6
Chaynütacmi uyway nunacunäpis patrunnintá allin rispïtuwan licanan,
Tayta Diospis allin yaćhachicuyninpis mana jamuyäśha cananpä.
2 Ñatac patrunnincuna chalapacü-masinchic captinꞌa,
ama-ari mana manchacuywanꞌa licaycuychu aśhwanpa sumäpalä lulaycälipuy,
cuyaśhan chalapacü-masinchicta yanapaycuyalꞌa.
Lluy caycunacta yaćhachil-ari limapaycuy.
Capuśhallanwan jawca cawsananpämi limapan
3-5 Jesusninchicpa allin willacuynin yaćhachishanchiccäman ñatac allin cawsaymannüpis yaćhachicuynincuna mana tincuptinꞌa nunatucüśha mana yaćhayniyu pasaypi aśhnum.
Ishyayä-yupay ruydullapi limaycunallapi muspapacuyalcan.
Chaycunallapïmi talcun imbidicuycuna,
iwinacuycuna,
piñanacuycuna,
palanacuycuna,
jamuyacuycuna,
yanꞌal waśhanta limaycunapis.
Chay nunacunäpa umanćhu pasaypi mana allincällam winalayan.
Chaymi allincäćhuꞌa mana uchuyllapis caycälinchu.
Diosman chalapacütuculcan illay aptinan-laycullam.
[Caycunapïta japächaculcay-ari.]
6 Sumä ćhaniyücäñatacmi ichá rasunpa chalapacul chuya cawsaycuycäwan capuśhancällawan jawcalla caycuy.
7 Manamari cay pachäman imactapis apacuśhachu śhamulanchic,
nïtac imactapis apaśhuntacchu.
8 Ñatac micunanchicpä,
müdacunanchicpä capamaptinchicꞌa jawcallañari cawsaycuśhun.
9 Cäniyu cayta wañupacücunacá imaymana munayninwanmi ćhänachicülun.
Cay mana allin wañupacuycunam nunacunäta wiñay simpri mana allincäman jitaycun.
10 Illaycäćhu śhunꞌunchic caśhancämi imamanpis jitaycämachwan.
Chaymari waquincuna chaypi wañupaculcäśhanwan chalapacuśhanta ipanchalcul intuchicüśha quiquinpa mana allinninwan ñacayalcan.
Chalapacuyninćhu tacyaycunanpämi anyapan
11 Am Diospa nunan cayalꞌa caycunapïta ayicul,
aśhwanpa cawsayniquićhu allincunälla caycuchun:
Tayta Diosllaman wañupacuycunalla,
chalapacuycunalla,
cuyacuycunalla,
mana pishipällal lulaycunalla,
llampu śhunꞌuyu caycunalla.
12 Cachacu-yupay gïrraćhu gïrranacünüpis Jesusninchicpa yaćhachicuyninćhu masïsu caycul,
chay mana allin lulaycunacta llalliycuy;
jinal wiñay cawsaycäta ama caćhaycuychu.
Chaypá Tayta Dios ayaśhuptiquim llapanpa ñawquin awnilanqui.
13 Canan llapa imactapis cawsayta uycü Tayta Diospa ñawquinmi,
chaynütac sumä allin willacuypi Poncio Pilatocta niycü Jesusninchicpa ñawquinmi cayta niycuc:
14 Cay nishäcunäta mana iwillal mayanpis nï imaniycuna cäcällacta Jesusninchic cutimunancama lulaycuy.
15 Tayta Dios unanchaycuśhan timpućhümi licalimunꞌa,
lluy imactapis camaycü munayniyüca,
Mandacücunap sumä Mandäninca,
puydïcunapïpis sumänin puydïninca,
16 imaypis mana wañuyniyüca,
mayanpis mana aśhuycuna sumä acchïćhu yaćhäca.
Manamá pï nunapis licayculachu nïtac licaycuytapis atipapäcunmanchu.
¡Payllari wiñay simpripä altuman juluycuśha cachun!
Chaynu cachun.
17 Ñatac cay pachäćhu rïcu nunacunäta limapaycuy:
nunatucüśha nï cäninman chalapacüśha atinïdu mana cayalcänanpä,
chay manamá wiñaypächu caycapunꞌa.
Aśhwanpa cawsä Tayta Diosman-ari chalapacuchun;
paymi lluy imactapis llüllay-llüllayta cushicunanchicpä uycamanchic.
18 Rïcu capäcuchun allin lulaycunäćhu,
llaquipayniyü-cama yanapayninwan uycälinacuyćhüpis.
19 Chaynücunacta luläcá siguracuyanñam juc timpućhu Dioswan cawsaycäman ćhänanpä,
jinalćhari rasu-rasun wiña-wiñay cawsaycäman ćhäpäcunꞌa.
Limapaytam camacalpun
20 Cananꞌa,
Timoteo,
uycuśhuśhayqui lulanayquicunacta tuquicta licaycuy.
Ama uyalïtucuyaychu chay mana allin luclu-yupay limaycunacta,
Diospä cuntran cäcunäta;
sumä yaćhaynülä cacuyalpis manamá chaynüchu.
21 Chayta atïcunämi waquinnincuna chalapaculcäśhanpi pantalcälil liculcan.
Quiquin Diosninchicpa llaquipaynin amćhu caycuchun.
Chaynu cachun.