2
Am chulí Timoteo,
Jesusninchicpa llaquipayninćhu callpanchacuy.
2 Achca nunacunap ñawpäninćhu yaꞌapi uyalishayquitari chalapacunawan yaćhachinanpä allin nunacunäman yaćhaycachiy.
3 Amꞌa Jesusninchicpa sumä cachacunü-ari ñacaycunäćhu ñacaycuy.
4 Cachacuman yaycülulꞌa manam juc licchä lulaycunamanꞌa miticunchu.
Aśhwanpa mandäninpa munayllantam lulayta jicutaycun.
5 Chaynütacmi llallinacuypä cürrïcunäpis ninacuśhanmannuy mana lulalꞌa primiunta mana ćhasquinmanchu.
6 Jinamanꞌa ćhaclaćhu sumä luläcunäpis paylämi cusichanta puntacta ćhasquin.
7 Cay nishäcunäta śhunꞌuyquiman ćhulaptiquiꞌa Jesusninchicmi lluyta tantiaycachishunqui.
8 Jesusninchic śhalcamuśhantapis,
chaynütac puydï mandacü Davidpa milayninpi caśhantapis yalpay-ari.
Caycunapïmá willacuyá.
9 Cay-laycum ñacaycunactapis pasayá,
nuna wañuchicü-yupay cadinäśhalä canpis.
Ñatac Diospa limayninꞌa manamá cadinäśhachu cayan.
10 Chaymi ima aycacta ñacayalpis yaꞌa willacuyá Diospa aclaśhancuna-laycu paycunapis salbacü Jesusman chalapaculcal wiñay simpri cawsapäcunanpä.
11 Cay limay chalapacunam:
Jesusninchicćhu wañülulꞌa,
paywantacmi cawsaśhunpis.
12 Mana jucmanyällal ñacayculꞌa,
paywan cuscam gubirnunćhu caycuśhun.
Payta ipanchaptinchicꞌa,
paypis ipanchamäśhunmi.
13 Yaꞌanchic mana chalapacü nuna cayaptinchicpis,
payꞌa jina chalapacunallam.
Quiquinta manamá ipanchacunmanchu,
nil.
Allinpa licaycuśha sirbïca caynümi
14 Ñatac chalapacü-masinchiccunacta yalpachiy lluy caycunacta.
Tayta Diosta licäninchicpa ćhulaycul anyapaycuy chay limaycunäpi mana jäćhinacuyalcänanpä.
Chay jäćhinacuycunäwan manam imactapis julucunchichu,
aśhwanpam uyalïcunäta ishcayyachinchic.
15 Imanuypa aycanuypapis allin tincüllanman lulaycü caśhayquita Dios licaycuśhunayquipä callpanchacuy.
Chayćha ćhasquiycuśhunqui imapïtapis mana uyshuycaćhayä allin lulaycüta,
jinaman tincüllanman cällanman allin willacuyta yaćhaycachïta.
16 Ñatac am cay pachäćhu yanꞌal luclu limaycunapïta aśhucuy.
Chaycuna masta-masta mana allincällamanmá liyalcan.
17 Chay yaćhachicuycuna ismupacuy ishyay-yupaymi milayan.
Chaynümi Himeneowan Filetopis cayalcan.
18 Paycunam allincäpi japächaculcul:
“Wañücuna śhalcämunñam” nil nipäcun.
Chayꞌa manamá rasunpachu.
Chaynu äśhaycaćhapäcuśhanwanmi waquinnincunap chalapacuyninta mana caśhanman muyuyächin.
19 Ñatac Tayta Diosmi ichá mana cuyulï simintuctanuy cay pachäman limayninta ćhulala.
Limayninćhümi caynüta niyan:
“Diosꞌa lisinmi mayancuna paypa caśhantapis”a chaynütac:
“Jesusman chalapacücunacá ima mana allin lulaycunäpïpis aśhuculcay” niyan.
20 Má,
jatun wasićhu manamá illayllapïchu nïtac ürullapïchu ima sirbichicunapis cayan.
Sinuꞌa cullupïpis,
allpapïpis cayantacmi.
Waquinnincunam fistallapä.
Waquinnincunañatacmi pinꞌay sirbichicunanpä.
21 Chaynümi yaꞌanchicwanpis pasan:
Llapa chay pinꞌaycunapi japächacücá Jesusninchicpa ima allin lulaypäpis sirbichicunanmi caycunꞌa.
22 Chaynütac müsucunap aychanpa munaśhanta lulaycunapi ayil,
aśhwanpa allincällacta jicutaycuy.
Jinamanꞌa chalapacuycäta,
cuyacuycäta,
jawca allin cawsaycuycäta tucuy śhunꞌuwan Jesusman chalapacücunäwan cuscari jicutaycuy.
23 Ñatac imaćhüpis mana yanapä luclu tapunacuycunamanꞌa ama miticuychu.
Chaynu tapunacücunacá imaypis pilyallaćhümi camacan.
24 Jesusninchicta sirbïnin nunañatacmi ichá pilyallaćhu mana puliyanmanchu.
Aśhwanpam lluywanpis allin caycunman,
yaćhachinanpäpis shimillanćhu caycunman,
ima cacuptinpis pasinsiayniyu caycunman.
25 Llampu śhunꞌuwantacmi allinpa anyaycunan ćhïnicünincunactapis “Diosninchic rasuncäta tantiachiptinꞌa juchanpi wanaculcanmanćha” nil.
26 Chaynüpaćh paycunapis Satanaśhpa munayninćhu ćhänalayalcal munayninta lulapäcuśhanpïta ayipämunꞌa.