3
Chaynu manaña watucamuyta atipalcul masta llaquiculculmi,
Atenas malcaćhu quïdacuyta pinsälälí.
2-3 Salbacüninchicpa allin willacuyninta willacawshï-masí pudirní chalapacü-masinchic Timoteocta caćhapämulá “Paymi chalapacuynincunaćhu masïsu tacyaycäliyta yanapaycamunꞌa,
chaynütac callpanchaycamunꞌa chay imaymana sasachacuycunäćhu pasaśhancunäwan mana mayanllanpis iwichiculcänanpä” nil.
Amcuna yaćhapäcunquimá caynu ñacananchicpä caśhanta.
4 ¿Manachun amcunawan cayal juc-pun nipäculac:
“Chalapaculcäśhayquipïta aticaćhaśham capäcunqui” nil?
Canan ¿manachun nishänülla pasayan?
5 “Caynu pasayaptinꞌa ichaćh chay ñacaycunawanꞌa Palpachï Satanaśhpis umanta muyuyächinña Jesusta caćhaycunanpä.
Jinaptinćha cay imaymanap ñacal lulaśhanchicꞌa pampapäña canꞌa” nilculmi,
sumä pinsamintucüśha cayal apuraypa Timoteocta caćhamulá,
imanuy capäcuśhayquitapis willaycamänanpä.
Allin willacuywanmi Timoteo cutimun
6 Ñatac Timoteo cutïmul,
willaycaman sumä allin capäcuśhayquitapis “Jesusninchicmanꞌa masïsu chalapacüśham cayalcäñä.
Jinalmi llapanpis yanapänacuyalcäñä cushisha imallaćhüpis” nil.
Nimantacmi yaꞌacunapïta imaypis cuyacuywan yalpaćhaculcäśhayquita,
ñatac “¿Imayćha tincuycuśhun paycunawan?”
nil yaꞌacunanu llaquiculcäśhayquitapis.
7 Cay sasachacuynïcunäćhu uyalïlulmari sumä-sumäta cushicul śhunꞌulläpis jawcayälunlä canpis.
8 Amcuna Jesusninchicman masïsu chalapaculcäśhayquita yaćhalpüluptïmi śhunꞌüta acchiycälichimanqui.
9 ¡Rasunpa caycunapi maynu cushisham cayá!
¡Diosninchicta imanuypälä anradisicüman sumä cushicuyta uycapamäśhayquiman tincüta!
¡Manamá atipächu!
10 Ñatac Diosninchicman masta chalapaculcänayquipäpis yaćhachinac cayanlämi.
Chaymi Diosninchicta tutay-muyunpis mañaculcá amcunaman cutipämunäpä.
11 Chaymi quiquin Diosninchictawan Duyñuninchic Jesusta mañacú ima captinpis amcunaman yanapaycul ćhächimänanpä.
12 Chaynütac Duyñunchicta mañacú,
yaꞌacuna cuyapäcuśhacnuy,
amcunapis quiquiqui-pulapis ñatac juccunawanpis masta cuyanaculcänayquipämari.
13 Chaynütacmi,
ruygacuyalcá śhunꞌuyquita callpanchaycälishunayquipäpis.
Chayćha Duyñunchic Jesus anjilnincunawan cutimuptin amcunapis Tayta Diosninchicpa puntanćhu chuya caycälinqui.