JONA
‑Tɛ Nyɩsʋa lee 'le Jona Ninifʋkʋɛ ‑wɔn, Jona 'ɔ bla
1
Ɛ kɔ la nahuon ꞊de, 'ke 'le Yisraɛkʋɛ a 'blʋgba 'mʋ.
'A 'dʋ mɔ Jona.
'A bu a 'dʋ mɔ Amitai.
‑Nyrɔwɔ ꞊de 'mʋ, kɛ Kʋkɔnyɔ Nyɩsʋaa ꞊nɔ ye po, ɔ nɔ:
2 'Du ye 'mʋ, mu 'le 'dɩɔ gblaka ꞊nʋ 'mʋ, ʋʋ Ninifʋ daa.
꞊Nɩ nyre 'le, 'wɔɔn 'le gbo, ‑bo le 'dɩɔ a ‑gbɛ a nahuin, ‑ɛ mɔ, 'na ‑bati diu 'nɩ klɩ, ‑ɛ nue, 'n 'ye nɩ, ‑ɛ mɔ, 'waa nunuklɔ nyre lɛ 'yi 'dɔ.
3 Kɛɛ ‑ye Jona bla nɩ, 'ke bɔ mu 'le Ninifʋdɩɔ a ‑gbɛ 'mʋ, 'ɔ nye ‑hʋa, 'ke bɔ 'gba Kʋkɔnyɔ Nyɩsʋa ye 'mʋ ci lɛ, ɔ 'mʋ Tasisɩdɩɔ 'mʋ mu.
Nɛ‑ nue, 'ɔ 'ba ye 'mʋ, 'ɔ mu 'le dɩɔ ꞊nʋ 'mʋ, ʋʋ Safa daa.
'Ke ɔ yɛ 'le 'mɩɩ gbo, ‑ɛɛ Tasisɩdɩɔ a ‑gbɛ 'mʋ mu, 'ɔ 'pɛɛ 'pasie, 'ɔ 'ya 'le 'mɩɩ a ‑gbɛ wlɔn.
Kɛ'ɛ nɩ, ɔ nu, 'ɔɔ Kʋkɔnyɔ ye 'mʋ ci lɛ 'gba.
4 ‑Tɛ ʋʋ 'klɛɛ mu, ‑ye Kʋkɔnyɔ nue nɩ, pepe gblaka 'ɛ ‑hi, 'ke 'o 'yru ke, 'ɛ nue, ‑hlonpʋ 'ʋ cɛ 'le, 'ʋʋ ‑hʋa bʋ wa 'mɩɩ ‑nɩ ‑wɛn.
5 'Mɩɩ a ‑kʋannunyʋ ‑mɛ ‑ye, hʋannʋ biu 'le 'mʋ 'kwli.
Nɛ‑ nue 'ʋ ‑tʋa 'waa 'kuo a dɩda gbo, ‑ɛ die nu, ɔ 'mʋ ꞊nʋ 'mʋ ‑hɛ, ‑tɔplɩ ꞊nʋ, ‑ɩ nɩ 'le 'mɩɩ 'kwli 'mʋ, 'ʋ 'bʋɩ 'mʋ, 'ʋ pui 'yru 'mʋ lɛ, ‑ɛ die nu, 'mɩɩ 'mʋ 'huhue.
Kɛɛ ‑ye, ‑tɔplɩ 'bii ꞊nʋ, ‑ɩɩ 'lu ‑wɔn mue, Jona ‑mɛ ‑ye, ɔ pɛ gbo, 'ke 'le 'mɩɩ a bʋgbopɩa 'kwli 'mʋ, 'ɔɔ ŋmo.
6 ‑Tɛ ɔ nɩ 'klɛɛ 'le ŋmla a ŋmuŋme 'kwli 'mʋ, ‑ye 'mɩɩnaanyɔ 'yɩyɔ 'o 'mʋ gbo 'hʋɩn, 'ɔ 'prɛɛ 'le ꞊nɔ ‑wɔn, ɔ nɔ:
꞊Be kɛ ti a 'yaklalɛ 'mʋ nɩ, ꞊nɩ pɛ gbo, ꞊nɩɩ ŋmo?
'Ba ye 'mʋ, ꞊mʋ ‑na ke 'mʋ a 'kuo da.
‑Bakla꞊de, 'ɔ po ‑a nɩ ‑tɩ ꞊wlʋ ‑wɔn, ꞊a 'de gbo ‑wɛ.
7 Bɔ po 'klɛɛ lɛ, ‑ye kɛ 'mɩɩ a ‑kʋannunyʋʋ yrɛ pupo, ʋ nɔ:
Ba di 'le, ‑ba po 'bla, ‑ɛ die nu, ‑a 'mʋ nahuon ꞊nʋ yi, ‑ɔ nue, 'kla‑wliye'yɩya ‑gbo, 'ɛ yɛ ‑a mʋ.
