Lluypä anyapaycuynin
5
Ñatac yaśhacunäta ama-ari millapayaychu.
Aśhwanpa limapaycuy taytacta-yupay,
müsucunätapis quiquinchicpa śhullcanchiccunactanuy,
2 chacwaśhcunätapis mamanchictanuy;
lasaccunätapis juc licchäta mana pinsallal quiquinchicpa paninchictanuy limapaycäliy.
3 Chaynütac japanyäśha walmicunäta yanapaycuy,
rasunpa mana pïllanpis yanapaycünin captinꞌa.
4 Sïchuśh chay japanyäśha walmicunap willcanpis,
ütac wawinpis captinꞌa paycunalämi aylluncunacta taytancunacta yanapaycuyta cuyaycuyta yaćhaycälinan.
Cay lulaycuycá allinmi jinaman Tayta Diospa śhunꞌunpämi.
5 Ñatac rasunpa japanyäśha pïllanpis mana cäniyu walmicá Tayta Diosllamanñam chalapacun.
Chaymi tutay-muyun payllactaña mañacunpis.
6 Aychanpa munayllanćhu pulicü japanyäśha walmiñatacmi ichá cawsayalpis wañüśhaña Diospá cayan.
7 Caycunacta yaćhaycachiy mana pipis imaniycunallanpis capäcunanpä:
8 quiquinpa aylluncunacta,
mastá wasinćhu cäcunäpi mana ucupacücá,
Jesusman chalapacuśhantapis ipanchälunñam.
Jinamanꞌa Diosta mana lisï nunacunapïpis mas piyurninlämi cayalcan.
9 Ñatac listapäcunquiman yanapapäcunayquipä süta ćhunca watayüpi janaman japanyäśha walmicunactam.
10 Capäcunman wayapallanwan cawsäcunatacmi.
Jinaman allin lulayninpa lisishacunämi.
Má,
wawincunacta allin-camacta ishpiycachïca,
pulicücunacta wasinćhu jamaycachïca,
chalapacü-masinchiccunacta mana nunatucullal sirbiycüca,
sasachacuyniyücunäta yanapaycüca,
jinaman imaymana allin lulaycunacta lulaycümi canman.
11 Ñatac lasacllaćhu japanyäśhacunätam ichá listaman ama ćhulanquichu.
Paycuná aychanpa munaynin talcämuptinmi Jesusman chalapacuśhanta ipanchaycul yapacuyta munapäcunman.
12 Cay lulayninwanmi Jesuspa sirbinanpä punta limalicuśhanta ipanchal jalutacunman cunca cuchuyninpä.
13 Jinamanꞌa wasin-wasin pulicul illacayman muyülälinman.
Manatacmi illacayllamanchu sinuꞌa waśha limaman,
śhalpu shimiman,
mana limanacunacta limayäcunamanmi.
14 Chaymi lasac japanyäśhacunaca yapaculcänan,
jinal wasinćhu wawincunacta atindichun,
ama-ari ćhïnimäninchiccunawan limachicuyächunchu.
15 Canancamá achca japanchäśhacunam Diospi caynu japächaculcul Satanaśhta atiyalcan.
16 Ñatac chalapacücunaca wasinćhu japanyäśha walmi captinꞌa yanapächun.
Cay manamari lluy chalapacücunäpa yanapänanlächu.
Jinalćha chalapacücunaca mana pïllanpis cä japanyäśhacunäta licaycälinꞌa.
17 Puydï caminaycücunaca lulayninta sumä allinta lulaycuptinꞌa allintam uycälinanpis;
mastá wañuy-wañuy yaćhachïcunätawan willacücunätam.
18 Isquirbishancunaćhümi nin:
“Ïra jalü uywacta amam jaquimanquichu” nil.
Chaynütacmi:
“Lulapacü nuna,
lulaśhanpi ćhasquinanmi” niyan.
19 Ñatac mayannin puydï caminaycücäta tumpaycuptin ishcay quimsa licänin mana captinꞌa ama awniychu.
20 Rasunpa mana allincällaćhu cayaptinmi ichá llapanpa puntanćhu anyäluy juccunäpis manchaculcänanpä.
21 Chaymi Diospa ñawquin,
Jesusninchicpa ñawquin,
aclaśhan anjilnincunap ñawquin canan niycuc,
cay nishäcunäta pimanpis mana śhalcullal lulaycunayquipä.
22 Mayantapis caminaycü cananpä ama-ari lijïru ćhulaycuychu.
Yanꞌalmi juchancunawan chapunacülunquiman,
aśhwanpa chaycunapi japächacuy.
23 Ñatac patayqui mana allin cayaptinꞌa ama-ari yacucta upyayñachu,
aśhwanpa ashllay bïnullacta upyalpuy.