!
Yu ombá aulke kangama
toko sumbi-siee!” nikimu.”.c Aisaya 40:3
nirimu. ˻Aisayane Jonone paa pe temba mele ou aku-sipe nimbe panjipe boku torumu.˼
4 Jono yu kongi-kemelenga indini teli wale-pakoli te pakopa, kongi-kilumuni teli kako te topalie, kuli-kumbe kinie pilimu-no kinie aku langiselo mindi nomba molorumu.
5 Kanu-kinie kolea-awili Jerusalleme-yemboma kinie Jerusalleme lierimu kolea Judia-Disiriki pali yemboma kinie kolea Jodane pali yemboma kinie kanu yemo molorumune pukulie niringimuni,
6 No-Jodane sukundu pukulie enone ulu-pulu-keri teringime ningu para siringi kinie yuni eno no linderimu.
7 Yuni ˻Juda-yembomanga ye-awili˼ Parisime kinie Sadusime kinied awisili no lingendo oringi kanopalie nirimumuni, eno iri topalie nimbendo:
“Kolo topa yemboma tepa kenjeli wambiyemonga waloma, Pulu Yemo mumindili kolomba walemonga nawene “Eno talopa leko paa!” nimu kinie eno ‘Pulu Yemone naa tepa kenjepili!’ ningu ‘No liemili.’ ningu okomeleye?
8 Eno sumbi-siku molko, ulu peangama mindi teko molonge kinie eno ulu-pulu-keri teringime paa sike munduku siye kolko konopu alowa tenge mele mona lemba.
9 “Olio anda-kolepa Eporayamone kalopa lsimume molemolomonga yembo peangama molemolo.” ningu aku-siku ningu naa pilieme! Nane eno nimbu sikiru: ‘Pulu Yemone i koumendo “Eporayamone kalopa lsimu yemboma a leangi!” nilkenje koume Eporayamone kalopa lsimu yemboma molemela.’ nikiru. Eno Eporayamone kalopa lsimu yemboma molemelemonga uluri naa telemo.e
10 “Unjo peke tomba loumu Pulu Yemone koronga unjo-pulune ambolopa ola lipe molemo. Unjo-mongo peanga naa tomba unjomaf yuni peke topalie tepena kalomba.
11 Nane ulu-pulu-kerime siye kolko konopu alowa telemele yemboma sike no lindilio. Nalo te na akilipe ombámo yuni ˻Pulu Yemonga˼ Mini Kake Telimu kinie tepémo kinie eno lindimbe ˻linge˼. I na akilipe ombá yemo yunge tondolomo paa olandopa, nanga tondolomo paa maniendopa. Na yu-kinie manda mólo! Yembo-awilimenga kongono keri teli kendemande yembomane sike enonga awilimenga kongono keri tendengendo kimbu-su wendo lindilimele nalo na akilipe ombámonga kimbu-su wendo lindimbo kanu kongonomo paa olandopa mele, nane kapola naa tendelka; ˻na ye paa keri˼.
12 “Yuni yunge rasi-witi apuroli apulu-pokomo ambolopalie yunge rasi-witi mongo kinie rasi-witi kilu kinie apurumbendo molemo. Yunge rasi-witi apuroli polomo tepa mimi tembando rasi-witi pali apurupe wendo lipelie mongoma lipe rasi-witi nosilimo ulkena ‘Liepili!’ nimbe nosimbendo ulkena lipe nosipe, pe kilume lipe máku topa tepe naa kumbulupe nomba pepa mindi pulimona kalomba.” nirimu.
Jonone Yesusi No Linderimu Temanemog
13 Jonone yemboma no lindipe molopili Yesusi kolea Gallilli-Disiriki mundupe siye kolopalie nirimumuni, ‘Jonone na no lindepili!’ nimbe Jono No-Jodane kélona molorumune yu purumu.
14 Orumu kinie Jonone nimbendo: “Aku paa mólo! Nane nu no nambepo lindembo ningu nikinuye? Nuni na no lindilinanje papu.” nirimu.
15 Nalo Yesusini topondopa nimbendo: “Mólo! Ulu kake teli ulume pali kapola tepili kene nikiru mele tei!” nirimu. Kanu-kinie Jonone “Kapola.” nimbe yu no linderimu.
16 Yesusi no lipe pora sipelie nona sumbi-sipe wendo orumu. Wendo ombá orumu kinie mulúmu kengeya lepa anjo-yando purumu, Pulu Yemonga Minimu, kera-waembono mele, manie omba Yesusi molorumune pupe ˻kangine˼h ola molorumu kanorumu.
17 Kanu-kinie mulúne ola ungu te wendo ombalie, “I nanga konopu mondolio kangomo. Yu-kinie konopu sipu molio.” nirimu.i