Willacücunäta limayninpa chalapapäcuy
4
Cuyaśhäcuna,
pictapis “Diospa caćhaśham śhamú” niycuśhallanpá ama-ari awniyäśhunchu.
Aśhwanpa Dios partipi caćhaśha ütac mana caśhantapis tuquictam yaćhapaycunanchic.
Cay pachäćhu Diospi willacütucul pasaypi casquishcuna cayalcanmá.
2 Chaycuna Dios partipi rasunpa caśhanta limacuyninpam chalapanqui:
mayanpis “Salbacüca Jesus yaꞌanchicnu nunaman muyuśham śhamula” nïcunämi Dios partipi.
3 Chaynu Jesuspi mana limäcá manam Dios partipïchu.
Aśhwanpa Jesuspa cuntran śhalcücäpa unaypi uyalipäcuśhayquip partinmi.
Cananmi ichá cay pachäćhüña chay cacuyan.
4 Cuyaśhá chulilläcuna,
amcunañatacmi ichá rasunpa Dios partipi capäcunqui.
Paypa munaynin cay pachäta maquinćhu uywäcäpi mas jatun captinmari chay casquishcunäta llallïlälinqui.
5 Paycuna cay pachäpi capäculmi caycunallapïtac limapäcunpis.
Chaymi cay pachäpä cä nunacunäpis uyalipäcun.
6 Yaꞌanchicmi ichá Diospa canchic.
Chaymi paypa cäcunaca uyalimanchic.
Diospa mana cäcunañatacmi ichá mana.
Caycunawanmari chalapanchic rasun partipi ütac casquish partipi caśhantapis.
Diosninchic sumä-sumä cuyacümi
7 Cuyaśhäcuna,
Tayta Diosninchic cuyacüca cayaptinꞌa,
quiquinchic-pula cuyanacunanchicmi.
Mayanpis cuyacücá Diospa chulinñam,
jinamanꞌa paytam lisinpis.
8 Diosninchic cuyacüca cayaptinꞌa mana cuyäcämi ichá payta mana lisinchu.
9 Cuyacuyninta camalaycachimanchic caypam:
japallan cuyay chulinta cay pachäman caćhamula,
paywan wiñay cawsayta umänanchicpämi.
10 Cay cuyacuyca caynümá:
Manam yaꞌanchicchu Diosta cuyalanchic,
sinuꞌa paymi lluyta cuyal caćhamula chulin Jesusta juchanchicpi wañuycul quiquinwan allinpa licaycachimänanchicpä.
11 Cuyaśhäcuna,
caynu Diosninchic cuyayämaptinchicꞌa,
chaynümi yaꞌanchicpis cuyanacunanchic.
12 Aw,
rasunpa manamá mayanpis licanchu Diostá.
Chaynu captinpis cuyanacuptinchicꞌa yaꞌanchicćhu uyaypa caycuśhancämari cuyacuyninta mastalä wiñaycachin.
13 Chaynütacmi Chuya Ispiritunta umäśhanchicpa yaćhanchic payćhu cawsaśhanchicta,
paypis yaꞌanchicwan cawsaśhanta.
14 Yaꞌacunamá licapäculá Tayta Dios chulin Jesusta jinantin pachäpa Salbacünin cananpä caćhamuśhanta.
Chaymi lluymanpis willacuyalcá.
15 Ñatac mayanpis Jesus Diospa Chulin caśhanta awnïcá Diosninchicwanmi cayan,
Diospis paywantacmi cayan.
16 Chayurá Dios rasunpa cuyamäśhanchicta sumätam tantialpunchicpis chalapacunchicpis.
Diosninchicꞌa sumä-sumä cuyacuyniyümi.
Chaymi cuyacuyćhu cawsäcá paywan cayanchic,
Diospis yaꞌanchicwantac cayan.
17 Caynu cayäśham cuyanacuyninchic masta wiñaycuptin cay pachäćhu Jesusnuy cawsayanchic.
Chaymi cäraycunan muyuncäćhu mana manchalinanchic canꞌachu.
18 Rasunpa sumä cuyamäninchicta manam imapi manchacunanchicchu.
Chay cuyacuyninmi ima manchacuytapis lluy chincachin.
Sïchuśh manchaculꞌa mućhuycachimänanchicta pinsalmi manchacunchic.
Chayurá rasun cuyamäśhanchicta manalämá tantianchiclächu.
19 Tayta Dios puntacta cuyamaptinchicmari yaꞌanchicpis cuyaycunchic.
20 Ñatac “Tayta Diosta cuyämi” niyalpis chalapacü-masinta ćhïnicücá pasaypi artishmi.
¿Licaśhan chalapacü-masinta mana cuyayalchun,
mana licaśhan Tayta Diostalä cuyälunman ampá?
21 Chaymi pay camachimälanchic:
“Diosta cuyäcá,
chalapacü-masintapis cuyanantacmi” nil.