Juan Punta Cartacuśhan
Isquirbiycälimuc yaꞌacunawan juc śhunꞌullaña cananchicpämi
1
Manalä imapis cayaptin cawsäcäpïmi isquirbiycälimuc.
Yaꞌacunam ichá uyalipäculá,
licapäculá,
sumäta lisiycälilá,
maquïcunawanpis yataycälilämi.
Pay Tayta Diospa Shimin quiquin cawsaycämi.
2 Cay cawsayca licalimuptinmi licapäculá.
Chaymi pay wiñay cawsayca caśhanta amcunaman willaycälimuc.
Paymi Taytanwan cusca cayal,
yaꞌacunaman licalimula.
3-4 Chayurá chay licapäcuśhätam uyalipäcuśhätam willaycälic,
amcunapis yaꞌacunawan juc śhunꞌullaña cananchicpä.
Caynu juc śhunꞌullaña Tayta Dioswan chulin Jesusninchicwanpis caycälishäpam isquirbiycälimuc amcunawanpis chaynu caycunapä.
Chayćha lluy cushicuyninchic sumä-sumä cabal caycunꞌa.
Cawsayninchicpis limayninchicwan tincünmanmi
5 Cay Jesusninchic yaćhachipämäśhantam amcunamanña willaycälimuc:
Diosninchicꞌa sumä-sumänin acchimá;
payćhuꞌa yanawyayä tutapä uchucllapis manamari canchu.
6 Chayurá “Payćhümi cayá” niyalpis tutapäcäćhu cawsayalꞌa casquicuyanchicmá;
rasuncämannüchu manamá cawsanchic.
7 Paynüpis acchïćhu cawsalmi ichá lluywanpis juclla caycunchic.
Jinaman Tayta Diospa Chulin Jesusninchicpa yawarninpis llapa juchanchicta pampachaycul chuyanchaycamanchicmi.
8 Ñatac “Manam imaypis juchacüchu” niyalꞌa,
quiquillanchicmi ingañacuyanchic.
Chayurá rasunca manalämi yaꞌanchicćhu canchu.
9 Juchanchicta willapacuśhañatacmi ichá Diosninchic chalapacuna allincällacta lulaycü cal imaypis pampachaycamanchic,
imaymana mana allin lulayninchictapis chuyanchaycamanchic.
10 Ñatac “Manam imaypis juchacüchu” nilꞌa Diosninchicta licayächinchic artishpämi.
Chayurá willacuyninta śhunꞌunchicćhu manamá uywanchicchu.