O leta to kino roho e
Jiud
O moroko momohu te Jiud
1
Enaa e Jiud,
a too kiu kokoraa te Jisu Karisito ae e keara te Jemis.
Enaa na kino ka nasu nom ameam amaa tavaan vai to dadao ri roho e Hunavaan e Tamaraara.
E Hunavaan na uruuru ni kanom ameam bara eam mee na tei nom tea kikira te Jisu Karisito.
2 E Hunavaan pasi hee vaberobero avameam bono koma uru,
a murun ae a uruuru.
Matatopo bata ri nom eori o piipiku
3 Tobara sahata,
enaa na rake kurusu vai nasu nom tea kino kameam,
enaa re vahutate nia vatagae te Hunavaan tea maa tootoo tea kavara raara.
Enaa he na haraa voen,
enaa toro sue nasu a meha taba.
Enaa na rake nasu nom tea vaakikisi ameam,
eam re vaasuasun kahikahi bata ni nom a omana vai to vamanamana raara.
A omana bona na hee ni ma e Hunavaan vo teara to vamanamana rae.
Na hee koa ni mae teo peho vuri,
me kahi tei vaneovoi nom,
saka ante haana tea tapau.
4 Menaa paa kino ka nasu avameam,
tea tabae o meho aba paa kao hovo mau teo vaagum team.
Eori na piku bata vo rien,
na vamanamana rori.
A koara te Hunavaan vai to takino roho nabunuu na boha vo naen,
e Hunavaan pasi rareu bara vaherehereke riu bari.
Ei kou eori saka vasisio haa ni rori bene Hunavaan.
Eori mee na boha vo rien,
eara na ante rara tea varevaren,
e Hunavaan repaa vaarudaha vaha bona maa hata teara.
Eori na goe rori tea manaata bene Jisu Karisito,
e Beera ae Sunano teara.
5 Enaa na rake nom tea vaaupehe ameam amaa taba vai to paa nata vaevuru ni am.
E Sunano na haihai bona ta Israel,
eove he mee tavusu kahi ri ma bari bona Ijip.
Evehee murinae,
meve paa vaamate vakavara ri bene eori to saka vamanamana bata haa bari.
6 Enaa mee na rake nom tea vaaupehe ameam o meho enjol.
Eori saka rake haa tea paku vamataa bona maa kiu to hee ri roho e Hunavaan bari,
meori paa kaokahi bona maa hum sunsun teori.
Me Sunano paa vaasun ribari teo hum booboni,
mepaa nohonoho ribari bona sen vai to pasi tei vaneovoi nom u.
O boni beera va tea rare pasi tavusuu,
beori tei rori teebona.
7 Goe tea vanun voen,
o matapaku to paku a bua siitii va Sodom bara Gomora ae amaa taon vai to taviri ri na bari,
na vaapeha me nana bono matapaku to paku o enjol vai.
Eori na paku bona maa matapaku vai amaa hata kurusu bara na paku bona maamihu kaku varevaren.
Ei me Sunano paa vaherehereke ribari teo suraa vai o asi vaneovoi.
Meara toro upehe amaa taba to tapaku tea bua siitii vai,
eara re goe tea murinae.a
8 Amaa abana vai mee to hovo ma teo vaagum team na vaapeha me ri na bari.
Na murina rori bona maa tatariopo teori,
meori vaparuparu rori bona suini riori bono matapaku varevaren.
Eori mee na goe rori bono kikisi te Sunano bara na sue vahatahata ni rori bono enjol vai o mataa.
9 Evehee a too vamee teo enjol,
e Maikol,
saka sue vahatahata haa ni bene Setan,
eori he tea vaasue suku bona suini ne Moses.
Ahiki.
Eove na boha koa voen,
“E Sunano pasi vaherehereke uvuan.”
10 Evehee amaa abana vai na pihan rori bona maa taba to saka kona haa ni riori bara na kaesi hata ni rori bari.
Eori na potee ri rori bono enimol to paku rori bona maa taba teo haraharaa koa,
saka teo vakokona haana.
Evei amaa taba to pasi ma teki ri na bari.
