Śhamü timpucunaćhümi mana allin yaćhachïcuna licalimunꞌa
4
Cananꞌa Chuya Ispiritum tuquictaña nimanchic:
“Camacay timpucunaćhümi chalapacuyta caćhaycul mana allin pantachï ispiritucunap yaćhachicuynincunacta aticulcanꞌa” nil.
2 Chaycunacta yaćhachïcunaca ishcay cäracunam,
casquishcunam,
mana llaquipayniyü-camañam;
śhunꞌun pasaypi lumiyäśhañam cayanpis.
3 Nunacunaca casaraculcänanta mićhaculcanmi.
Chaynütac Tayta Dios lulaśhancunäpi rasun allincäta lisïcunaca sulpayta uycul micapäcunanpäpis mićhaculcanmi.
4 Tayta Dios lluy camaśhancunaca allinmi;
manam imallapis anla canmanchu sulpayta uycul ćhasquiptinchicꞌa.
5 Diospa limayninmannuy mañacuptinchicꞌa ima micuypis chuyanchäśhañamari.
6 Caycunacta chalapacü-masinchiccunacta yaćhachilꞌa Jesuspa allin sirbïninmi caycunqui.
Caynüpam chalapacuśhanchicćhu yaćhachimäśhanchicta sumä cäsucul wiñaycuśhayquita camalaycachinqui.
7 Ñatac mana allin yanꞌal uman chaquïsha limaycunapïtá japächacuy;
aśhwanpa chuyalla canayquipä yaćhapacuy.
8 Cay aychanchicpä ejerciciocunacta yaćhapacuyꞌa rätullapämi aychanchic callpacta chalan.
Tayta Diospä yaćhapacuśhanchiccäñatacmi ichá mas allin;
manam cay pachällapächu sinuꞌa aśhta janay pachäcamapämi.
9 Cay limayꞌa chalapacunamá,
lluy ćhasquiycunamari.
10 Chay-laycumá ñacaśhtinpis lulayanchic wiñay cawsä Tayta Diosninchicman chalapacuśhtin.
Payꞌa lluy nunacunäta salbaycücämari,
mastá chalapacücunäpa salbaycüninmi.
11 Canan caycunacta camaycachilmi yaćhaycachinqui.
12 Ñatac müsu cayniquićhu mana-cäpa ama licachicuychu.
Aśhwanpa allinnin licachipälä chalapacücunäpä caycuy:
limayniquićhu,
purtacuyniquićhu,
cuyacuyniquićhu,
chalapacuyniquićhu,
allin chuya śhunꞌu caycuśhayquićhüpis.
13 Ñatac ćhämunäcama lluyćhüpis Diospa Shiminta lïgiyta jicutaycuy,
yaćhaycachiy,
caminaycuy.
14 Amatac Tayta Dios puydï caminaycücunäwan umayquiman maquinta ćhulaycul lulayniquita tacyalpachishuśhayquita unꞌaycuychu.