Timoteoman Pablo Ishcay Cartacuśhan
1
Jesusninchicpa jucnin puydï caćhan yaꞌa Pablom,
quiquin Tayta Dios chulinpa wiñay cawsayta limalicamäśhanchicpa munaśhanmannuy cäcämi limaycamuc.
2 Chulï-yupay cuyaśhá Timoteo,
cay cartactam isquirbiyämuc.
Tayta Diosninchicwan Duyñunchic Jesuspa llaquipayninpïta jawca cawsay amćhu caycuchun.
Allincäćhu masïsu tacyaycunanpämi callpachaycun
3 Chuya śhunꞌüwanmi awquillücunanüpis Tayta Diosta sirbicú.
Ñatac amta tutapapis muyunpapis yalpalculmi payllacta sulpá nil anradisicú.
4 Waꞌaśhayquita yalpalculmi,
anwan tincuycuyta munayá cushicunanchicpä.
5 Yaꞌa allictam śhunꞌüćhu yaćhá allin chalapacuyniyu caśhayquipi.
Chaynümari awilayqui Loidapïpis,
ñatac mamayqui Eunicepïpis capäcunqui.
Ampis chaynu chalapacuyniyümá cayanqui.
6 Yalpay-ari umayquiman maquïta ćhulaycul mañacuptí Dios Ispiritunta uśhuśhayquita.
Canan-ari paypa maquinćhu canayquipä masta-masta quiquiquita ćhulacuy.
7 Diosꞌa Ispiritunta manamá umälanchic ćhinaśh canapächu aśhwanpa pudirniyu,
cuyacuyniyu,
sujitacuyniyu canapämi.
8 Chayurá Jesusninchicpi willacuyta ama-ari pinꞌacuychu,
nïtac pay-laycu wićhaläśhäpïpis.
Aśhwanpa allin willacuycä-laycu ñacawshimay;
Tayta Diosꞌa callpanchaśhunquimá.
9 Paymi salbaycul payllapäña cawsananchicpä aclamälanchic.
Manamá imapis allin lulaśhanchicpachu sinuꞌa llaquipayninpa pay munaśhanmannüllam.
Cay pachaca manaläpis captinmi Jesusninchic llaquipämälanchicña.
10 Cay llaquipaynintamari salbacü Jesusninchic śhamuśhanwan canan licaycachimanchic.
Pay śhalcamuśhanwanmi wañuycäta llalliycul,
allin wiñay simpri cawsayta uycamäśhanchicta willaycamanchic.
11 Cay allin willacuyta willanapämi,
yaćhachinapämi Tayta Dios caćhamäla.
12 Chaymari caynu imaymana ñacaycunacta pasayá.
Ñatac mana pinꞌacüchu mayanman chalapacuśhäta tuquicta yaćhaculmi.
Yaćhayätacmá cay pacha camacanancama paypa maquinman imactapis ćhulaycuptí munaśhanmannuy licaycunanta.
13 Cay allin willacuy yaćhachishäcänuy ampis yaćhachiy,
Jesusninchicman chalapacuśhtin,
chalapacü-masinchicta cuyaśhtin.
14 Yaꞌanchicćhu cä Chuya Ispiritup munayninwan-ari quiquin Diosninchic lluy allin cäcunäta maquiquiman ćhulaycuśhuśhayquita sumäpa licaycuy.
15 Yaćhaśhayquinüpis Asia-lädućhu chalapacü-masinchiccunam unꞌäläliman;
¡caynütacmi Figelowan Hermogenespis!
16 Ñatac Jesusninchic Onesiforocta wasintinta llaquipaycuchun.
Paymi achca cuti callpanchaycamäla,
wićhaläśhäpïtapis mana pinꞌacullal.
17 Aśhwanpa Romaman ćhaycamul-pacham talimänancama wañuy-wañuy ashimäla.
18 Quiquin Taytanchic-ari Jesusninchic cutimuptin llaquipayninćhu caycachichun.
Am tuquictamá yaćhayanqui Efesoćhu cayaptinchic maynu yanapämäśhanchictapis.