2
Chulilläcuna,
caycunacta isquirbiycamú manaña juchayalcänayquipämi.
Sïchuśh lulälälilꞌa,
Tayta Diosninchicpa puntanćhu yaꞌanchicpi limalcapämäninchic mana juchayu Jesusninchic cayäpamanchicmá.
2 Pay allinpa licaycachimanchic juchanchicpi Tayta Diospa piñacuyninta quiquin apaycuśhanwanmi.
Manamá yaꞌallanchicpïchu apaycula sinuꞌa jinantin pachäćhu nunacunapïwanmi.
3 Pay nimäśhanchicta cäsucuśhanchicpamari yaćhanchic Tayta Diosta lisishanchicta.
4 Ñatac “Yaꞌa lisicullämi” niyalpis shiminta mana cäsucücá casquish nunam.
Chayurá rasunca payćhu manamá canchu.
5 Diospa shiminta cäsucücätañatacmi ichá śhunꞌunchicman sumä-sumä cuyacuyninta ćhulaycamanchic.
Chaypam tantiachimanchic paywan rasunpa caśhanchicta.
6 Chayurá mayanpis “Yaꞌa Dioswanmi cawsayá” nïcá Jesusninchic cawsaśhannuymi sumäpa cawsaycunan.
7 Cuyaśhäcuna,
cay isquirbimuśhäca manamá muśhü camachicuychu,
sinuꞌa cuyanacuypi unay uyalipäcuśhayqui camachimäśhallanchicmari.
8 Masqui chaynu captinpis muśhü-yupaymari cayan.
Cay rasun caśhanta Jesusninchicpa cawsayninćhüpis amcunap cawsayniquićhüpis licaycunchicmi.
Chaymari tutapäca cawsayniquićhu masta-masta mirmaycuptin Tayta Diospa rasun acchinñatac mastaña acchiyämun.
9 Chaymi mayanpis “Acchïćhüñam cayá” nil chalapacü-masinta ćhïnipayalꞌa tutapäcällaćhülämi cawsayan.
10 Chalapacü-masinta cuyäcämi ichá acchïćhüña cawsayan.
Imallamanpis mitcacacunan manamari canchu.
11 Ñatac chalapacü-masinta ćhïnipäcá tutapäcäćhu apla-yupaypis taplaypa-cama puliyalmi maypa lishantapis mana tantiacunchu.
Cay pachällapi ama wañupacuyalcaychu
12 Cananñatacmari isquirbiycälimuc,
am chulilläcuna,
Jesus-laycu juchayquicunacta Dios pampachaycälishuśhayquicunäman,
13 am taytacuna,
imapis manalä captin cawsäcäta lisïcunämanpis,
am müsucuna,
supaycäta llallïcunämanpis,
am chulilläcuna,
Taytanchicta lisïcunämanpis,
14 am taytacuna,
imapis manalä captin cawsäcäta lisïcunämanpis,
am müsucuna Diospa shiminta cäsucü masïsu-cama capäcul supaycäta llallïcunämanpis.
15 Ama-ari cay pachäpïpis nï ima cänincunapïpis wañuy-wañuy muspapacuyalcaychu.
Mayanpis chaynu jinäcá Tayta Diospi manamá wañupacuyanchu.
16 Cay pachäćhu lluy cäcunaca - aychap munayllancuná,
ñawinchicpa mana allin munapaynincuná,
cänincunawan nunatucuycuná - manamá Tayta Diospïchu,
sinuꞌa cay quiquin pachällapïmi.
17 Aw-ari,
cay pachaca llapa imapis munaynincunawan camacällam.
Tayta Diospa munayninta luläcämi ichá wiña-wiñaypä cawsanꞌa.
Jesuspa cuntrancunapi cuydaculcay
18 Chulilläcuna,
camacänan timpućhüñam cayanchic.
Uyalipäculanquim Jesusninchicpa cuntracünin śhamunanta.
Chay cananmi ichá alli-alliña puliyalcan.
Caypamari chay timpućhüña caśhanchicta tantianchic.
19 Chaycuna yaꞌanchicpi yalü calpis,
manamá yaꞌanchicpïchu.
Rasunpa yaꞌanchicpi cayalꞌa masïsućh yaꞌanchicwan śhaycuycunman cala.
Caynu yalupäcuśhanwanmari yaꞌanchicpi mana caśhanta camalachin.
20 Ñatac lluy amcunactá caycunapi yaćhapäcunayquipä mana juchayu Jesusninchicmi Chuya Ispiritunta upäcuśhulanqui.
21 Chayurá caycunacta isquirbiycälimuc manam rasuncäta mana lisipäcuśhayquipachu,
sinuꞌa yaćhapäcuśhayquipamá.
Jinamanꞌa yaćhapäcunquiñam rasuncäpi uchuyllapis arti mana yaluycuśhantapis.
22 Chayurá ¿pitá artishca?
Chay “Jesusꞌa manam Tayta Diospa Caćhamuśhan Salbacücächu” nïcämari.
Paymi Jesusninchicpa cuntracüninca,
Tayta Diostawan chulinta ipanchäcäpis.
23 Chaymi mayanpis chulin Jesusta ipanchäcäwanꞌa,
Tayta Diospis mana paywanchu.
Ñatac quiquin Diospi śhamü chulin Jesus caśhanta awnïcunacá Tayta Dioswanmi cayan.
24 Chayurá allaycuycäpi allin willacuy uyalipäcuśhayquita amcunaćhu tacyaycälichiy.
Chaynu jinapäculꞌa Tayta Diosćhüpis chulin Jesusćhüpis tacyaycunquim.
25 Chayćha wiñay cawsay limalicamäśhanchicta ćhasquiycuśhun.
26 Caycunacta isquirbiycälimuc chay ingañacücunäpïtam.
27 Ñatac Chuya Ispiritu upäcuśhuśhayqui amcunaćhu tacyaycuptinꞌa manamá juccuna tantiaycaćhachipäcuśhunayqui canñachu.
Quiquin Chuya Ispirituñamá lluyta yaćhaycälichishunqui.
Chay yaćhachicuynin rasuncällam;
manamá articuna canchu.
Chayurá Chuya Ispiritu yaćhachipäcuśhuśhayquimannuy Jesusninchicćhu tacyaycäliy.
Tayta Diospa chulincuna allincätam lulaycälin