O vakukan o leta to kino roho e
Jon
O moroko momohu te Jon
1
Gaius,
sahata tenaa!
Enaa e beera va teo vaagum lotu to kino ki nasu unoman o leta vai.
Enaa na uruuru mamana ni kiu noman.
2 Sahata tenaa!
Enaa na nata vo nasu nomen,
a tootoo tean va tea taun na mataa nana.
Menaa na vaneanava tamuana me kiu noman,
ean re popo vamataa nom teo suini,
bara maamihu taba re tapaku vamataa ki vuan.
3 Enaa na moramora viravira kurusu,
a meha ba keara teara he ma sue kanaa voen,
eam na sun vasuu nom teo koma vamanamana team bara eam na pita murina tamuana nom a koara vai a omana.
4 Menaa na moramora viravira kurusu nom tea baitono voen,
o baiko tenaa komane Karisito,
na murina rori bona koara vai a omana.
Ahiki benaa moramora vo roho en.
Haihai ria tau kiu te Sunano
5 Sahata tenaa!
Ean na haihai tamuana ri nom a tau kiu te Sunano vai to vaavihi rori.
A tau kiu vai mee to toku ri noman,
na haihai vakisi ri noman.
6 Eori na ma sue kiri bono vaagum lotu vai,
bona maa matapaku mataa tean vo teori to vataaree ni nana bona uruuru tean vo teori.
Menaa na rake nom bean haihai vakisi bata ri nom ori,
beori nao pete tea maa vaavihi teori.
Paku kirii bono matapaku vai to vaamararae nana bene Hunavaan.
7 Eori kou a tau kiu te Jisu Karisito,
meori na kona vo rien,
eori saka ante haari tea gono ta haihai,
teori to toku ni rori bene Hunavaan.
8 Ei meara toro haihai rio kaku aba bari,
eara re pate vahaihai vatatana tea paku a kiu va tea sue tavusu nia koara vai a omana.
9 Enaa na kino kiri nasu roho o vaagum lotu varau bono meho leta.
E Diotrepes he saka manaata haa roho bona maa taba to sue nasu roho naa.
Eove na rake tamuana nana tea momohu ni bono vaagum lotu.
10 Enaa pasi ma sue tavusu kiri veo vaagum lotu varau bona meha maa taba to pakupaku nae,
benaa nao nasu.
Eove na sue vahatahata ni kanom araara,
bara na paku nana bona maa moroko vai amaa piku.
Eove mee saka vaavoosu haa ri nana bona maa tau kiu te Sunano.
Ahiki.
Na goe pete nana beo meho aba vaavoosu ribona tau kiu te Sunano tea maa inu teori.
Beori saka baitono haa bari,
eove repaa vaatavusu ribari kahi bono vaagum lotu.
11 Sahata tenaa!
Goe tea paku o matapaku hata vai to paku rio meho aba.
Ean he toro paku o matapaku mataa.
Eteie to paku nana bono matapaku mataa,
a baiko te Hunavaan.
A aba vai he to paku nana bono matapaku hata,
na toku ni nana bene Hunavaan.
12 A kavara na aba na sue tavusu vo rien,
e Demetrius a otei a mataa.
Eove na murina vamataa nana bona koara vai a omana,
to vataaree vo naen,
eove a otei a mataa.
Enam mee na boha tamuana vo nomen,
eove a otei a mataa.
Meam na nata vo nomen,
o moroko to paku nasu nom naa na mana nana.
Amaa moroko vagegeana
13 Enaa na rake nasu nom tea sue kameam amaa taba amaa bero,
enaa he saka rake haa nom tea kino e.
14 Enaa na matamatana nom tea nao komana nasu tea ira ameam,
eara repaa no vamoromoroko komana.
15 O vaagum lotu vai,
na vaanao nasu rori bona uruuru teori vo tean.
Hee nia uruuru tenaa tea tobara aba varau.
A murun te Hunavaan na tei me kiu noman.