3
¡Licapäcuy-ari,
Tayta Dios maynu-maynu cuyalmi yaꞌanchic nunacunallacta “Chulïmi capäcunqui” nimanchic!
¡Rasunpa chulinmi canchic!
Ñatac cay pachäćhu nunacunaca quiquin Taytanchictapis mana lisiyalcalmá paypa chulin caśhanchicta mana lisimanchicchu.
2 Cuyaśhäcuna,
Diosninchicpa chulinñam cayanchic.
Masqui śhamü timpućhu imanuy cananchicta mana yaćhayalpis,
Jesusninchic cutimuptin imanuy rasunpa caśhantapis lical paynüman muyunanchictam ichá yaćhayanchicña.
3 Mayanpis cayman chalapacul alcäcá maynümi Jesusninchic chuya cayan,
chaynümi chuya caycunan.
4 Ñatac mayanpis juchacücá Diospa camachicuynintam jalutacuyan.
Aw-ari,
juchacá Diospa camachicuyninta jalutacuymi.
5 Yaćhapäcunquiñatacmi juchanchicta apananpä Jesusninchic cay pachäman śhamuśhanta.
Payꞌa imapis mana juchayümari.
6 Chayurá payćhu tacyaycücá manañam juchacuyanñachu.
Mayanpis juchacuyllacta jinalla jicutäcá,
uyaypam Jesusninchicta mana tantianchu nïtac lisinpischu.
7 Chulilläcuna,
umayquita ama muyuchicuyalcaychu caypi:
allin luläcätá Jesusninchicta licaśhannuymi Diosninchic allinpa licaycun.
8 Mana allincällacta luläcunämi ichá allaycuycäpi mana allincällacta lulayta jicutä supaycäpa cayalcan.
Paypa lulaynincunacta pampaman muyuchinanpämari Diospa Chulin cay pachäman śhamula.
9 Chaymi Diospa milayninña cäcunacá juchacuyta mana jicutayanñachu;
Tayta Diospa quiquin cawsaynin paycunaćhu cayaptinñamari juchacuyta nï jicutanmanñachu.
10 Ñatac uyaypa tantiapaśhmi mayan Diospa ütac supaypa chulincuna caśhanpis:
allincätapis mana luläcunacá,
ütac nuna-masintapis mana cuyäcunacá manamari Diospa chulinchu.
Quiquiqui-pula cuyanaculcay
11 Allaycapäcuśhayquipïpis uyalipäculanquim:
“Quiquinchic-pula cuyanacuśhun” nil yaćhachicuyta.
12 Ama-ari supaypa nunan Cain śhullcanta wañuchïcänuꞌa cayäśhunchu.
¿Imapïtan wañuchila?
Quiquinpa lulaynincuna mana allin captin śhullcanpañatac allin captinmá.
13 Chayurá cuyaśhá chalapacü-masïcuna,
cay pachäćhu nunacunaca ćhïnipäcuśhuptiquiꞌa ama-ari jucnawyacüśha capäcuychu.
14 Quiquinchic-pula cuyanacuśhanchicpañatacmi ichá yaćhanchic wañuycäpi cawsaycäman yalüśhaña caśhanchicta.
Mana cuyäcämi ichá jina wañuycällaćhülä cayan.
15 Ñatac nuna-masinta ćhïnicücá wañuchicümi cayan.
Yaćhaśhayquinüpis wañuchïcunacá manamá wiñay cawsaycäćhu canmanchu.
16 Jesusñatacmi ichá sumä cuyacuyninta camalaycachimanchic yaꞌanchic-laycu wañuyninwan.
Chaynümi yaꞌanchicpis nuna-masinchic-laycu bïdanchictapis uycunanchic.
17 Ñatac cäniyüca chalapacü-masin pishipacüśhacta licayalpis mana llaquipaycücäpá ¿imanuypatan Diospa cuyacuynin śhunꞌunćhu canman?
18 Cuyaśhá chulïcuna,
ama-ari janä śhunꞌullanchicwanꞌa shimillanchicwanꞌa cuyayäśhunchu,
sinuꞌa rasunpa lulayninchicwan-ari.
19-20 Caynüpam yaćhacuśhun rasuncäćhu caśhanchicta.
Sïchuśh śhunꞌunchic yanꞌal tumpamaptinchicpis Tayta Diosꞌa śhunꞌunchicpïtapis lluy mas tuquictalämari yaćhayan.
Jinaptinmi puntanćhu jawca caycuchwan.
21 Cuyaśhá chalapacü-masïcuna,
śhunꞌunchic manaña yanꞌal tumpamaptinchicꞌa,
Diosninchicmanpis jawcallam chalapacunchic.
22 Jinamanꞌa camachimäśhanchictapis munaśhantapis lulaycuyalꞌa mañacuśhanchicta uycamänanchicta yaćhanchicmi.
23 Caytamari camachimanchic:
chulin Jesusman chalapacunanchicpä,
quiquinchic-pula yaćhachimäśhanchicnuy cuyanacunanchicpä.
24 Paypa shiminta cäsucücunämi paywan cayanchic.
Paypis yaꞌanchicwantacmi cayan.
Caynu cusca caśhanchicta umäśhanchic Chuya Ispiritupam yaćhanchic.