‑Tɛ ʋ po 'bla, ‑ye 'bla ‑ha 'le Jona.
8 ‑Ye ʋ nɔ:
Dɛ‑ nue, 'kla‑wliye'yɩya ‑gbo, 'ɛ yɛ ‑a mʋ 'le?
‑Kʋan tio‑ ‑nɩɩ nu 'le?
‑Be' ‑n ‑hɔn 'mʋ 'le?
‑Be' ‑n kɔɔ ye 'le?
9 ‑Ye Jona nɔ:
'Mɔ mɔ Hebrekʋɛyuu nɩ.
Kʋkɔnyɔ Nyɩsʋa, ‑ɔ nɩ 'le yakɔ 'mʋ, nɔ‑ 'nɩɩ da.
Nɔ‑ nu 'yru kɔ ‑tʋtʋ 'hɛɛn,
10 'ɔ le ꞊nʋ, ‑ɛ mɔ, Kʋkɔnyɔ, ɔɔ ye 'mʋ ci lɛ 'gba.
‑Tɛ ʋ 'wɔn ‑tɩ a ‑gbɛ, ‑ye hʋannʋ biu 'le 'kwli 'mʋ.
Kɛ ʋʋ ꞊nɔ ye po, ʋ nɔ:
Dɛ ꞊nʋ, ‑n nu, ɛ nyre lɛ 'yi 'dɔ.
11 ‑Tɛ ‑hlonpʋ a 'klɩkenɩnɩɛ 'kɩɛ bie klɛ, ‑ye ʋ nɔ:
Dɛ tio‑ ‑a di ‑mʋ 'mʋ nu, ‑ɛ die nu, ‑hlonpʋ ‑gbo, ʋ 'mʋ gbo nyra 'le?
12 ‑Ye ɔ nɔ:
Ba 'ba 'mʋ 'mʋ, ba po 'mʋ 'yru 'mʋ.
'Bɩa 'ba nue, 'yru di lele ke gbo 'nɩ ‑wan.
'N yie nɩ, ‑ɛ mɔ, 'na ‑tɩɩ nɩ, ‑hlonpʋdʋ ‑gbo, 'ʋ cɛ 'le.
13 'Mɩɩ a ‑kʋannunyʋ ‑mɛ ‑ye, ʋ 'de wɔn, ʋ 'dio 'yru 'mʋ po.
Dɛ ʋ nu, nɛ‑ mɔ bʋ 'kɩka, bʋ bri, ‑ɛ die nu, 'mɩɩ 'mʋ gbogbo yɛ.
Kɛɛ ‑ye, 'yru a 'dʋɩɩ klɛ 'nɩ bi 'dɔ, ɛ nue, 'ʋ 'die 'le ‑wɛ, 'ke bʋ yɛ gbogbo.
14 Nɛ‑ nue, 'ʋ da Kʋkɔnyɔ, ʋ nɔ:
Kʋkɔnyɔ o, ‑a kɔ ‑ba ‑ha nahuon ‑gbo a ‑hʋnhlʋn, kɛɛ ‑ye ‑aa ‑mʋ lɛ 'nɩ 'batɩ, nahuon ‑gbo, ‑ɔ 'de ‑a mʋ dɛ ꞊de 'mʋ nu, 'a 'kʋkʋɛ a ‑bati nɩ klɩ 'le ‑a mʋ, ꞊nɩ nue 'le, ‑a nɩ ‑wɛ 'le gbo 'a ‑tɩ.
'Ɛ mɔ ‑tɛɛ, Kʋkɔnyɔ o, dɛ ‑gbo, ‑nɩɩ ‑hʋa, nɛ‑ ‑nɩɩ nu.
15 ‑Tɛ ʋ ‑wɔ 'klɛɛ Kʋkɔnyɔ a dɩda ‑wɔn, ‑ye ʋ 'ba Jona 'mʋ nɩ, 'ʋ puo 'yru 'mʋ, ‑ʋ kɔ 'dʋɩ 'kɩɛ nɩɛ 'klɩ ke.
Ʋ nyo 'yru 'mʋ a pue ‑tɛɛ, ‑ye ‑hlonpʋ nyra gbo, 'yru 'ʋ ‑wan ke gbo.
16 Dɛ ꞊nʋ, ‑ɛ mue 'lu ‑wɔn a ‑tɩ, Kʋkɔnyɔ a hʋannʋ 'ʋ biu 'le 'kwli 'mʋ 'dɔ, 'ʋ pie ꞊nɔ ‑cɔhlʋn, 'plɩɩ 'ʋ po 'le ‑tɔplɩ, ʋ di nu, 'ke 'o Kʋkɔnyɔ ‑wɔn.