11 Eori pasi taminoto nom!
Ei kou eori na murina bono matapaku te Kein,
to asun roho bene keara teve.b
Eori mee na rake viravira tea gono moonii potee bene Balaam.c
Eori na vaanagu sue ki bene Hunavaan potee bene Kora,
meori pasi ma tatekiu.d
12 Amaa abana vai na ante rori tea teki ameam,
beam pate ani meri nom ori tea maa taba-ani vavanoasi team.
Eori na hiki ni rori bona pote ae a naabu.
Na potee rori bona masi vai to varavihi maana komana tahii,
to ante nana tea kokope bono toro.
Eori na potee ri rori bona tau kikira sipsip to kikira koari bene eori komana.
Na potee rori bono unuunu vai to saka ante haana tea vaasiko bona huan,
o unuunu vai to hoa binubinu koana a iravata.
Eori na potee ri rori bona naono vai to saka vavuvua haari teo vuri vai rova toro vua riori.
A naono bona to kara riori,
orepaa mahaka vakavara.e
13 Eori na potee rori bono poha vai to takaku vagavagava maana,
o poi repaa tavusu.
Meo matapaku vaapote teori na nou hiava potee nana bono poi.
Na potee ri rori bono pitopito vai to vataviri pinopino rori teo suviri.f
Ei me Hunavaan na matatopo kiri bari bono hum booboni kurusu vai to pasi tei vaneovoi nom ori.
14 E Inoke,
a va buaku totoka (7) a jenereisen murine Adam.
Eove na sue varaba ri roho bona maa abana bari,
mepaa boha voen,
“Taraham!
E Sunano na nomaa bata meri nana bono bero taosin enjol teve
15 tea rare ribona maamihu aba.
Eve pasi ma vaherehereke riu bona maa tavaan vai o hata suku bona maa matapaku vahata teori bara maa moroko vahatahata vai to tahi riori bene Hunavaan.”
16 Eori o aba va tea vavorivori kurusu bara tea moroko vahatahata ribono meho aba.
Eori na murina koari bono manimanini teori tea paku bono matapaku hata.
O hahahaara kurusu.
Na vaabeera vapiipiku koa ri rori bono meho aba,
eori re gono bona maa taba mene haihai koa ribari.
Amaa moroko vamamaen
17 Eam he tobara sahata,
toro upehe amaa taba to sue ka roho araara o aposol te Jisu Karisito,
e Sunano teara.
18 Eori na boha me ka roho araara en,
“Tea maa boni vagegeana,
pasi tavusu mau amaa tavaan vai to pasi ma pihan u bene Jisu ae amaa tavaan teve.
Eori mee pasi murinau bono manimanini teori tea paku bona maa matapaku hata.”
19 Amaa tavaan bari paa suguna vaevuru.
Eori to kirikiri nom ameam ei.
Eori na murina koari bona maa haraharaa teori.
Eori saka tei haa me rori bona Taun Penapena tea tootoo teori.
20 Eam he tobara sahata,
toro vigu hiava o koma vamanamana team tea omana vai a penapena va-oha,
ei to vamanamana roho am.
Eam mee toro vaneanava voen to vamee vo nae a Taun Penapena.
21 Tei tamuana nom tea uruuru te Hunavaan beam ihuana nom o koma uru te Jisu Karisito e Sunano teara,
tea mee ameam vo tea tootoo vaneovoi.
22 Eam toro koma uru ria maa tavaan vai to vovoeaka rori.
23 Haihai rio meho aba beam rahi tavusu vakahu kahi riori bono suraa va hel.
Koma uru ria meha papana,
eam he toro matatopo bata nom,
eam re goe sin tea paku to matapaku hata vai to paku bata riori.g
E Jiud na vamatamataa bene Hunavaan
24 E Hunavaan na ante nana tea haihai ameam,
eam re goe tea kuu teo matapaku vahata.
Eove na ante nana tea rudaha bona maa hata team,
eam repaa hiki ta hata beam sun tea mamairaka teve.
Eam repaa moramora viravira kurusu.
25 A peha koa a Hunavaan to vatagae araara kaakoo te Jisu Karisito e Sunano teara.
Taneo nana nabunuu,
nomana ae tea maa vuri vai to nomaa batana,
eove e king teara a mamairaka to tei me nana bono kikisi ae o atorotii.
Amen.