‑WLABRECRƖƖNƖƐ
Nahuon ꞊nʋ, ‑ɔ kɔ plɔ a bleelɛ
1
'Bɩa nahuon 'bɔ 'mʋ plɔ a bleelɛ kɔ,ɔ nɩ kʋɛ 'le 'crɛnyʋ a 'lu a lɛ‑hielɛ ‑wɔn,
kɔ, ɔ nɩ na 'le dɛ'kukununyʋ a 'hru,
kɔ, ɔ nɩ nɩ 'le 'le nahuin ꞊nʋ ‑hɛyri gbo, ‑ʋʋ Nyɩsʋa 'caa.
2 'Bɩa nahuon 'bɔ 'mʋ plɔ a bleelɛ kɔ,
bɔ nʋɛ Nyɩsʋa a tɔɔlɛ 'mʋ,
kɔ, bɔ ‑hie 'a ‑tɩ 'lu ‑wɔn lɛ, 'tɔ 'mʋ kɔ ‑nyrɛ 'mʋ.
3 'Bɔɔ lɛ nu, ‑ye ɔ 'we ꞊nɔ tugbɛ ꞊nʋ ye, ʋ 'dɔɔ 'o 'nie nʋa 'mʋ.
Tugbɛ a ‑gbɛ, 'kuitʋti 'bɩ nyre 'o, 'ɛɛ 'kui tʋ,
'a hai 'ɩ 'nɩnɩ 'yrɔ.
Nahuon a ‑gbɛ, 'ɛ nɩ dɛ ꞊de, ɔɔ nu, ɛɛ 'le 'nɩ bi.
4 Kɛɛ ‑ye, nahuin 'bʋ hren Nyɩsʋa ‑wɔn,
'waa nɩ dɛ 'de lɛ 'mʋ nɩ.
Ʋ ‑mɛ ‑ye, ʋ 'we ꞊nɔ ꞊gbla a ‑pupui ye, pepe 'ɛ nyu lɛ ‑gbla.
5 Nɛ‑ nue, nahuindʋ a ‑gbɛ, Nyɩsʋa a ‑bati 'ɩ diu klɩ,
'plɩɩ 'ʋ 'dɩɛ‑ bʋ kɔ gbonɩɩlɛ,
'ke 'le nahuin ꞊nʋ ‑hɛyri, ‑ʋ 'sii 'o ye, 'ke 'o Nyɩsʋa ye.
6 'Ɛ mɔ ‑tɛɛ, nahuin 'bʋʋ ye'siihru na,
Nyɩsʋa nyu ꞊tu 'yie.
Kɛɛ ‑ye, dɛ'kukununyʋ ‑mɛ ‑ye,
'ke 'waa nɩ 'hruu 'le nahuin 'waanlɛ 'mʋ gba.